VALMYND ×

Fréttir

Samstarfsverkefni T.Í. og G.Í.

Lúðrasveitir T.Í. ásamt nokkrum nemendum 5. bekkjar (mynd: T.Í.)
Lúðrasveitir T.Í. ásamt nokkrum nemendum 5. bekkjar (mynd: T.Í.)

Eftir áramótin fóru Grunnskólinn á Ísafirði og Tónlistarskóli Ísafjarðar af stað með blásturshljóðfæraverkefni í 5. bekk undir stjórn Madis Mäekalle. Allir 36 nemendur árgangsins  sóttu þá tíma á kornett og klarinett, fjórir krakkar í einu, tvisvar í viku. Þannig fengu allir þessir krakkar tækifæri til að kynnast hljóðfæraleik og samspili. Verkefninu lauk svo með því að nokkrir þessara nemenda spiluðu á tónleikum með lúðrasveitum T.Í. á tónleikum 9. maí s.l. og var það mikil upplifun og reynsla fyrir þessar krakka. 

Nemendur 5. bekkjar voru mjög ánægðir með þessa tíma í vetur og vonandi verður áframhald á samstarfsverkefni skólanna.

Háskóli unga fólksins

Föstudaginn 25. maí mun Háskóli unga fólksins heimsækja skólann og halda námskeið fyrir 7. - 9. bekk. Boðið verður upp á efnafræði, líffræði, mannfræði, fornleifafræði, japönsku, þjóðfræði og stjörnufræði.

Háskóli unga fólksins er hluti af Háskólalestinni sem verða mun hér á Ísafirði um helgina, þar sem boðið verður upp á fyrirlestur um forsetakosningarnar 2012 og vísindaveislu í Edinborgarhúsinu á laugardaginn kl. 12 - 16. Dagskrá Háskólalestarinnar er öllum opin, aðgangur ókeypis og allir hjartanlega velkomnir.

Nánari upplýsingar má finna hér.

Vorferðalag 10. bekkjar

Í gær þreyttu 10. bekkingar sitt síðasta próf í grunnskóla. Við tekur vorferðalag árgangsins, en á mánudagsmorgun verður lagt af stað kl. 8:15 frá Torfnesi,  norður á Bakkaflöt í Skagafirði. Dvalið verður í Skagafirðinum fram á fimmtudag og ýmislegt sér til gamans gert. Farið verður í flúðasiglingu, litabolta, þrautir, sund í hinni margrómuðu sundlaug á Hofsósi, rúntað um Skagafjörð, haldnar kvöldvökur og fleira.

Hópurinn áætlar heimkomu seinnipart fimmtudags.

Ferðaskrifstofa opnuð í 6. bekk

Olga skólastjóri kynnti sér m.a. Færeyjar
Olga skólastjóri kynnti sér m.a. Færeyjar

Í gærmorgun opnaði 6. bekkur ferðaskrifstofu í tengslum við nám sitt um Norðurlöndin. Krakkarnir skiptu löndunum á milli sín og kynntu hvert land fyrir sig fyrir samnemendum, starfsfólki skólans og öðrum gestum sem sáu sér fært að líta við. Einnig buðu krakkarnir upp á léttar veitingar í tilefni opnunarinnar.

Það er alltaf gaman að sjá hversu fjölbreyttar kennsluaðferðir eru innan skólans og án efa eykur það áhuga og virkni nemenda.

Bolungarvíkurferð hjá 5. bekk

Kolfinna Íris Rúnarsdóttir og Jakob Daníelsson skrifuðu smásögu í sandinn
Kolfinna Íris Rúnarsdóttir og Jakob Daníelsson skrifuðu smásögu í sandinn
1 af 2

Ein af hefðunum í skólastarfinu er sú að 5. bekkur heimsæki Náttúrugripasafnið í Bolungarvík og var sú ferð farin í morgun í blíðviðrinu. Nemendur unnu fjölbreytt verkefni á safninu, enda mikið að sjá og rannsaka s.s. þörunga,  fjölmargar tegundir fugla, sjávardýr, spendýr og ýmislegt fleira.

Eftir góða stund á safninu og hressingu var haldið í fjöruferð fyrir innan kaupstaðinn. Þar var ýmislegt sér til gamans gert. Sumir léku sér í flæðarmálinu, skoðuðu rekavið, eða tíndu skeljar og kuðunga. Aðrir voru mjög skapandi í listaverkum í sandinn og leit m.a.s. ein smásaga dagsins ljós. Því miður er ekki víst að hún lifi lengi í sandinum, en hún er einnig til skráð og á ljósmyndum eins og sjá má á myndum inni á heimasíðu árgangsins.

Það voru blautir og sælir krakkar sem fóru heim um hádegisbilið eftir góðan dag í Bolungarvík.

