Undanfarin ár hafa Kiwanishreyfingin og Eimskip gefið nemendum 1. bekkjar hjálma til notkunar á reiðhjólum, hlaupahjólum, línuskautum og hjólabrettum. Yfir 20 þúsund börn hafa notið góðs af þessari gjöf og hafa hjálmarnir nú þegar sannað gildi sitt. Góð samvinna við grunnskóla landsins hefur skipt miklu og er markmiðið að stuðla að bættu öryggi barna í umferðinni, allir fái sinn hjálm og enginn verði útundan. 

Það voru glaðir nemendur í 1. bekk G.Í. sem tóku við þessari rausnarlegu gjöf frá Kiwanisklúbbnum Básum í dag og vonum við að allir verði duglegir að nota hjálmana.

Í dag vantar um 100 nemendur af 340 nemendum skólans. Margir eru farnir til Akureyrar á Andrésar andar leikana á skíðum, auk þess sem hópur nemenda af unglingastigi fylgir keppendum skólans í Skólahreysti, sem fram fer í Laugardalshöll í kvöld.

Á morgun er sumardagurinn fyrsti og á föstudaginn er vorfrí, þannig að framundan er löng helgi og vonum við að allir njóti vel.

Keppendur G.Í. (Mynd: www.skolahreysti.is)

Í kvöld mun lið Grunnskólans á Ísafirði keppa til úrslita í Skólahreysti, ásamt 11 öðrum skólum víðs vegar að af landinu. Keppnin hefst kl. 20:00 í Laugardalshöll og verður sýnd í beinni útsendingu í Ríkissjónvarpinu.

Fyrir hönd G.Í. keppa þau Einar Torfi Torfason, Dagný Björg Snorradóttir, Daníel Adeleye Wale og Ólöf Einarsdóttir. Til vara eru þau Ívar Tumi Tumason og Guðbjörg Ásta Andradóttir. Guðný Stefanía Stefánsdóttir, íþróttakennari, er þjálfari liðsins, en auk hennar er hópur stuðningsmanna með í för. Við óskum keppendum góðs gengis og fylgjumst að sjálfsögðu vel með.

Foreldrafélag Grunnskólans á Ísafirði stendur þessa dagana fyrir bókasöfnun fyrir skólasafn G.Í., í samstarfi við Pennann Eymundsson. Foreldrum og öðrum velunnurum er boðið að kaupa bækur á 20% afslætti dagana 20. - 25. apríl og ánafna bókasafni skólans. Starfsmenn Pennans Eymundssonar sjá svo um að koma þeim til skólans að átakinu loknu. Til að hjálpa til við valið hefur verið gefinn út óskalisti sem liggur frammi í verslun Pennans hér á Ísafirði.

Við hvetjum alla velunnara til að nýta sér þetta tilboð og efla þannig aðgang nemenda að fjölbreyttu lesefni í skólanum.

Föstudaginn 15. apríl rann út frestur til að skila umsóknum í Nýsköpunarkeppni grunnskólanemenda (NKG) og voru 16 umsóknir sendar frá nemendum í Grunnskólanum á Ísafirði. Nýsköpunarkeppnin er hugmyndasamkeppni fyrir nemendur í 5. 6. og 7. bekk í grunnskóla og mega nemendur senda inn eins margar hugmyndir og þeim sýnist. Í vetur var boðið upp á val í nýsköpun þar sem nemendur þjálfuðu hugmyndavöðvann og spreyttu sig á ýmsum verkefnum tengdum nýsköpun. Einnig voru nemendur hvattir til að senda inn umsókn í keppnina. Öllum nemendum í 5., 6. og 7. bekk gafst þó kostur á að skila inn umsóknum og fá ráðgjöf frá Ólöfu Dómhildi Jóhannsdóttur, myndlistar- og nýsköpunarkennara.

Matsnefnd NKG leggur mat á innsendar umsóknir og velur úr þeim yfir 2000 umsóknir sem berast ár hvert frá yfir 3000 nemendum og fer vandlega yfir hverja og eina, með viðmiðin raunsæi, hagnýti og nýnæmi í huga. Verði nemandi valinn í úrslit er boðið upp á vinnusmiðju til að vinna að hugmyndinni undir leiðsögn. Vinnusmiðjur verða á höfuðborgarsvæðinu en nemendur geta sótt um ferðastyrk. Allar nánari upplýsingar er að finna á heimasíðu verkefnisins.

