Árgangur 1970 kom færandi hendi í skólann nú fyrir helgi og gaf honum 100.000 krónur sem hópurinn átti uppsafnað eftir síðustu afmælismót og var mikil samstaða innan hópsins með þá ráðstöfun. Skólinn þakkar árgangnum kærlega fyrir þessa rausnarlegu gjöf, sem á svo sannarlega eftir að nýtast vel.
Síðustu daga hafa nemendur 1. - 4. bekkjar sýnt dansfimi sína á danssýningum og hefur foreldrum verið boðið til áhorfs. Þessir krakkar eru virkilega efnilegir og frábært að geta boðið upp á danskennslu í skólanum, en Sigurrós Eva Friðþjófsdóttir hefur kennt af stakri snilld í mörg ár.
Á morgun er vorverkadagur hjá skólanum í samstarfi við umhverfisdeild bæjarins. Allir árgangar fá þá ákveðið verkefni til úthlutunar, sem stuðlar að bættu umhverfi. Um hádegið býður mötuneytið svo öllum nemendum upp á grillaðar pylsur.
Frá og með deginum í dag og til sunnudags er Hreyfivika UMFÍ í gangi og taka HSV og Ísafjarðarbær þátt að venju. Frítt er í allar sundlaugar Ísafjarðarbæjar, farið er í gönguferðir og fjallgöngur, sjósund, kajak, jóga og ýmislegt fleira. Bæjarbúar eru hvattir til að taka þátt og auka hreyfingu þessa viku. Nemendur G.Í. létu ekki sitt eftir liggja í dag, þegar þeir söfnuðust saman úti í porti, héldu boltum á lofti og léku sér með svifdiska (frisbí).
Í gær hélt 10. bekkur í sitt árlega skólaferðalag og var ferðinni heitið að Bakkaflöt í Skagafirði, líkt og síðustu ár. Næstu daga mun hópurinn njóta þess sem Skagafjörður hefur upp á að bjóða og fara í flúðasiglingar, klettaklifur, kayakferðir, sund og fleira. Heimkoma er áætluð á miðvikudag.
Þessa dagana funda þær Bryndís Bjarnason og Halla Magnadóttir í Split í Króatíu, ásamt öðrum samstarfsþjóðum í Erasmus+ verkefninu. Fjallað er um hvernig skólar geta aðstoðað börn sem hafa annað tungumál, við að læra og aðlagast skólasamfélaginu. Einnig skiptast kennarar á góðum hugmyndum og kennsluaðferðum.
Í dag fá nemendur unglingastigs valblað fyrir næsta vetur, sem skila á í síðasta lagi þriðjudaginn 24. maí n.k. Hægt er nálgast upplýsingar varðandi valið hér á síðu skólans.
Nemendur 5. - 7. bekkjar fengu einnig í hendur sitt valblað sem þau eiga að fylla út heima ásamt foreldrum og skila til kennara í síðasta lagi 26. maí n.k.
Í dag er síðasti formlegi skóladagur 10. bekkjar og bauð starfsfólk skólans árgangnum í kveðjukaffi af því tilefni. Næstu dagar eru prófdagar hjá krökkunum og n.k. sunnudag fara þeir svo í skólaferðalag norður á Bakkaflöt í Skagafirði.
Í morgun hittust 4. - 7. bekkur á sal skólans til að þakka vinaliðum vel unnin störf frá áramótum. Að því loknu fóru vinaliðarnir ásamt Árna Heiðari Ívarssyni, umsjónarmanni verkefnisins í bíó. Hópurinn er svo væntanlegur aftur í skólann um hádegisbilið.
Vinaliðaverkefnið hefur verið starfrækt hér við skólann í tvö ár og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að:
Nú er vorskipulagið orðið klárt með öllum sínum uppbrotsdögum og námsmati. Ef nemandi er fjarverandi þegar próf er lagt fyrir er meginreglan sú að prófið er ekki lagt fyrir nemandann. Kennari gefur þá einkunn sem miðast við ástundun og verkefnavinnu.
Vorskipulagið er hægt að nálgast hér.