Danssýningar

Nú er vordagskráin hafin með öllum sínum fjölbreytileika í skólastarfinu. Danssýningar eru á sínum stað og eru 1. og 2. bekkur búnir að sýna dansfimi sína. Á föstudaginn er svo röðin komin að 3. bekk og svo koll af kolli upp í 7. bekk.

Við hvetjum foreldra og aðra til að koma og sjá þessar fjölbreyttu danssýningar, en þeirra er getið á vikuáætlunum og/eða bekkjarsíðum árganganna.

Fjölmenni við opnun myndlistarsýningar

Ein af myndunum á sýningunni
Ein af myndunum á sýningunni

Margt var um manninn í Hamraborg í morgun, þegar Ómar Karvel Guðmundsson opnaði sína fyrstu myndlistarsýningu. Á sýningunni getur að líta fjölbreytt myndverk sem Ómar hefur unnið á undanförnum árum. Sýningin verður opin út mánuðinn og hvetjum við alla til að líta við og njóta verkanna.

Myndlistarsýning í Hamraborg

Ómar Karvel Guðmundsson og Sveinfríður Olga Veturliðadóttir skólastjóri
Ómar Karvel Guðmundsson og Sveinfríður Olga Veturliðadóttir skólastjóri

Á morgun, föstudaginn 11. maí, opnar Ómar Karvel Guðmundsson nemandi í 10. bekk G.Í. myndlistarsýningu í Hamraborg á Ísafirði kl. 10:00. Sýning þessi stendur yfir út mánuðinn og er fyrsta einkasýning Ómars Karvels og jafnframt útskriftarsýning hans frá Grunnskólanum á Ísafirði. Á sýningunni getur að líta sýnishorn af verkum hans í skólanum undanfarin ár.

 

Ómar Karvel er 15 ára, fæddur 20. júlí 1996. Hann var snemma greindur með ódæmigerða einhverfu og málþroskaröskun og hefur þurft aðstoð í námi í samræmi við fötlun sína. Myndlist hefur alla tíð verið sérsvið Ómars Karvels og hefur hann í gegnum tíðina þróað þann hæfileika sinn í myndmenntatímum árgangsins undir leiðsögn Péturs Guðmundssonar myndmenntarkennara og hvenær sem tækifæri hefur gefist, bæði heima og í skóla. Þegar Ómar Karvel hóf nám í 9. bekk var ákveðið að styðja enn frekar við myndlistarnám hans með vikulegri einkakennslu og hefur Valgerður Gísladóttir myndmenntarkennari sinnt þeirri kennslu frá þeim tíma.

 

Í gær var síðasti hefðbundni skóladagur Ómars Karvels og annarra 10. bekkinga í GÍ en við taka próf, skólaferðalag og fleira. Á þeim tímamótum afhenti Ómar Karvel skólanum tekassa að gjöf, sem hann smíðaði sjálfur og tók Sveinfríður Olga Veturliðadóttir við gjöfinni.

 

Hvatningarátak foreldrafélags GÍ

Foreldrafélag GÍ stendur fyrir hvatningarátaki til að styrkja bókakost skólasafnsins og hefur fengið til liðs við sig Pennann-Eymundsson á Ísafirði sem mun halda utan um þær bækur sem keyptar eru. Að sögn starfsmanna þar eru nokkur tilboð í gangi á barnabókum. Átakið hófst í Viku bókarinnar, þann 19. apríl og stendur yfir til 14. maí n.k.


Foreldrafélagið bendir á að með því að nýta ávísunina sem send var öllum heimilum í byrjun Viku bókarinnar til að kaupa bók fyrir bókasafnið er hægt að styðja við bakið á þessari grunnstoð lestrarmenningar barna okkar á tvöfaldan máta, en af andvirði ávísunarinnar renna 100 krónur í Skólasafnasjóð sem úthlutar styrkjum til bókasafna grunnskólanna.
Bókakaupandinn getur haft áhrif á úthlutunina með því að skrifa nafn GÍ í þar til gerðum reit á henni. Þá aukast líkurnar á því að skólabókasafn GÍ fái stuðning.



 

Hjálmur er höfuðatriði

Nú fer í hönd sá tími sem margir árgangar fara í hjólreiðaferðir á vegum skólans. Vert er að minna á að ALLIR yngri en 15 ára eiga að vera með hjólreiðahjálma í umferðinni samkvæmt lögum og fara engir í slíkar hjólaferðir hjálmlausir.

Höfuðmeiðsl eru alvarlegustu áverkar sem hljótast af hjólreiðaslysum. Notkun hlífðarhjálms kemur ekki í veg fyrir slysin en dregur úr alvarleika þeirra og minnkar líkurnar á alvarlegum höfuðmeiðslum. Hjálmur getur greint á milli heilahristings og höfuðkúpubrots og jafnvel lífs og dauða. Sérstaklega er mikilvægt að börn noti hlífðarhjálm við hjólreiðar enda eru höfuð þeirra minni og viðkvæmari en þeirra sem eldri eru.