« 1 af 2 »

Í morgun voru valdir 6 nemendur úr 7.bekk til að keppa fyrir hönd skólans á Lokahátíð Stóru upplestrarkeppninnar, sem fram fer í Bolungarvík fimmtudaginn 19.mars. Alls lásu 12 nemendur í morgun sögubrot og tvö ljóð, en allir nemendur 7.bekkjar hafa æft framsögn frá því á Degi íslenskrar tungu 16.nóvember s.l.

Dómarar í dag voru þau Gylfi Ólafsson, Rannveig Halldórsdóttir og Esther Ósk Arnórsdóttir. Þeim var svo sannarlega vandi á höndum, en niðurstaðan varð sú að þau Aino Magnea Norðdahl Widell, Baldur Ernir Stefánsson, Eiríkur Bjarkar Jónþórsson, Emilía Dögun Emilsdóttir, Glódís Ingudóttir og Guðrún Eva Þorvaldsdóttir verða okkar fulltrúar í keppninni. Til vara verða þær Emelía Eivör Daníelsdóttir og Kristjana Malen Pálsdóttir.

Við erum virkilega stolt af öllum nemendum 7.bekkjar sem hafa tekið miklum framförum í frasögninni síðustu vikurnar og hlökkum til að fylgjast með í næstu viku.

Teymið á bak við Sólmyrkvaleikana: Ingibjörg Fríða, Siggi, Sævar Helgi, Janus Bragi, Nina, Embla og Aude

« 1 af 6 »

Dagana 24. - 25. febrúar fóru Sólmyrkvaleikarnir fram í Edinborgarhúsinu á Ísafirði, en leikarnir eru hluti af barnamenningarhátíðinni Púkanum, sem stýrt er af Vestfjarðastofu.

Sólmyrkvaleikarnir fóru þannig fram að nemendur 5. - 7. bekkjar byrjuðu á fyrirlestri hjá Sævari Helga Bragasyni sem er betur þekktur í þeirra hópi sem Stjörnu-Sævar. Hann sagði þeim á sinn innblásna hátt frá almyrkva á sólu sem Vestfirðingar verða í kjöraðstæðum til að upplifa þann 12. ágúst næstkomandi – í eina sinn á lífsleiðinni fyrir þau sem fædd eru eftir 1954.

Að fyrirlestri loknum tóku við vinnustofur þar sem allir fengu að taka þátt í skuggaleikhússmiðju með Aude og Emblu frá Þykjó, vísindasmiðju með Sævari og Ninnu frá Þykjó og tónlistarsmiðju með Sigga og Ingibjörgu. Með í för var kvikmyndagerðarmaðurinn Janus Bragi sem myndaði það sem fram fór til að skapa úr því stuttmynd sem sýnd verður þegar Púkinn fer fram dagana 27. apríl-8. maí. Þar mun líka hljóma lag sem Siggi og Ingibjörg hafa sett saman upp úr tónlistarsmiðjunum og útsett.

Ungmennaráð Vestfjarða valdi hafið sem þema Púkans í ár og vildu þau jafnframt sjá samspil lista og vísinda, og samstarf eiga sér stað. Í allri vinnu Þykjó í kringum þetta verkefni hefur verið lögð áhersla á að uppfylla óskir ungmennaráðsins. 

« 1 af 6 »

Nemendur 3.bekkjar vinna í myndmennt út frá kveikju við eigin listsköpun, bæði í tví- og þrívíðu formi samkvæmt Aðalnámskrá. Einnig læra þeir ýmis hugtök og heiti myndlistar og styrkja fínhreyfingar sem og ímyndunaraflið. Þetta hafa þeir þjálfað undir leiðsögn Solveigar Eddu Vilhjálmsdóttur, myndlistarkennara.

Í morgun var einn hópur árgangsins að vinna með mynsturgerð og klippingu, ýmist í svarthvítu eða í lit og úr urðu hin litríkustu og fjölbreyttustu verk eins og sjá má á meðfylgjandi myndum.

Í mars verða lögð fyrir ný stöðu- og framvindupróf Matsferils í stærðfræði og lesskilningi í 4. - 10. bekk. Prófin hafa þann tilgang að veita upplýsingar um stöðu og framvindu nemenda í námi og varpa ljósi á styrkleika þeirra og áskoranir.

Nánari upplýsingar hafa verið sendar heim til foreldra, sem einnig má sjá hér til hliðar.

Fimmtudaginn 26. og föstudaginn 27. febrúar er vetrarfrí og á mánudaginn 2. mars er starfsdagur - án nemenda. Við vonum að allir njóti þessarar löngu helgar sem best og komi endurnærðir til baka á þriðjudaginn.

