6.bekkur í útivist

« 1 af 5 »

Þrátt fyrir grímuskyldu, fjöldatakmarkanir, sóttvarnarreglur og hvað allt heitir, þá gengur lífið sinn gang hér hjá okkur. Krakkarnir eru ótrúlega duglegir þrátt fyrir allt og reyna kennarar að brjóta upp daginn og njóta útiveru og samveru sem best. Verkgreinar hafa legið niðri að mestu leyti, þar sem nemendur mega ekki fara inn í verkgreinastofur, á milli sóttvarnarhólfa. Verkgreinakennararnir brugðu þá á það ráð að láta nemendur hanna borðspil frá grunni og útfæra á eigin hátt. Það tókst ljómandi vel og á meðfylgjandi myndum má sjá 5.bekk spila eigin útgáfur. 

« 1 af 2 »

Í dag, 16.nóvember, er dagur íslenskrar tungu, á fæðingardegi Jónasar Hallgrímssonar. Af því tilefni var setning litlu og stóru upplestrarkeppnanna í 4. og 7. bekk. Eins og gefur að skilja var engin samkoma á sal líkt og undanfarin ár, heldur var brugðist við ástandinu og dagskráin send út frá skrifstofu skólatjóra og út í bekkjastofur 4. og 7. bekkjar.

Sveinfríður Olga Veturliðadóttir, skólastjóri, setti hátíðina og Kristín Oddsdóttir, kennari, kynnti dagskrána. Þær Anna María Ragnarsdóttir og Dagný Rut Davíðsdóttir nemendur í 8. bekk fluttu ljóð, en þær náðu langt í upplestrarkeppninni í fyrra. Þá var hlustað á tónlist í boði Sinfóníuhljómsveitar Íslands og voru keppnirnar formlega settar að því loknu.

Markmið upplestrarkeppni í grunnskóla er að vekja athygli og áhuga á vönduðum upplestri og framburði. Mestu skiptir að kennarar nýti þetta tækifæri til að leggja markvissa rækt við einn þátt móðurmálsins með nemendum sínum, vandaðan upplestur og framburð, og fái alla nemendur til að lesa upp, sjálfum sér og öðrum til ánægju. 

Vikan hefur gengið ágætlega og nemendur eiga hrós skilið fyrir hvernig þeir taka taka þessum hertu sóttvarnarreglum.  Við sjáum þó að ákveðinnar þreytu er farið að gæta, sérstaklega varðandi grímurnar.

Nú hefur heilbrigðisráðherra kynnt nýja reglugerð sem gildir frá 18. nóvember til 2. desember, og samkvæmt henni verður aðeins slakað á hvað varðar fjöldatakmarkanir í skólum.  Það er gert til að koma til móts við framhaldsskólanna en breytir ekki miklu hjá okkur í grunnskólunum. Íþróttir barna með og án snertinga verða heimilaðar en sundlaugar verða enn lokaðar. Við í grunnskólunum bíðum eftir nánari útfærslu og getum vonandi kynnt hana á mánudag eða þriðjudag í næstu viku.

Nú er fyrstu vikunni í þessari lotu að ljúka. Mér finnst hún heilt yfir hafa gengið vel og þið sýnt okkur skilning og stuðning við breytt skipulag. Það skiptir okkur mjög miklu að finna það að við erum öll í þessu saman. Það er svo ótrúlega mikilvægt að geta haldið úti skólastarfi og að röskunin sé með minnsta móti fyrir nemendur. Mér finnst líka að nemendur standi sig ótrúlega vel. Þeir taka langflestir vel í grímunotkunina og skilja mikilvægi hennar. Eins reynir á alla nemendur að vera meira og minna inn í umsjónarstofunum sínum allan skóladaginn og þá sérstaklega þau yngstu sem eru fullan skóladag.
Vonandi verður hægt að létta á sóttvarnarreglunum strax eftir 17. nóvember og vil ég trúa því að það verði hægt, allavega að við losnum við grímur og að við getum farið í eðlilegt ástand hvað varðar kennsluna, þó svo að kannski verði enn fjöldatakmarkanir og aðgengi utanaðkomandi aðila verði enn takmarkað.

Við óskum ykkur góðrar helgar og við skulum reyna að hafa gleðina að leiðarljósi og njóta samveru við fjölskyldu þessa helgi þar sem yfirvöld hafa hvatt okkur til að ferðast innanhúss þessa helgi.

Þar sem starfsdagurinn 2.nóvember fór alfarið í nýtt skipulag vegna nýrra sóttvarnarreglna, verður starfsdagurinn sem vera átti 11.nóvember færður til 25. nóvember n.k.

