Hér má sjá reglugerðina í heild sinni. 

1.bekkur á sviði

Árshátíð skólans fór fram miðvikudaginn 24.mars síðastliðinn og var skólum landsins lokað af sóttvarnarástæðum í lok þess dags. Ætlunin var að sýna árshátíðaratriði allra bekkja aftur á fimmtudeginum, en það tókst ekki. Við vorum samt það heppin að fá Viðburðastofu Vestfjarða til að taka upp allar sýningar á miðvikudeginum. Foreldrar hafa nú fengið krækjur á sýningar sinna barna og geta hlaðið þeim niður til 1. júní næstkomandi. Efnið verður einnig varðveitt hér í skólanum. 

Við fyllumst alltaf stolti þegar við sjáum stóra sem smáa á sviði og allir hafa sín hlutverk og leggja sig fram um að skila sínu sem best. Ekki má heldur gleyma þeim nemendum sem standa utan sviðs og gera þetta gerlegt með stjórnun hljóðs, lýsingar, förðunar og sviðsstjórnar. 

Við vonum að aðstandendur séu ánægðir með þá lausn að taka sýningarnar upp, þar sem ekki var mögulegt að bjóða áhorfendum í hús í þessu covid-ástandi. Njótið vel!

Úthlutað hefur verið úr Sprotasjóði Mennta- og menningarmálaráðuneytisins fyrir skólaárið 2021-2022. Grunnskólinn á Ísafirði hlaut 900.000 kr. ásamt Grunnskólanum á Suðureyri, Grunnskóla Önundafjarðar, Grunnskólanum á Þingeyri, Súðavíkurskóla og Grunnskóla Bolungarvíkur, til innleiðingar leiðsagnarnáms. Veittir voru styrkir til 42 verkefna að upphæð rúmlega 54 millj. kr. og var eitt annað verkefni á Vestfjörðum sem hlaut styrk.

Markmið verkefnisins er að innleiða leiðsagnarnám sem byggt er á aðferðafræði Shirley Clarke, í öllum grunnskólum á norðanverðum Vestfjörðum. Í stuttu máli má segja að leiðsagnarnám snúist um að hjálpa nemandanum til að komast frá þeim stað sem hann er á í náminu og að markmiði sínu. Með því móti verða gæði náms aukin sem skilar sér í valdeflingu nemenda og meiri námsáhuga og ábyrgðar á eigin námi. Ennfremur mun verkefnið efla fagvitund kennara og annars starfsfólks skólanna og bæta samstarfsvettvang á norðanverðum Vestfjörðum, þvert á sveitafélög.

Verkefnið mun standa yfir frá ágúst 2021 - desember 2023 og hefur Nanna Kristín Christiansen tekið að sér að leiðsegja skólunum gegnum þetta ferli. Hún er fyrrverandi verkefnastjóri hjá fagskrifstofu skóla- og frístundasviðs Reykjavíkur og stýrði innleiðingu leiðsagnarnáms hjá Reykjavíkurborg. 

Styrkur þessi verður fyrst og fremst nýttur til námskeiða fyrir alla starfsmenn skólanna og kemur sér því afar vel við innleiðinguna. Lesa má nánar um styrkveitingar Sprotasjóðs hér.

Nú er nýja sóttvarnarreglugerðin frá heilbrigðisráðherra komin út.  Hún gildir til og með 15. apríl. Hún lítur betur út en við þorðum að vona og verða engar breytingar á kennslu:

• Nemendur eru undanþegnir nálægðartakmörkun og grímuskyldu.
• Hámarksfjöldi starfsmanna er 20 manns í rými og þeir mega fara milli rýma.
• Starfsfólk skal virða 2 metra fjarlægðarreglu sín á milli og gagnvart nemendum en nota grímu ella.

• Viðburðir eru heimilir í skólastarfinu með þátttöku nemenda og starfsfólks en engum utanaðkomandi.
• Hámarksfjöldi nemenda í rými er 50 og blöndun milli hópa innan sama skóla er heimil.
• Í sameiginlegum rýmum skóla, svo sem við innganga, í anddyri, á salerni og göngum, sem og í mötuneytum og skólaakstri, er heimilit að víkja frá fjöldatakmörkun að því gefnu að starfsfólk noti andlitsgrímu.
• Allir sem koma í skólann eiga að vera með andlitsgrímu.
• Ráðstafanir skulu gerðar til að þrífa og sótthreinsa byggingar eftir hvern dag og milli hópa í sama rými.

Kennsla hefst því samkvæmt stundaskrá  þriðjudaginn 6. apríl og vonum við að ekki þurfi að gera frekari ráðstafanir.

Með ósk um gleðilega páska

Olga og Helga.

« 1 af 21 »

Unglingar í heimilisfræðivali hjá Guðlaugu Jónsdóttur, heimilisfræðikennara, bökuðu og skreyttu tertur síðustu dagana fyrir páskaleyfi. Á meðfylgjandi myndum má sjá afraksturinn í höndum stoltra bakaranna og myndu þessar tertur sóma sér vel á hvaða veisluborði sem er.

Þekking og leikni í heimilisstörfum er kjarni heimilisfræðinnar og honum tengjast allir þættir námsins, fræðilegir sem verklegir. Það er heilmikið nám sem fram fer í gegnum bakstur sem þennan og stoltið og gleðin sem skín af nemendum ber þess merki að vinnan hafi verið vel þess virði. 

