Á dögunum stóð Foreldrafélag Grunnskólans á Ísafirði fyrir jólaföndri í sal skólans. Mjög góð mæting var á föndrið en hátt í 200 börn, foreldrar og ættingjar mættu og föndruðu saman, drukku kakó og borðuðu piparkökur. Föndrið hefur svo sannarlega fest sig í sessi á aðventunni og hefur þátttakan verið mjög góð hingað til.
Nánari upplýsingar um félagið og starfsemi þess má nálgast á heimasíðu félagsins.
Skólastarfið hefur verið fjölbreytt nú á aðventunni sem endranær, en ýmislegt er gert til að brjóta það upp í mesta skammdeginu.
Vinabekkirnir í 1. og 8. bekk hittust á föstudaginn, þar sem unglingarnir lásu jólasögu fyrir yngri krakkana og sungu saman jólalög.
Krakkarnir í 3. bekk skruppu upp í Jónsgarð, hengdu upp kertalugtir í trén og kveiktu eld. Á meðan kakóið hitnaði á hlóðunum var brugðið á leik og svo var fengið sér heitt kakó og borðað jólasmákökur með.
7. bekkur heimsótti Bæjarbókasafnið í vikunni og naut þess að glugga í bækur og blöð, en það er alltaf jafn notalegt að sækja það heim, enda einstakur andi í því virðulega og fallega húsi.
Jólaundirbúningurinn er í hámarki þessa dagana hjá öllum árgöngum, en allir föndra eitthvað ákveðið stykki sem þeir fá svo að taka með sér heim fyrir jólin. Einhverjir foreldrar verða jafnvel heppnir og fá handgerðar jólagjafir fá börnunum sínum.
Nú fer í hönd síðasta heila kennsluvika desembermánaðar. Kennt verður samkvæmt stundaskrá alla þessa viku og mánudag og þriðjudag í næstu viku.
Miðvikudaginn 19. desember er skreytingadagur. Þá er skóli frá kl. 8:00 - 12:00 og síðasti dagur mötuneytis fyrir jól. Dægradvöl verður opin frá kl. 12:00.
Fimmtudaginn 20. desember eru svo litlu jólin. Þá er skólatími frá kl. 9:00 - 12:00 og fer strætó kl. 8:40 úr firðinum og Hnífsdal. Á litlu jólin mæta allir prúðbúnir í sínar bekkjarstofur, þar sem allir eiga saman hátíðlega stund auk þess sem haldnar eru fjórar jólatrésskemmtanir. Dægradvöl verður opin frá kl. 12:00.
Allar nánari upplýsingar varðandi hvern og einn árgang, munu verða settar inn á bekkjarsíður, eða sendar heim eftir öðrum leiðum.
Á morgun, föstudaginn 7. desember, verður frumsýnt í sal skólans leikritið ÞegarTrölli stal jólunum eftir Dr. Seuss, en um er að ræða árlegt 1. des. leikrit nemenda. Leikstjóri er Sunna Karen Einarsdóttir og aðstoðarleikstjóri Agnes Ósk Marzellíusardóttir, en leikarar eru úr 8. - 10. bekk G.Í.
Krakkarnir hafa einungis haft þrjár vikur til þess að æfa og setja upp sýninguna, þannig að æfingar hafa verið mjög stífar undanfarið.
Fyrsta sýning er klukkan 20:00 á morgun og er ætluð 8. - 10. bekk. Sýningar fyrir almenning verða á laugardag kl. 13:00 og á sunnudag kl. 14:00.
Miðaverð er kr. 1.000 fyrir fullorðna og kr. 500 fyrir yngri en 16 ára.
Í dag var jólaföndurlota á unglingastigi frá kl. 11:15 - 12:35, þar sem boðið var upp á fjölbreytilegt föndur. Nemendur völdu sér viðfangsefni s.s kertagerð, gjafapokagerð, pappírsgerð, þæfingu, piparkökubakstur, kortagerð, gluggaskreytingar o.fl. og voru allir ánægðir með afraksturinn.
Mánudaginn 3. des er opinn dagur í skólanum. Foreldrar og aðrir velunnarar eru ávallt velkomnir í skólann, en eru hvattir sérstaklega til að kíkja í heimsókn þennan dag.
Nú eru aðeins 24 dagar til jóla og ekki seinna vænna að útbúa jóladagatöl fyrir allar bekkjardeildir skólans. Í ár er jóladagatal 4. bekkjar kirkja með ljómandi fallegum gluggum sem skreyttir eru af mikilli list. Hvert barn fékk það verkefni að skreyta einn glugga og skrifa síðan eitt erindi í uppáhalds jólalaginu sínu inn í gluggann. Börnin drógu um dagsegningar og þegar sá dagur rennur upp verður uppáhalds jólalagið þeirra sungið.
Myndmenntahópur 6. bekkjar fékk það skemmtilega verkefni í vikunni að skreyta glugga verslunarinnar Eymundsson. Pétur Guðmundsson, myndmenntakennari, aðstoðaði krakkana og eru gluggarnir svo sannarlega orðnir jólalegir og fallegir.
Dagur íslenskrar tónlistar er laugardaginn 1. desember næstkomandi og líkt og í fyrra verður mikið um dýrðir af því tilefni. Verkefnið Syngjum saman sem hleypt var af stokkunum í fyrra verður nú endurtekið þar sem landsmenn allir geta kveikt á útvarpinu og sungið með þremur skemmtilegum lögum. Þar sem 1. desember lendir á laugardegi í ár verður hann haldinn hátíðlegur föstudaginn 30. nóvember, svo að sem flestir geti tekið þátt - þar með taldir skólar og tónmenntaskólar sem voru hvað litríkastir í fyrra en þá vakti verkefnið mikla lukku um land allt og voru viðbrögð framar vonum.
Nú hafa lögin þrjú verið valin til leiks og eru þau sem hér segir:
Jólakötturinn eftir Ingibjörgu Þorbergs, Spáðu í mig eftir Megas og Á Sprengisandi eftir Sigvalda Kaldalóns við ljóð Gríms Thomsen. Lögin þrjú verða spiluð á Rás 2 kl. 11:15 á föstudaginn og munu nemendur og starfsfólk G.Í. að sjálfsögðu syngja með.
Foreldrafélag G.Í. stendur fyrir jólaföndurdegi fyrir nemendur og fjölskyldur þeirra laugardaginn 1. desember í sal skólans, frá kl. 11:00 - 13:00. Mikið úrval af tréföndri verður til sölu og einnig verður hægt að búa til jólakort. Allt tréföndur kostar 500 kr. stk. og jólakortin 100 kr. stk.
Einungis verður hægt að borga með peningum. Málningin fylgir með tréföndrinu, en fólk er beðið um að hafa með sér tússliti, tréliti, pensla, skæri, límstift og lím.