Kæru foreldrar!
Fyrsti dagur í þessari lotu hertra samkomutakmarkana gekk að mörgu leyti vel. Það voru margir nemendur sem voru með grímur á sér þegar þeir komu inn í skólann í morgun. Það er náttúrulega grímuskylda í strætó fyrir börn fædd 2010 og eldri, og nemendur sem komu úr strætó enn með grímurnar á sér.  
Við gerum okkur hins vegar grein fyrir því að það er erfitt að vera með grímuna lengi og þegar líða tók á daginn þá þreyttust margir og vildu ekki hafa hana. Við biðjum ykkur því að ræða mikilvægi grímunotkunar við börnin ykkar og ítreka það að við verðum að gera þetta saman. Þar fyrir utan þá er grímuskyldan í reglugerð og við verðum öll að hlýða henni. Það er engin undanþága nema fyrir þá sem hafa fengið covid eða aðrar læknisfræðilegar ástæður, sem þarf þá að skila vottorði fyrir. Við vonum að grímurnar venjist fljótt og allir átti sig fljótt á mikilvægi þeirra.
Það voru nokkrir smávægilegir hnökrar sem komu í ljós á nýja skipulaginu okkar, en okkar frábæra starfsfólk er fljótt að slípa þá til og þökkum við þeim enn og aftur fyrir þeirra góða og lausnamiðaða starf.
Við finnum vel fyrir stuðningi ykkar núna kæru foreldrar og er það ómetanlegt og veitir okkur kraft til að takast á við verkefnin sem covidið færir okkur.

Ný reglugerð um takmörkun á skólastarfi gildir 3.-17. nóvember. Breytingarnar hjá okkur eru þær helstar að við skiptum skólanum í sóttvarnarhólf, og mega nemendur ekki fara á milli hólfa.  Það þýðir að í langflestum tilvikum færast verkgreinar inn í bekkjarstofur.  Íþróttir og sund falla niður og munu íþróttakennarar leitast við að vera með nemendum úti, eins og veður leyfir. Við höfum góða reynslu frá því í vor af því að hafa upphaf skólatíma sveigjanlegan og því gerum við það aftur núna. Nemendur geta því mætt til 8:15 án þess að fá seinkomu.

 Í 5.-10. bekk er grímuskylda þar sem við getum ekki tryggt tveggja metra fjarlægðarmörk og á það við um öll rými skólans, þannig að nemendur verða að vera með grímur allsstaðar, á leið inn og út úr skóla og einnig í kennslustundum og hvetjum við alla sem geta að nota eigin grímur í skólanum. Að öðrum kosti mun skólinn útvega þær. Nemendur eiga einnig að vera með grímur í strætó. Þar sem hópablöndun er ekki leyfð munu nemendur fá frímínútur inni í kennslustofum en kennarar munu fara út á hverjum degi með nemendur sína.  Þar sem við getum ekki komið hádegismat fyrir vegna fjöldatakmarkana og létta á álagi vegna grímunotkunarinnar mun verða kennsla til 12:15 en þá verður strætó.

Hámarksfjöldi er 25 í hverju rými fyrir sig. Hverjum árgangi á unglingastigi verður því skipt í tvo fasta hópa, og hver hópur í sér stofu. Nemendur sem eiga að mæta í fyrstu kennslustundum í íþróttir á Torfnes eiga að mæta í skólann. Matartíminn fellur niður og verður mataráskrift endurgreidd.

Í 1.-4. bekk gilda aðrar reglur, þar er 50 barna hámark í hverju rými og grímuskyldan á ekki við. Það verður óskertur skóladagur hjá þessum árgöngum. Frístund, dægradvöl og  mötuneyti verða á sínum stað með breytingum þó og til að koma öllum nemendum á yngsta stiginu fyrir í mötuneytinu borðar 2. og 4. bekkur fyrir framan matsal.

Við vonum svo sannarlega að þetta skipulag gangi upp hjá okkur og að við þurfum ekki að fara í meiri takmarkanir.
Í fyrstu covid bylgjunni í vor fundum við mikinn og góðan stuðning og skilning frá ykkur kæru foreldrar og með því að gera þetta saman þá náum við að gera okkar besta til að börnunum okkar líði sem best

Ágætu foreldrar!
Nú er búið að boða hertar sóttvarnarreglur. Mesta breytingin sem snýr að okkur er sú að börn á grunnskólaaldri eru ekki lengur undanþegin almennum takmörkunum. Við bíðum eftir nýrri reglugerð fyrir skólana frá menntamálaráðherra og það er gert ráð fyrir að hún liggi fyrir um helgina. Í ljósi þessa gefum við okkur tíma á mánudaginn til að útfæra skólastarfið og færum starfsdaginn sem vera átti 11. nóvember fram til mánudagsins 2. nóv. þannig að það er ekki skóli hjá nemendum á mánudaginn. Það er alveg ljóst að töluverðar breytingar verða hjá okkur en nánari upplýsingar koma frá skólanum á mánudaginn. Við höfum sýnt það og sannað að þegar við stöndum saman eins og við gerðum í vor þá getum við tekist á við margskonar áskoranir.
Ég óska ykkur góðrar helgar og vona að við öll njótum hennar þrátt fyrir ástandið.

Nú er matseðill fyrir nóvember kominn inn á síðuna og hvetjum við þá sem ætla að nýta sér áskrift að gera það  sem fyrst.