VALMYND ×

Fréttir

Páskaleyfi

Í dag vantaði í það minnsta þriðjung nemenda í skólann vegna ófærðar og vegalokana. Samkvæmt útgefnum verkreglum lokum við ekki skóla nema í algjörri neyð og látum þá foreldra fá þær upplýsingar í pósti fyrir klukkan 7 að morgni. Einnig er það auglýst hér á heimasíðunni og á Facebook síðu skólans fyrir klukkan 7.

Því miður gátum við ekki haldið loka árshátíðarsýninguna í morgun eins og til stóð, þar sem margir nemendur og starfsfólk var fjarverandi, en stefnum að því sem fyrst eftir páska og auglýsum það þegar tímasetning liggur fyrir.

Nú tekur páskaleyfi við og óskum við starfsfólki, nemendum og fjölskyldum gleðilegrar páskahátíðar. Skólahald hefst að páskaleyfi loknu þriðjudaginn 2.apríl 2024.

 

Ófærð

Í dag er Skutulsfjarðarbraut frá Grænagarði að Tunguá lokuð ásamt Eyrarhlíð. Strætisvagnar ganga ekki fram að hádegi. Skólinn er samt opinn fyrir þá sem komast og fellum við niður árshátíðarsýningu sem vera átti í dag.

Kvöldsýningu árshátíðar frestað

Vegna óveðurs og óvissustigs verðum við því miður að fresta kvöldsýningunni í dag fimmtudaginn 21.mars til morguns föstudagsins 22.mars kl.9:00.
Þessi sýning er fyrir 9. og 10.bekk og þeirra gesti, og sýnd verða atriði frá 7. - 10.bekk.
Við vonum að þessi ráðstöfun komi sér ekki illa fyrir gesti 9. og 10.bekkjar.

Skólinn opinn í dag

Skólinn verður opinn í dag þrátt fyrir appelsínugula viðvörun. Við hvetjum þó alla til að fara varlega og biðjum foreldra að fylgja yngri börnum að strætó eða í skólann. Ef foreldrar hafa börn sín heima í dag skal það tilkynnt í Mentor.

Appelsínugul veðurviðvörun

Á morgun, mánudaginn 18.mars 2024 er appelsínugul veðurviðvörun og spáð norðaustan 18-25 m/s og snjókomu. Við bendum foreldrum á verklag Ísafjarðarbæjar er óveður geisar, en samkvæmt því geta foreldrar haldið börnum sínum heima og tilkynnt það í gegnum Mentor. 

Við munum taka stöðuna í fyrramálið og gefum frekari upplýsingar fyrir kl. 7:00 ef röskun verður á skólahaldi.

Árshátíð í næstu viku

Prúðbúnir dyraverðir á árshátíð 2014
Prúðbúnir dyraverðir á árshátíð 2014

Miðvikudaginn 20. mars og fimmtudaginn 21. mars verður árshátíð skólans haldin. Yfirskriftin þetta árið er ,,Innlit í áratug" og verður gaman að sjá hvert hver og einn árgangur leiðir okkur að þessu sinni. Nemendur hafa æft stíft þessa vikuna og er spennan farin að magnast. Það getur verið flókið að koma 390 nemendum í hlutverk, en allt hefst þetta að lokum með mikilli vinnu og útsjónarsemi starfsmanna. Ekki má gleyma því að fjölmargir nemendur koma að tæknimálum, kynningum, förðun, sviðsstjórn og fleiru, auk þeirra sem stíga á svið, þannig að styrkleikar hvers og eins fá að njóta sín sem best og öll hlutverk mikilvæg.

Við höfum nú fjölgað sýningum frá því í fyrra, þegar áhorfendafjöldi flæddi nánast út úr húsi á kvöldsýningu. Við höfum því tvær kvöldsýningar þetta árið til að mæta því. Sýningarnar verða eins og hér segir:

Miðvikudagur 20. mars 2024

1.sýning kl. 9:00, flytjendur 1. - 6. bekkur, nemendur í 1. og 2. bekk horfa á ásamt sínum gestum

2.sýning kl.11:00, flytjendur 5.-10.bekkur, nemendur í 5. og 6. bekk horfa á ásamt sínum gestum

3.sýning kl.20:00, flytjendur 7.-10.bekkur, nemendur í 7. og 8. bekk horfa á ásamt sínum gestum.

 

Fimmtudagur 21.mars 2024

4.sýning kl. 9:00, flytjendur 1. - 6. bekkur, nemendur í 3. og 4. bekk horfa á ásamt sínum gestum

5.sýning kl.11:00, flytjendur 1. - 4. bekkur, nemendur Tanga og unglingastig horfa á (engir utanaðkomandi gestir)

6.sýning kl.20:00, flytjendur 7.-10. bekkur, nemendur 9. og 10. bekk horfa á ásamt gestum.

