Á morgun er bóndadagur, fyrsti dagur þorra. Samkvæmt venju bjóða foreldrar nemenda í 10. bekk árgangnum á þorrablót þar sem nemendur ásamt foreldrum og fjölskyldu mæta í sínu fínasta pússi og eiga saman ánægjulega kvöldstund, ásamt starfsfólki skólans. Húsið opnar kl. 18:30 og gert er ráð fyrir að borðhald hefjist kl. 19:00.

Þorrablót þetta er upp á gamla mátann og hefur verið haldið allt frá árinu 1981. Gestir hafa með sér mat í trogum og einnig þarf að hafa með sér diska og hnífapör. Drykkir eru seldir í sjoppunni og fer ágóðinn af því í ferðasjóð 10.bekkjar. Glös eru til staðar og boðið er upp á kaffi eftir matinn. Hefð er fyrir því að foreldrar annist skipulagningu og skemmtiatriði, sem iðulega hefur slegið í gegn. Að borðhaldi loknu er svo stiginn dans við harmonikuleik og hafa nemendur æft gömlu dansana af kappi undanfarnar vikur. 

Nú hefur verið ákveðið að Sundhöllin við Austurveg verði lokuð í lengri tíma á meðan framkvæmdir standa yfir, en skipta þarf um dælubúnað, laga loftræstingu og bæta við neyðarútgangi. Búist er við að viðgerðir standi yfir alla vega fram í apríl.
Það er því ljóst að sundkennsla fellur niður á meðan og stefnum við á útivist í stað sunds en munum reyna að finna aðstöðu inni til vara ef veður hamlar útivistinni.

« 1 af 3 »

Með janúar fylgir nýtt orðtak, orðatvenna og málsháttur sem við hvetjum alla til að rýna í og læra.

Við óskum öllum farsæls árs og vonum að þið hafið notið jólaleyfisins sem best.

Kennsla hefst á morgun, þriðjudaginn 6.janúar kl. 10:00 og mæta þá allir í sínar umsjónarstofur, líka þeir sem hafa íþróttir á sinni stundatöflu. Strætóar verða tveimur tímum seinni á ferðinni en venjulega.

Við viljum vekja athygli á því að sundlaugin er því miður ekki starfhæf í það minnsta á morgun og þarf því enginn að hafa sundföt meðferðis. Við fáum frekari fregnir af framhaldinu á morgun.

Á morgun, föstudaginn 19.desember eru litlu jólin haldin frá kl. 9:30-12:00. Að því loknu hefst jólaleyfi nemenda.

Kennsla hefst á nýju ári þriðjudaginn 6.janúar kl. 10:00. 

Starfsfólk skólans óskar nemendum og fjölskyldum þeirra gleðilegrar jólahátíðar og farsældar á komandi ári.

« 1 af 2 »

Íslenskuteymi kennara skólans ákvað í haust að halda nýyrðakeppni í tilefni af Degi íslenskrar tungu 16.nóvember síðastliðinn. Nemendur voru fræddir sérstaklega um Jónas Hallgrímsson og framlag hans til nýyrða í íslensku þess tíma. Sem dæmi um nýyrði hans má nefna orðin aðdráttarafl, sporbaugur og fjaðurmagnaður.
Í framhaldi af því voru nemendur fengnir til að spreyta sig á nýyrðasmíði. Hugmyndirnar voru teknar saman ásamt útskýringum og að lokum kosið um besta orðið.

Besta nýyrðið á miðstigi var orðið þrætustubbur. Það merkir manneskju sem þrætir of mikið. Höfundar þess orðs eru þær Kristín Dóra Aradóttir, Maya Esí Badu og Vilborg Rakel Guðmundsdóttir.

Besta nýyrðið á unglingastigi átti Helga Karen Haraldsdóttir í 10.GJ, en það var orðið orðdregin, sem merkir að þú sért orðlaus eða veist ekki hvað þú átt að segja.

Halla Magnadóttir, skólastjóri, afhenti verðlaunahöfum viðurkenningar í morgun fyrir þessi nýju orð. Snerpa gaf vinningshöfum bakpoka og Hamraborg vinatilboð og þökkum við þeim kærlega fyrir um leið og við óskum höfundum svo og öllum þátttakendum innilega til hamingju. 

« 1 af 4 »

Í morgun var nemendum boðið upp á heitt kakó og smákökur í frímínútunum. Góð stund sem fest hefur verið í sessi á aðventunni hjá okkur og kunnu nemendur vel að meta framtakið.

« 1 af 2 »

Frétt frá nemendum í Erasmus+ vali:

Mánudaginn 24.nóvember fóru átta nemendur ásamt tveimur kennurum í Grunnskólanum á Ísafirði til Frakklands í ferð á vegum Erasmus+. Hópurinn þurfti að vakna eldsnemma og hittast á BSÍ kl. 4:15. Þau tóku rútu til Keflavíkur og svo flugið til Frankfurt, sem var 3,5 klst. Eftir það fóru þau í lest frá Frankfurt til Strassborg og svo með tramminu á hótelið. Hópurinn hitti nemendur og starfsfólk úr samstarfsskólunum okkar frá Þýskalandi og Portúgal áður en þau fóru í kvöldmat.

