Við vorum minnt á það í dag hverju við getum átt von á varðandi Covid-19. Það var grunur um nýtt smit í skólanum í dag. Sá grunur reyndist ekki á rökum reistur heldur var um gamalt smit að ræða og einstaklingurinn ekki smitandi. Þetta hefur því engin áhrif á skólastarf og verður það með eðlilegum hætti á morgun (og vonandi alla daga). Við erum meðvituð um smit í bænum og sendum nemendur heim með námsgögn komi til þess að þeir þurfi að vera heima einhverja daga. Staðan er samt sú að það eru alltaf einhverjir nemendur og starfsmenn í úrvinnslusóttkví þannig að við verðum að halda vel vöku okkar varðandi sóttvarnir og smitgát. Við vinnum alltaf eftir fyrirmælum og leiðbeiningum sóttvarnaryfirvalda og gerum allt sem við getum til að reyna að koma í veg fyrir smit.

Af gefnu tilefni viljum við benda á að ný umferðarlög nr.77/2019 tóku gildi þann 1.janúar 2020. Hér má finna atriði er varða umferðaröryggi allra nemenda og hvetjum við foreldra og aðra forráðamenn til að fara yfir öryggismál með sínum börnum. Rafhlaupahjólum/vélknúnum hlaupahjólum hefur fjölgað í umferðinni og er mjög mikilvægt að gæta að öllum öryggisbúnaði hvað þau varðar. Samkvæmt lögum ber ungmennum yngri en 16 ára að nota hjálma á reiðhjólum og eru þau hvött til að gera slíkt hið sama á hlaupahjólunum.

Á vefnum www.umferd.is má auk þess finna allskyns fræðsluefni fyrir unga fólkið okkar í umferðinni.

Allur hópurinn saman kominn á Reykjum

7.bekkur hefur dvalið í Skólabúðunum að Reykjum í Hrútafirði þessa viku og eru á heimleið í dag. Starfið í skólabúðunum beinist í öllum aðalatriðum að sömu markmiðum og starfið í grunnskólum. Lögð er sérstök áhersla á aukna samstöðu og eflingu samvinnu, félagslegrar aðlögunar og þroska nemenda. Einnig snýst dvölin um að takast á við áður óþekkt verkefni, kynnast nýju umhverfi og ólíkum lífsmáta. Nemendur fá nasaþefinn af heimavistarforminu og er alltaf viss eftirvænting hjá nemendum að fá að dvelja saman nánast allan sólarhringinn. Þessa viku eru auk nemenda G.Í. nemendur frá Bíldudalsskóla, Patreksskóla, Grunnskóla Bolungarvíkur, Súðavíkurskóla og Oddeyrarskóla á Akureyri. Þannig að ljóst er að nemendur mynda ný kynni og dýrmætar minningar sem lifa eflaust lengi.

Hópurinn heldur af stað frá Reykjum um hádegisbilið og verður kominn heim til Ísafjarðar seinnipartinn. Kennarar munu setja nánari upplýsingar varðandi heimkomu inn á FB síðu árgangsins þegar nær dregur.

Nemendur 10. bekkjar gengu frá Flæðareyri og yfir til Grunnavíkur

6.bekkur gekk upp á Sandfell í morgun

« 1 af 3 »

Á hverju hausti fara allir árgangar skólans í fjallgöngur eða gönguferðir. Í upphafi skólagöngunnar er byrjað á að fara upp í Stórurð, en svo smám saman verður gangan erfiðari, en hver árgangur fær úthlutað sinni gönguleið. Þegar grunnskólagöngunni lýkur hafa því allir nemendur kynnst mörgum fjallgönguleiðum hér í kring s.s. upp í Naustahvilft, á Hnífa, Sandfell og Kistufell svo fátt eitt sé nefnt. Þessa dagana skunda nemendur upp um fjöll og firnindi og fór 5. bekkur hjólandi inn í Tungudal í morgun og gekk þaðan upp með Buná. Nemendur 6.bekkjar voru á svipuðum slóðum og gengu frá Seljalandsdal og upp á Sandfell. Nemendur 10.bekkjar sigldu í gærmorgun norður í Jökulfirði og gengu frá Flæðareyri til Grunnavíkur, þar sem þeir gistu í tjöldum í nótt. Hópurinn kom heim núna eftir hádegið.

