Það er mikið tilhlökkunarefni hjá okkur að taka á móti nemendum okkar á morgun við skólasetningu. 7.bekkur heldur snemma af stað í skólabúðir að Reykjum í Hrútafirði og verður þar alla vikuna, þannig að þeir verða ekki við skólasetninguna sjálfa en við óskum þeim góðrar ferðar og dvalar.

Einhverjir nemendur hafa flutt í burtu eins og gengur og gerist og óskum við þeim öllum velfarnaðar. Það er sérstakt gleðiefni við upphaf nýs skólaárs að nemendum hefur fjölgað nokkuð frá í vor, úr 359 í 379 sem skráðir eru við skólann í dag. Mestu munar um stóran árgang á okkar mælikvarða sem er að hefja nám í 1. bekk, en þeir nemendur eru 47 talsins. Við útskrifuðum 34 nemendur úr 10.bekk í vor, þannig að fjölgunin á sér skýringu þar að miklu leyti.

Við leggjum okkur fram um að taka vel á móti nýjum nemendum og bjóðum þeim öllum í sérstaka heimsókn til okkar áður en skóli hefst. 1.bekkingar komu í nokkrar heimsóknir til okkar s.l. vor og munu mæta til sinna umsjónarkennara í viðtöl á morgun ásamt foreldrum. Aðrir nýir nemendur hafa verið boðaðir sérstaklega í heimsókn til okkar síðustu daga, þar sem umsjónarkennarar og stjórnendur hafa tekið á móti þeim. 

Við munum gera allt sem í okkar valdi stendur til að skólastarfið gangi sem best þrátt fyrir takmarkanir og vonum að allir komi endurnærðir eftir gott sumarleyfi.

Mánudaginn 23. ágúst verður skólinn settur. Skólastarf verður með hefðbundnum hætti þar sem grunnskólabörn eru undanþegin fjöldatakmörkunum og nándarreglum og blöndun hópa heimil. Nemendur eru þó hvattir til fyllstu varkárni og persónulegra sóttvarna. Þegar starfsfólk nær ekki að viðhafa nálægðarmörk (1 metra) sín á milli ber að nota andlitsgrímu og munum við gera allt það sem við getum til að halda sóttvörnum eins og lög gera ráð fyrir.

Að því sögðu er skólasetning með öðrum hætti en við höfðum hugsað okkur og boðum við einn árgang í einu, líkt og síðasta haust.  Hver árgangur mætir í matsal og fer síðan með umsjónarkennara í heimastofur. Þeir foreldrar sem velja það að fylgja börnum sínum eru beðnir að sýna aðgát þegar þeir koma inn í skólabygginguna og gæta að sóttvörnum. Hvatt er til grímunotkunar gesta í skólabyggingum, en skólum er jafnframt heimilt að takmarka enn frekar komu gesta en við vonum að ekki þurfi að grípa til þess ráðs.

Tímasetningar fyrir skólasetningar 23. ágúst eru eftirfarandi:

Nemendur 1.bekkjar eru boðaðir sérstaklega með bréfpósti.
7.bekkur fer í Skólabúðir að Reykjum þennan dag og er mæting við skólann/Ísafjarðarbíó kl.7:15 og áætluð brottför kl.7:30. 

 
kl. 09:00 Skólasetning 2. bekkur
kl. 09:30 Skólasetning 3. bekkur
kl. 10:00 Skólasetning 4. bekkur
kl. 10:30 Skólasetning 5. bekkur
kl. 11:00 Skólasetning 6. bekkur
kl. 11:30 Skólasetning 8. bekkur
kl. 12:00 Skólasetning 9. bekkur
kl. 12.30 Skólasetning 10. bekkur

Við freistum þess að koma enn meiru af óskilamunum í hendur eigenda sinna og höfum skólann opinn á morgun og föstudag frá kl. 10:00-14:00. Endilega kíkið við og bjargið þessum verðmætum!

Nú hefur verið ákveðið að samræmd könnunarpróf verði ekki lögð fyrir 4. og 7. bekk í haust og farið verður í vinnu við þróun á nýju námsmati.