Jóna Benediktsdóttir aðstoðarskólastjóri verður í námsleyfi næsta skólaár. Helga S. Snorradóttir kennari mun leysa hana af og verður því aðstoðarskólastjóri skólaárið 2016-2017.

Nú nýverið veitti Sprotasjóður Grunnskólanum á Ísafirði styrk til að útfæra verkefnið Þríþraut – fjölmenningarlegt verkefni um sjálfsmynd, menningu og fordóma.

Markmið verkefnisins er að vinna markvisst að bættri stöðu nemenda af erlendum uppruna þannig að sá

nemendahópur hafi sömu tækifæri og aðrir nemendur til náms og í lífinu almennt. Skólinn á að geta skilgreint sig

sem fjölmenningarlegan skóla þar sem kennsluhættir henta jafnt öllum nemendum, að valdastaða foreldra

grunnskólabarna sé jöfn (óháð uppruna) og að bæði nemendur og kennarar séu stolt af því að tilheyra

fjölmenningarlegu skólasamfélagi og líti á það sem styrkleika skólans. Markmið verkefnisins er einnig að

vinna markvisst gegn fordómum þannig að allir í skólasamfélaginu hafi tök á að blómstra, óháð sérstöðu

sinni.

Verkefnið verður unnið skólaárið 2016-2017.

Nýtt fréttabréf er komið út og hvetjum við alla til að lesa það og fylgjast þannig með því sem gerist utan hinna hefðbundnu starfa í skólanum.

Nú er daginn tekið að lengja og þá vex umferð barna í umferðinni, bæði við leik og á leið til og frá skóla. Því er við hæfi að rifja upp nokkur atriði varðandi umferðaröryggi sem gott er að hafa í huga. Umferðarfræðsla í grunnskólum ber mestan árangur þar sem gott samstarf við heimili nemenda næst. Hlutverk heimilanna í umferðarfræðslu og forvörnum er mikilvægt því þar er mótunin sterkust.

Samgöngustofa hvetur foreldra til að nýta góða veðrið og ganga eða hjóla í skólann með börnunum sínum svo fækka megi bílum sem aka að skólanum á morgnana. Að vera börnum sínum góð fyrirmynd í umferðinni er öflugasta fræðslan ásamt því að kenna þeim um lög og reglur sem eru í gildi.

Núna fara fleiri nemendur að koma á reiðhjólum í skólann. Gæta þarf að því að öryggisbúnaður þeirra sé í lagi sem og notkun reiðhjólahjálma. Á þessari síðu er hægt að skoða fræðslumyndbönd um hjólreiðar  og í þessum ágæta bæklingi er m.a. hægt að fræðast um atriði sem hafa ber í huga varðandi hjólreiðahjálma.

Á náms- og fræðsluvefnum www.umferd.is er svæði ætlað foreldrum/forráðamönnum. Hugmyndin er að leita eftir samstarfi við foreldra um leiðir sem þeir telja að komi sér vel í umferðarfræðslunni. 

Athygli er vakin á að:

• samkvæmt 40. gr. umferðarlaga mega börn yngri en 7 ára ekki vera hjólandi í umferðinni nema í fylgd með 15 ára og eldri.

• eigi má reiða farþega á reiðhjóli eða rafvespu. Þó má vanur reiðhjólamaður sem náð hefur 15 ára aldri reiða barn yngra en 7 ára en ber þó að nota viðeigandi öryggissæti og búnað.

• best er að nota hjálm, það er eina vitið. Börnum yngri en 15 ára er skylt að nota reiðhjólahjálma og viðeigandi hlífðarbúnað þegar þau ferðast um á reiðhjólum, rafvespum, hjólabrettum og línuskautum.

Ísafjarðarbær hefur gert samning við talmeinafræðinginn Dagnýju Annasdóttur og  kemur hún reglulega til Ísafjarðar og þjónustar börn í leik- og grunnskólum.  Dagný sér bæði um greiningar á vanda og þjálfun, auk þess sem hún mun leiðbeina foreldrum og kennurum um atriði sem hægt er að þjálfa með börnum sem glíma við málþroska eða framburðarvanda.