Auður Yngvadóttir, ökukennari, ásamt nemendum sínum frá Grunnskólanum á Ísafirði og Suðureyri.

Nemendur í fornámi ökunáms, sem er valfag hér í skólanum, framkvæmdu umferðarkönnun hér í miðbænum nú fyrr í haust. Þeir skiptu með sér verkum og komu sér fyrir á fyrirfram ákveðnum stöðum í bænum þar sem auðvelt  var að hafa yfirsýn yfir hinar ýmsu aðstæður sem tengjast umferðinni. 

Niðurstöðurnar komu nemendum á óvart og þótti nokkuð sláandi hversu illa vegfarendur sinntu þeim fáu þáttum umferðarinnar sem kannaðir voru.  Sérstaklega voru það hámarkshraði, bílbeltanotkun og fjöldi þeirra sem ekki virtu stöðvunarskyldu, sem vakti athygli nemendanna.

• Taldir voru 28 bílar sem óku inn í Krók af Hnífsdalsvegi. Af þeim óku 13 of hratt, eða 46% samkvæmt  hraðaskilti sem þar er.
• Hvað stöðvunarskyldu varðar, þá stöðvaði aðeins einn ökumaður af sautján við stöðvunarskyldu við Hrannargötu gagnvart umferð um Fjarðarstræti,  eða aðeins 5,88%. Sláandi er hversu margir ökumenn virða ekki stöðvunarskylduna, þar sem þarna er um að ræða mjög hættuleg og blind gatnamót við stöðvunarskylduna. 
• Þá voru einungis 53 farþegar af 94 með spennt öryggisbelti, eða 56,3% sem leið áttu um Skutulsfjarðarbraut þessar 40 mínútur sem könnunin tók. 

Þó svo könnunin sem slík sé ekki fyllilega marktæk sýna niðurstöður hennar að átaks sé þörf og mögulegt að nýta þær sem leiðarljós að bættri umferðarmenningu okkar bæjarbúa.

Frá jólaföndri foreldrafélagsins fyrir nokkrum árum. (Mynd: bb.is)

Laugardaginn 30. nóvember heldur Foreldrafélag Grunnskólans á Ísafirði jólaföndur í sal skólans frá kl. 11:00 - 13:00. Föndur verður selt á staðnum á hóflegu verði og einnig verður boðið upp á léttar veitingar.

Jólaföndur þetta er orðinn árviss atburður hjá foreldrafélaginu og hefur mælt mjög vel fyrir. Ætíð hefur verið góð þátttaka og sannkölluð jólastemning.

Höfuðlús

Nú hefur höfuðlúsin gert vart við sig í nokkrum árgöngum skólans. Foreldrar eru þess vegna beðnir að fylgjast vel með hári barna sinna og annarra fjölskyldumeðlima. Mikilvægt er að allir sem fengið hafa bréf frá skólahjúkrunarfræðingi sýni samstöðu og fari að þeirri beiðni að kemba hár allra fjölskyldumeðlima reglubundið næstu tvær vikurnar, til að uppræta þennan vágest sem höfuðlúsin er.

Undanfarna daga hafa verið truflanir á símakerfi skólans. Við biðjumst afsökunar á þessum truflunum og biðjum fólk um að sýna þolinmæði þar til viðgerð hefur farið fram.

Julie Andrews í hlutverki sínu í Söngvaseið árið 1965.

Hin árlega 1. des. hátíð skólans verður haldin föstudaginn 29. nóvember næstkomandi.  Þá verður söngleikurinn Söngvaseiður (The sound of music) frumsýndur kl. 20:00 undir leikstjórn Elfars Loga Hannessonar, en sú sýning er einungis fyrir unglingastig skólans. Á eftir munu unglingarnir svo stíga dans fram undir miðnætti.

Aðrar sýningar verða  laugardaginn 30. nóvember kl. 14:00 og sunnudaginn 1. desember kl. 14:00. Miðaverð er kr. 1.500 fyrir almenning, en kr. 1.000 fyrir grunnskólanemendur og eldri borgara. Ókeypis er fyrir 6 ára og yngri.

Við hvetjum alla til að koma og sjá þessa skemmtilegu leiksýningu, sem nemendur hafa lagt mjög mikla vinnu í, hvort heldur eru leikæfingar, lýsing, hljóð, leikmynd eða annað.

