Í vetur tóku nemendur 8. og 9. bekkjar þátt í Pangea stærðfræðikeppni sem er fyrir alla nemendur áttundu og níundu bekkja grunnskóla landsins. Aðalmarkmið keppninnar er að vekja áhuga hjá ungu fólki á stærðfræði, hvetja þau sem halda að stærðfræði sé of erfið til dáða með því að sýna þeim að þau geti afrekað miklu ef þau reyna, og hvetja efnilegustu nemendurna til áframhaldandi afreka.

Öll vinna við skipulagningu og framkvæmd keppninnar er unnin af sjálfboðaliðum úr Félagi Horizon og raungreina- og verkfræðinemum. Kennarasamband Íslands hefur verið skipuleggjendum innan handar við gerð prófanna.

Nú er ljóst að tveir nemendur G.Í. komust í úrslit Pangea 2026. Það eru systkinin Svaha Halldórsdóttir og Nirvaan Halldórsson. Þetta er frábær árangur hjá þeim og erum við innilega stolt af þeim systkinum og óskum þeim góðs gengis í úrslitakeppninni, sem haldin verður 18.apríl í Menntaskólanum við Hamrahlíð.

« 1 af 9 »

Í dag tóku nemendur í 5. og 7. bekk þátt í að kveðja veturinn og bjóða vorið velkomið. Nemendur gerðu myndir af kakóbollum með nokkrum aðferðum og þurftu að nota lita- og formfræðiaðferðir. Mynduppbygging var rædd, en með þessu verkefni efldu þau fínhreyfingar, notkun olíupastellita, mynsturgerð og klippimyndalist (Collage), sem er aðferð sem notuð var í Abstrakt-list, Kúbisma, Súrreallisma og Pop-list.

Afraksturinn var skemmtilegur eins og sjá má hjá þessu upprennandi listafólki, sem naut handleiðslu Solveigar Eddu Vilhjálmsdóttur, myndlistarkennara.

« 1 af 2 »

Lokahátíð Stóru upplestrarkeppninnar á norðanverðum Vestfjörðum fór fram í Félagsheimili Bolungarvíkur í gær, þriðjudaginn 7. apríl. Í henni tóku 10 nemendur úr grunnskólunum á svæðinu þátt og lásu upp úr bókinni Birtingur og símabannið mikla eftir Gunnar Helgason, ljóð eftir Vilborgu Dagbjartasdóttur og ljóð að eigin vali.

Keppnin var mjög spennandi og nemendurnir stóðu sig allir með stakri prýði. Það var því erfitt verkefni sem dómarar stóðu frammi fyrir. Niðurstaðan varð þó sú að í fyrsta sæti varð Aino Magnea Norðdahl Widell, í öðru sæti varð Guðrún Eva Þorvaldsdóttir og í þriðja sæti Eiríkur Bjarkar Jónþórsson, en þau eru öll nemendur Grunnskólans á Ísafirði.

Upplesararnir fengu allir viðurkenningarskjal og rós, en keppendur í verðlaunasætum fengu auk þess gjafir frá Pennanum/Eymundsson og Landsbankanum.

Við óskum öllum lesurum innilega til hamingju með frábæra frammistöðu og kennurum og foreldrum sem hjálpuðu til við þjálfunina.

Þá er 6 glæsilegum árshátíðarsýningum lokið og erum við afar stolt af okkar nemendum og starfsfólki. Eftir daginn í dag hefst páskaleyfi sem stendur til 6.apríl.

Kennsla hefst að loknu páskaleyfi þriðjudaginn 7.apríl samkvæmt stundaskrá. Við vekjum athygli á því að sundkennslan hefst að nýju eftir langa bið.

Við óskum starfsfólki, nemendum og fjölskyldum þeirra sem og öllum velunnurum gleðilegrar páskahátíðar!

