Skólaslit G.Í. verða á morgun, þriðjudaginn 8. júní.

Nemendur 1. bekkjar eru boðaðir sérstaklega til fundar við umsjónarkennara, en nemendur 2. - 7. bekkjar mæta í sínar umsjónarstofur kl. 10:00 og hitta sína kennara.

Fyrir nemendur 8. - 10. bekkjar verður formleg athöfn í Ísafjarðarkirkju kl. 20:00 sama dag. Því miður getum við einungis boðið aðstandendum 10.bekkjar, vegna upplýsinga sem við fengum frá Heilbrigðisráðuneytinu varðandi hámarksfjölda. Vonandi verður þetta í síðasta skipti sem við þurfum að vera með einhverjar takmarkanir vegna Covid og við stefnum ótrauð og bjartsýn á næsta skólaár.

Margrét Mjöll, Soffía Rún og Elísabet María

Saga Björgvinsdóttir

« 1 af 2 »

Þrjár hugmyndir nemenda G.Í. komust í úrslit í Nýsköpunarkeppni grunnskólanna þetta árið og fengu allar viðurkenningarskjal undirritað af Menntamálaráðherra.

Hugmyndirnar voru þessar:

Hvað viltu gera - Margrét Mjöll Sindradóttir og Soffía Rún Pálsdóttir 7.bekk

Innstungudóterí - Elísabet María Gunnlaugsdóttir 7.bekk og

Skinnskór - Saga Björgvinsdóttir 5.bekk.

Í úrslitum hlaut Saga Björgvinsdóttir umhverfisverðlaun NKG og Hugverkastofu fyrir hugmynd sína og hlaut hún að verðlaunum 25.000 kr. gjafabréf í ELKO ásamt viðurkenningarskjali, undirrituðu af Guðna Th. Jóhannessyni, forseta Íslands.

Elísabet María Gunnlaugsdóttir hlaut svo hönnunarbikar NKG í úrslitum, fyrir hönnun sína og 25.000 kr. gjafabréf í ELKO og viðurkenningarskjal, undirritað af Guðna Th. Jóhannessyni, forseta Íslands.

Við erum afar stolt af öllum okkar þátttakendum og óskum vinningshöfum innilega til hamingju. Ekki má gleyma hlutverki Ólafar Dómhildar Jóhannsdóttur kennara, sem hefur stýrt ferlinu af sinni alkönnu snilld og fest nýsköpunarkeppnina í sessi hér í skólanum.

Lesa má nánar um keppnina og hugmyndir nemenda á www.nkg.is 

Nemendur 8.bekkjar heimsóttu Hrafnseyri við Arnarfjörð í gær, þar sem Valdimar J. Halldórsson, staðarhaldari, fræddi nemendur um sögu staðarins og einnig var safnið um Jón Sigurðsson skoðað. Farið var í leiki á túninu og að lokum fékk hópurinn að heyra söguna af galdramanninum sem hvílir í kirkjugarðinum.

Eftir það var farið yfir að Dynjanda þar sem starfsmenn grilluðu pylsur á meðan nemendur skoðuðu fossinn. Hópurinn var heppinn með veður, það rigndi bara rétt á meðan gengið var frá grillinu.

Við erum heppin að hafa slíkan sögustað sem Hrafnseyri er en saga 19.aldar er einmitt eitt af viðfangsefnum 8.bekkjar og sjálfstæðisbarátta Íslendinga með Jón Sigurðsson í broddi fylkingar.

« 1 af 8 »

Í dag er leikjadagur hjá 1. - 4. bekk á Torfnesi þar sem íþróttakennarar hafa skipulagt hina ýmsu leiki. Nemendum er skipt í hópa sem fara í bandý, hlaupaleiki, hringleiki og boltafjör. Veðrið hefur leikið við okkur eins og sést á meðfylgjandi myndum og vonandi hafa allir skemmt sér sem best. Fjörinu lýkur um kl. 11:30 þegar allir koma til baka í hús.

Það hefur því miður verið lítið um félagslíf hjá nemendum í vetur vegna ástandsins í samfélaginu. 10.bekkur nær þó að halda lokaballið sitt fimmtudaginn 3.júní í matsal skólans. Nemendum 7. - 9.bekkjar er boðið og kostar aðgöngumiðinn kr. 1.000. Sjoppa verður á staðnum með krap, popp, gos og nammi til að auka dansorkuna.

Ballið er frá kl. 19:30 - 22:30 og fer rúta út í Hnífsdal og inn í fjörð að ballinu loknu.

« 1 af 4 »

Í morgun fór 6.bekkur inn í Tungudal til gróðursetningar. Yrkjusjóður úthlutaði skólanum 134 birkiplöntum sem nemendur settu niður og vonum við að þær eigi eftir að dafna vel.

Nú er heimferðardagur hjá 10.bekk og er áætluð brottför frá Bakkaflöt kl. 12:00. Ferðin hefur gengið vel þrátt fyrir að veður hafi sett strik í reikninginn. Hópurinn komst ekki í ,,river rafting" í fyrradag eins og til stóð vegna hvassviðris, en krakkarnir vöknuðu þess í stað snemma í morgun og náðu að ljúka þeirri ferð.

Áætluð heimkoma er um kl. 19:00 í kvöld.

« 1 af 2 »

Nemendur 10.bekkjar lögðu af stað í skólaferðalag norður að Bakkaflöt í Skagafirði í morgun. Auk nemenda eru umsjónarkennarar og nokkrir foreldrar með í för og mun hópurinn dvelja á Bakkaflöt fram á mánudag. Dagskráin er þétt og skemmtileg næstu daga hjá þeim og vonum við að allir njóti ferðarinnar sem best.

« 1 af 5 »

Litla Act alone bauð öllum nemendum skólans upp á einleikna viðburði í morgun í Hömrum. Yngsta stigið naut skemmtilegrar dagskrár í tali og tónum með Aðalsteini Ásberg Sigurðssyni, sem ber nafnið Karímarímambó.  Eldri nemendum var boðið upp á súkkulaðióperuna Bon appétit! með Guju Sandholt.

Nemendur kunnu vel að meta þessa listviðburði og þökkum við kærlega fyrir okkur.

« 1 af 5 »

Vordagskráin hjá okkur er fjölbreytt og skemmtileg eins og áður og nemendur og starfsfólk úti um hvippinn og hvappinn þessa dagana. Vinabekkirnir 2. og 9. bekkur fóru í heimsókn í Raggagarð í Súðavík í morgun og léku sér saman í blíðunni. Ferðin tókst vel í alla staði og virkilega gaman að geta nýtt sér þessa frábæru aðstöðu hjá nágrönnum okkar í Súðavík.