Sjá frétt hér á vef mennta- og menningarmálaráðuneytisins.

Skólinn er lokaður frá 1.júlí til og með 3.ágúst vegna sumarleyfa. Við vonum að allir njóti sumarsins og nemendur og starfsfólk komi endurnært til starfa. 

Mikið magn óskilamuna liggur nú frammi í anddyri skólans, Sundhallarmegin. Skólinn verður opinn frá kl. 8:00 - 16:00 alla virka daga, nema föstudaga til kl. 14:00, þessa og næstu viku. Við hvetjum nemendur og foreldra til að líta við hjá okkur og freista þess að finna eigur sínar.

« 1 af 5 »

Í gærkvöld var Grunnskólanum á Ísafirði slitið í 146. skipti og fór athöfnin fram í Ísafjarðarkirkju. Hefð er fyrir því að nemendur úr 9. bekk kynni dagskrána og voru kynnar að þessu sinni þau Birta Kristín Ingadóttir og Kristinn Hallur Jónsson.

Sveinfríður Olga Veturliðadóttir, skólastjóri, flutti ávarp og þau Brynja Dís Höskuldsdóttir og Guðmundur Brynjar Björgvinsson fluttu ávarp fyrir hönd útskriftarnema. 

Eftirtaldar viðurkenningar voru veittar í 8. og 9.bekk:

8. bekkur - Kristinn Már Guðnason hlaut viðurkenningu Rotary klúbbsins á Ísafirði fyrir ástundun og framfarir. 

9. bekkur - Sara Katrín Heiðarsdóttir hlaut viðurkenningu Rotary klúbbsins á Ísafirði fyrir ástundun og framfarir.

Eftirtaldar viðurkenningar voru veittar í 10. bekk:

Kvenfélagið Hlíf gaf eftirfarandi viðurkenningar fyrir verk- og listgreinar:

Viðurkenningu fyrir vönduð vinnubrögð og góða ástundun í textílmennt hlaut Embla Kleópatra Atladóttir.

Viðurkenningu fyrir framúrskarandi hæfileika á sviði teikninga undanfarin ár hlaut Brynjar Ari Sveinsson, sem blómstraði í málverkinu í vetur.

Viðurkenningu fyrir framúrskarandi námsárangur í heimilisfræði hlaut Anna Marý Jónasdóttir.

Viðurkenningu fyrir framfarir og vinnubrögð í smíði og hönnun hlaut Ástmar Helgi Kristinsson.

Stöðin heilsurækt gaf viðurkenningar fyrir góða ástundun og námsárangur í íþróttum. Þær viðurkenningar hlutu Ástmar Helgi Kristinsson og Sigrún Betanía Kristjánsdóttir.

Rotary klúbburinn á Ísafirði veitti viðurkenningu fyrir ástundun og framfarir og hlaut Embla Kleópatra Atladóttir hana.

Danska Menntamálaráðuneytið gaf viðurkenningu fyrir góða ástundun og námsárangur í dönsku og hlaut Solveig Amalía Atladóttir þau verðlaun.

Grunnskólinn á Ísafirði veitti eftirfarandi viðurkenningar:

Viðurkenningu fyrir næmt auga fyrir línum og myndbyggingu og skapandi leiðir til lausna á verkefnum í ljósmyndun hlaut Kristey Sara Sindradóttir.

Viðurkenningu fyrir metnað, góða ástundun og námsárangur í samfélagsfræði hlaut Lilja Björg Kristjánsdóttir.

Viðurkenningu fyrir metnað, góða ástundun og námsárangur í ensku hlaut Katrín Bára Albertsdóttir.

Viðurkenningu fyrir góða ástundun og námsárangur náttúrufræði hlaut Lilja Jóna Júlíusdóttir.

Viðurkenningu fyrir góða ástundun og námsárangur í stærðfræði hlaut Katrín Bára Albertsdóttir.

Viðurkenningu fyrir góða ástundun og námsrárangur í íslensku hlaut Solveig Amalía Atladóttir.

