« 1 af 3 »

Krakkarnir okkar í Skólahreysti stóðu sig frábærlega vel í undankeppninni í gær. Niðurstaðan varð 2.sæti riðilsins, sem er mjög góður árangur í sterkum riðli. Saga Björgvinsdóttir gerði sér lítið fyrir og setti Íslandsmet í hreystigreip, þar sem hún hékk í heilar 30,06 mínútur! Við erum afar stolt af þessum árangri liðsins og ekki má gleyma stuðningsliðinu sem var mjög öflugt á pöllunum. Innilega til hamingju Saga, Hilmir, María Sif, Kamil, Kristín Eik og Sigurjón. Ekki má heldur gleyma þjálfurum liðsins, þeim Árna Heiðari Ívarssyni og Axel Sveinssyni.

Það var Heiðarskóli sem sigraði riðilinn og komst þannig sjálfkrafa í úrslit. Það er þó enn von fyrir okkar lið að komast þangað, þar sem nokkur stigahæstu liðin fyrir neðan sigurvegara riðlanna munu komast áfram. Það kemur í ljós eftir helgi.

Þann 12.ágúst n.k. verður sögulegur sólmyrkvi á Íslandi, sem mun sjást allra best á Vestfjörðum. Púkinn - barnamenningarhátíð á Vestfjörðum, stendur af því tilefni fyrir hátíðarsýningum. Yfirskrift sýninganna er Sólmyrkvaleikar, þar sem verkefni tengd vísindum, listum og þjóðsögum renna saman í eitt stórt ævintýri.

Föstudaginn 8.maí n.k. er sýning í Ísafjarðarbíói kl. 16:30, þar sem Stjörnu-Sævar útskýrir hvað sólmyrkvi er og gestir eru leiddir inn í heillandi þjóðsögur um fyrirbærið. Þá verða einnig frumflutt grípandi tónverk og töfrandi stuttmyndir sem vestfirskir krakkar unnu í vinnusmiðjum fyrr í vetur. Þetta er skemmtun fyrir alla fjölskylduna og börn á öllum skólastigum og hvetjum við alla til að mæta og taka þátt í gleðinni.

Í kvöld keppir G.Í. í 8.undankeppni Skólahreysti, ásamt 11 öðrum skólum. Það er mikil stemning í hópnum og fór tæplega 50 manna hópur nemenda í morgun áleiðis suður til að hvetja okkar fólk. Keppendur fyrir hönd skólans eru þau Saga Björgvinsdóttir, María Sif Hlynsdóttir, Hilmir Norðfjörð og Kamil Fortuna. Til vara eru þau Kristín Eik Sveinbjörnsdóttir og Sigurjón Kári Eyjólfsson.

Við hvetjum alla til að fylgjast með krökkunum okkar í beinni útsendingu á RÚV kl. 19:45 í kvöld.

« 1 af 3 »

Nú fer að sjá fyrir endann á skólaárinu og komið að orðum maímánaðar. Við vonum að allir hafi haft gagn og gaman af þessum orðaleik okkar í vetur.

Nú hefur skóladagatal fyrir næsta skólaár verið samþykkt af Skóla-, íþrótta- og tómstundanefnd Ísafjarðarbæjar og því tilbúið til útgáfu.

« 1 af 4 »

Frá árinu 2013 höfum við haldið nemendaþing annað hvert skólaár. Markmið þessara umræðuþinga eru fjögur;

- að veita nemendum tækifæri til að taka þátt í lýðræðislegri samræðu um málefni sem hefur merkingu fyrir daglegt líf þeirra og skipulag skólastarfsins

- að efla vitund nemenda um eigin áhrif í skólastarfinu

- að fá fram rödd og sjónarhorn nemenda í ýmsum málaflokkum

- að fá fram tillögur frá nemendum um hvað hægt er að gera til að hafa jákvæð áhrif á deglegt starf í skólanum.

Þingin hafa verið sett upp með formlegu sniði, þar sem borðstjórar hafa komið úr efri bekkjum og fengið sérstaka þjálfun í að virkja samnemendur til þátttöku og að stýra umræðum þannig að allir fái að tjá sig.

Viðfangsefnin hafa verið þessi: skólasamfélagið, kynjajafnrétti, samfélagsmiðlar, samskipti, símanotkun, einelti, og hvernig gerum við góðan skóla betri. 

Sjöunda nemendaþing skólans var haldið 27.janúar 2026 og var viðfangsefnið líðan og hegðun. Í fyrsta skipti í sögu nemendaþinganna tók allur skólinn þátt frá 1.bekk og upp úr, en hingað til hefur yngsta stigið ekki verið með. Það reyndi því enn frekar á unglingana okkar að stýra þeim yngstu og fá fram svörun frá öllum. Nemendum skólans var skipt í 14 hópa á hverju stigi, eða samtals 42 hópa og komu hópstjórar úr 7. - 10. bekk. Einkunnarorð skólans eru virðing, samhugur og menntun og var það kjarninn í umræðunum. Hópstjórar hófu starfið með því að lesa úr barnasáttmálanum um réttindi barna, þar sem segir að börn eigi rétt á því að tjá sig frjálslega um öll málefni sem hafa áhrif á líf þeirra og að fullorðnir eigi að hlusta og taka mark á þeim.

