Fyrr í mánuðinum var opnað fyrir foreldrakönnun Skólapúlsins, þar sem sendur var hlekkur á ákveðið úrtak foreldra og þeir beðnir að svara. 

Mikilvægt er að sem flestir taki þátt en 80% svörun þarf til að könnunin teljist marktæk. Við hvetjum alla þá sem ekki eru búnir að svara könnuninni að gera það fyrir 28. febrúar til að skólinn geti nýtt sér þær niðurstöður fyrir innra mat skólans; séð hvað vel gengur og hvar tækifærin liggja til sóknar. 

Snillingarnir sem kepptu til úrslita, f.v. Daði Hrafn, Ásdís Ósk, Saga Líf, Halla María, Jóhanna Ýr og Ásgerður Pála

Snillingarnir er heiti á bókmenntaspurningakeppni sem nú er haldin í fyrsta sinn á miðstigi Grunnskólans á Ísafirði og hefur staðið yfir undanfarnar vikur. Nemendur 4.-7. bekkjar fengu lista yfir 13 barnabækur sl. vor og voru hvattir til að lesa sem mest af listanum. Keppnin var formlega sett á Degi íslenskrar tungu, þann 16. nóvember. Þá höfðu verið valin tvö þriggja manna keppnislið úr hverjum árgangi en keppnin sjálf hófst ekki fyrr en eftir áramótin. Þótt aðeins þrír séu í keppnisliðinu er mikilvægt að allir undirbúi sig vel, því að liðin mega spyrja bekkinn og fá aðstoð úr salnum.

Fyrsta umferð fór fram í bekkjarstofum en sigurvegararnir mættust síðan í tveimur undanúrslitakeppnum sem fóru fram í sal skólans með viku millibili að viðstöddum öllum nemendum og kennurum í 4.-7. bekk.

Úrslitakeppnin var haldin í gær, þriðjudaginn 14. febrúar í salnum og er óhætt að segja að mikil spenna hafi legið í loftinu. Eftir æsispennandi keppni fóru leikar þannig að liðið 6. bekkur A sigraði eftir að hafa lagt liðið Banana-ananas úr 7. bekk að velli.

Þetta frækna lestrarlið 6. bekkjar er skipað þeim Daða Hrafni Þorvarðarsyni, Sögu Líf Ágústsdóttur og Ásdísi Ósk Brynjarsdóttur og hlutu þau að launum bókina Vetrarhörkur eftir Hildi Knútsdóttur, sem nýlega hlaut Íslensku bókmenntaverðlaunin í flokki barnabóka. Auk þess fengu þau derhúfu merkta skólanum.

Silfurliðið í 2. sæti skipuðu þær  Jóhanna Ýr Barðadóttir, Ásgerður Pála Hilmarsdóttir og Halla María Ólafsdóttir og þær hlutu bókina Pabbi prófessor eftir Gunnar Helgason en hún var einmitt líka tilnefnd til Íslensku bókmenntaverðlaunanna.

Öll liðin stóðu sig frábærlega og reyndust sannkallaðir snillingar og ekki síður stuðningsmennirnir sem jafnvel gátu ráðið úrslitum á stundum. Aðstandendur keppninnar þakka öllum þátttakendum kærlega fyrir góða frammistöðu og drengilega keppni.

Ákveðið hefur verið að endurtaka leikinn á næsta skólaári en byrja þá fyrr og halda keppnina að hausti. Bókalistum verður dreift fyrir vorið og nemendur hvattir til að nýta sumarið til undirbúnings.

Á morgun, fimmtudaginn 16. febrúar, verður skipt um hreinsibúnað í Sundhöllinni og verður því engin kennsla í lauginni.

Nú er landsleikurinn Allir lesa í fullum gangi og tæplega 2.000 þátttakendur hafa lesið í rúmlega 20.400 klukkustundir, en það jafngildir 850 dögum á þeim 13 dögum sem af eru keppni. Nóg er eftir og enn bætast við nýir þátttakendur daglega.

Til að gera lesturinn enn skemmtilegri er hér bókabingó sem hægt er að prenta út. Þetta er fyrst og fremst til gamans gert og tilvalið fyrir yngri lesendur sem vantar lestrarhvatningu en eldri lesendur geta líka fundið margt við sitt hæfi á bingóspjaldinu. Þátttakendur eru hvattir til að deila myndum af lestrinum á Instagram og Facebook með myllumerkinu #allirlesa. Frumlegasta lestrarmyndin verður valin og eigandinn verðlaunaður í lok landsleiksins.

Fleiri skemmtileg lestrarbingó má finna vef Heimilis og skóla, m.a. jóla-, páska- og sumarlestrarbingó.

Kátir Vestra drengir ásamt Sveinfríði Olgu Veturliðadóttur og Guðríði Sigurðardóttur.

Það voru kampakátir körfuboltadrengir sem mættu í skólann í morgun, eftir frábæra keppnisferð til Reykjavíkur. Vestri keppti þar við Val í úrslitum Maltbikarsins í 9. flokki karla og gerði sér lítið fyrir og sigraði með 60 stigum gegn 49.

