Nú er sumarið framundan og viljum við hvetja alla, stóra sem smáa, til að njóta sumarlesturs. Bókasafnið á Ísafirði býður upp á lestrarsprett til 20. ágúst fyrir yngri börnin og fer skráning fram á safninu.
Skólinn stendur fyrir spurningakeppni 5.-7. bekkjar í haust, þar sem nemendur þurfa að lesa ákveðnar bækur sem verða til umfjöllunar. Nú er lag fyrir þá nemendur að nýta sumarið til lesturs þessara bóka og má sjá bókalistann á meðfylgjandi mynd.

Við vonum svo sannarlega að allir verði duglegir að lesa í sumar og njóti lestursins, því eins og við vitum þá er alltaf veður til að lesa. Gleðilegt lestrarsumar!

Grunnskólanum á Ísafirði var slitið í 151. skipti föstudaginn 5. júní síðastliðinn og fór athöfnin fram í Ísafjarðarkirkju. Jón Hálfdán Pétursson, deildarstjóri unglingastigs setti athöfnina, en að því loknu tóku kynnar við, þau Emilía Rós Sindradóttir og Garðar Logi Guðmundsson, nemendur í 9.bekk.

Guðbjörg Halla Magnadóttir skólastjóri, flutti ávarp og það gerðu einnig þau Saga Björgvinsdóttir og Hilmir Norðfjörð fyrir hönd útskriftarnema. 

Nemendur buðu upp á tónlistaratriði þar sem Kristín Eik Sveinbjörnsdóttir lék Sonatinu í G-dúr eftir Ludwig van Beethoven.

Eftirtaldar viðurkenningar voru veittar í 8. og 9. bekk: 

8. bekkur - Ylfa K. Rósinkara Tómasdóttir hlaut viðurkenningu Rotary klúbbsins á Ísafirði fyrir ástundun og framfarir. 

9. bekkur - Dagbjört Sjöfn Magnúsdóttir hlaut viðurkenningu Rotary klúbbsins á Ísafirði fyrir ástundun og framfarir.

Eftirtaldar viðurkenningar voru veittar í 10. bekk:

Rotary klúbburinn á Ísafirði veitti viðurkenningu fyrir ástundun og framfarir í 10. bekk og hana hlaut Sölvey Marie Tómasdóttir.

Kvenfélagið Hvöt gaf eftirfarandi viðurkenningar fyrir verk- og listgreinar:

Viðurkenningu fyrir framfarir og vinnubrögð í í smíði og hönnun hlaut Sigríður Jóna Haraldsdóttir.

Viðurkenningu fyrir listræna hæfileika, jákvæðni og áhugasemi í myndmennt hlaut Roza Matijevic Ismailovski.

Viðurkenningu fyrir brennandi áhuga, kraft og dugnað í heimilisfræði hlaut Heimir Logi Samúelsson.

Stöðin Heilsurækt gaf viðurkenningar fyrir góða ástundun og námsárangur í íþróttum. Þær viðurkenningar hlutu Hilmir Norðfjörð og Saga Björgvinsdóttir.

Danska Menntamálaráðuneytið gaf viðurkenningu fyrir góða ástundun, vinnusemi, góð skil og framfarir í dönsku og hlaut Saga Björgvinsdóttir þau verðlaun.

Grunnskólinn á Ísafirði veitti eftirfarandi viðurkenningar:

Viðurkenningu fyrir metnað, góða ástundun og námsárangur í stærðfræði hlaut Saga Björgvinsdóttir.

Viðurkenningu fyrir góða ástundun og námsárangur í náttúrufræði hlaut Saga Björgvinsdóttir.

Viðurkenningu fyrir góða ástundun og námsárangur í samfélagsfræði hlaut Þórey Þórsdóttir.

Viðurkenningu fyrir góða ástundun og námsárangur í ensku hlaut Guðmundur Arnór Shiransson.

Viðurkenningu fyrir frumkvæði, ábyrgð og áreiðanleika í tækniráði hlutu þeir Jakob Ingi Ingvarsson og Ólafur Pálmi Birgisson.

Dokkupúkinn veitti verðlaun í íslensku til minningar um Ölmu Guðrúnu Frímannsdóttur, fyrrverandi kennara G.Í.

Þau verðlaun hlaut Kristín Eik Sveinbjörnsdóttir fyrir metnað, góða ástundun og námsárangur.

Starfsfólk Grunnskólans á Ísafirði þakkar árgangi 2010 samfylgdina í gegnum árin og óskar þeim velfarnaðar í framtíðinni.

Skólaslit G.Í. verða föstudaginn 5.júní 2026 og verður skipulagið eftirfarandi:

Salur Grunnskólans:

kl. 15:30   1. og 2. bekkur

kl. 16:00   3. og 4. bekkur

kl. 16:30   5. - 7. bekkur

Ísafjarðarkirkja:

kl. 20:00   8. - 10. bekkur.

