Fréttir
Sleðaferð
Í fyrradag nýttu nemendur 4.bekkjar góða veðrið og hið mikla snjómagn í bænum til að fara í sleðaferð. Farið var inn á Torfnes og nutu krakkarnir þess að renna sér á sleðum, brettum, snjóþotum og þoturössum.
Hreyfing, hollusta og heilbrigðir lífshættir eru mikilvæg viðmið í skólastarfi og hafa kennarar verið duglegir í vetur að nýta þau fjölmörgu tækifæri sem bjóðast hér í nærumhverfinu til að uppfylla þau viðmið Aðalnámskrár.
Hárgreiðslufólk framtíðarinnar
Í hárgreiðsluvali í vetur fá nemendur unglingastigs ýmiskonar fræðslu um umhirðu hárs og eiginleika þess, undir leiðsögn Kristínar Oddsdóttur hárgreiðslumeistara og kennara. Nemendur æfa sig á hverjum öðrum og læra ýmsar aðferðir við að flétta s.s. fasta fléttur (innstæðar og útstæðar), fossafléttur og fiskifléttur. Einnig læra þeir að slétta og krulla hár með sléttujárni, æfa sig að krulla hár með misjöfnum krullu- og bylgjujárnum og læra ýmsar uppgreiðslur, snúða o.fl. Farið er í heimsókn í hárdeild MÍ þar sem nemendur æfa sig að upprúlla hár á gínum, ásamt því að bera lit í hár, setja álstrípur og þvo hár.
Eins og sjá má á meðfylgjandi myndum má búast við að hér séu á ferð hárgreiðslumeistarar framtíðarinnar.
Orðið fært fyrir strætó
Strætó fer úr firðinum og Hnífsdal kl.8.00.
Ófærð innanbæjar
Skólaakstur strætó er á bið vegna ófærðar innanbæjar. Við setjum inn frekar upplýsingar um leið og þær liggja fyrir. Sjálfvirkur símsvari strætó er 878-1012.
Engar strætóferðir
Öllum skólaakstri Strætisvagna Ísafjarðar er aflýst fram að hádegi í dag.
Lágmarksmönnun í GÍ á morgun
Seinni bólusetningar barna 5 – 11 ára
Seinni bólusetningar 5 - 11 ára barna fara fram á HVEST á morgun og fimmtudaginn samkvæmt meðfylgjandi skipulagi:
Miðvikudagur 2. febrúar: Seinni bólusetning barna 5 – 11 ára. Foreldrar fá boð í SMS. Bólusett á Ísafirði e.h
Fimmtudagur 3. febrúar: Seinni bólusetning barna 5 – 11 ára. Foreldrar fá boð í SMS. Bólusett á Ísafirði og Þingeyri e.h
Þeir foreldrar sem eiga börn 5 – 11 ára og hafa ekki fengið fyrri bólusetningu geta komið með börn sín miðvikudaginn 2. feb. eða fimmtudaginn 3. feb. milli kl. 13:00 og 14:00.
Alltaf verða að líða a.m.k. 3 vikur á milli fyrri og seinni sprautu og fá allir boð þegar kemur að seinni sprautunni.
Ritað um íslenska þjóðhætti
Undanfarið hafa nemendur 4. JH verið að læra um íslenska þjóðhætti. Í þessari viku hafa þau unnið hörðum höndum í samfélagsfræði við smásagnagerð. Þau hafa skrifað í skólanum og flest tekið bækurnar heim til að halda áfram þar. Núna í morgun sendum við inn verk nemenda sem vildu senda inn efni í ,,Sögur smásagnakeppni" sem er á vegum Ríkisútvarpsins. Við óskum nemendum góðs gengis í keppninni en umfram allt erum við mjög stolt af þessum krökkum sem hafa svo sannarlega lagt sig fram við rithöfundastörf hvort sem þau völdu að skila inn í keppnina eða ekki.
Hér má sjá frekari upplýsingar um keppnina sjálfa.
Foreldraviðtöl 1.febrúar
Í vetur erum við að innleiða leiðsagnarnám, eins og kynnt var hér á síðunni fyrr í haust. Liður í þeirri innleiðingu er nemendastýrð foreldraviðtöl sem ætlað er að virkja og valdefla nemandann til að auka trú hans á eigin getu. Markmiðið er að nemandinn geti haft áhrif á og tjáð sig um nám sitt, viti hvar hann er staddur, hvert hann stefnir og hvað er góður árangur.
Viðtölin verða þriðjudaginn 1.febrúar n.k. og eru nemendur að undirbúa sig þessa dagana. Opnað verður fyrir bókanir á mentor.is í fyrramálið.
Hér má finna kynningu á leiðsagnarnámi fyrir foreldra.