Þó veðurspá sé slæm skal tekið fram að skólinn er opinn og vonumst við til að geta sýnt allar árshátíðarsýningar sem eru á dagskrá í dag. Einnig minnum við á reglur Ísafjarðarbæjar:

Þegar gular viðvaranir eru í gildi hjá Veðurstofu Íslands skulu foreldrar ávallt að meta sjálfir hvort óhætt sé að senda barn í skólann. Í slíkum aðstæðum er alltaf einhver hluti starfsmanna mættur í skólann til að taka á móti þeim börnum sem mæta.

Foreldrar skulu meta hvort barn hafi sjálft getu til að komast frá grunnskóla í lok dags, eða hvort foreldri þurfi að sækja barn í grunnskóla/dægradvöl.

Þegar appelsínugular eða rauðar viðvaranir eru í gildi hjá Veðurstofu Íslands þá gilda þau eindregnu tilmæli að foreldrar fylgi yngri börnum til skóla eða að stoppistöð skólabíls og yfirgefi þau ekki fyrr en þau eru í öruggum höndum starfsfólks.

Sé barn heima vegna veðurs eða ófærðar, þegar skóla hefur ekki verið aflýst, skal forráðamaður tilkynna það í síma, tölvupósti eða á Mentor/Karellen. Aðstæður fólks til að koma börnum á milli heimils og skóla eru ólíkar og er tekið tillit til þess. Tilvik sem þessi eru eðlileg forföll og eru skráð sem slík.

Miðvikudaginn 25. og fimmtudaginn 26.mars verður árshátíð skólans haldin. Í kringum slíkan viðburð þarf mikla skipulagningu starfsfólks, enda töluvert umstang við að koma sem flestum á svið í rúmlega 400 nemenda skóla. Auk þess að stíga á svið þurfa nemendur að sjá um skreytingar, hljóð, tónlist, lýsingu í sal, förðun, miðasölu, kynningar og dyravörslu, þannig að það er í mörg horn að líta.

Yfirskrift árshátíðarinnar í ár er ,,Sveitin" og verður skemmtilegt að sjá mismunandi útfærslur árganga á því viðfangsefni.

Sýningar eru þessar:

Miðvikudagur 25.mars

1. sýning kl. 9:00. Flytjendur: 1.– 6. bekkur. Áhorfendur: Nemendur í 1. og 2. bekk ásamt gestum. 

2. sýning kl. 11:00. Flytjendur: 5.–10. bekkur. Áhorfendur: Nemendur í 5.– 6. bekk ásamt gestum. 

3.sýning kl.20:00. Flytjendur: 7.-10.bekkur. Áhorfendur: Nemendur í 7.– 8. bekk ásamt gestum.

Fimmtudagur 26.mars

4.sýning kl. 9:00. Flytjendur: 1. – 6. bekkur. Áhorfendur: Nemendur í 3. og 4. bekk ásamt gestum.

5.sýning kl. 11:00. Flytjendur: 1.- 4. bekkur. Áhorfendur: Leikskólabörn og unglingastig. 

6.sýning kl. 20:00. Flytjendur: 7.–10. bekkur. Áhorfendur: Nemendur í 9.–10. bekk ásamt gestum.

Miðaverð er kr. 1.000 og greiðir hver og einn eitt gjald, þó svo að einhverjir þurfi jafnvel að koma á fleiri en eina sýningu til að sjá sín börn. Andvirði miðaverðs fer í tækjasjóð.

Við biðjum foreldra og aðra að virða tímaplanið eins og hægt er, til að forðast örtröð.

Árið 2011 lýstu Sameinuðu þjóðirnar yfir að 21.mars ár hvert væri Alþjóðadagur Downs heilkennis. Þann dag eru allt fólk hvatt til að klæðast mislitum sokkum.

Við í G.Í. fögnum og sýnum stuðning við margbreytileika lífsins með því að klæðast mislitum og/eða ósamstæðum sokkum á morgun, föstudaginn 20. mars.

