Í vikunni greip 2. bekkur tækifærið  og skellti sér út í blómagarð í byggingaframkvæmdir.  Ekki þurfti steypu eða timbur til verksins, þar sem snjórinn var nægur. Byggingarnar risu hratt og voru byggð virki, snjókarlar, útsýnispallur og rennibraut.  Einnig litu margir englar dagsins ljós, sem hafa eflaust dáðst að listsköpun krakkanna og vakað yfir þeim þar til snjóinn leysti. 

Útivistin heppnaðist vel og voru allir ánægðir með verk sín og endurnærðir eftir góða útiveru.

Um liðna helgi var Bikarmót SKÍ í skíðagöngu haldið í blíðskaparveðri á Seljalandsdal. Keppendur voru frá 13 ára aldri og komu frá Ísafirði, Ólafsfirði, Akureyri og Reykjavík. Keppt var í sprettgöngu, með frjálsri aðferð og í svokallaðri skiptigöngu, sem er tvíkeppni, þ.e. hefðbundin aðferð og skaut.

Katrín Ósk Einarsdóttir, nemandi í 8. bekk G.Í. gerði sér lítið fyrir og sigraði þrefalt, þ.e. í öllum keppnisgreinum. Unnur Eyrún Kristjánsdóttir í 8. bekk varð í 2. sæti með frjálsri aðferð og tvíkeppni og í 3. sæti í sprettgöngu. Jóhanna María Steinþórsdóttir í 9. bekk varð í 3. sæti í tvíkeppni og í því 4. í sprettgöngu og frjálsri aðferð. Stelpurnar kepptu allar í flokknum 13 - 14 ára.

Hjá strákunum varð Dagur Benediktsson í 9. bekk í 2. sæti í öllum greinunum þremur. Sigurður Arnar Hannesson í 8. bekk varð í 3. sæti í sprettgöngu og tvíkeppni og í 4. sæti með frjálsri aðferð. Dagur og Sigurður Arnar kepptu báðir í flokki 13 - 14 ára.

Guðmundur Sigurvin Bjarnason í 10. bekk, keppti í flokki 15 - 16 ára og sigraði í sprettgöngu og varð í 2. sæti með frjálsri aðferð og í tvíkeppninni.

Við óskum öllum þessum krökkum innilega til hamingju með góðan árangur.

Nú hefur lúsin gert vart við sig á nýjan leik hér í einum árgangi og hafa foreldrar fengið bréf varðandi rétt viðbrögð. Allir geta fengið lús og lúsasmit er ekki merki um óþrifnað. 

Lúsin smitast nær eingöngu við beina snertingu og er sáralítil  hætta á að smitast af umhverfinu en möguleiki er að smitast af greiðum/burstum og höfuðfötum.  Lús sem dottið hefur úr höfði verður fljótt löskuð og veikburða.

Foreldrar eru hvattir til að bregðast við og láta skólahjúkrunarfræðing vita um öll tilvik sem upp koma.

Nú fer að líða að lokum haustannar með viðeigandi námsmati, en önninni lýkur 18. janúar.

Í nýrri aðalnámskrá fyrir grunnskóla er skólum gert að taka tillit til fleiri þátta en þeirra sem við höfum til þessa kallað hefðbundið námsmat. Það mat hefur miðast að mestu leyti við árangur nemenda í einstökum námsgreinum. Nú skal einnig, innan hvers námssviðs, leggja mat á hæfni nemenda í grunnþáttum almennrar menntunar. Þar ber helst að nefna þætti eins og samskipti og samstarf, þekkingu og leikni, hæfni til að miðla þekkingu sinni og beita gagnrýninni hugsun, hæfni til að vinna undir leiðsögn ásamt hæfni til sjálfstæðra vinnubragða og ábyrgðar á eigin námi.

Í Grunnskólanum á Ísafirði hefur nú þegar farið fram mikil vinna við endurskipulag á námsmati en þó er ljóst að þegar um svona miklar breytingar er að ræða verður að fikra sig áfram og hrinda þeim í framkvæmd í nokkrum skrefum. Skólinn lagði af stað með töluverðar breytingar haustið 2011 en námsmatið hefur verið í stöðugri þróun síðustu ár í átt að nýjum markmiðum aðalnámskrár. 

Kvenfélagið Hvöt varð 100 ára þann 29. des s.l. og af því tilefni var ákveðið að styrkja nokkur góð málefni í heimabyggð. Verkefni í byrjendalæsi G.Í. hlaut 200.000 kr. í styrk og er þeim fjármunum ætlað að fara í kaup á kennslugögnum sem nýtast í því verkefni.