Nú er undirbúningur fyrir árshátíðina okkar hafinn og leikæfingar og búningamátun í hverju horni. Að þessu sinni verða eingöngu nemendasýningar þar sem við getum ekki komið áhorfendum fyrir miðað við þær takmarkanir sem eru í gildi. Við þyrftum að hafa 1 metra á milli óskyldra aðila og þá kæmust milli 50 og 60 manns í salinn. Sá áhorfendafjöldi myndi ekki einu sinni duga fyrir einn árgang. Við munum því að taka sýningarnar upp og senda tengil til foreldra. Nemendasýningarnar verða 24. og 25. mars - á skólatíma. Skipulagið á sýningunum er eftirfarandi:

1. sýning -miðvikudaginn 24. mars kl. 8:30.
Flytjendur: 1. - 7. bekkur. Áhorfendur: Nemendur í 2.-4.bekk

2. sýning - miðvikudaginn 24. mars kl. 9:50.
Flytjendur: 5.-10. bekkur. Áhorfendur: Nemendur í 5.-7. bekk.

3. sýning - fimmtudaginn 25. mars kl. 8:30
Flytjendur: 1.-4. bekkur Áhorfendur: 1. bekkur og nemendur af Tanga

4. sýning - fimmtudaginn 25. mars kl. 9:50.
Flytjendur: 5.-10. bekkur. Áhorfendur: 8.-10. bekkur.

Á miðvikudeginum verður kennsla fram að mat hjá 5.-10. bekk. Að öðru leyti verður kennsla samkvæmt stundaskrá þessa daga. Við vonum svo að eftir þessi undarlegu ár getum við verið með sýningar fyrir gesti á næsta ári.

Í gær fór lokahátíð Stóru upplestrarkeppninnar fram í Hömrum. Þrettán nemendur úr 7.bekk grunnskóla á norðanverðum Vestfjörðum, lásu sögubrot eftir Bergrúnu Írisi Sævarsdóttur og ljóð eftir Kristján frá Djúpalæk. Jóna Benediktsdóttir, skólastjóri Grunnskólans á Suðureyri var kynnir hátíðarinnar og Herdís M. Hübner hélt erindi um lestur. Dagný Rut Davíðsdóttir, sem varð í 2.sæti keppnninnar í fyrra, kynnti skáld keppninnar.

Flutt voru tónlistaratriði af nemendum Tónlistarskóla Ísafjarðar. Lúðrasveit T.Í. flutti 2 lög, Þórunn Hafdís Stefánsdóttir lék á pianó lagið Stingum af og Katrín Fjóla Alexíusdóttir lék á gítar lagið Raindrops keep falling on my head.

Dómarar keppninnar að þessu sinni voru þau Bergþór Pálsson, Jóna Símonía Bjarnadóttir og Kristbjörg Sunna Reynisdóttir. Niðurstaðan varð sú að Margrét Mjöll Sindradóttir frá Grunnskólanum á Ísafirði sigraði, í öðru sæti varð Marcin Anikiej frá Grunnskólanum á Suðureyri og Jón Guðni Guðmundsson frá Grunnskóla Bolungarvíkur hafnaði í því þriðja.

Við óskum öllum keppendum, foreldrun og kennurum þeirra innilega til hamingju með frábæran árangur.

Í samræmdu könnunarprófi í íslensku í 9. bekk sem lagt var fyrir í morgun komu upp tæknileg vandamál í prófakerfi. Vandinn lýsti sér í því að margir nemendur áttu erfitt með að komast inn í prófin eða duttu út úr kerfinu áður en þeir höfðu lokið próftöku. Menntamálastofnun ber ábyrgð á framkvæmd samræmdra könnunarprófa í grunnskólum og harmar þau vandamál sem komu upp við fyrirlögn þeirra. Stofnunin er nú að greina stöðuna með þjónustuaðila prófakerfisins og vinna að viðeigandi úrlausn. Þar sem ekki hefur fengist fullnægjandi lausn á þeim vanda sem upp kom var nauðsynlegt að endurskoða fyrirlögn prófanna.
Að höfðu samráði við Mennta- og menningarmálaráðuneyti hefur verið ákveðið að fresta samræmdum könnunarprófum í stærðfræði og ensku í þessari viku. Skólum er gefinn kostur á að leggja öll þrjú samræmdu könnunarprófin fyrir á tveggja vikna tímabili frá og með næsta mánudegi.
Við í GÍ höfum ákveðið að leggja íslensku prófið fyrir aftur þar sem langflestir lentu í vandræðum í prófatökunni. Prófin verða því á þriðjudaginn 16. mars (íslenska), miðvikudaginn 17. mars (stærðfræði) og fimmtudaginn 18. mars (enska).
Krakkarnir stóðu sig eins og hetjur í erfiðum aðstæðum og þykir okkur miður að þetta hafi farið svona. Vonandi ganga prófin snurðulaust fyrir sig í næstu viku.

Skólinn hefur nú gefið út nýja viðbragðsáætlun gegn einelti sem tók gildi 1.mars síðastliðinn. Foreldrar og starfsmenn hafa kallað eftir endurbótum sem er nú lokið. Sjálfsmatsteymi skólans, sem skipað er 5 starfsmönnum, tók áætlunina saman ásamt fulltrúa foreldrafélags skólans. Hún var svo lögð fyrir alla starfsmenn og skólaráð, sem skipað er fulltrúum nemenda, starfsmanna, foreldra og grenndarsamfélags. Það er því mikil vinna sem liggur að baki og allir framangreindir aðilar ánægðir með útkomuna.

Við hvetjum alla til að kynna sér þessa nýju útgáfu sem við vonum að eigi eftir að gera vinnsluferlið markvissara og áhrifaríkara.