Krakkarnir með sínar glæsilegu kökur

Í haust var sett upp tvenns konar val í heimilisfræði fyrir unglinga í 9. og 10 bekk. Í öðru valinu er áherslan meiri á eldamennsku en það valfag kallast Mannsins megin. Hitt nefnist Allt í köku, en eins og nafnið ber með sér er bakstur aðal viðfangsefnið þar. Stærsta verkefnið í því valfagi er sykurmassakaka sem krakkarnir gera alveg frá grunni, baka, laga krem og sykurmassa og skreyta. Í dag fóru nemendur heim með kökurnar sínar. Eins og sjá má á meðfylgjandi mynd var útkoman frábær - alls konar kökur sem báru vitni um listræna hæfileika og sköpunargleði.

Á aðventunni munu svo krakkarnir í hinum valhópnum spreyta sig á hinum árlegu piparkökuhúsum. Hér má sjá fleiri myndir af þessum girnilegu kökum. /GJ

Mynd: Velferðarráðuneytið

Evrópuráðið hefur tekið ákvörðun um að helga 18. nóvember baráttu gegn kynferðislegu ofbeldi og kynferðislegri misneytingu barna. Tilgangurinn er að stuðla að aukinni umræðu og samfélagsvitund um kynferðislegt ofbeldi gegn börnum og að kynna  samning Evrópuráðsins um vernd barna gegn kynferðislegri misneytingu og kynferðisofbeldi, svonefndan Lanzarote samning. 

Evrópuráðið hefur í tilefni dagsins gefið út teiknimynd sem er um 3 mínútur að lengd og var unnin í samráði við hóp barna. Myndin er með einföldum og aðgengilegum boðskap fyrir börn á aldrinum 9 – 13 ára. Börn eru hvött til þess að leita til einhvers sem þau treysta ef þau eða einhver sem þau þekkja hefur verið eða er beittur ofbeldi. Myndin er með íslensku tali, með leyfi Evrópuráðsins, og verður sýnd nemendum 4. - 7. bekkjar G.Í. í dag. Með því móti leggur skólinn sitt að mörkum til að leiðbeina börnum sem kunna að vera í viðkvæmri stöðu og stuðlar jafnframt að aukinni samfélagsvitund um kynferðisofbeldi gegn börnum.

Í dag fengu eldri nemendur skólans að sjá myndina Fellum grímuna, sem er ný heimildarmynd sem ætlað er að varpa ljósi á þá staðreynd að við erum öll mannleg og enginn fullkominn. Þekktir einstaklingar koma fram og segja frá því þeir sem hafa verið að glíma við svo sem kvíða, meðvirkni, fíkn o.fl. Myndin er forvarnarverkefni sem þær Sigurbjörg Bergsdóttir og Jóhanna Jakobsdóttir hafa sett saman undir merkjum fyrirtækis sem þær kalla Ekta Ísland. 

Með þessu forvarnarvídeói eru þær að benda á að allir þessir frægu einstaklingar sem taka þátt í myndinni, eru að glíma við eitthvað en hafa náð langt þrátt fyrir það og hafa ekki látið það sem þeir eru að glíma við sigra sig. 

« 1 af 3 »

Það er virkilega gaman að ganga um skólann og sjá fallega unnin verk nemenda á veggjum. Listin birtist í hinum ýmsu verkefnum og námsgreinum og nálgun og túlkun nemenda misjöfn, sem gerir útkomuna ennþá skemmtilegri fyrir vikið. Hér er hægt að fara í stutta ,,gönguferð" um skólann.

Fréttabréf nóvembermánaðar er nú komið út og er hægt að nálgast það hér. Þar er stiklað á stóru í skólastarfinu, enda mikið um að vera síðustu vikurnar s.s. læsisátak, þemadagar, bókasafnsheimsóknir, bekkjarsáttmálar, vinaliðaverkefni o.fl.

Sveinfríður Olga Veturliðadóttir setur Litlu og Stóru upplestrarkeppnirnar

Birna Sigurðardóttir leikur á harmonikku

Nemendur 4. og 7. bekkjar ásamt flytjendum úr 8. og 10. bekk.

Hilmir Hallgrímsson flytur ljóð

Pétur Ernir Svavarsson lék undir fjöldasöng.

Davíð Hjaltason flytur ljóð

Hafdís Bára Höskuldsdóttir les textabrot

Þuríður Kristín Þorsteinsdóttir les textabrot

Rebekka Skarphéðinsdóttir leikur á píanó

« 1 af 9 »

Í dag er Dagur íslenskrar tungu og var hann haldinn hátíðlegur með ýmsum hætti hér í skólanum. Í Hömrum var setningarhátíð Litlu og Stóru upplestrarkeppnanna, sem ætlaðar eru nemendum 4. og 7. bekkjar. Allir nemendur þessara árganga taka þátt og æfa framsögn af kappi næstu vikur og mánuði. Nemendur 4. bekkjar munu svo bjóða foreldrum til upplestrarhátíðar sem nefnist Litla upplestrarkeppnin. Í mars verður svo lokahátíð Stóru upplestrarkeppninnar hjá 7. bekk, en þangað komast þeir sem standa sig best í framsögn.

Það verður gaman að fylgjast með þessum krökkum næstu misserin og sjá framfarirnar hjá þeim.

Í dag var samsöngur hjá 4. - 6. bekk eins og flesta aðra föstudaga, en 1. - 3. bekkur gerir slíkt hið sama á fimmtudögum. Það var mikil gleði í söngnum í dag eins og sjá má og heyra á meðfylgjandi myndbandi.

Við óskum öllum góðrar helgar með þessum skemmtilegu tónum.

Nemendur 7. bekkjar með spjaldtölvurnar

Í dag er mikil gleði hjá 7. bekk, en nemendur hafa nú fengið iPad spjaldtölvur til afnota. Nemendur í 6. - 10. bekk skólans eru því allir komnir með spjaldtölvur í námi, auk þess sem nokkur tæki eru til í öllum yngri árgöngum.

Spjaldtölvurnar gefa mikla möguleika til fjölbreyttra kennsluhátta og hafa reynst afar vel það sem af er, en þetta er annað skólaárið sem skólinn hefur afnot af slíkum tækjum.

Á morgun, miðvikudaginn 11. nóvember, eru foreldraviðtöl hér í skólanum. Nemendur mæta þá til sinna umsjónarkennara ásamt foreldrum og fellur öll kennsla niður.

Í dag hófst norræn bókasafnsvika og er yfirskrift hennar þetta árið Vinátta á Norðurlöndunum. Skólasafnið bauð nemendum í heimsókn í morgun og las Rannveig Halldórsdóttir bókavörður kafla úr bókinni Vöffluhjarta eftir Maria Parr. Nemendur kunnu vel að meta boðið og hlýddu af áhuga og áttu notalega stund saman.