« 1 af 4 »

Þessa dagana hanga uppi á veggjum skólans ýmis glæsileg myndlistaverk sem nemendur hafa unnið að undanfarnar vikur. Náttúrmyndir eru áberandi, enda var eitt viðfangsefnið ,,Fjallasýn og umhverfið við Norðurtanga" og var það vatnslitað í haustveðrinu. Sjá má ýmis kennileiti og örnefni sem fyrir augu bar s.s. Naustahvilft, Snæfjallaströnd, Kirkjubólshlíð og Eyrarhlíð.

Þá hafa nemendur einnig verið að mála vetrarmyndir í ýmsum útgáfum og má sjá afraksturinn hér inni á myndasíðu skólans. Aldeilis efnilegir myndlistarmenn hér á ferð.

Í gær var rýmingaræfing hér í skólanum í samstarfi við Slökkvilið Ísafjarðarbæjar. Nauðsynlegt er að æfa útgönguleiðir og skipulag ef til bruna kæmi. Allir árgangar eiga sinn ákveðna stað í nágrenni skólans til að safnast saman og þurfa þá nafnalistar að vera klárir til að bregðast við ef einhver nemandi skilar sér ekki á söfnunarstað. Eins er með starfsfólk að merkja þarf við alla viðstadda til að stemma allt af.

Rýmingaræfingin tókst vel í alla staði og tók rétt rúmar 2 mínútur að tæma alla bygginguna.

Nemendur 8. bekkjar lásu upp og léku á hljóðfæri

Snjólaug Ásta Björnsdóttir

Mikolaj Ólafur Frach lék á píanó

Pétur Ernir Svavarsson las sögubrot

Lára Sigrún Steinþórsdóttir las ljóð

Birna Sigurðardóttir lék á harmóníku

Anna María Daníelsdóttir las upp

Sveinfríður Olga Veturliðadóttir, skólastjóri, setti keppnina formlega

Áheyrendur sungu ljóð Þórarins Eldjárns ,,Á íslensku"

Erna Sigrún Jónsdóttir, fagstjóri í íslensku, bauð gesti velkomna og kynnti dagskrána.

« 1 af 10 »

Í dag var stóra upplestrarkeppnin sett formlega í Hömrum. Nemendur 8. bekkjar, sem tóku þátt í fyrra, lásu sögubrot og ljóð og  léku á píanó og harmóníku. Nemendur 7. bekkjar voru sérstakir gestir, þar sem þeir taka við keflinu og hefja nú markvissar æfingar í framsögn næstu mánuði. 

Markmið upplestrarkeppni í 7. bekk grunnskóla er að vekja athygli og áhuga í skólum á vönduðum upplestri og framburði. Keppnin sjálf er í rauninni aukaatriði og forðast skyldi að einblína á sigur. Mestu skiptir að kennarar nýti þetta tækifæri til að leggja markvissa rækt við einn þátt móðurmálsins með nemendum sínum, vandaðan upplestur og framburð, og fái alla nemendur til að lesa upp, sjálfum sér og öðrum til ánægju. Stefnt skyldi að því að allur upplestur í tengslum við keppnina sé fremur í ætt við hátíð en keppni. Þetta á ekki síst við um lokahátíð keppninnar, sem haldin verður í mars 2014.

Nánari upplýsingar um keppnina er að finna á heimasíðu verkefnisins.

Þórarinn Eldjárn

Undanfarin ár hafa verið haldnar skáldavikur hér í skólanum, þar sem eitt ákveðið íslenskt skáld er kynnt sérstaklega. Þetta árið varð Þórarinn Eldjárn fyrir valinu og munu nemendur vinna fjölbreytt verkefni út frá verkum hans. Frá árinu 1975 hefur hann starfað sem rithöfundur og þýðandi og hefur sent frá sér fjölda ljóðabóka, smásagna og skáldsagna.  Þórarinn hefur sent frá sér nokkrar ljóðabækur fyrir börn í samstarfi við systur sína, myndlistarkonuna Sigrúnu Eldjárn og hafa þær hlotið fjölmargar viðurkenningar. 

Nemendur í tölvuvali hafa undanfarið skilgreint hlutverk nemenda og kennara út frá uppbyggingarstefnunni sem skólinn vinnur eftir. Því næst tóku nemendur í Fablab vali við og útbjuggu límmiða fyrir hlutverkin sem tölvuvalsnemendur límdu að lokum upp á vegg í tölvuveri skólans. Afraksturinn sést á myndinni hér til hliðar.