Þorrablóti 10.bekkjar, sem vera átti föstudaginn 21.janúar, hefur verið frestað vegna sóttvarnatakmarkana. Við ætlum samt sem áður að bjóða nemendum upp á dansnámskeið í gömlu dönsunum í byrjun febrúar þannig að nemendur verði komnir með danstaktana á hreint þegar við vonandi getum haldið blót.
Börnum í 1.–6. bekk G.Í. verður boðin bólusetning gegn covid 19 í þessari viku og fer hún fram á heilsugæslustöðinni á Ísafirði samkvæmt tímatöflu hér að neðan.
Miðvikudagur 12.janúar 2022
kl.13:00 6.bekkur G.Í. börn fædd jan, feb og mars
kl.13:10 6.bekkur G.Í. börn fædd apríl, maí og júní
kl.13:20 6.bekkur G.Í. börn fædd júlí, ágúst og september
kl.13:30 6.bekkur G.Í. börn fædd október, nóvember og desember
kl.13:40 5.bekkur G.Í. börn fædd jan, feb og mars
kl.13:50 5.bekkur G.Í. börn fædd apríl, maí og júní
kl.14:00 5.bekkur G.Í. börn fædd júlí, ágúst og september
kl.14:10 5.bekkur G.Í. börn fædd október, nóvember og desember
kl.14:20 4.bekkur G.Í. börn fædd jan, feb og mars
kl.14:30 4.bekkur G.Í. börn fædd apríl, maí og júní
kl.14:40 4.bekkur G.Í. börn fædd júlí, ágúst og september
kl.14:50 4.bekkur G.Í. börn fædd október, nóvember og desember
kl.15:00 3.bekkur G.Í. börn fædd jan, feb, mars og apríl
kl.15:10 3.bekkur G.Í. börn fædd maí, júní, júlí og ágúst
kl.15:20 3.bekkur G.Í. börn fædd september, október , nóvember og desember
kl.15:30 2.bekkur G.Í. börn fædd jan, feb, mars og apríl
kl.15:40 2.bekkur G.Í. börn fædd maí, júní, júlí og ágúst
kl.15:50 2.bekkur G.Í. börn fædd september, október , nóvember og desember
Fimmtudagur 13.janúar 2022
kl.13:00 1.bekkur G.Í. börn fædd jan, feb og mars
kl.13:10 1.bekkur G.Í. börn fædd apríl, maí og júní
kl.13:20 1.bekkur G.Í börn fædd júlí, ágúst og september
kl.13:30 1.bekkur G.Í. börn fædd október, nóvember og desember
Allar nánari upplýsingar varðandi skráningarferlið og annað má finna hér.
Gjaldskrár Ísafjarðarbæjar fyrir árið 2022 hafa verið samþykktar og tóku gildi 1. janúar s.l. Almenn hækkun gjaldskráa er 2,4%, í samræmi við verðbólguforsendur sem gefnar voru út af Sambandi íslenskra sveitarfélaga um mitt ár 2021.
Ýmsar undantekningar eru þó á þessari almennu hækkun og er mataráskrift grunnskólanemenda þar á meðal, en verð á skólamáltíðum grunnskóla lækkar úr 510 kr. í 490 kr. til að haldast í hendur við lægri hráefniskostnað. Þá lækkar hámarksgjald í dægradvöl úr 19.300 kr. í 18.900 kr. og skýrist það af því að innheimtuaðferðir fyrir dægradvöl voru einfaldaðar haustið 2021. Hér má sjá nánari upplýsingar um gjaldskrárbreytingarnar.
Við hvetjum þá foreldra sem hyggjast nýta sér mötuneytið til að skrá börn sín sem fyrst. Matseðlar eru aðgengilegir hér á forsíðu skólans og alltaf boðið upp á ávexti og grænmeti með öllum réttum.
Gleðilegt ár kæru foreldrar. Eins og þið hafið heyrt og séð í fréttum eru nýjar sóttvarnarreglur í gildi til 12. janúar nk. Við teljum okkur geta haldið úti eðlilegri kennslu sóttvarnarlega séð, með því plani sem við setjum hér fram (sjá meðfylgjandi mynd). Við verðum svo að taka stöðuna frá degi til dags. Hver og einn dagur sem við náum að kenna er dýrmætur og við reynum því að nýta tímann vel. Við gerum okkur grein fyrir því að ástandið getur breyst mjög skyndilega og munum við bregðast við þeim aðstæðum sem upp kunna að koma hverju sinni.
Á morgun, mánudaginn 3.janúar er starfsdagur án nemenda, en kennsla hefst samkvæmt stundaskrá á þriðjudaginn.
Grunnskólinn á Ísafirði óskar nemendum, foreldrum, starfsmönnum og velunnurum öllum gleðilegrar jólahátíðar. Kennsla hefst aftur að jólaleyfi loknu, þriðjudaginn 4.janúar samkvæmt stundaskrá.
Undanfarið hafa nemendur í heimilisfræðivali unnið að hinum árlegu piparkökuhúsum. Húsin urðu samtals 28 í þetta skiptið. Þótt öll húsin séu í grunninn eins að gerð, með sama sniði, varð útkoman afar fjölbreytt og skemmtileg að vanda. Það er alltaf jafn gefandi að sjá gleðina og stoltið í andlitum krakkanna að verki loknu og verða vitni að tilhlökkun þeirra yfir því að fara heim með handverkið og sýna fjölskyldunni. Guðlaug Jónsdóttir heimilisfræðikennari stýrði verkefninu, en henni telst til að þetta sé þrettánda ,,piparkökuhúsaárið" í G.Í. Í fyrra féll verkefnið því miður niður vegna Covid 19.
