Ævar Þór Benediktsson, betur þekktur sem Ævar vísindamaður, heldur áfram að stuðla að auknum lestri barna. Nú í upphafi árs hleypir hann af stokkunum þriðja lestrarátaki sínu sem hann heldur utan um. Lestrarátakinu lýkur 1. mars n.k. á því að dregnir verða út nokkrir þátttakendur sem verða persónur í næstu bók um bernskubrek Ævars vísindamanns.
Við hvetjum alla nemendur í 1. - 7. bekk að skrá sig til leiks og njóta lestursins.
Mánudaginn 19. desember er skreytingadagur hér í skólanum. Stundaskrá helst óbreytt hjá 1. - 7. bekk, en sérgreinar falla niður hjá unglingastigi og lýkur skóla hjá þeim um hádegið. Allir eru hvattir til að mæta í rauðri flík og/eða jólapeysu.
Á þriðjudaginn eru svo litlu jólin hjá okkur. Þá mæta allir prúðbúnir kl. 9:00 í sínar bekkjarstofur og eiga notalega stund til kl.12:00, skiptast á jólapökkum og dansa í kringum jólatréð. Heimilt er að taka með sér gosdrykki/fernudrykki og smákökur í nesti.
Strætó fer kl.8:40 úr Holtahverfi og Hnífsdal og til baka aftur kl.12:05. Dægradvöl opnar kl.12:00.
Að litlu jólunum loknum hefst jólafrí sem stendur til starfsdagsins 4. janúar, en kennsla hefst aftur fimmtudaginn 5. janúar 2017.
Í morgun hittust 4. - 6. bekkur á sal skólans til að þakka vinaliðum vel unnin störf frá upphafi skólaárs og bauð umsjónarmaður verkefnisins, Árni Heiðar Ívarsson, hópnum í bíó.
Vinaliðaverkefnið hefur verið starfrækt hér við skólann í rúm tvö ár og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að:
Eftir áramót tekur svo nýr nemendahópur við keflinu, en kosið er um vinaliða tvisvar á ári.
Á morgun, sunnudaginn 11. desember, heldur 10. bekkur jólabingó í Guðmundarbúð. Spjaldið kostar kr. 500 og eru veglegir vinningar í boði en auk þess bjóða nemendur upp á vöfflur og kaffi gegn vægu gjaldi. Bingóið hefst kl.14:00 og eru allir velkomnir. Nemendur vilja benda á að gott hjólastólaaðgengi er í Guðmundarbúð.
Í gær heimsótti Íslenski dansflokkurinn Ísfirðinga og nærsveitunga og sýndu dansverkið ,,Óður og Flexa halda afmæli". Nemendum 1. - 4. bekkjar var boðið á sýninguna, sem haldin var í Edinborgarhúsinu í boði verkefnisins List fyrir alla. Verkið sem er eftir Hannes Þór Egilsson og Þyri Huld Árnadóttur, fjallar um þau Óð og Flexu sem eru engir venjulegir krakkar. Þau eru ofurhetjur sem nota ímyndunaraflið til þess að fljúga og ætla sér að halda ofur skemmtilegt afmæli.
Sýningin var mjög lifandi og skemmtileg í alla staði og skemmtu krakkar jafnt sem fullorðnir sér afar vel.
Í morgun kom Þröstur Jóhannesson, rithöfundur, í heimsókn í 3. - 6. bekk og las úr nýútkominni bók sinni, Bjalla og bæjarstjórinn sem gat ekki flogið. Sagan fjallar um Bjöllu sem er ein og umkomulaus í villta vestrinu. Í upphafi sögu býr hún ásamt útlaganum Gussa fingralanga í útjaðri Rjómabæjar, en óvænt brotthvarf hans breytir öllu.
Þetta er önnur barnabók Þrastar, en árið 2013 sendi hann frá sér bókina Sagan af Jóa.
Við þökkum Þresti kærlega fyrir skemmtilegan upplestur.
Hluti starfsmanna GÍ og dægradvalar á Ísafirði nýtti vetrarfrísdagana 23. og 24. nóvember s.l. til að sækja námskeið um Uppeldi til ábyrgðar – uppbygging sjálfsaga. Skólinn hóf innleiðingu á stefnunni haustið 2006 og hafa starfsmenn farið áður á nokkur námskeið tengd henni, en það er nauðsynlegt að halda kunnáttu og þekkingu við og alltaf bætist eitthvað nýtt við. Að þessu sinni var námskeiðið haldið í Boston og voru þátttakendur í heildina um 120 frá 20 stofnunum víðs vegar af landinu. Fyrirlesarar voru þær Diane Gossen, sem er upphafsmaður þessarar nálgunar og samstarfskona hennar Judy Anderson. Þær hafa báðar komið til Íslands nokkrum sinnum og haldið námskeið fyrir Íslendinga erlendis.
Á námskeiðinu var farið í ýmsa þætti, meðal annars mikilvægi þess að þjálfa börn og unglinga í að ræða um tilfinningar sínar og átta sig á þörfum sínum. Einnig að stefnunni er ætlað að styðja starfsmenn skóla og foreldra við að móta sér skýra stefnu varðandi samskipti og agamál. Skerpt var á hugmyndafræðinni sem byggist á því að einstaklingurinn geti tekið sjálfstæðar, siðferðilegar ákvarðanir varðandi eigin hegðun þegar hann er laus undan skömmum, hótunum, sektarkennd eða væntingum og loforðum um umbun. Markmiðið er að styrkja einstaklinginn í að vera sá sem hann vill vera með hliðsjón af eigin sannfæringu frekar en að stjórnast út frá geðþótta annarra.
Á morgun er 1. desember, fullveldisdagur okkar Íslendinga. Sú hefð hefur skapast hér í skólanum að hafa opinn dag, þar sem foreldrar og aðrir velunnarar eru sérstaklega hvattir til að koma í heimsókn. Við vonum að sem flestir líti við og sjái það fjölbreytta og gróskumikla starf sem fram fer hér innan veggja.
Skiptiborð skólans er sambandslaust í augnablikinu. Hægt er að ná sambandi í síma 894-1688.