« 1 af 2 »

Í morgun voru valdir 6 nemendur úr 7.bekk til að keppa fyrir hönd skólans á Lokahátíð Stóru upplestrarkeppninnar, sem fram fer í Bolungarvík fimmtudaginn 19.mars. Alls lásu 12 nemendur í morgun sögubrot og tvö ljóð, en allir nemendur 7.bekkjar hafa æft framsögn frá því á Degi íslenskrar tungu 16.nóvember s.l.

Dómarar í dag voru þau Gylfi Ólafsson, Rannveig Halldórsdóttir og Esther Ósk Arnórsdóttir. Þeim var svo sannarlega vandi á höndum, en niðurstaðan varð sú að þau Aino Magnea Norðdahl Widell, Baldur Ernir Stefánsson, Eiríkur Bjarkar Jónþórsson, Emilía Dögun Emilsdóttir, Glódís Ingudóttir og Guðrún Eva Þorvaldsdóttir verða okkar fulltrúar í keppninni. Til vara verða þær Emelía Eivör Daníelsdóttir og Kristjana Malen Pálsdóttir.

Við erum virkilega stolt af öllum nemendum 7.bekkjar sem hafa tekið miklum framförum í frasögninni síðustu vikurnar og hlökkum til að fylgjast með í næstu viku.

Teymið á bak við Sólmyrkvaleikana: Ingibjörg Fríða, Siggi, Sævar Helgi, Janus Bragi, Nina, Embla og Aude

« 1 af 6 »

Dagana 24. - 25. febrúar fóru Sólmyrkvaleikarnir fram í Edinborgarhúsinu á Ísafirði, en leikarnir eru hluti af barnamenningarhátíðinni Púkanum, sem stýrt er af Vestfjarðastofu.

Sólmyrkvaleikarnir fóru þannig fram að nemendur 5. - 7. bekkjar byrjuðu á fyrirlestri hjá Sævari Helga Bragasyni sem er betur þekktur í þeirra hópi sem Stjörnu-Sævar. Hann sagði þeim á sinn innblásna hátt frá almyrkva á sólu sem Vestfirðingar verða í kjöraðstæðum til að upplifa þann 12. ágúst næstkomandi – í eina sinn á lífsleiðinni fyrir þau sem fædd eru eftir 1954.

Að fyrirlestri loknum tóku við vinnustofur þar sem allir fengu að taka þátt í skuggaleikhússmiðju með Aude og Emblu frá Þykjó, vísindasmiðju með Sævari og Ninnu frá Þykjó og tónlistarsmiðju með Sigga og Ingibjörgu. Með í för var kvikmyndagerðarmaðurinn Janus Bragi sem myndaði það sem fram fór til að skapa úr því stuttmynd sem sýnd verður þegar Púkinn fer fram dagana 27. apríl-8. maí. Þar mun líka hljóma lag sem Siggi og Ingibjörg hafa sett saman upp úr tónlistarsmiðjunum og útsett.

Ungmennaráð Vestfjarða valdi hafið sem þema Púkans í ár og vildu þau jafnframt sjá samspil lista og vísinda, og samstarf eiga sér stað. Í allri vinnu Þykjó í kringum þetta verkefni hefur verið lögð áhersla á að uppfylla óskir ungmennaráðsins. 

« 1 af 6 »

Nemendur 3.bekkjar vinna í myndmennt út frá kveikju við eigin listsköpun, bæði í tví- og þrívíðu formi samkvæmt Aðalnámskrá. Einnig læra þeir ýmis hugtök og heiti myndlistar og styrkja fínhreyfingar sem og ímyndunaraflið. Þetta hafa þeir þjálfað undir leiðsögn Solveigar Eddu Vilhjálmsdóttur, myndlistarkennara.

Í morgun var einn hópur árgangsins að vinna með mynsturgerð og klippingu, ýmist í svarthvítu eða í lit og úr urðu hin litríkustu og fjölbreyttustu verk eins og sjá má á meðfylgjandi myndum.