Í október var lestrarleikur á bókasafninu sem kallaðist Skelfilegi bókaklúbburinn. Hann snérist um að lesa 10 bækur um Skúla skelfi, skrá þær niður og fá miða fyrir hverja lesna bók. 4. bekkingar tóku þátt af fullum krafti og lásu samtals yfir 200 bækur.
Á hrekkjavöku fengu þau sem tóku þátt viðurkenningu og við erum virkilega stolt af þessum krökkum
Undafarið hefur mikið verið um að vera hérna í skólanum í tengslum við hrekkjavöku. Nemendur hafa verið að vinna verkefni í mörgum greinum í tengslum við hana og afraksturinn hefur verið sýnilegur á göngum skólans, á bókasafni og fleiri stöðum. Í gær stóð foreldrafélag skólans fyrir hrekkjavökuballi fyrir 1.-7. bekk. Í kvöld verður ball fyrir unglingastigið.
Við viljum minna á fyrirlesturinn í dag uppi í Menntaskóla kl. 17.00.
Hildur H. Pálsdóttir hefur farið í marga grunnskóla og framhaldsskóla með fyrirlestur um forvarnir gegn fíkniefnum. Hún nýtir eigin reynslu en hún missti 15 ára gamla dóttur sínu úr neyslu fíkniefna. Hildur mun hitta nemendur í 9.bekk á norðanverðum Vestfjörðum og 1.bekk í Menntaskólanum á Ísafirði í dag með þessa áhrifaríku fræðslu. Við viljum bjóða foreldra og aðra áhugasama velkomna á fyrirlestur hjá henni á þriðjudaginn 29.október kl 17.00 í sal menntaskólans á Ísafirði.
Notum tækifærið, fræðumst, spjöllum og vinnum saman að forvörnum ungmenna.
Í haust bjóðum við upp á val á unglingastigi sem tengist útivist og fjallamennsku. Nemendur hafa farið í gönguferðir, farið í heimsóknir og fleira. Í gær fengu þau kynningu á allskonar klifri, meðal annars klettaklifri og ísklifri. Síðan var farið yfir í Skátaheimilið þar sem krakkarnir fengu að klifra og fengu góða leiðsögn frá Björgvini Hilmarssyni sem hefur sérhæft sig í klifri ásamt öðru sem tengist útivist.
Það hefur sannarlega verið mikið stuð á skólalóðinni undanfarna daga. Nemendur ánægðir með að fá snjóinn og nýta hvert tækifæri til að leika sér. Njótið helgarinnar.
Eins og undanfarin ár þá mun 7. bekkur taka þátt í verkefninu Jól í skókassa. Í næstu viku verður farið með kassana í kirkjuna.
„Jól í skókassa“ er alþjóðlegt verkefni sem felst í því að fá börn jafnt sem fullorðna til þess að gleðja önnur börn sem lifa við fátækt, sjúkdóma og erfiðleika með því að gefa þeim jólagjafir. Með slíkum gjöfum er þeim sýndur kærleikur Guðs í verki. Gjafirnar eru settar í skókassa og til þess að tryggja að öll börnin fái svipaða jólagjöf er mælst til þess að ákveðnir hlutir séu í hverjum kassa.
Fyrir jólin 2004 ákvað hópur ungs fólks innan KFUM & KFUK að láta reyna á verkefnið hér á landi. Undirtektirnar voru frábærar og söfnuðust rúmlega 500 kassar það árið. Verkefnið hélt svo áfram að spyrjast út og árið 2005 urðu skókassarnir 2600. Sú tala hefur síðan tvöfaldast því undanfarin ár hafa borist í kringum 5000 gjafir.
Skókassarnir verða sendir til Úkraínu. Í Úkraínu búa um 46 milljónir manna. Atvinnuleysi er þar mikið og ástandið víða bágborið. Á því svæði þar sem jólagjöfunum verður dreift ríkir mikil örbirgð. Íslensku skókössunum verður meðal annars dreift á munaðarleysingjaheimili, barnaspítala og til barna einstæðra mæðra sem búa við sára fátækt. Aðalskipuleggjandi dreifingarinnar í Úkraínu er faðir Evheniy Zhabkovskiy sem komið hefur hingað til lands í heimsókn og m.a. kynnt sér starf KFUM og KFUK hér á landi. Hann starfar með KFUM í Úkraínu og er sjálfboðaliðum KFUM og KFUK innan handar þegar þau hafa farið til Úkraínu með gjafirnar.
Á miðvikudaginn er bleikur dagur og hvetjum við alla til að mæta í einhverju bleiku.
Á bókasafninu okkar er bókaklúbbur sem hefur yfirskriftina ,,skelfilegur bókakúbbur". Hrekkjavakan er á næsta leyti og gaman að lesa bækur sem snúa að henni og allskonar öðrum skelfilegum hlutum. Við hvetjum foreldra til að lesa með börnunum sínum.
Nemendur í 9. og 10. bekk, ásamt 2 kennurum eru búin að vera í Barcelos í Portúgal þessa viku. Þetta er án efa einstakt tækifæri til að auka fræðslu og skilning á heimsmarkmiðum Sameinuðu þjóðanna. Með því að taka þátt í ýmsum verkefnum og námskeiðum fá þau að kynnast hvernig lönd vinna að því að ná þessum markmiðum, allt frá menntun og jafnrétti til loftslagsmála og sjálfbærrar þróunar.
Barcelos er sérstaklega þekkt fyrir handverk og list, þar á meðal hinar litríku Barcelos hanastyttur sem hafa mikla þjóðmenningartengingu. Nemendurnir munu eflaust heimsækja sögulega staði, njóta portúgalskrar matargerðar og kynnast siðum sem gera borgina einstaka.
Ferðin er ekki aðeins fræðandi heldur einnig tækifæri fyrir nemendurna að stækka sjóndeildarhring sinn, þróa samskiptahæfni og efla félagslegan þroska í alþjóðlegu samhengi. Með þessari reynslu eiga þau eftir að koma til baka með nýja sýn á samfélagið og heiminn í kringum sig. Vonandi nýtast þau þekkingunni og upplifuninni til framtíðarverkefna og persónulegrar þróunar.
Í dag kom Þorgrímur Þráinsson, rithöfundur með meiru, í heimsókn til okkar. Hann hélt fyrirlestur sem ber nafnið Verum ástfangin af lífinu fyrir 10. bekk, hvatningarfyrirlestur, þar sem hann brýnir fyrir nemendum að bera ábyrgð á sjálfum sér, sýna samkennd, þrautsegju, koma fallega fram, gera góðverk, sinna litlu hlutunum daglega og setja sér markmið.
Þá bauð hann nemendum á miðstigi upp á fyrirlesturinn Tendrum ljós fyrir lestri. Þar kynnti hann bækurnar sínar, hvatti nemendur til að nýta bókasafnið sem mest og lesa meira til að öðlast ríkari orðaforða og meira sjálfstraust.
Við hvetjum foreldra til að taka samtalið heima um fyrirlestrana og mögulega eru til einhverjar bækur á heimilum nemenda eftir Þorgrím.
