Í morgun hittust 4. - 6. bekkur á sal skólans til að þakka vinaliðum vel unnin störf frá áramótum. Að því loknu fara vinaliðarnir ásamt Árna Heiðari Ívarssyni, umsjónarmanni verkefnisins í bíó. Hópurinn er svo væntanlegur aftur í skólann um hádegisbilið.

Vinaliðaverkefnið hefur verið starfrækt hér við skólann í fjögur ár og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að stuðla að fjölbreyttari leikjum í frímínútum, leggja grunn sem gerir nemendum kleift að tengjast sterkum vináttuböndum, minnka togstreitu milli nemenda og hampa góðum gildum, svo sem vináttu, virðingu og því að allir fá að taka þátt.

Grunnskólinn á Ísafirði hefur verið tilnefndur til Foreldraverðlauna Heimilis og skóla - landssamtaka foreldra, fyrir verkefnið Nemendaþing um notkun samfélagsmiðla, sem skólinn hélt í október s.l. Dómnefnd velur eitt verkefni sem hlýtur verðlaunin, en auk þeirra verða veitt hvatningarverðlaun til verkefnis sem dómnefnd telur að muni skila árangri til framtíðar. Einnig verður dugnaðarforkur Heimilis og skóla útnefndur, auk þess sem viðurkenningar verða veittar til allra verkefna sem tilnefnd eru.

Lilja Dögg Alfreðsdóttir, mennta- og menningarmálaráðherra, mun afhenda verðlaunin við hátíðlega athöfn sem fram fer í Safnahúsinu við Hverfisgötu í Reykjavík, þriðjudaginn 15. maí næstkomandi.

Ferðinni sem 10. bekkur stefndi á í Haukadal á morgun, hefur nú verið frestað vegna óviðráðanlegra orsaka. Kennsla verður því samkvæmt stundaskrá á morgun.

Nú er vordagskráin frágengin og ljóst að nóg verður um að vera það sem eftir lifir skólaársins. Ekki má vanmeta það nám sem á sér stað utan skólastofunnar, þar sem nemendur fá enn frekari þjálfun í mörgum grunnþáttum menntunar eins og t.d. læsi, sköpun, heilbrigði og velferð. Grunnþættirnir snúast um læsi á samfélag, menningu, umhverfi og náttúru þannig að börn og ungmenni læri að byggja sig upp andlega og líkamlega, að bjarga sér í samfélaginu og vinna með öðrum.

Við vonum því að nemendur njóti þess náms sem á sér stað í hinum ýmsu viðburðum sem boðið er upp á nú í mánuðinum, innan dyra sem utan.

Endurfyrirlögn samræmdra könnunarprófa í íslensku og ensku í 9. bekk hófst í gær mánudaginn 30. apríl en próftímabilið stendur yfir til 11. maí. Öllum nemendum býðst að þreyta könnunarpróf að nýju, hvort sem þeir náðu að ljúka prófum í mars eða ekki. Skólar gátu valið að hafa prófdaga í vor eða haust en alls verða 13 prófdagar.

Grunnskólinn á Ísafirði ákvað að velja dagana 2. og 3. maí og verður enskuprófið því lagt fyrir á morgun og íslenskuprófið á fimmtudag. Þrír nemendur úr 9. bekk völdu að taka enskuprófið og tveir íslenskuprófið, af 27 nemendum árgangsins.

Starfsfólk Menntamálastofnunar hefur undanfarnar vikur undirbúið endurfyrirlögn prófanna. Vandlega hefur verið farið yfir ferla og viðbragðsáætlanir endurbættar, þannig að nú er bara að vona að allt gangi eins og best verður á kosið.

Mynd frá íþróttadegi G.Í. fyrir nokkrum árum

Nú er apríl að renna sitt skeið á enda og við tekur maí með öllu sínu vorskipulagi. Við erum að ganga frá skipulagningu á öllum þeim viðburðum sem verða á dagskránni og birtum um leið og lokið er.

Útileikfimin hófst í dag og hitta krakkarnir í 1. - 4. bekk sína íþróttakennara við Sundhöllina, en 5. - 10. bekkur mætir áfram upp á Torfnes og nýtir sér aðstöðuna þar. Við minnum alla á að vera klædda til útiveru.

« 1 af 4 »

Í morgun komu þeir Gunnlaugur Gunnlaugsson og Sigurður Ólafsson frá Kiwanisklúbbnum Básum hér á Ísafirði og færðu öllum 1. bekkingum, alls 50 krökkum, reiðhjólahjálma að gjöf. Lögreglumenn voru einnig viðstaddir afhendinguna og ræddi Þórir Guðmundsson við nemendur um hvar má hjóla og hvar ekki og nauðsyn hjálmanotkunar.

Um leið og við þökkum Kiwanismönnum kærlega fyrir þessar rausnarlegu gjafir, þá minnum við alla á nauðsyn hjálmanotkunar, bæði á reiðhjólum og hlaupahjólum.

Elín Þóra Friðfinnsdóttir (Mynd: Facebook).

Á morgun fer fram útför Elínar Þóru Friðfinnsdóttur frá Háteigskirkju í Reykjavík kl. 13:00. Elín Þóra var kennari hér við skólann s.l. fjögur ár, en varð bráðkvödd 9. apríl s.l.

Minningarathöfn um Elínu Þóru fer fram frá Ísafjarðarkirkju á morgun kl. 16:30 í umsjá sr. Fjölnis Ásbjörnssonar.

María Ólafsdóttir á fyrirlestri hjá 9. bekk

Í morgun kom María Ólafsdóttir í heimsókn í 7. - 10. bekk og fræddi nemendur um rafrettur, en hún er læknir við Heilbrigðisstofnun Vestfjarða. María fór yfir skaðsemina sem fylgir rafrettum og fíknina af völdum nikótínsins sem þær innihalda. Nemendur voru flestir vel með á nótunum og vel upplýstir og sköpuðust góðar umræður. Við þökkum Maríu kærlega fyrir góðan og fræðandi fyrirlestur.

Nú er löng helgi framundan, þar sem sumardagurinn fyrsti er á fimmtudag og vorfrí á föstudag. Við vonum að allir njóti þessara daga sem best og komi endurnærðir á mánudaginn.