Frá þrettándagleði á Ísafirði 2012. Mynd: bb.is

Þann 6. janúar er þrettándinn en þá er síðasti dagur jóla. Síðasti jólasveinninn fer þá aftur til fjalla eins og eftirfarandi vísubrot eftir Jóhannes úr Kötlum ber vott um: 

Svo tíndust þeir í burtu, 
- það tók þá frost og snjór. 
Á Þrettándanum síðasti 
sveinstaulinn fór. 

Margt skemmtilegt er um að vera á þrettándanum. Þann dag eiga kýr að geta talað mannamál og álfar fara á kreik. Fólk kveður gjarnan jólin með því að safnast saman við þrettándabrennur, skýtur upp flugeldum og syngur. Álfar, huldufólk og jafnvel tröll sjást á sveimi. Einnig má stundum rekast á einn og einn jólasvein sem ekki hefur skilað sér aftur upp til fjalla. (Heimild: Námsgagnastofnun).

Allt of mikið er um að nemendur skólans vanti íþróttaföt eða handklæði þegar þeir eiga að fara í íþróttir. Starfsmenn íþróttahúsanna hafa lánað nemendum föt og handklæði en það á aðeins að vera neyðarráðstöfun. Í morgun hafa verið lánuð handklæði sem nemur þremur þvottavélum í sundhöllinni einni. Það segir sig sjálft að þetta þarf að bæta.

Foreldrar eru vinsamlegast beðnir um að skoða hvort börnin eiga að fara í sund eða leikfimi og senda viðeigandi búnað með þeim. 

Aldrei má sofna á verðinum í umræðunni um einelti. Markmið okkar er að hafa þá umræðu alltaf virka, en auðvitað þarf líka að gera margt fleira í skólanum. Á haustönninni fórum við í sérstakt eineltisverkefni. Þar var lögð áhersla á að nemendur skilgreindu einelti og kynnu ráð til að bregðast við ef þeir teldu að um slíkt væri að ræða. Oft er einelti mjög dulið og stundum upplifa krakkar neikvæð skilaboð vegna samskipta sem aðrir upplifa á allt annan veg. Við því þarf líka að bregðast. Við viljum helst geta leiðrétt neikvæð samskipti áður en þau fara að flokkast sem eineltismál en oft höfum við ekki vitneskju um vanlíðan nemenda því þeir segja okkur ekki alltaf frá.  Stundum segja krakkar líka frá atburðum heima sem þeir vilja ekki segja frá í skólanum. Ef við höfum ekki vitneskju getum við ekkert gert.

Til að auðvelda nemendum og foreldrum að koma til okkar upplýsingum höfum við útbúið sérstakt eyðublað þar sem hægt er að tilkynna um grun um einelti. Við viljum reyna að tryggja að ferlar slíkra mála séu sem skilvirkastir og því teljum við best að fá slíkar upplýsingar skriflega. Eyðublaðið er á heimasíðu skólans, sjá hér. 

Rómverski guðinn Janus

Nú er janúar, fyrsti mánuður ársins, genginn í garð. Hann hófst með nýársdegi sem til forna var stundum kallaður áttidagur en það þýðir einfaldlega að hann er áttundi dagur jóla. Janúarmánuður heitir eftir Janusi, rómverskum guði, sem var sérstakur fyrir þá sök að hann hafði tvö andlit. Sneri annað fram og hitt aftur en það er hagnýtt fyrir heimilisguð og vísar til þess að hann sér um heima alla og ekkert kemur honum á óvart. Hann táknar þannig upphaf og endi alls, nútíð, fortíð og framtíð. Janus gætti dyra á híbýlum fólks og af nafni hans er enska orðið „janitor“ dregið eða dyravörður (Heimild: Námsgagnastofnun).

Við minnum á að þeir sem hyggja á skráningu í mötuneyti á nýju ári, þurfa að ganga frá þeim málum sem fyrst. Hér á síðunni undir hnappnum mötuneyti er hægt að nálgast skráningareyðublað ásamt matseðlum fram í apríl.

Þá hafa allir nemendur á yngsta- og miðstigi fengið eyðublöð heim til skráningar í mjólkuráskrift, fyrir þá sem það vilja. Þessum eyðublöðum skal skilað til umsjónarkennara eða ritara sem fyrst.

Starfsfólk G.Í. óskar öllum gleðilegs árs og þakkar liðið ár.

Fimmtudaginn 3. janúar er starfsdagur og hefst kennsla föstudaginn 4. janúar samkvæmt stundaskrá.

Starfsfólk Grunnskólans á Ísafirði óskar nemendum sínum, fjölskyldum þeirra og velunnurum öllum gleðilegrar jólahátíðar og farsældar á komandi ári, með kærri þökk fyrir samstarfið á árinu sem er að líða.

Í morgun voru litlu jólin haldin hátíðleg. Allir mættu prúðbúnir og áttu saman notalega stund í sínum bekkjarstofum. Haldnar voru fjórar jólatrésskemmtanir í anddyri nýja skólans þar sem nemendur og starfsfólk sungu saman jólalög og dönsuðu í kringum jólatréð, við undirleik Sveinfríðar Olgu Veturliðadóttur skólastjóra. Jólatrésskemmtanirnar gengu einstaklega vel og gaman að sjá hvað allir nemendur nutu hátíðleikans og samverunnar. Að sjálfsögðu birtust nokkrir rauðklæddir sveinar og létu þeir ekki sitt eftir liggja í söngnum og dansinum, enda engir nýgræðingar þar á ferð.

Að litlu jólunum loknum hófst svo jólaleyfið og verður fyrsti kennsludagur eftir áramótin föstudaginn 4. janúar.

Á morgun eru litlu jólin haldin hátíðleg í skólanum. Þá mæta allir kl. 9:00 spariklæddir og eiga notalega morgunstund í sínum bekkjarstofum, auk þess sem allir fara á jólatrésskemmtun í anddyri nýja skólans.

Skóla lýkur kl. 12:00 og hefst þá jólaleyfi. Kennsla hefst aftur á nýju ári föstudaginn 4. janúar 2013.

Hópurinn með glæsileg piparkökuhús

Ívar Orri Guðmundsson stoltur húseigandi

Jóhanna María Steinþórsdóttir með sitt glæsilega hús

« 1 af 3 »

Ein af jólahefðunum í skólanum er sú að heimilisfræðivalið á unglingastigi baki piparkökuhús undir leiðsögn Guðlaugar Jónsdóttur, heimilisfræðikennara. Húsin eru nú tilbúin í allri sinni dýrð og voru krakkarnir alsælir þegar búið var að skreyta þau og gera þau sem jólalegust.

Hægt er að sjá fleiri myndir með því að smella hér.