Fjallgöngurnar eru ætlaðar til að nemendur fræðist um nærumhverfi sitt og náttúruna, en einnig eru þær mikilvægar til að efla samstöðu og félagsþroska nemenda.  

Í vor gaf Kvenfélagið Hvöt í Hnífsdal skólabókasafninu okkar veglega peningagjöf til bókakaupa. Búið er að kaupa bækurnar og eru þær tilbúnar til útláns til nemenda, sem eflaust munu njóta vel. Við þökkum Kvenfélaginu Hvöt kærlega fyrir þessa kærkomnu gjöf.

Í dag var uppskerutími hjá nemendum á miðstigi þegar þeir fóru ásamt heimilisfræðikennara út að sækja grænmeti sem sett var niður í vor. Það var samdóma álit krakkanna að grænmetið hefði sjaldan verið betra! Það verða glaðir nemendur sem fá að njóta uppskerunnar næstu daga.

Á morgun er fyrsti hefðbundni skóladagurinn hjá okkur og opnar mötuneytið um leið. Skráning fer fram á http://mataraskrift.isafjordur.is/ og er boðið upp á þá nýjung að velja ákveðna vikudaga. Matseðilinn er að finna hér á forsíðunni og hvetjum við alla til að skrá sig sem fyrst.

Mynd frá Reykjum

Mánudaginn 24. ágúst heldur 7. bekkur af stað í árlega skólabúðaferð að Reykjum í Hrútafirði. Mæting er við skólann/Ísafjarðarbíó kl. 7:15 og er áætluð brottför kl. 7:30. Allar nánari upplýsingar hafa verið sendar heim í tölvupósti og hvetjum við foreldra til að hafa samband við umsjónarkennara ef eitthvað er óljóst.

Ágætu foreldrar og forráðamenn!
Við bjóðum ykkur velkomin til samstarfs á nýju skólaári. Við hefðum viljað byrja alveg Covid frí en það er ekki alveg þannig. Skólastarf verður þó með hefðbundnum hætti þar sem börn fædd árið 2005 og yngri eru undanþegin fjöldatakmörkunum og nándarreglum. Fyrir starfsfólk skólans gildir hins vegar eins metra regla og munum við gera allt það sem við getum til að halda sóttvörnum eins og lög gera ráð fyrir. Að því sögðu er skólasetning með öðrum hætti en við höfðum hugsað okkur og boðum við einn árgang í einu.  Hann byrjar saman í matsal og fer síðan með umsjónarkennara í heimastofur. Við getum því miður ekki tryggt foreldrum tveggja metra fjarlægðarmörk og biðjum við ykkur að sýna því skilning að fylgja börnum ykkar ekki á skólasetningu í þetta skipti.  Þetta þykir okkur mjög miður en okkur er gert að takmarka komur gesta í skólahúsnæðið. Eftir þennan dag eru foreldrar velkomnir til að sinna mikilvægum erindum í skólann og hafa þá samband við ritarann og gæta að fjarlægðarmörkum og smitgát.

Tímasetningar fyrir skólasetningar 24. ágúst eru eftirfarandi;
kl. 09:00 Skólasetning 2. bekkur
kl. 09:30 Skólasetning 3. bekkur
kl. 10:00 Skólasetning 4. bekkur
kl. 10:30 Skólasetning 5. bekkur
kl. 11:00 Skólasetning 6. bekkur
kl. 11:30 Skólasetning 8. bekkur
kl. 12:00 Skólasetning 9. bekkur
kl. 12.30 Skólasetning 10. bekkur

Nú liggur mikið magn óskilamuna frammi í anddyri skólans, Sundhallarmegin. Við hvetjum alla foreldra til að kíkja við í þessari eða næstu viku til að nálgast föt barna sinna, en gríðarleg verðmæti liggja í þessum fatnaði.