Undanfarin misseri hefur skólanámskrá G.Í. verið í vinnslu og er hún nú komin á heimasíðu skólans, að undanskildum kaflanum um foreldrasamstarf. Þeim kafla er ólokið og því boðum við foreldra á fund, miðvikudaginn 26. október kl. 17:00 (í dansstofunni) til að fara yfir hann. Síðasta vetur var sérstakt teymi kennara að skoða foreldrasamstarfið og er það búið að gera uppkast/tillögur að samstarfinu og nú óskum við eftir hugmyndum foreldra.
Í gær og fyrradag voru þemadagar hér í skólanum undir yfirskriftinni Fjölmenning. Nemendum var skipt í hópa eftir námsstigum þannig að hóparnir blönduðust nokkuð. Viðfangsefnin voru fjölbreytileg og fóru nemendur á margar skemmtilegar stöðvar s.s. fánasmiðju, dansstöð, lummubakstur, vinabandagerð, hópefli, veggmyndargerð, stuttmyndir o.fl.
Verkefni sem þessi krefjast mikils undirbúnings og skipulags af hendi kennara og eru allir sammála um að vel hafi til tekist og nemendur margs vísari um þann fjársjóð sem býr í öllum okkar litríku samfélögum. Afraksturinn má sjá víða um ganga skólans til að gleðja okkur og fræða, eins og sjá má á meðfylgjandi myndum.
Föstudaginn 21. október er nemendum í 8.-10. bekk boðið á hina árlegu íþróttahátíð í Bolungarvík. Setning hátíðarinnar er klukkan 10 og mun keppni trúlega ljúka um kl. 18:40. Ekki eru lengur lið frá hverjum skóla heldur er öllum sem óska eftir að keppa, blandað í fjögur lið og fá allir að keppa í a.m.k. einni grein. Að keppni lokinni er svo ball í sal grunnskólans sem lýkur kl. 22:30.
Nemendur frá Ísafirði fara með rútum til Bolungarvíkur. Klukkan 9:30 fer rúta frá Holtahverfi sem stoppar á strætóleiðinni um Seljalandsveg. Önnur rúta fer frá skólanum kl. 9:30 og stoppar hún í Króknum og í Hnífsdal. Klukkan 19:00 er svo rúta til baka frá Bolungarvík inn á Ísafjörð og önnur eftir ballið kl. 22:40 sem fer strætóleiðina inn í Holtahverfi.
Nemendur frá GÍ hafa verið til fyrirmyndar í framkomu undanfarin ár og vonandi skemmta allir sér vel.
Í tilefni af degi myndlistar býðst skólum að fá heimsókn frá myndlistarmanni með það að markmiði að kynna starf hans fyrir nemendum og auka þannig skilning á myndlist sem starfsgrein. Í ár fengum við Bryndísi Hrönn Ragnarsdóttur í heimsókn til okkar og kynnti hún fyrir okkur myndlist sína í máli og myndum og sagði okkur frá því hvar hún lærði og hvernig hún eyddi sumrunum í listsköpun á sínum tíma þegar hún var í námi.
Aðalfundur foreldrafélags Grunnskólans á Ísafirði verður haldinn 1. nóvember n.k. kl. 20:07, í danssal skólans.
Hefðbundin aðalfundarstörf og kosningar til stjórnar þar sem ekki allir aðalmenn gefa kost á sér áfram.
Kaffi og konfekt í boði.
Hlökkum til að sjá sem flesta,
Stjórn foreldrafélags GÍ.
Föstudaginn 14. október er starfsdagur hér í skólanum. Starfsmenn munu þá sitja námskeið varðandi fjölmenningu og fjölbreytileika, en það verður einnig viðfangsefni þemadaganna á miðvikudag og fimmtudag í næstu viku.
Í morgun fengum við Sólveigu og Guðmundu, fulltrúa frá Samtökunum 78 í heimsókn í 8., 9. og 10. bekk. Tilgangur komunnar var að fræða nemendur um hinsegin hugtök, staðalmyndir, fordóma og hvernig fólk getur lagt sitt af mörkum við að gera skólaumhverfið og samfélagið hinseginvænt og opið fyrir hinsegin fólki. Farið var í gegnum helstu hinsegin hugtökin og tími gefinn fyrir nafnlausar spurningar frá nemendum og umræður um þær, enda voru nemendur mjög duglegir að spyrja hinna ýmsu spurninga um þessi mál.
Frá og með 3. október eru íþróttirnar kenndar innanhúss. Nemendur þurfa því að mæta með íþróttaföt og handklæði þá daga sem íþróttir eru á stundaskránni.
Netþjónn skólans hefur ekki enn komist í lag eftir rafmagnsleysið í morgun og hefur því verið netsambandslaust í allan dag. Símkerfið er ekki heldur komið í lag, en skiptiborð skólans er tengt við símanúmerið 894-1688 sem tekur við öllum símtölum inn í skólann. Við bendum foreldrum einnig á að hægt er að skrá veikindi í gegnum mentor.is.
Á svona dögum erum við rækilega minnt á það hversu Netið er nauðsynlegt í okkar daglega lífi og starfi. Við vonum að allt verði fallið í ljúfa löð á morgun og þökkum fyrir að samræmdu könnunarprófin voru afstaðin!
Símakerfi skólans hefur legið niðri eftir rafmagnsleysið í morgun og er unnið að viðgerð. Hægt er að ná sambandi við ritara í síma 894-1688.