Í dag er íþrótta- og leikjadagur hjá 5. - 10. bekk á Torfnesi, þar sem nemendur spreyta sig í ýmsum leikjum, samveru og samvinnu. Leikir þroska sjálfsvitund og samskiptahæfni nemenda, auk þess sem þeir bæta líkamlega færni, andlega vellíðan og heilbrigði. Mikilvægast af öllu er þó gleðin sem skapast á dögum sem þessum í góðu veðri, góðum félagsskap og dásamlegu umhverfi. Við vonum að allir komi heim endurnærðir á sál og líkamlega eftir góðan dag.

« 1 af 7 »

Í samfélagsfræðinni í vetur hefur 6.bekkur verið að læra um Norðurlöndin, kynnst þjóðum, lífsháttum og helstu einkennum hvers og eins. Sem hluti af því námi settu nemendur upp ferðaskrifstofur í dag og kynntu öll Norðurlöndin fyrir foreldrum og starfsmönnum. Þeir reyndu að ,,selja" ferðir til landanna og mærðu hvert og eitt þeirra fyrir sín sérkenni og landslag. Úr varð hin besta kynning og erum við ekki frá því að Norðurlandaferðum muni fjölga í kjölfarið!

« 1 af 3 »

Í vetur hefur Kjartan Ágúst Pálsson, kennari, boðið nemendum miðstigs upp á valgreinina ,,Sprengjum ímyndunaraflið" þar sem nemendur fá að kynnast hinum ýmsu tilraunum.

Í gær spreyttu nemendur sig á því að búa til eldflaugar úr 2ja lítra gosflöskum sem þurftu að geta staðið stöndugar, með uggum og oddi framan á. Markmiðið var að hafa þær sem léttastar til að ná sem mestri drægni. Að því búnu var þrýstiloki festur á með röri, sem fyllt var af matarsóta og settur inn í flöskuna. Þétt var að með lokanum eftir að búið var að setja Edik í flöskuna, þannig að það blandaðist ekki fyrr en flaskan var hrist. Þá sáu nemendur hvernig edik og matarsódi mynda gas eða koltvísýringsgas, sem myndar þannig þrýsting þar til tappinn eða þrýstilokinn gaf sig og þeytti henni upp.

« 1 af 4 »

Í morgun buðu foreldrar upp á hjólastrætó í skólann, þar sem strætóleiðin var farin á hjólum úr Holtahverfi og út í skóla. Farið var af stað úr firðinum kl. 7:15 og var virkilega góð þátttaka nemenda og foreldra, sennilega um 150 manns!

Við þökkum Hebu Dís Þrastardóttur og Antoni Helga Guðjónssyni kærlega fyrir þessa skemmtilegu hugmynd, sem er að erlendri fyrirmynd -  og fyrir að koma henni í framkvæmd. Einhverjir foreldrar höfðu að orði að það hefði aldrei verið jafn auðvelt að vekja börnin og í morgun! Við vonum svo sannarlega að þessi viðburður verði endurtekinn að ári.

« 1 af 5 »

Núna í vor hefur 3. bekkur verið að læra um íslensku húsdýrin. Hápunktur þeirrar vinnu var svo heimsókn í Hóla í Dýrafirði 20. maí síðastliðinn. Þar fengu nemendur að kíkja í fjárhúsin hjá Ástu og Berta og sjá sauðburð í fullum gangi. Allir sem vildu fengu að klappa lömbum og nokkrir nemendur voru svo heppnir að sjá lamb koma í heiminn. Á heimleiðinni var stoppað á Víkingasvæðinu á Þingeyri þar sem hópurinn borðaði nesti og fékk tækifæri til að leika sér í þessu skemmtilega umhverfi. Það voru sáttir nemendur sem skiluðu sér heim í skólann í lok dags. ,,Þetta er sko besti dagur lífs míns” sagði einn drengurinn.

« 1 af 2 »

Allt frá árinu 2008 hafa fyrirtækin Klofningur og Íslandssaga á Suðureyri boðið nemendum 1.bekkjar í heimsókn til að skoða fiskvinnslurnar hjá þeim. Súgfirðingar eru miklir höfðingjar heim að sækja og hafa öll þessi ár tekið einstaklega vel á móti okkar hópum og leyst þá út með gjöfum, þar sem hver og einn nemandi fékk kassa með ýsuflökum með sér heim.

Það er okkur afar dýrmætt að eiga slíka bakhjarla, sem eru tilbúnir til að taka á móti nemendahópum okkar og fræða þá um þá vinnslu og verðmætasköpun sem er hér á svæðinu. Við þökkum Klofningi og Íslandssögu enn og aftur fyrir frábærar móttökur.

Landsmótið í skólaskák var haldið um s.l. helgi í Ólafsvík. Grunnskólinn á Ísafirði átti þar þrjá keppendur, sem stóðu sig allir með mikilli prýði. Hilmir Örn Atlason varð í 9.sæti í yngsta flokki (1.-4.bekk), Nirvaan Halldórsson varð í 10.sæti í elsta flokki (8.-10.bekk) og Karma Halldórsson sigraði í miðflokki (5.-7.bekk) eftir bráðabana.

Við óskum Karma innilega til hamingju með sigurinn og þeim öllum með frábæra frammistöðu.