Undanfarin ár hefur Ísfirðingafélagið í Reykjavík gefið gjöf til minningar um Hannibal Valdimarsson. Þessi viðurkenning hefur verið veitt nemanda í 10.bekk fyrir lofsverða ástundun, framfarir í námi og virka þátttöku í félagsstarfi. Í þeim aðstæðum sem nemendur 10.bekkjar hafa þurft að glíma við í vetur var ómögulegt að velja einn eða tvo nemendur til að hljóta þessi verðlaun. Þess í stað ákvað stjórn Ísfirðingafélagsins að gefa öllum útskriftarnemum gjafabréf í Ísafjarðarbíó ásamt poppi og gosi.

Við þökkum öllum þeim sem gefið hafa þessi verðlaun kærlega fyrir og vonum að nemendur njóti vel.

Að verðlaunaafhendingu lokinni lék Sara Lind Jóhannesdóttir á þverflautu og meðleik annaðist Madis Maeekalle. Starfsmenn skólans stigu einnig á stokk og tóku eitt kveðjulag til nemenda með tár á hvörmum og í lokin lék Sveinfríður Olga Veturliðadóttir undir fjöldasöng þar sem allir risu úr sætum og sungu ,,Lóan er komin".

Starfsfólk Grunnskólans á Ísafirði þakkar árgangi 2005 samfylgdina í gegnum árin og óskar þeim velfarnaðar um ókomin ár. Framtíðin er ykkar!

Skólaslit G.Í. verða á morgun, þriðjudaginn 8. júní.

Nemendur 1. bekkjar eru boðaðir sérstaklega til fundar við umsjónarkennara, en nemendur 2. - 7. bekkjar mæta í sínar umsjónarstofur kl. 10:00 og hitta sína kennara.

Fyrir nemendur 8. - 10. bekkjar verður formleg athöfn í Ísafjarðarkirkju kl. 20:00 sama dag. Því miður getum við einungis boðið aðstandendum 10.bekkjar, vegna upplýsinga sem við fengum frá Heilbrigðisráðuneytinu varðandi hámarksfjölda. Vonandi verður þetta í síðasta skipti sem við þurfum að vera með einhverjar takmarkanir vegna Covid og við stefnum ótrauð og bjartsýn á næsta skólaár.

Margrét Mjöll, Soffía Rún og Elísabet María

Saga Björgvinsdóttir

« 1 af 2 »

Þrjár hugmyndir nemenda G.Í. komust í úrslit í Nýsköpunarkeppni grunnskólanna þetta árið og fengu allar viðurkenningarskjal undirritað af Menntamálaráðherra.

Hugmyndirnar voru þessar:

Hvað viltu gera - Margrét Mjöll Sindradóttir og Soffía Rún Pálsdóttir 7.bekk

Innstungudóterí - Elísabet María Gunnlaugsdóttir 7.bekk og

Skinnskór - Saga Björgvinsdóttir 5.bekk.

Í úrslitum hlaut Saga Björgvinsdóttir umhverfisverðlaun NKG og Hugverkastofu fyrir hugmynd sína og hlaut hún að verðlaunum 25.000 kr. gjafabréf í ELKO ásamt viðurkenningarskjali, undirrituðu af Guðna Th. Jóhannessyni, forseta Íslands.

Elísabet María Gunnlaugsdóttir hlaut svo hönnunarbikar NKG í úrslitum, fyrir hönnun sína og 25.000 kr. gjafabréf í ELKO og viðurkenningarskjal, undirritað af Guðna Th. Jóhannessyni, forseta Íslands.

Við erum afar stolt af öllum okkar þátttakendum og óskum vinningshöfum innilega til hamingju. Ekki má gleyma hlutverki Ólafar Dómhildar Jóhannsdóttur kennara, sem hefur stýrt ferlinu af sinni alkönnu snilld og fest nýsköpunarkeppnina í sessi hér í skólanum.

Lesa má nánar um keppnina og hugmyndir nemenda á www.nkg.is