Orðið fært fyrir strætó
Strætó fer úr firðinum og Hnífsdal kl.8.00.
Fréttir
Ófærð innanbæjar
Skólaakstur strætó er á bið vegna ófærðar innanbæjar. Við setjum inn frekar upplýsingar um leið og þær liggja fyrir. Sjálfvirkur símsvari strætó er 878-1012.
Engar strætóferðir
Öllum skólaakstri Strætisvagna Ísafjarðar er aflýst fram að hádegi í dag.
Lágmarksmönnun í GÍ á morgun
Ríkislögreglustjóri hefur í samráði við alla lögreglustjóra á landinu ákveðið að lýsa yfir hættustigi almannavarna frá miðnætti í kvöld vegna yfirvofandi óveðurs um allt land.
Samhæfingarmiðstöð almannavarna og aðgerðastjórnstöðvar um land allt verða virkjaðar um og eftir miðnætti.
Aðgerðarstjórn almannavarna á Vestfjörðum hefur verið virkjuð og beinir því til íbúa að mjög slæm veðurspá er fyrir svæðið í nótt og fram eftir degi á morgun, mánudag. Gera má ráð fyrir versta óveðrinu frá kl. 4.00 í fyrramálið og fram undir hádegi.
Ef veðurspáin gengur eftir verður ekkert ferðaveður á svæðinu, fjallvegir verða lokaðir og svo og leiðir milli byggðakjarna. Búast má við að færð innanbæjar, víðast hvar, verði jafnframt mjög þung og götur að mestu ófærar, utan stofnbrauta, sem reynt verður að halda opnum eftir megni.
Flateyrarvegi og veginum milli Ísafjarðar og Súðavíkur verður lokað ekki seinna en á miðnætti í kvöld, af öryggisástæðum.
Eru íbúar því hvattir til að vera sem minnst á ferðinni á meðan veðrið gengur yfir.
Hægt er að fylgjast með framvindu veðursins á vef Veðurstofu Íslands, vegum og lokunum hjá Vegagerðinni og sömuleiðis ölduhæð.
Þetta óveður gengur hratt yfir og mikilvægt er fyrir okkur öll að bíða það af okkur.
Við hvetjum foreldra til að halda skólabörnum heima á morgun ef það getur. Lágmarksmönnun verður hjá okkur hér í skólanum og skólastarf óhefðbundið. Við biðjum foreldra að skrá nemendur fjarverandi í Mentor svo við getum haldið betur utan um skipulagið.
Seinni bólusetningar barna 5 – 11 ára
Seinni bólusetningar 5 - 11 ára barna fara fram á HVEST á morgun og fimmtudaginn samkvæmt meðfylgjandi skipulagi:
Miðvikudagur 2. febrúar: Seinni bólusetning barna 5 – 11 ára. Foreldrar fá boð í SMS. Bólusett á Ísafirði e.h
Fimmtudagur 3. febrúar: Seinni bólusetning barna 5 – 11 ára. Foreldrar fá boð í SMS. Bólusett á Ísafirði og Þingeyri e.h
Þeir foreldrar sem eiga börn 5 – 11 ára og hafa ekki fengið fyrri bólusetningu geta komið með börn sín miðvikudaginn 2. feb. eða fimmtudaginn 3. feb. milli kl. 13:00 og 14:00.
Alltaf verða að líða a.m.k. 3 vikur á milli fyrri og seinni sprautu og fá allir boð þegar kemur að seinni sprautunni.
Ritað um íslenska þjóðhætti
Undanfarið hafa nemendur 4. JH verið að læra um íslenska þjóðhætti. Í þessari viku hafa þau unnið hörðum höndum í samfélagsfræði við smásagnagerð. Þau hafa skrifað í skólanum og flest tekið bækurnar heim til að halda áfram þar. Núna í morgun sendum við inn verk nemenda sem vildu senda inn efni í ,,Sögur smásagnakeppni" sem er á vegum Ríkisútvarpsins. Við óskum nemendum góðs gengis í keppninni en umfram allt erum við mjög stolt af þessum krökkum sem hafa svo sannarlega lagt sig fram við rithöfundastörf hvort sem þau völdu að skila inn í keppnina eða ekki.
Hér má sjá frekari upplýsingar um keppnina sjálfa.
Foreldraviðtöl 1.febrúar
Í vetur erum við að innleiða leiðsagnarnám, eins og kynnt var hér á síðunni fyrr í haust. Liður í þeirri innleiðingu er nemendastýrð foreldraviðtöl sem ætlað er að virkja og valdefla nemandann til að auka trú hans á eigin getu. Markmiðið er að nemandinn geti haft áhrif á og tjáð sig um nám sitt, viti hvar hann er staddur, hvert hann stefnir og hvað er góður árangur.
Viðtölin verða þriðjudaginn 1.febrúar n.k. og eru nemendur að undirbúa sig þessa dagana. Opnað verður fyrir bókanir á mentor.is í fyrramálið.
Hér má finna kynningu á leiðsagnarnámi fyrir foreldra.
Slakað á reglum um sóttkví
Breytingar á reglum um sóttkví tóku gildi á miðnætti. Einstaklingum sem eru útsettir fyrir COVID-19 smiti utan heimilis eða dvalarstaðar síns verður ekki lengur skylt að fara í sóttkví en þurfa þess í stað að viðhafa smitgát. Sóttkví verður áfram beitt gagnvart þeim sem hafa verið útsettir fyrir smiti innan heimilis eða dvalarstaðar en þríbólusettir sem útsettir eru á heimili geta verið í smitgát sem lýkur með sýnatöku. Börn á leik- og grunnskólaaldri verða enn fremur undanþegin smitgát. Nánari upplýsingar má nálgast hér.
Við hvetjum foreldra til að vera vel vakandi fyrir einkennum og fara með börnin í skimun ef einkenni gera vart við sig.
Lestrarvísir
Í vinnslu er svokallaður Lestrarvísir, sem grunnskólarnir í Ísafjarðarbæ hafa komið sér saman um. Honum er ætlað að vera leiðbeinandi fyrir nemendur, starfsfólk og foreldra um hvernig unnið er með þjálfun lestrar, ásamt skimunum og prófum.
Fyrr í mánuðinum voru drög að Lestrarvísinum send á alla foreldra og óskað eftir ábendingum ef einhverjar eru. Frestur til að koma ábendingum á framfæri rennur út á morgun, þriðjudaginn 25.janúar.
Eyrarhlíð lokuð
Vegurinn á milli Ísafjarðar og Hnífsdals er lokaður sem stendur vegna snjóflóðahættu. Frekari upplýsingar munu koma inn á síðu Vegagerðarinnar www.vegagerdin.is