 

Miðaverð er kr. 1.000 fyrir gesti og er hægt að nýta miðann á fleiri en eina sýningu ef á þarf að halda. Aðeins er tekið við peningum, enginn posi á staðnum. Andvirði miðasölu fer í tækjasjóð. Við biðjum foreldra og aðra gesti að virða skipulagið eins og hægt er til að komast hjá sem mestri mannþröng.

Astoðarskólastjóri í námsleyfi veturinn 2024 - 2025

Helga S. Snorradóttir aðstoðarskólastjóri verður í námsleyfi næsta skólaár. Guðný Stefanía Stefánsdóttir kennari mun leysa hana af og verður því aðstoðarskólastjóri skólaárið 2024-2025.

Fyrsti hluti upplestrarkeppninnar

Í morgun fór bekkjakeppni Stóru upplestrarkeppninnar fram í 7.bekk. Allir nemendur árgangsins hafa æft sig undanfarnar vikur og lásu þeir sögubrot og ljóð að eigin vali. Árangurinn var líka eftir því og stóðu allir sig með prýði.

Þeir sem komust áfram í skólakeppnina sem verður haldin þann 4.apríl eru Magnús Húni, Matthías Kristján, Pétur Arnar, Aðalheiður, Vanda Rós, Salka Rosina, Elínborg Birna, Emelía Rós, Birkir Hafsteinn, Einar, Simon Richard, Nadia, Emilía Rós, Margrét Rán, Freyja Rún og Edda Sigríður. Til vara verða þau Patrekur Rafn og Amelia Anna.

Við óskum öllum 7.bekkingum til hamingju með góðan árangur í lestrarþjálfuninni og hlökkum til að fylgjast með framhaldinu.

Skíða- og útivistardagur

Frá skíðadegi 2018
Frá skíðadegi 2018

Miðvikudaginn 6.mars ætlum við að hafa skíða- og útivistardag í Tungudal hjá 5. - 10. bekk. Við biðjum þá sem geta að sameinast í einkabíla, en ein rúta fer frá skólanum kl. 10:00 og til baka úr Tungudal kl. 13:00. Engin kennsla er frá kl. 8:00 - 10:00 hjá þessum árgöngum. Þeir sem ekki eiga skíðabúnað geta komið með sleða, þotur eða annað til að renna sér á, en einnig er hægt að fá skíði lánuð endurgjaldslaust í skíðaskálanum, á meðan birgðir endast. Mötuneytið sendir samlokur og fernur á svæðið fyrir áskrifendur og verður hægt að grilla þær í skálanum.

Það stefnir í að veðrið leiki við okkur og vonum við svo sannarlega að allir njóti dagsins sem best.

Chromebook tölvur á unglingastig

1 af 2
Grunnskólinn á Ísafirði hefur notað iPad í kennslu frá árinu 2014. Nemendur í 5.-10. bekk hafa verið með eitt tæki á mann en á yngsta stigi hafa verið bekkjarsett. Tækin hafa sett nýja vídd í kennsluna á margan hátt og aukið fjölbreytni í kennsluháttum. Það eina sem vantaði við spjaldtölvurnar var lyklaborð, en eitt af markmiðum aðalnámskrár er að nemendur læri fingrasetningu en það er með hana eins og annað að það þarf að halda við þekkingunni. Við höfum náð því að nokkru leyti með nýtingu tölva í tölvuveri, en betur má ef duga skal.
Síðasta haust var því  ákveðið að láta 10. bekk frá Chromebook tölvur, þar sem nemendur í elstu bekkjunum eru að vinna mun meira með ritun í stærri verkefnum. Chromebook tölvur eru fartölvur sem hafa lítið minni og vista allt efni á skýi. Nemendur á unglingastigi nota Google Classroom í miklum mæli til verkefnaskila en tækin eru hönnuð utan um það kerfi. Tækin leyna þó á sér því hægt er að snúa þeim við og nota sem spjaldtölvur og fylgir því sérstakur penni með. Það eina sem tækin bjóða ekki upp á er léttleikinn sem fylgir myndbandsupptökum á iPad og munu því nokkrar spjaltölvur vera til útláns á bókasafni fyrir nemendur sem vilja vinna þannig verkefni. Þó að afhending hafi dregist voru það samt nemendur í 10. bekk sem fengu að vígja tækin, en næsta vetur ættu bæði 9. og 10. bekkur að vera komnir með Chromebook.