« 1 af 5 »

Undanfarið hafa nemendur 10.bekkjar verið í skemmtilegu hópverkefni í stærðfræðinni, þar sem reynir á margskonar hæfni. Megintilgangur náms og kennslu í stærðfræði er að nemendur öðlist alhliða hæfni og skilning til að nota stærðfræði sem verkfæri í fjölbreyttum og margs konar tilgangi og við ólíkar aðstæður í daglegu lífi, leik og starfi. Til þess þurfa þeir að fá tækifæri til að ígrunda ólíkar aðferðir og líkön sem nýtast við lausn viðfangsefna og leggja mat á niðurstöður. Verkefni þurfa að vera fjölbreytt og áhugaverð og byggja upp hæfni þar sem nemendur eru virkir þátttakendur.

Í umræddu hópverkefni átti hver hópur að hanna og búa til ösku utan um jólapakka sem er u.þ.b. 2-20 dl. Reikna átti allt sem hægt er í sambandi við viðfangsefnið og sýna útreikninga, sköpun og frumleika ásamt viðeigandi hugtökum stærðfræðinnar. Einnig átti hver hópur að halda dagbók yfir vinnuna og verkefnaskiptingu. Til að fá fullt fyrir verkefnið þurftu öll þessi atriði að koma fyrir: sívalningur, þrístrendingur eða ferstrendingur, keila eða pýramídi, rúmmál og yfirborðsflatarmál, a.m.k. 2 tegundir flutninga og regla Pýþagórasar.

Afraksturinn var glæsilegur eins og sjá má á meðfylgjandi myndum og voru nemendur vitanlega alsælir með vinnuna og árangurinn.

Á mánudaginn er maskadagur/bolludagur og hvetjum við alla til að mæta í búningum og mega nemendur koma með bollur í nesti. Við bjóðum upp á maskaböll í sal skólans og er skipulagið eftirfarandi:

kl. 8:20-9:00    1. - 3. bekkur

kl.10:00-10:40  4. og 5. bekkur

kl.13:10-13:50  6. og 7. bekkur

Þeir unglingar sem mæta í búningum eru velkomnir á maskaböllin.

Grunnskólinn á Ísafirði hefur nú verið skráður til þátttöku í þróunarstarfi um Heilsueflandi grunnskóla.
Markmiðið er að vinna markvisst að heilsueflingu í okkar starfi með því að skapa skólaumhverfi sem stuðlar að andlegri, líkamlegri og félagslegri heilsu og vellíðan nemenda og starfsfólks í samvinnu við heimili og nærsamfélag. Verkefnið sem slíkt hefur hvorki upphaf né endi, heldur er hér um að ræða nálgun sem nýtist í starfinu til framtíðar. Hver skóli vinnur á þeim hraða sem hentar og er reiknað með að taka sér allt að ár í innleiðingarferli.
Við erum spennt að hefjast handa á þessu verkefni sem tekur á heilsu og vellíðan nemenda og starfsfólks og fléttar heilsu og velferð saman við daglegt skólastarf, námskrá og árangursmat.

Þriðjudaginn 10. febrúar er samráðsdagur, þar sem forráðamenn og nemendur mæta til umsjónarkennara á fyrirfram völdum tíma. Skráning er nú hafin á Mentor og hvetjum við alla til að skrá sig sem fyrst. Engin kennsla er þennan dag.

Foreldraviðtölin eru nú orðin nemendastýrð hjá okkur samkvæmt hugmyndafræði leiðsagnarnáms, sem aðalnámskrá grunnskóla leggur áherslu á. Nemendastýrðum foreldraviðtölum er ætlað að virkja og valdefla nemendur með það að markmiði að auka trú þeirra á eigin getu. Nemendur hafa undirbúið viðtölin og valið verkefni til að sýna og kynna fyrir forráðamönnum, ásamt þeirri hæfni sem þjálfuð var við vinnuna.

« 1 af 6 »

Í gær og í dag var haldið Nemendaþing hjá okkur, þar sem allir nemendur skólans tóku þátt í fyrsta skipti. Þing sem þessi hafa verið haldin annað hvert ár, en hingað til hafa einungis nemendur 6. - 10. bekkjar tekið þátt. 

Yfirskrift nemendaþingsins í ár var Líðan og hegðun. Nemendum var skipt í hópa, þar sem 10.bekkingar voru borðstjórar og aðstoðuðu yngsta stigið, en nemendur 7.bekkjar voru borðstjórar miðstigs. Tilgangurinn með þinginu var að efla vitund nemenda um þau áhrif sem þeir hafa á eigin líðan og annarra. Einnig voru nemendur inntir eftir því hvað starfsfólk skólans getur gert til að bæta líðan og ná fram jákvæðum áhrifum á daglegt starf í skólanum. Velt var upp spurningum um hvernig við sjáum, heyrum og finnum virðingu, samhug og góða líðan. Nemendur voru duglegir að svara og komu með góðar ábendingar.

Stjórnendur hafa nú fengið öll svör nemenda í hendur og munu fá aðstoð nemendaráðs til frekari úrvinnslu. Það er mjög mikils virði fyrir okkur sem hér störfum að heyra rödd nemenda og gefa þeim færi á að tjá sig frjálslega um líðan og hegðun, á lýðræðislegum vettvangi. Við hlökkum til samantektarinnar og munum koma henni á framfæri við nemendur og foreldra.