Fimmtudaginn 16.desember býður 10.bekkur unglingastigi skólans á jólaball, sem haldið verður í salnum kl.19:30-22:30. Aðgangseyrir er kr. 1.500 og verður boðið upp á rútu heim að balli loknu.
Skilyrði fyrir aðgangi að ballinu er neikvætt hraðpróf, sem verður í boði á Heilsugæslunni á miðvikudag á milli kl.13:00 og 14:00. Skráning í hraðpróf fer fram í gegnum vefsíðuna heilsuvera.is og verða foreldrar að skrá símanúmer barna sinna þannig að þau geti framvísað niðurstöðum við innganginn á ballinu.
10.bekkur hvetur alla til að mæta í fínni fötunum, þar sem hér er um spariball að ræða og minnir á að það verður sjoppa á staðnum.
Eftir umræður og ábendingar um fyrirkomulag litlu jóla þá höfum við ákveðið í samráði við sviðsstjóra Skóla- og tómstundasviðs að gera eins og mörgum skólum á höfuðborgarsvæðinu og Vesturlandi. Við munum því hafa litlu jólin föstudaginn 17. desember milli 14:00 og 15:30. Það verður því hefðbundinn skóladagur auk litlu jólanna. Með því móti tvíteljum við 17. des sem skóladag og jólafrí hefst því 20. desember í stað 21. des. Þetta hefur ekki önnur áhrif á skóladagatalið okkar þar sem dagafjöldinn breytist ekki. Með þessu höfum við tryggt að komi upp covid smit þessa síðustu daga lendir enginn í sóttkví á jólunum.
Nemendum, sem eru skráðir í Dægradvöl, verður boðið uppá að klára daginn í Dægradvölinni.
Nánari upplýsingar koma svo strax eftir helgi.
Nemendur í 6., 7. og 8. bekk tóku í haust þátt í alþjóðlegri friðarveggspjaldakeppni Lions, undir leiðsögn Ólafar Dómhildar Jóhannsdóttur, myndmenntakennara. Keppnin var fyrst haldin árið 1988 og markmiðið með henni er að gefa grunnskólanemendum tækifæri til að koma á framfæri á skapandi hátt hugmyndum sínum varðandi heimsfrið og miðla framtíðarsýn sinni til umheimsins.
Á hverju ári er valið þema til að vekja ímyndunarafl nemendanna. Tjáning, listrænt gildi og frumleiki eru þau þrjú viðmið sem notuð voru til að meta veggspjöldin. Þemað þetta árið er Við erum öll tengd.
Jón Reynir Sigurvinsson kom til okkar í gær, fyrir hönd Lionsklúbbs Ísafjarðar og afhenti öllum þátttakendum viðurkenningarskjal. Ennfremur veitti hann hvatningarverðlaun fyrir 1. - 3. sæti í keppninni hér á Ísafirði.
Í 3. sæti varð Soffía Rún Pálsdóttir og í 2. sæti Urður Óliversdóttir. Verk þeirra fengu umsögnina að vera yfirburðamyndir hvað varðar teiknifærni og vandvirkni.
Dómnefnd LÍ komst að þeirri niðurstöðu að 1.verðlaun hlyti Hálfdán Ingólfur Hálfdánsson fyrir mynd sína og hlaut hún eftirfarandi umsögn: ,,Veggspjaldið sýnir býflugu sem ber á herðum sér heiminn allan og umvefur hann með vængjum sínum. Það er einfalt í teikningu en myndmálið er sterkt sem gerir það að verkum að allir geta dregið eitthvað af því. Býflugan virkar á dómnefnd sem sameiningartákn - án þeirra getum við ekki verið og því þurfa allir í heiminum að taka höndum saman í þeirri vinnu. Veggspjaldið ber af hvað frumleika varðar, það er listrænt og fangar viðfangsefni ársins vel, þ.e. að tengja fólk".
Verðlaunamyndin verður nú send og metin af dómnefnd sem velur eitt verk frá Íslandi til viðurkenningar hér heima og mun jafnframt verða send í alþjóða keppnina.
Við óskum verðlaunahöfum og þátttakendum öllum innilega til hamingju.
Í mörg ár hefur tíðkast hjá unglingum í heimilisfræðivali að halda veislu þar sem nemendur bjóða nokkrum starfsmönnum skólans. Í vikunni sem leið var komið að þessum viðburði hjá tveimur hópum, en nemendur útbjuggu nokkra smárétti undir stjórn Guðlaugar Jónsdóttur heimilisfræðikennara. Að sögn Guðlaugar hafa krakkarnir verið einstaklega áhugasamir og duglegir í vetur, enda leyndi sér ekki stoltið í andlitum þeirra þegar starfsmenn gengu inn í skólaeldhúsið, sem krakkarnir höfðu breytt í hinn fallegasta veislusal með girnilegum kræsingum á borðum. Framtíðin er svo sannarlega björt hjá þessum kokkum framtíðarinnar.
Þess má geta að í vetur koma 12 nemendur af unglingastigi Grunnskólans á Suðureyri í valgreinar hjá okkur, tvisvar í viku og njóta sín vel í heimilisfræðivalinu sem og öðru.
