Þessa vikuna eru þemadagar hjá 10.bekk. Nemendur klæðast ákveðnum klæðnaði hvern dag og fara í útileiki og setur það lit sinn á skólastarfið. Í dag var þemað sveita/lopapeysur og fór hópurinn í brennó á sparkvellinum og tvítví í blómagarðinum. Á morgun verður yfirskriftin ,,Celeb" og verður spennandi að sjá hvaða persónur birtast hér á göngunum. Þemavikunni lýkur svo með náttfata/kósýdegi á föstudaginn.
Í morgun hittust nemendur sem starfað hafa sem vinaliðar í vetur, í félagsmiðstöðinni og fögnuðu góðu starfi í vetur. Þeir Atli Freyr og Árni Heiðar, íþróttakennarar, settu upp skemmtidagskrá fyrir krakkana með alls konar leikjum og buðu svo upp á smá hressingu. Við þökkum þessum flotta hóp kærlega fyrir sitt frábæra starf í vetur.
Vinaliðaverkefnið hefur verið starfrækt hér við skólann frá haustinu 2014 og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að stuðla að fjölbreyttari leikjum í frímínútum, leggja grunn sem gerir nemendum kleift að tengjast sterkum vináttuböndum, minnka togstreitu milli nemenda og hampa góðum gildum, svo sem vináttu, virðingu og því að allir fá að taka þátt.
Góða veðrið hefur heldur betur verið vel nýtt hjá okkur undanfarna daga. Í fyrradag var ítalskur matseðill hjá nemendum 6.bekkjar í heimilisfræði hjá Guðlaugu Jónsdóttur og elduðu þeir ítalska grænmetissúpu og bökuðu brauðstangir með.
Það var ekki amalegt að njóta matarins utan dyra í blíðviðrinu og var sannkölluð Miðjarðarhafsstemning!
G.Í. tók þátt í riðlakeppni Skólahreysti sem fram fór í Kópavogi í gær. Liðið okkar hafnaði í 8.sæti í mjög sterkum riðli og erum við afar stolt af okkar fólki sem æfir við erfiðar aðstæður miðað við mörg önnur lið sem hafa skólahreystibrautir á skólalóðum sínum.
Holtaskóli sigraði riðilinn og Grunnskóli Bolungarvíkur hafnaði í 2. sæti. Þessi tvö lið komast því áfram í úrslitakeppnina sem haldin verður síðar í mánuðinum.
Í dag keppir GÍ í undankeppni Skólahreysti í Digranesi kl. 17:00. Fyrir hönd skólans keppa þau Agnes Þóra Snorradóttir, Ástmar Kristinsson, Grétar Smári Samúelsson og Sigrún Betanía Kristjánsdóttir. Til vara eru þau Elma Katrín Steingrímsdóttir og Kristinn Hallur Jónsson. Liðsstjóri hópsins er Guðný Stefanía Stefánsdóttir kennari.
Keppnin verður sýnd beint á RÚV kl. 17:00 og fylgjumst við spennt með og sendum baráttukveðjur til hópsins.
Það fer ekki á milli mála að vorið er komið, þó lofthiti sýni ekki margar gráður. Eitt af því sem er svo gaman við vorið er hvað tíminn er vel nýttur til útivistar. Síðastliðinn föstudag bauð 3. bekkur nemendum 9. bekkjar með sér í fótbolta í útivist og létu unglingarnir ekki bjóða sér það tvisvar, heldur hlupu til og léku við þá yngri eins og sjá má á meðfylgjandi myndum. Við bíðum samt eftir fleiri hitagráðum áður en úlpurnar fá að fjúka!
Í dag flöggum við regnbogafánanum til að fagna fjölbreytileikanum í sinni víðustu mynd. Með því móti minnum við okkur á að allar manneskjur eiga rétt á að njóta sömu mannréttinda án tillits til uppruna þeirra, þjóðernis, litarháttar, trúarbragða, stjórnmálaskoðana, kynferðis, kynhneigðar, aldurs, efnahags, ætternis, fötlunar, heilsufars eða annarrar ómálefnalegrar stöðu. Umræður hafa skapast inni í bekkjum sem utan og finnst nemendum mikilvægt að fá að vera nákvæmlega eins og hver og einn vill. Það er enginn sem getur stöðvað mann í að vera maður sjálfur.
Nemendur 1. bekkjar tóku heldur betur til hendinni í morgun og tíndu rusl í næsta nágrenni skólans. Krakkarnir vita sem er að við þurfum að ganga vel um umhverfi okkar. Við vonum að bæjarbúar taki sér þessa ungu umhverfissinna til fyrirmyndar og láti ekki sitt eftir liggja í þessum málum.
Í mörg ár hefur Kiwanisklúbburinn Básar á Ísafirði komið færandi hendi og gefið nemendum 1.bekkjar hlífðarhjálma að gjöf. Markmið hjálmaverkefnis þeirra hefur frá upphafi verið að stuðla að öryggi barna í umferðinni og nýtast hjálmarnir vel við notkun reiðhjóla, hjólabretta og hjólaskauta.
Það voru glaðir krakkar sem fóru heim með hjálmana sína í dag og hvetjum við alla til að merkja þá vel. Við þökkum Kiwanismönnum kærlega fyrir þessa veglegu gjöf og vonum að nemendur njóti vel.
Í tilefni af sjónlistadeginum 11. mars s.l. brugðu nemendur 6.bekkjar upp hinum ýmsu skuggamyndum undir stjórn Ólafar Dómhildar Jóhannsdóttur, myndmenntakennara. Krakkarnir lærðu um tröll og bjuggu til skuggamyndir af þeim. Verkin voru svo hengd upp í stofugluggum árgangsins og eru hin mesta prýði.
