Nú hefur verið ákveðið að samræmd könnunarpróf verði ekki lögð fyrir 4. og 7. bekk í haust og farið verður í vinnu við þróun á nýju námsmati.

Sjá frétt hér á vef mennta- og menningarmálaráðuneytisins.

Skólinn er lokaður frá 1.júlí til og með 3.ágúst vegna sumarleyfa. Við vonum að allir njóti sumarsins og nemendur og starfsfólk komi endurnært til starfa. 

Mikið magn óskilamuna liggur nú frammi í anddyri skólans, Sundhallarmegin. Skólinn verður opinn frá kl. 8:00 - 16:00 alla virka daga, nema föstudaga til kl. 14:00, þessa og næstu viku. Við hvetjum nemendur og foreldra til að líta við hjá okkur og freista þess að finna eigur sínar.

« 1 af 5 »

Í gærkvöld var Grunnskólanum á Ísafirði slitið í 146. skipti og fór athöfnin fram í Ísafjarðarkirkju. Hefð er fyrir því að nemendur úr 9. bekk kynni dagskrána og voru kynnar að þessu sinni þau Birta Kristín Ingadóttir og Kristinn Hallur Jónsson.

Sveinfríður Olga Veturliðadóttir, skólastjóri, flutti ávarp og þau Brynja Dís Höskuldsdóttir og Guðmundur Brynjar Björgvinsson fluttu ávarp fyrir hönd útskriftarnema. 

Eftirtaldar viðurkenningar voru veittar í 8. og 9.bekk:

8. bekkur - Kristinn Már Guðnason hlaut viðurkenningu Rotary klúbbsins á Ísafirði fyrir ástundun og framfarir. 

9. bekkur - Sara Katrín Heiðarsdóttir hlaut viðurkenningu Rotary klúbbsins á Ísafirði fyrir ástundun og framfarir.

Eftirtaldar viðurkenningar voru veittar í 10. bekk:

Kvenfélagið Hlíf gaf eftirfarandi viðurkenningar fyrir verk- og listgreinar:

Viðurkenningu fyrir vönduð vinnubrögð og góða ástundun í textílmennt hlaut Embla Kleópatra Atladóttir.

Viðurkenningu fyrir framúrskarandi hæfileika á sviði teikninga undanfarin ár hlaut Brynjar Ari Sveinsson, sem blómstraði í málverkinu í vetur.

Viðurkenningu fyrir framúrskarandi námsárangur í heimilisfræði hlaut Anna Marý Jónasdóttir.

Viðurkenningu fyrir framfarir og vinnubrögð í smíði og hönnun hlaut Ástmar Helgi Kristinsson.

Stöðin heilsurækt gaf viðurkenningar fyrir góða ástundun og námsárangur í íþróttum. Þær viðurkenningar hlutu Ástmar Helgi Kristinsson og Sigrún Betanía Kristjánsdóttir.

Rotary klúbburinn á Ísafirði veitti viðurkenningu fyrir ástundun og framfarir og hlaut Embla Kleópatra Atladóttir hana.

Danska Menntamálaráðuneytið gaf viðurkenningu fyrir góða ástundun og námsárangur í dönsku og hlaut Solveig Amalía Atladóttir þau verðlaun.

Grunnskólinn á Ísafirði veitti eftirfarandi viðurkenningar:

Viðurkenningu fyrir næmt auga fyrir línum og myndbyggingu og skapandi leiðir til lausna á verkefnum í ljósmyndun hlaut Kristey Sara Sindradóttir.

Viðurkenningu fyrir metnað, góða ástundun og námsárangur í samfélagsfræði hlaut Lilja Björg Kristjánsdóttir.

Viðurkenningu fyrir metnað, góða ástundun og námsárangur í ensku hlaut Katrín Bára Albertsdóttir.

Viðurkenningu fyrir góða ástundun og námsárangur náttúrufræði hlaut Lilja Jóna Júlíusdóttir.

Viðurkenningu fyrir góða ástundun og námsárangur í stærðfræði hlaut Katrín Bára Albertsdóttir.

Viðurkenningu fyrir góða ástundun og námsrárangur í íslensku hlaut Solveig Amalía Atladóttir.

Undanfarin ár hefur Ísfirðingafélagið í Reykjavík gefið gjöf til minningar um Hannibal Valdimarsson. Þessi viðurkenning hefur verið veitt nemanda í 10.bekk fyrir lofsverða ástundun, framfarir í námi og virka þátttöku í félagsstarfi. Í þeim aðstæðum sem nemendur 10.bekkjar hafa þurft að glíma við í vetur var ómögulegt að velja einn eða tvo nemendur til að hljóta þessi verðlaun. Þess í stað ákvað stjórn Ísfirðingafélagsins að gefa öllum útskriftarnemum gjafabréf í Ísafjarðarbíó ásamt poppi og gosi.

Við þökkum öllum þeim sem gefið hafa þessi verðlaun kærlega fyrir og vonum að nemendur njóti vel.

