Það voru hressir og sprækir grunnskólanemendur sem tóku þátt í Norræna skólahlaupinu í gær og létu ekki rigninguna á sig fá. Krakkarnir hlupu ýmist að Engi, Seljalandi eða alla leið inn að tjaldstæðinu í Tungudal og til baka aftur að Bæjarbrekku.
Myndir frá hlaupinu má sjá hér.
Miðvikdaginn 11. september verður hið árlega Norræna skólahlaup. Hlaupið verður frá Bæjarbrekku við Seljalandsveg og inn Seljalandsveg að Seljalandi og þangað áfram inn í skóg.
Kl. 10.00 1. - 4. bekkur fer að Engi
Kl. 10.05 5. - 7. bekkur fer að Seljalandi
Kl. 10.10 8. - 10. bekkur getur valið um hlaup að Seljalandi eða inn að tjaldsvæðinu í Tungudal.
Starfsmenn áhaldahúss bæjarins ásamt lögreglu munu leggja okkur lið hvað varðar umferðaröryggi og verður helstu götum lokað á meðan á hlaupinu stendur.
Alþjóðlegur dagur læsis er sunnudaginn 8. september. Af því tilefni ætlar Grunnskólinn á Ísafirði að hafa bangsadag í skólanum á mánudaginn fyrir nemendur í 1. - 6. bekk en þá mega börnin koma með bangsann sinn í skólann og verða bangsabækur í stóru hlutverki á skólasafninu.
Mánudaginn 9. september hefst einnig fyrsta lestrarlota skólans þennan veturinn en hún stendur yfir í tvær vikur. Þá lesa nemendur skólans í a.m.k. 15 mínútur á dag í skólanum til viðbótar við heimalesturinn.
Þessa dagana eru grunnskólanemendur í sínum árlegu fjallgöngum. Það viðraði aldeilis vel á 5. bekkinga í morgun, en þeir hjóluðu inn að Seljalandi og gengu inn í skóg. Þaðan lá leiðin upp með Buná, sem er nokkuð bratt og einnig var nokkuð hált vegna rigningar undanfarna daga. Krakkarnir röltu svo niður að Seljalandi aftur og hjóluðu heim á leið glaðir í bragði.
Föstudaginn 6. september er starfsdagur og því frí hjá nemendum.
Verkefninu Göngum í skólann verður hleypt af stokkunum í sjöunda sinn miðvikudaginn 4. september næst komandi og lýkur svo formlega með alþjóðlega Göngum í skólann deginum miðvikudaginn 2. október.
Markmið verkefnisins eru að hvetja til aukinnar hreyfingar með því að auka færni barna til að ferðast með virkum og öruggum hætti í skólann. Á vef Samgöngustofu má lesa frétt um mikilvægi þess að kenna börnum á umferðina, en þar eru meðal annars talin upp 10 góð ráð sem mikilvægt er að foreldrar og forráðamenn hafi í huga og fræði börnin sín um.
Grunnskólinn á Ísafirði tekur þátt í þessu verkefni og hvetur alla til að ganga eða hjóla í skólann. Í lok átaksins stendur svo til að marsera um bæinn líkt og undanfarin ár og enda með samverustund á Silfurtorgi.
Allar nánari upplýsingar um verkefnið má finna á heimasíðu verkefnisins Göngum í skólann.
Árgangur 1967 heimsótti skólann nú á dögunum, en árgangurinn er 30 ára gagnfræðingar í ár. Af því tilefni færði hópurinn nemendafélagi Grunnskólans á Ísafirði kr. 50.000 til tækjakaupa, með von um að þeir fjármunir nýtist vel.
Nemendafélagið og skólinn þakka kærlega höfðinglega gjöf.
Ferðalagið gengur vel frá Reykjum og er áætluð koma að skólanum kl. 14:45.
Lagt var af stað frá Reykjum 9:15 í morgun og gengur allt samkvæmt áætlun.
Vegna slæmrar veðurspár á morgun hefur verið ákveðið að flýta heimför 7.bekkja frá Reykjum í Hrútafirði. Gert er ráð fyrir að leggja af stað kl. 9 (föstudagsmorgun) og heimkoma á milli 14 og 15. Nánari upplýsinga er svo að vænta á morgun.
