« 1 af 2 »

Nú er skóladagatal næsta skólaárs tilbúið og komið hér inn.

Í morgun gat enginn nemandi í 9. bekk hér við skólann skráð sig inn á samræmt könnunarpróf í ensku, þar sem einhver bilun kom upp í prófakerfi Menntamálastofnunar. Þetta vandamál var víða um land, en svo virðist sem einhverjum hafi þó tekist að klára próf.

Í gær gekk stærðfræðiprófið eins og í sögu, en fresta þurfti íslenskuprófinu sem leggja átti fyrir í fyrradag, vegna sömu tæknilegu vandamála og voru í morgun.

Á fundi forstjóra Menntamálastofnunar með mennta- og menningarmálaráðherra í fyrradag var ákveðið að ráðuneytið myndi boða fulltrúa skólastjóra, kennara, nemenda, foreldra og sveitarfélaga til fundar þar sem farið verður yfir stöðuna. Í framhaldinu verður tekin ákvörðun um hvort íslensku- og enskupróf verða lögð fyrir að nýju fyrir þá nemendur sem ekki náðu að ljúka þeim eða prófin felld niður.

Við þökkum nemendum 9. bekkjar einstaka biðlund og þolinmæði. Þeim verður nú boðið upp á notalega samverustund með léttum veitingum.

Lokahátíð Stóru upplestrarkeppninnar fer fram í Hömrum þriðjudaginn 13. mars n.k. kl. 17:00. Þar munu nemendur úr 7. bekk sem valdir hafa verið úr skólum byggðarlagsins, lesa sögubrot og ljóð. 

Fyrir hönd Grunnskólans á Ísafirði munu þau Anja Karen Traustadóttir, Anna Marý Jónasdóttir, Ástmar Helgi Kristinsson, Daði Hrafn Þorvarðarson, Kristey Sara Sindradóttir, Saga Líf Ágústsdóttir og Solveig Amalía Atladóttir lesa. Til vara verða þær Borgný Valgerður Björnsdóttir og Sigrún Betanía Kristjánsdóttir. 

Þar sem netþjónn Menntamálastofnunar stóð ekki undir því álagi sem fylgdi prófatöku 9.bekkjar í íslensku í morgun lentu flestir skólar landsins í vandræðum. Hjá okkur komust nokkrir nemendur inn í prófið og gátu byrjað, en duttu síðan út aftur. Þegar við höfðum beðið í 70 mínútur án þess að kerfið væri komið í lag ákváðum við að ekki væri ástæða til að bíða lengur þar sem niðurstöður yrðu hvort sem er ómarktækar. Við bíðum nú ákvörðunar Menntamálastofnunar um hvort reynt verður að endurtaka prófið síðar eða ekki og erum þar í sömu sporum og margir aðrir skólar.

Við höldum okkar striki hvað varðar stærðfræðiprófið á morgun og treystum því að kerfið verði þá komið í lag.

Aðalfundur foreldrafélags G.Í. verður haldinn í dansstofu skólans fimmtudaginn 8. mars kl. 20:00. Á fundinum verða almenn aðalfundarstörf, auk fyrirlesturs um ADHD. Við hvetjum alla foreldra til að fjölmenna.

Samræmd könnunarpróf verða haldin í 9. bekk dagana 7. mars (íslenska), 8. mars (stærðfræði) og 9. mars (enska).
Nemendur árgangsins eiga að mæta klukkan 8:00 þessa daga og eru boðnir í morgunmat í sal skólans, en prófin hefjast kl. 9:00. Eftir prófin heldur skólastarfið áfram og eru valgreinar á sínum stað.

Við leggjum áherslu á að þessir dagar séu sem líkastir venjulegum skóladögum að uppbyggingu og spennustigi haldið í lágmarki.

Í morgun fór fram skólakeppni Stóru upplestrarkeppninnar, þar sem valdir voru fulltrúar skólans til að taka þátt í lokahátíðinni sem fram fer þriðjudaginn 13. mars n.k.

Nítján nemendur úr 7. bekk lásu sögubrot og ljóð og var dómurunum, þeim Margréti Halldórsdóttur, Rannveigu Halldórsdóttur og Sigríði Ó. Kristjánsdóttur vandi á höndum að velja 7 af þessum frambærilegu lesurum. Niðurstaðan varð þó sú að fulltrúar skólans verða þau Anja Karen Traustadóttir, Anna Marý Jónasdóttir, Ástmar Helgi Kristinsson, Daði Hrafn Þorvarðarson, Kristey Sara Sindradóttir, Saga Líf Ágústsdóttir og Solveig Amalía Atladóttir. Til vara verða Borgný Valgerður Björnsdóttir og Sigrún Betanía Kristjánsdóttir.
Við óskum öllum þátttakendum innilega til hamingju með góða frammistöðu og hlökkum til lokahátíðarinnar.

Nú er febrúar á enda og því um að gera að skrá mataráskrift fyrir mars sem fyrst á http://mataraskrift.isafjordur.is/ . Nokkuð hefur borið á því undanfarið að ekki hefur verið gengið frá skráningum hjá nemendum sem telja sig eiga að vera í áskrift og biðjum við foreldra að ganga frá þeim málum.

Hér má nálgast matseðil marsmánaðar.

Mynd: Ágúst Atlason/Skíðasvæði Ísafjarðarbæjar

Föstudaginn 2. mars n.k. er skíða- og útivistardagur í Tungudal fyrir 5. - 10. bekk. Strætó fer þá frá skólanum kl. 9:30 og úr Tungudal heim aftur kl. 13:00. Þeir sem vilja vera lengur, mega það sér að kostnaðarlausu, en sjá þá um að koma sér heim aftur. Nemendur þurfa ekki að mæta í skólann að morgni en gott væri ef einhverjir foreldrar geta skutlað nemendum á skíðasvæðið til að létta á strætónum. Lyfturnar opna kl. 10:00 og er nóg að mæta þá upp eftir.
Hægt verður að leigja skíði/bretti og skó á kr. 1.500 fyrir daginn. Göngubraut verður troðin þannig að nemendur geta verið á gönguskíðum. Þeir nemendur sem ekki vilja vera á skíðum/brettum geta komið með snjóþotur, sleða eða ruslapoka til að renna sér á og einnig getum við lánað rassaþotur og skóflur.
Þeir sem eru í áskrift í mötuneyti fá nesti þaðan, samlokur og fernudrykki.

Nú hefur fréttabréf febrúarmánaðar litið dagsins ljós. Það hefur verið mikið um að vera hér í skólanum eins og endranær og er því stiklað á stóru.