Í framhaldinu voru lagðar fyrir 6 spurningar:

1. Virðing - hvernig sjáum við hana, heyrum hana og finnum hana?

2. Samhugur - hvernig sjáum við hann, heyrum hann og finnum hann?

3. Góð líðan - hvernig sjáum við hana, heyrum hana og finnum hana?

4. Hvað getur þú gert til að þér líði betur?

5. Hvað getur starfsfólk skólans gert til að þér líði betur?

6. Hvað getur þú gert til að öðrum líði betur?

Nemendur tjáðu sig allir á post-it miða, sem voru settir við hverja spurningu. Nemendaráð fékk svo það hlutverk að taka saman niðurstöður allra 42 hópanna. Nú í vikunni fór nemendaráð svo inn í alla bekki og kynnti niðurstöðurnar, sem voru svo hengdar upp á öllum göngum skólans. Kennarar munu svo nýta þær enn frekar til umræðna og ígrundunar inni í bekkjum.

Niðurstöðurnar eru skýrar hjá nemendum og má sjá kjarnann í þeim innrammaðan á hverju spjaldi. Vinnan sem fram fór í hópunum er einnig ómetanleg, þar sem allir nemendur höfðu rödd, sem hefur svo jákvæð áhrif á skólastarfið.

Fyrir um ári fékk starfsmaður ásamt nemendum í 2.ÁJ þá hugmynd að setja niðu paprikufræ innan úr papriku sem nemandi kom með í nesti. Starfsmaðurinn tók hluta af uppsprettunni með sér heim í skólalok s.l. vor og kom svo aftur með hana í nýjum potti í skólann í haust. Nemendur hafa fylgst spenntir með vextinum og tekið þátt eftir áhuga. Í vetur hefur plöntunni verið umpottað nokkrum sinnum og hlúð að henni á ýmsan hátt. Nú ber hún 22 paprikur í mismunandi stærðum. Þetta hefur verið áhugavert ferli og góður lærdómur fyrir nemendur og augnayndi í þokkabót.

Gömul og góð mynd frá skíðadegi 2016.

Föstudaginn 24.apríl verður skíða- og útivistardagur í Tungudal frá kl. 9:00-13:00 hjá öllum nemendum 5. - 10. bekkjar og er því engin kennsla í húsi hjá þeim nemendum.
Við hvetjum þá foreldra sem geta til að skutla sínum börnum, en við bjóðum upp á eina rútu frá skóla kl. 9:00 og heim aftur kl. 13:00.
Nemendur geta komið með svigskíði, bretti, gönguskíði, þotur, sleða eða hvað sem er til að renna sér á og ættu því allir að geta notið útivistarinnar. Hægt er að fá lánuð svigskíði og klossa endurgjaldslaust í skíðaskálanum.
Nemendur verða að koma vel nestaðir, þar sem ekki er boðið upp á mat á vegum skólans.

Staðan er viðkvæm í Tungudal þar sem snjórinn er á miklu undanhaldi, en starfsmenn gera allt sem í þeirra valdi stendur til að hægt sé að njóta útivistarinnar sem best.

Á morgun er svo sumardagurinn fyrsti og engin kennsla. 

« 1 af 4 »

Dagana 13. - 17. apríl var seinni Erasmus ferðin hjá Grunnskólanum á Ísafirði. Hópurinn (8 nemendur og 2 starfsmenn) fór til Þýskalands í borgina Ludenscheid, sem er um það bil tveimur tímum frá Frankfurt, þar sem krakkarnir lentu. Á mánudeginum, eftir flugið og leigubílaferð í borgina,, gerðu krakkarnir ekki mikið heldur fengu sér kvöldmat á gistiheimilinu. Hópurinn hitti síðan nemendur og starfsfólk úr samstarfsskólum og fóru svo að sofa.

Á þriðjudeginum vöknuðu krakkarnir snemma og fengu sér morgunmat rétt áður en þeir tóku lest með Þjóðverjunum og Portúgölunum til Dortmund. Þar fór hópurinn saman á tækni/verklegt safn þar sem krakkarnir mældu mjög mikið með því og var algjör stemning þar. Síðan fóru krakkarnir með Þjóðverjunum að skoða borgina, versla og þess háttar. Eftir það ævintýri fóru Íslendingarnir og Portúgalirnir upp á gistiheimilið, fengu sér kvöldmat og síðan voru íslensku krakkarnir með kósýkvöld saman.

Á miðvikudeginum var heimsókn í Adolf-Reichwein Gesamtschule, skóla Þjóðverjanna, og þar voru Þjóðverjarnir með stutta kynningu um heimsmarkmið sameinuðu þjóðanna. Eftir að hafa skoðað skólann rölti hópurinn saman að miðborginni, þar sem var borðaður hádegismatur og keppt í ratleik um miðborgina. Krakkarnir hittu borgarstjórann í Ludenscheid og tóku fallega mynd af öllum Erasmus hópnum í ráðhúsinu. Eftir heimsóknina í ráðhúsið var frjáls tími í miðborginni áður en haldið var í partý í skólanum. Þar var mikil stemning og stuð, góður matur og frábær félagsskapur.

Á fimmtudeginum var farið í skógarferð þar sem hópurinn fór í alls konar útileiki og þurfti að leita skjóls fyrir rigningu inni í risastórri skemmu, sem áður var notuð af belgíska hernum til að geyma skriðdreka. Eftir hádegið þennan dag var farið á vísindasafnið Phanomenta þar sem krakkarnir fengu að prófa ýmis tæki og tól sem tengjast vísindum og enn og aftur var það ótrúlega gaman. Um kvöldið fengu íslensku krakkarnir að fara út með þýsku krökkunum, þau skemmtu sér mjög vel, fengu sér ís og svo var komið að kveðjustund.

Á föstudeginum var komið að heimferð, þá var vaknað snemma til að fá sér morgunmat og klára að pakka niður. Hópurinn tók svo leigubíl til Frankfurt, þaðan sem var flogið til Íslands og frábærri ferð lauk á BSÍ seinni partinn á föstudeginum. (Skrifað af nemendum sem fóru í þessa ferð).