Þorgrímur Þráinsson Mynd: NB forlag

Í gær heimsótti Þorgrímur Þráinsson, rithöfundur og fyrrverandi knattspyrnumaður nemendur í 9. og 10. bekk með fyrirlesturinn ,,Verum ástfangin af lífinu".  Þar fjallaði hann um markmiðasetningar, árangur og lífið sjálft og hvatti nemendur til að láta drauma sína rætast með því að bera ábyrgð á eigin lífi, setja sér markmið, hafa trú á sjálfum sér til að ná markmiðunum og skipuleggja sig í samræmi við það.

Þorgrímur fjallaði einnig um mikilvægi þess að halda góðu jafnvægi milli einkalífs, atvinnu og tómstunda til þess að þroskast fallega og lifa björtu lífi. Þá hvatti hann nemendur til að sýna samkennd, bera virðingu fyrir öllum og hafa hugrekki til að fylgja hjartanu, því við erum öll einstök og eigum að njóta þess.

Þorgrímur hefur farið með þennan fyrirlestur sinn um allt land og er nær alveg einstaklega vel til nemenda. Við þökkum honum kærlega fyrir komuna.

Unglingarnir hlaupa af stað

Fallegt haustveður

« 1 af 2 »

Í morgun tók skólinn þátt í Ólympíuhlaupi ÍSÍ sem nú hefur tekið við af Norræna skólahlaupinu sem hefur verið hluti af skólaíþróttum síðan 1984. Með Ólympíuhlaupi ÍSÍ er leitast við að hvetja nemendur skólanna til þess að hreyfa sig reglulega og stuðla þannig að betri heilsu og vellíðan.

Hlaupið var frá horni Seljalandsvegar og Urðarvegar. Yngstu nemendurnir hlupu inn að Engi og til baka, miðstigið inn að Seljalandi og til baka og unglingarnir gátu valið um að hlaupa inn að Seljalandi eða golfskála. Vel tókst til þrátt fyrir lágt hitastig, en veður var bjart og úrkomulaust og hið ágætasta hlaupaveður.

« 1 af 3 »

Í morgun fengum við Pál Halldór Halldórsson, Hnífsdæling og rallýkappa með meiru í heimsókn til okkar með veltibílinn. Veltibíllinn er í eigu Brautarinnar – bindindisfélags ökumanna og er af gerðinni VW Golf en kerran var smíðuð á Íslandi. Markmið heimsóknarinnar var að fræða nemendur um mikilvægi öryggisbelta í bifreiðum, sem Páll innti vel af hendi. Allir nemendur skólans sem vildu fengu að prófa bílinn, sem fór nokkrar veltur með 5 farþega í einu. Krökkunum fannst þetta mikil upplifun og gera sér vonandi enn frekari grein fyrir nauðsyn beltanna í framtíðinni.

Í ljósi aukningar á Covid smitum síðastliðna helgi þá verðum við að vera enn varkárari og enn meðvitaðri um okkar einstaklingsbundnu sóttvarnir og passa sérstaklega upp á nálægðartakmörkin sem er einn metri og ef við getum komið tveggja metra nálægðartakmörkum við þá er það enn betra. Við viljum hafa aðgengi utanaðkomandi aðila sem ekki tengjast skólastarfinu sem minnst og þeir aðilar sem þó verða að koma inn í skólann virði tveggja metra regluna auk persónubundnu sóttvarnanna. Starfsemi sem ekki tengist skólanum er ekki leyfð til og með 5. október t.d. óformlegt íþróttastarf fullorðinna sem ekki tilheyrir ÍSÍ og hópfundir með foreldrum.
Þetta þýðir að við verðum að fresta öllum foreldrafundum þar til eftir 5. október en hvetjum foreldra til að vera í góðu sambandi við okkur í skólanum. Foreldrar sem eiga erindi í skólann eiga að spritta hendur við inngang og hafa samband við ritara.
Við höfum fullan skilning á því að fólk sé orðið langþreytt á þessu ástandi en við verðum að gera allt sem í okkar valdi stendur til að starfsemi skólans haldist órofin.

Í kvöld heldur 10.bekkur haustball í salnum okkar góða. Ballið er fyrir nemendur 8. - 10. bekkjar og er frá kl. 19:30-22:30. Aðgangseyrir er kr. 1.000 og verður sjoppa á staðnum með krap, gos og nammi. Rúta fer í Hnífsdal og inn í fjörð að loknu balli. Nemendum frá nágrannaskólum okkar er boðið á ballið ásamt fylgdarmanni.

10. bekkur hvetur sem flesta til að mæta og skemmta sér með þeim.

« 1 af 3 »

Nemendur 5.bekkjar hafa verið að skoða útilistaverk bæjarins undanfarið og lært ýmislegt fróðlegt um þau. Á meðfylgjandi myndum má sjá myndir af nokkrum verkum sem nemendur unnu eftir slíka skoðunarferð.

« 1 af 2 »

Í gær og fyrradag vorum við svo heppin að fá heimsókn frá dönsurunum Valgerði Rúnarsdóttur og Snædísi Lilju Ingadóttur, á vegum verkefnisins List fyrir alla, í boði Dansgarðsins sem eru samtök um danskennslu og dansfræðslu.

Þær stöllur gerðu loftið að viðfangsefni sínu þar sem kannaðir voru alls kyns hreyfimöguleikar líkamans og hvernig hann tengist rýminu, ryþma og tónlist. Þær náðu vel til nemenda og fengu þá til þess að virkja sköpunarkraftinn í gegnum danslistina og veittu þeim góða innsýn í þá listgrein.

Verkefnið Göngum í skólann er nú hafið og er skólinn skráður til leiks. Meginmarkmið verkefnisins er að hvetja nemendur og foreldra á Íslandi til að ganga, hjóla eða nota annan virkan ferðamáta til og frá skóla, hvetja til aukinnar hreyfingar og fræða börn um ávinning reglulegrar hreyfingar. Með þessu er ætlunin að hvetja til heilbrigðs lífsstíls fyrir alla fjölskylduna en hreyfing vinnur m.a. gegn lífsstílstengdum sjúkdómum, stuðlar að streitulosun og betri sjálfsmynd. Einnig er markmiðið að auka færni barna til að ganga á öruggan hátt í skólann og kenna reglur um öryggi á göngu og á hjóli. 

Í ár tekur Ísland þátt í 14. skipti í þessu alþjóðlega verkefni sem hófst í Bretlandi árið 2000 og hefur þátttaka stöðugt farið vaxandi. 

« 1 af 2 »

Ein af valgreinunum hjá unglingastiginu í vetur sem og undanfarin ár nefnist tækniráð. Í tækniráði læra nemendur helstu þætti ljósa- og hljóðvinnu og stýra þeim þáttum þegar settar eru upp leiksýningar og árshátíðarsýningar hér í skólanum, undir styrkri stjórn Evu Friðþjófsdóttur. 

Í síðustu viku fékk tækniráðið góða heimsókn þegar Friðþjófur Þorsteinsson kom og hélt fyrirlestur fyrir nemendur um lýsingu. Hann er ljósa- og sviðsmyndahönnuður og ráðgjafi við hönnun og endurbætur sviðslistahúsa. Nemendur nutu aldeilis góðs af þessari heimsókn og þökkum við Friðþjófi kærlega fyrir að gefa sér tíma til að heimsækja okkur.