Byrjendalæsi er ný aðferð til að kenna ungum börnum lestur og miðar að því að börn nái góðum árangri í læsi sem allra fyrst á skólagöngunni. Aðferðin hefur verið að ryðja sér til rúms í skólastarfi á landinu og nú er svo komið að yfir 70 grunnskólar af þeim 174 sem starfa á landinu styðjast við aðferðina og alltaf bætast fleiri í hópinn. Grunnskólinn á Ísafirði tók byrjendalæsi upp nú í haust í samstarfi við skólaþróunarsvið Háskólans á Akureyri. Aðferðin lofar góðu, en með henni er reynt að setja skilning ungra barna í forgrunn í lestrarkennslu í stað þess að einblína á lestrartækni og hraðan lestur.  

Styrkur kvenfélagsins Hvatar kemur sér afar vel í þessu stóra verkefni sem byrjendalæsið er og þakkar skólinn höfðinglega gjöf.

Frá þrettándagleði á Ísafirði 2012. Mynd: bb.is

Þann 6. janúar er þrettándinn en þá er síðasti dagur jóla. Síðasti jólasveinninn fer þá aftur til fjalla eins og eftirfarandi vísubrot eftir Jóhannes úr Kötlum ber vott um: 

Svo tíndust þeir í burtu, 
- það tók þá frost og snjór. 
Á Þrettándanum síðasti 
sveinstaulinn fór. 

Margt skemmtilegt er um að vera á þrettándanum. Þann dag eiga kýr að geta talað mannamál og álfar fara á kreik. Fólk kveður gjarnan jólin með því að safnast saman við þrettándabrennur, skýtur upp flugeldum og syngur. Álfar, huldufólk og jafnvel tröll sjást á sveimi. Einnig má stundum rekast á einn og einn jólasvein sem ekki hefur skilað sér aftur upp til fjalla. (Heimild: Námsgagnastofnun).

Allt of mikið er um að nemendur skólans vanti íþróttaföt eða handklæði þegar þeir eiga að fara í íþróttir. Starfsmenn íþróttahúsanna hafa lánað nemendum föt og handklæði en það á aðeins að vera neyðarráðstöfun. Í morgun hafa verið lánuð handklæði sem nemur þremur þvottavélum í sundhöllinni einni. Það segir sig sjálft að þetta þarf að bæta.

Foreldrar eru vinsamlegast beðnir um að skoða hvort börnin eiga að fara í sund eða leikfimi og senda viðeigandi búnað með þeim. 

Aldrei má sofna á verðinum í umræðunni um einelti. Markmið okkar er að hafa þá umræðu alltaf virka, en auðvitað þarf líka að gera margt fleira í skólanum. Á haustönninni fórum við í sérstakt eineltisverkefni. Þar var lögð áhersla á að nemendur skilgreindu einelti og kynnu ráð til að bregðast við ef þeir teldu að um slíkt væri að ræða. Oft er einelti mjög dulið og stundum upplifa krakkar neikvæð skilaboð vegna samskipta sem aðrir upplifa á allt annan veg. Við því þarf líka að bregðast. Við viljum helst geta leiðrétt neikvæð samskipti áður en þau fara að flokkast sem eineltismál en oft höfum við ekki vitneskju um vanlíðan nemenda því þeir segja okkur ekki alltaf frá.  Stundum segja krakkar líka frá atburðum heima sem þeir vilja ekki segja frá í skólanum. Ef við höfum ekki vitneskju getum við ekkert gert.

Til að auðvelda nemendum og foreldrum að koma til okkar upplýsingum höfum við útbúið sérstakt eyðublað þar sem hægt er að tilkynna um grun um einelti. Við viljum reyna að tryggja að ferlar slíkra mála séu sem skilvirkastir og því teljum við best að fá slíkar upplýsingar skriflega. Eyðublaðið er á heimasíðu skólans, sjá hér. 

Rómverski guðinn Janus

Nú er janúar, fyrsti mánuður ársins, genginn í garð. Hann hófst með nýársdegi sem til forna var stundum kallaður áttidagur en það þýðir einfaldlega að hann er áttundi dagur jóla. Janúarmánuður heitir eftir Janusi, rómverskum guði, sem var sérstakur fyrir þá sök að hann hafði tvö andlit. Sneri annað fram og hitt aftur en það er hagnýtt fyrir heimilisguð og vísar til þess að hann sér um heima alla og ekkert kemur honum á óvart. Hann táknar þannig upphaf og endi alls, nútíð, fortíð og framtíð. Janus gætti dyra á híbýlum fólks og af nafni hans er enska orðið „janitor“ dregið eða dyravörður (Heimild: Námsgagnastofnun).