Að verðlaunaafhendingu lokinni lék Sara Lind Jóhannesdóttir á þverflautu og meðleik annaðist Madis Maeekalle. Starfsmenn skólans stigu einnig á stokk og tóku eitt kveðjulag til nemenda með tár á hvörmum og í lokin lék Sveinfríður Olga Veturliðadóttir undir fjöldasöng þar sem allir risu úr sætum og sungu ,,Lóan er komin".

Starfsfólk Grunnskólans á Ísafirði þakkar árgangi 2005 samfylgdina í gegnum árin og óskar þeim velfarnaðar um ókomin ár. Framtíðin er ykkar!

Skólaslit G.Í. verða á morgun, þriðjudaginn 8. júní.

Nemendur 1. bekkjar eru boðaðir sérstaklega til fundar við umsjónarkennara, en nemendur 2. - 7. bekkjar mæta í sínar umsjónarstofur kl. 10:00 og hitta sína kennara.

Fyrir nemendur 8. - 10. bekkjar verður formleg athöfn í Ísafjarðarkirkju kl. 20:00 sama dag. Því miður getum við einungis boðið aðstandendum 10.bekkjar, vegna upplýsinga sem við fengum frá Heilbrigðisráðuneytinu varðandi hámarksfjölda. Vonandi verður þetta í síðasta skipti sem við þurfum að vera með einhverjar takmarkanir vegna Covid og við stefnum ótrauð og bjartsýn á næsta skólaár.

Margrét Mjöll, Soffía Rún og Elísabet María

Saga Björgvinsdóttir

« 1 af 2 »

Þrjár hugmyndir nemenda G.Í. komust í úrslit í Nýsköpunarkeppni grunnskólanna þetta árið og fengu allar viðurkenningarskjal undirritað af Menntamálaráðherra.

Hugmyndirnar voru þessar:

Hvað viltu gera - Margrét Mjöll Sindradóttir og Soffía Rún Pálsdóttir 7.bekk

Innstungudóterí - Elísabet María Gunnlaugsdóttir 7.bekk og

Skinnskór - Saga Björgvinsdóttir 5.bekk.

Í úrslitum hlaut Saga Björgvinsdóttir umhverfisverðlaun NKG og Hugverkastofu fyrir hugmynd sína og hlaut hún að verðlaunum 25.000 kr. gjafabréf í ELKO ásamt viðurkenningarskjali, undirrituðu af Guðna Th. Jóhannessyni, forseta Íslands.

Elísabet María Gunnlaugsdóttir hlaut svo hönnunarbikar NKG í úrslitum, fyrir hönnun sína og 25.000 kr. gjafabréf í ELKO og viðurkenningarskjal, undirritað af Guðna Th. Jóhannessyni, forseta Íslands.

Við erum afar stolt af öllum okkar þátttakendum og óskum vinningshöfum innilega til hamingju. Ekki má gleyma hlutverki Ólafar Dómhildar Jóhannsdóttur kennara, sem hefur stýrt ferlinu af sinni alkönnu snilld og fest nýsköpunarkeppnina í sessi hér í skólanum.

Lesa má nánar um keppnina og hugmyndir nemenda á www.nkg.is 

Nemendur 8.bekkjar heimsóttu Hrafnseyri við Arnarfjörð í gær, þar sem Valdimar J. Halldórsson, staðarhaldari, fræddi nemendur um sögu staðarins og einnig var safnið um Jón Sigurðsson skoðað. Farið var í leiki á túninu og að lokum fékk hópurinn að heyra söguna af galdramanninum sem hvílir í kirkjugarðinum.

Eftir það var farið yfir að Dynjanda þar sem starfsmenn grilluðu pylsur á meðan nemendur skoðuðu fossinn. Hópurinn var heppinn með veður, það rigndi bara rétt á meðan gengið var frá grillinu.

Við erum heppin að hafa slíkan sögustað sem Hrafnseyri er en saga 19.aldar er einmitt eitt af viðfangsefnum 8.bekkjar og sjálfstæðisbarátta Íslendinga með Jón Sigurðsson í broddi fylkingar.

« 1 af 8 »

Í dag er leikjadagur hjá 1. - 4. bekk á Torfnesi þar sem íþróttakennarar hafa skipulagt hina ýmsu leiki. Nemendum er skipt í hópa sem fara í bandý, hlaupaleiki, hringleiki og boltafjör. Veðrið hefur leikið við okkur eins og sést á meðfylgjandi myndum og vonandi hafa allir skemmt sér sem best. Fjörinu lýkur um kl. 11:30 þegar allir koma til baka í hús.

Það hefur því miður verið lítið um félagslíf hjá nemendum í vetur vegna ástandsins í samfélaginu. 10.bekkur nær þó að halda lokaballið sitt fimmtudaginn 3.júní í matsal skólans. Nemendum 7. - 9.bekkjar er boðið og kostar aðgöngumiðinn kr. 1.000. Sjoppa verður á staðnum með krap, popp, gos og nammi til að auka dansorkuna.

Ballið er frá kl. 19:30 - 22:30 og fer rúta út í Hnífsdal og inn í fjörð að ballinu loknu.

« 1 af 4 »

Í morgun fór 6.bekkur inn í Tungudal til gróðursetningar. Yrkjusjóður úthlutaði skólanum 134 birkiplöntum sem nemendur settu niður og vonum við að þær eigi eftir að dafna vel.