Á þriðjudeginum fóru þau í Evrópuráðið og fengu að vita ýmislegt um störf fólks þar. Svo kom Gréta Gunnarsdóttir, sem er fulltrúi Íslands í Evrópuráðinu, og sagði hópnum frá starfinu sínu. Seinni partinn fór hópurinn í ratleik þar sem nemendum var skipt í hópa með Þjóðverjunum og Portúgölunum.

Á miðvikudeginum fór hópurinn í Alsace-Moselle memorial og þar lærðu þau ýmislegt um sögu heimsstyrjaldanna. Eftir hádegið fór hópurinn í bátsferð um Strassborg þar sem þau lærðu um sögu borgarinnar.

Á fimmtudeginum fór hópurinn á Evrópuþingið að hlusta á þingmenn rökræða um loftslagsbreytingar í The Hemicycle og svo að hitta Dr. Peter Liese, sem er einn af fulltrúum Þýskalands á þinginu. Liese talaði um vandamálin sem hann sér um að leysa í Evrópu og hvernig það er að vera þingmaður á Evrópuþinginu. Seinna um daginn var farið að skoða og versla á jólamarkaðinum, sem er einn sá allra flottasti í Evrópu.

Á föstudeginum var mjög rólegur dagur, þau kvöddu Þjóðverjana um morguninn og löbbuðu svo að fallegu kirkjunni sem var nálægt hótelinu. Eftir það var farið í verslunarleiðangur í miðbænum, hádegismatur á McDonald's og svo var afslöppun á hótelinu fyrir lokakvöldverð ferðarinnar.

Allur hópurinn vaknaði eldsnemma á laugardagsmorgni og fór með tramminu á lestarstöðina. Þar borðuðu þau morgunmat og tóku tvær lestir til Frankfurt á flugvöllinn þar. Klukkan var um fjögur þegar þau lentu á Íslandi, svo var farið með rútu á BSÍ og þá var þessari frábæru ferð lokið.

2.bekkur á Byggðasafninu

Síðustu daga hafa margir bekkir farið í heimsókn á Byggðasafnið í Neðsta kaupstað. Þar hefur Sæbjörg Freyja Gísladóttir, safnvörður tekið á móti hópum og sagt ýmsar sögur af jólasveinum, Grýlu og ísbjörnum. Elfar Logi Hannesson, leikari las kvæði um eldgamla jólasveina sem sjaldan er talað um í dag. Svo voru nokkur jólalög sungin við undirleik Magna Hreins Jónssonar, sem spilaði á harmonikku. Að lokum var boðið upp á þrautaleik um safnið og hægt að finna ilm af hangikjöti, Grýlu og floti svo dæmi séu nefnd. Nemendum og starfsfólki hefur þótt afar skemmtilegt í þessum heimsókn og kunna safninu bestu þakkir fyrir góðar, skemmtilegar og fræðandi móttökur. 

Nemendur 7. og 6. bekkjar kepptu til úrslita

Í haust var farið af stað með spurningakeppnina ,,Ég veit" á miðstigi. Keppnin gekk út á það að 5.-7. bekkur fékk bókalista og ákveðinn tíma til að lesa þær bækur. Eftir þann tíma valdi hver bekkur þrjá þátttakendur til keppni fyrir sína hönd.

Á bókalistanum voru bækurnar Benjamín Dúfa eftir Friðrik Erlingsson, Baukað og brallað í Skollavík eftir Guðlaugu Jónsdóttur, Ferðin til Samiraka eftir Hörpu Jónsdóttur, Frosnu tærnar eftir Sigrúnu Eldjárn, Henri og hetjurnar eftir Þorgrím Þráinsson, Hingað og ekki lengra eftir Hildi Knútsdóttur, Lending eftir Hjalta Halldórsson, Orri óstöðvandi: heimsfrægur á Íslandi eftir Bjarna Fritzson, Sagan af bláa hnettinum eftir Andra Snæ Magnason og Öðruvísi fjölskylda eftir Guðrúnu Helgadóttur.

Öll liðin kepptu sín á milli í stigakeppni og komust tvö stigahæstu liðin í úrslitakeppnina sem haldin var í morgun í sal skólans. Það voru lið 6. og 7. bekkjar sem kepptu sín á milli og lauk keppni þannig að 6.bekkur sigraði með eins stigs mun eftir hörku spennandi viðureign. 6.bekkur hreppti þannig Vitann í ár, sem er farandbikar. Einnig fékk sigurliðið bókina Skólastjórinn, eftir Ævar Þór Benediktsson, að gjöf frá Pennanum og þökkum við kærlega fyrir rausnarlega gjöf. 

Við óskum vinningshöfum innilega til hamingju og öllum nemendum miðstigs með drengilega keppni og dugnað við lesturinn.