Þau eru margskonar viðfangsefnin sem nemendur og starfsfólk skólans taka sér fyrir hendur í fjölbreyttu skólastarfi. Í nýju fréttabréfi skólans er stiklað á helstu atburðum janúar mánaðar.

Í dag fengu allir nemendur skólans vitnisburð fyrir haustönn, sem lauk nú í lok janúar. Foreldradagur er svo næstkomandi miðvikudag, 6. febrúar og fóru tímasetningar viðtala einnig heim með nemendum í dag.

Í dag fengum við góða gesti í heimsókn frá Körfuknattleiksfélagi Ísafjarðar. Þar voru á ferð þau Guðjón M. Þorsteinsson, Eva Margrét Kristjánsdóttir íþróttamaður Ísafjarðarbæjar 2012 og Brittany Schoen, en þær stöllur leika báðar með meistaraflokki KFÍ.  

Þau ræddu við nemendur um íþróttir og félagsmál og hve mikilvægt það er að taka þátt í hverskonar tómstundum. Þau lögðu áherslu á mikilvægi þess að láta skólann ganga fyrir og skipuleggja sig vel, bæði í námi og öðru starfi, enda er skipulag og samviskusemi lykillinn að góðum árangri.
Guðjón sagði að Eva Margrét, sem er í 10. bekk G.Í., væri frábær fyrirmynd. Hún stundar námið af samviskusemi, vinnur með skóla auk þess sem hún æfir á fullu og þar vantar ekki skipulag.

Frábærir krakkar í G.Í. sem spurðu góðra spurninga og eru greinilega með allt á tæru. Framtíðin er björt og hlakka ég til að sjá þau í framtíðinni, sagði Guðjón að lokum.

Á morgun, fimmtudaginn 31. janúar, munu foreldrafélög grunnskólanna á norðanverðum Vestfjörðum bjóða upp á skemmtilegan og fræðandi fyrirlestur með Hugo Þórissyni sálfræðingi, um samskipti foreldra og barna. Fyrirlesturinn er haldinn á 4. hæð Stjórnsýsluhússins á Ísafirði og hefst kl. 20:00. Allir áhugasamir eru velkomnir, sama hvort þeir eiga börn á grunnskólaaldri eða ekki.

Í morgun var stuttmyndin Fáðu já frumsýnd í öllum grunn- og framhaldsskólum landsins, þ.á.m. í 9. og 10. bekk G.Í., en myndin leitast við að skýra mörkin á milli kynlífs og ofbeldis. Tilgangurinn er einnig að leiðrétta ranghugmyndir unglinga um kynlíf, en nýleg rannsókn sýnir að íslenskir drengir neyta kláms í stórum stíl.

Mælt er með því að aðstandendur barna kynni sér leiðarvísi að stuttmyndinni, sem útskýrir hugmyndafræðina að baki myndinni. 

Handritshöfundar myndarinnar eru Páll Óskar Hjálmtýsson, Þórdís Elva Þorvaldsdóttir og Brynhildur Björnsdóttir. 

Allar frekari upplýsingar um myndina má finna hér á heimasíðu hennar. 

Á föstudaginn var líf og fjör hjá krökkunum í 1. bekk því að þann dag var hundraðasti skóladagurinn þeirra. Krakkarnir æfðu sig að telja upp í hundrað með því að gera ýmsar æfingar og svo var dansað, hoppað og skoppað og endað daginn á að horfa á myndband og borða popp.  1. bekkingum finnst svo sannarlega alltaf gaman í skólanum!

7.EJ í leiksundi

Í vikunni sem leið fengu nemendur að koma með allskyns leikföng í sundtímana. Uppblásnar fígúrur af ýmsum gerðum birtust í Sundhöllinni ásamt ýmsum öðrum leikföngum og voru vatnsbyssurnar einnig mjög vinsælar.

Leiksundið er alltaf jafn skemmtilegt eins og sjá má á meðfylgjandi mynd af 7.EJ.

6.HS gæddi sér á sólarpönnukökum í dag

Í dag fögnuðu margir árgangar sólardeginum með sólarpönnukökum í boði foreldra. Sólin náði þó ekki að brjóta sér leið í gegnum skýin, en krakkarnir voru þó vel meðvitaðir um nálægð hennar og bíða spenntir eftir að komast léttklæddari út.

Þá  er komið að hinu margrómaða þorrablóti 10.bekkjar skólans, en það verður haldið á morgun, föstudaginn 25. janúar, á sjálfan bóndadaginn. Nú þegar hafa rúmlega 170 manns skráð sig til þátttöku og stefnir í hörku blót hjá okkur að vanda, en þorrablótið er einn af hápunktunum í menningarstarfi skólans á hverju ári.                                  

Líkt og á mörgum góðum blótum mætir fólk með sinn þorramat fyrir sig og sína í trogum. Einnig þarf fólk að hafa með sér diska og hnífapör og servíettur ef fólk vill. Gos verður selt á staðnum til fjáröflunar fyrir 10. bekk og munu nokkrir  9. bekkingar standa sjoppuvaktina.  Glös verða fengin að láni úr skólaeldhúsinu.

Húsið opnar kl. 19:30 og hefst borðhald kl. 20:00 í hátíðarsal skólans.

« 1 af 4 »

Í dag fór 6. bekkur í skautaferð inn á gervigrasvöllinn á Torfnesi, sem er ísi lagður. Aðstæður voru allar hinar bestu og nutu krakkarnir útiverunnar og sýndu margir góða takta á skautunum. 

Ekki voru til skautar fyrir alla, en krakkarnir skiptust á og allir fengu að spreyta sig. Skólinn á nú nokkur pör af skautum og þiggur með þökkum fleiri slík af öllum stærðum, ef einhverjir eiga á lausu. Það væri mjög gott að eiga alla vega fyrir eina bekkjardeild svo hægt sé að skella sér á skauta með skömmum fyrirvara.

Fleiri myndir frá þessari vel heppnuðu skautaferð eru inni á myndasíðu 6. bekkjar.