Nú er heimferðardagur hjá 10.bekk og er áætluð brottför frá Bakkaflöt kl. 12:00. Ferðin hefur gengið vel þrátt fyrir að veður hafi sett strik í reikninginn. Hópurinn komst ekki í ,,river rafting" í fyrradag eins og til stóð vegna hvassviðris, en krakkarnir vöknuðu þess í stað snemma í morgun og náðu að ljúka þeirri ferð.
Áætluð heimkoma er um kl. 19:00 í kvöld.
Nemendur 10.bekkjar lögðu af stað í skólaferðalag norður að Bakkaflöt í Skagafirði í morgun. Auk nemenda eru umsjónarkennarar og nokkrir foreldrar með í för og mun hópurinn dvelja á Bakkaflöt fram á mánudag. Dagskráin er þétt og skemmtileg næstu daga hjá þeim og vonum við að allir njóti ferðarinnar sem best.
Litla Act alone bauð öllum nemendum skólans upp á einleikna viðburði í morgun í Hömrum. Yngsta stigið naut skemmtilegrar dagskrár í tali og tónum með Aðalsteini Ásberg Sigurðssyni, sem ber nafnið Karímarímambó. Eldri nemendum var boðið upp á súkkulaðióperuna Bon appétit! með Guju Sandholt.
Nemendur kunnu vel að meta þessa listviðburði og þökkum við kærlega fyrir okkur.
Vordagskráin hjá okkur er fjölbreytt og skemmtileg eins og áður og nemendur og starfsfólk úti um hvippinn og hvappinn þessa dagana. Vinabekkirnir 2. og 9. bekkur fóru í heimsókn í Raggagarð í Súðavík í morgun og léku sér saman í blíðunni. Ferðin tókst vel í alla staði og virkilega gaman að geta nýtt sér þessa frábæru aðstöðu hjá nágrönnum okkar í Súðavík.
Hlutirnir segja sögu er yfirskrift sýningar sem nokkrir nemendur í 9. og 10. bekk settu upp í Hversdagssafninu undir stjórn Ólafar Dómhildar Jóhannsdóttur, myndmenntakennara. Í vetur hefur hópurinn kynnt sér menningu og sköpun í Skutulsfirði og heimsótt til að mynda Byggðasafnið, þar sem hugmyndin að sýningunni kviknaði. Ferlið við að velja hlut og skoða söguna sem hluturinn segir hefur verið mjög gefandi fyrir nemendur.
Sýningin, sem er gluggasýning, stendur til 3. júní og hægt að skoða hana hvenær sem er fram að þeim tíma.
Nemendur í 6. og 7. bekk tóku þátt í Krakkasvari á RÚV í gær eftir áskorun frá Dalvíkurskóla. Þar svöruðu krakkarnir því hvaða íþróttagrein þau veldu ef þau mættu velja eina atvinnuíþróttagrein. Þeir skoruðu svo á Grunnskóla Bolungarvíkur til þátttöku í næsta þætti.
Innslagið á RÚV má sjá hér
Þessa vikuna eru þemadagar hjá 10.bekk. Nemendur klæðast ákveðnum klæðnaði hvern dag og fara í útileiki og setur það lit sinn á skólastarfið. Í dag var þemað sveita/lopapeysur og fór hópurinn í brennó á sparkvellinum og tvítví í blómagarðinum. Á morgun verður yfirskriftin ,,Celeb" og verður spennandi að sjá hvaða persónur birtast hér á göngunum. Þemavikunni lýkur svo með náttfata/kósýdegi á föstudaginn.
Í morgun hittust nemendur sem starfað hafa sem vinaliðar í vetur, í félagsmiðstöðinni og fögnuðu góðu starfi í vetur. Þeir Atli Freyr og Árni Heiðar, íþróttakennarar, settu upp skemmtidagskrá fyrir krakkana með alls konar leikjum og buðu svo upp á smá hressingu. Við þökkum þessum flotta hóp kærlega fyrir sitt frábæra starf í vetur.
Vinaliðaverkefnið hefur verið starfrækt hér við skólann frá haustinu 2014 og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að stuðla að fjölbreyttari leikjum í frímínútum, leggja grunn sem gerir nemendum kleift að tengjast sterkum vináttuböndum, minnka togstreitu milli nemenda og hampa góðum gildum, svo sem vináttu, virðingu og því að allir fá að taka þátt.
Góða veðrið hefur heldur betur verið vel nýtt hjá okkur undanfarna daga. Í fyrradag var ítalskur matseðill hjá nemendum 6.bekkjar í heimilisfræði hjá Guðlaugu Jónsdóttur og elduðu þeir ítalska grænmetissúpu og bökuðu brauðstangir með.
Það var ekki amalegt að njóta matarins utan dyra í blíðviðrinu og var sannkölluð Miðjarðarhafsstemning!
G.Í. tók þátt í riðlakeppni Skólahreysti sem fram fór í Kópavogi í gær. Liðið okkar hafnaði í 8.sæti í mjög sterkum riðli og erum við afar stolt af okkar fólki sem æfir við erfiðar aðstæður miðað við mörg önnur lið sem hafa skólahreystibrautir á skólalóðum sínum.
Holtaskóli sigraði riðilinn og Grunnskóli Bolungarvíkur hafnaði í 2. sæti. Þessi tvö lið komast því áfram í úrslitakeppnina sem haldin verður síðar í mánuðinum.