Í tilefni af bikarmeistartitlinum voru strákarnir kallaðir á sal, ásamt Nökkva Harðarsyni, aðstoðarþjálfara, sem einnig er starfsmaður við skólann og var klappað rækilega fyrir þessu frábæra liði og árangri þeirra. Það er svo einnig skemmtileg tilviljun að fyrir 50 árum varð Guðríður Sigurðardóttir, kennari við skólann, Íslandsmeistari með 2. flokki KFÍ.

Við óskum Vestra enn og aftur innilega til hamingju með þennan frábæra árangur.

« 1 af 5 »

Fyrr í vetur stóð umhverfisteymi G.Í. fyrir fræðsluverkefni um matarsóun. Stofnuð var umhverfisnefnd í skólanum en í henni sátu sex nemendur á unglingastigi. Verkefnið hófst með því að kennarar í umhverfisteyminu gerðu leynilega könnun í eina viku í mötuneyti skólans þar sem fylgst var með því hversu miklum mat nemendur í fjórum yngstu bekkjunum hentu í lok máltíðar. Mælingarnar stóðu yfir í eina viku og voru allar niðurstöður skráðar. Að því loknu tóku unglingarnir í umhverfisnefndinni til starfa. Þeir settu saman fræðsluefni og fóru skipulega í alla bekki á yngsta stigi. Fræðslan miðaði að því að útskýra fyrir yngri börnunum hvernig hægt væri að minnka eða jafnvel koma alveg í veg fyrir matarsóun. Einnig komu unglingarnir aðeins inn á skynsamlega notkun á pappír og sápu. Á þessum tímapunkti voru nokkrar vikur liðnar frá mælingunum. Gert hafði verið samkomulag við starfsfólk mötuneytisins og var nákvæmlega sami matseðill nú hafður í eina viku. Aftur voru allar matarleifar mældar og nú með vitneskju nemenda.
Fræðsla unglinganna skilaði sér svo sannarlega því mikill munur var á niðurstöðum milli mælinganna í öllum árgöngum. Í dag kynntu unglingarnir niðurstöðurnar fyrir yngri börnunum og hengdu þær upp fyrir framan stofur barnanna. Á morgun, á foreldradegi, fá börnin tækifæri til að sýna foreldrum sínum árangurinn.

Fimmtudaginn 9. febrúar er foreldradagur hér í skólanum, en þá mæta nemendur ásamt foreldrum eða forráðamönnum í viðtöl hjá umsjónarkennurum. Búið er að opna fyrir tímapantanir á mentor.is þar sem foreldrar geta valið sér hentuga viðtalstíma.

Dagur stærðfræðinnar er í dag, en hann er haldinn fyrsta föstudag í febrúar ár hvert. Markmið með deginum er annars vegar að vekja nemendur og sem flesta aðra til umhugsunar um stærðfræði og hlutverk hennar í samfélaginu og hins vegar að fá nemendur til að koma auga á möguleika stærðfræðinnar og sjá hana í víðara samhengi.

Flötur, samtök stærðfræðikennara, hefur gefið út fjölmörg verkefni í tilefni dagsins og geta áhugasamir nálgast þau hér.

Febrúar er hjartamánuðurinn og er honum fagnað víða um land. Árið 2009 fór Ísland í samstarf með alþjóða hjartasamtökunum og GoRed verkefninu með megináherslu á konur og hjartasjúkdóma. Verkefnið hefur síðan þróast í gegnum árin og að þessu sinni er allur mánuðurinn undir, efnið óháð kyni og aldri því hjartaheilsa varðar alla. 

Rauði dagurinn er að þessu sinni er föstudagur 3. febrúar n.k. Þá eru starfsmenn sveitarfélaga og þá sérstaklega í skólum, ásamt nemendum, hvattir til að klæðast rauðu og sýna þannig í verki að við eigum að hugsa vel um hjartað okkar, undirstöðu þess að við erum á lífi. 

Mætum í rauðu á morgun!

Sigurvegararnir þær Katla og Ásrós

Undankeppni Samfés fór fram í gær og kepptu 12 atriði um þátttökurétt í aðalkeppninni, sem fram fer í Reykjavík 24. - 26. mars n.k.

Sigurvegarar voru þær Katla Vigdís Vernharðsdóttir og Ásrós Helga Guðmundsdóttir úr Grunnskólanum á Suðureyri og Þingeyri, en þær fluttu lagið Big Jet Plane eftir Angus og Julie Stone. í 2. sæti höfnuðu Dagbjört Ósk Jóhannsdóttir, Rakel Damilola Adeleye og Helena Haraldsdóttir úr G.Í. með lagið Þessi reynsla, sem er frumsamið rapplag. Í 3. sæti urðu Ólöf Einarsdóttir, Hlynur Ingi Árnason, Árný Margrét Sævarsdóttir og Ísabella Rut Benediktsdóttir úr G.Í. með lagið Little Talks eftir hljómsveitina Of Monsters and Men.

Dómarar voru söngfuglarnir Dagný Hermannsdóttir, Málfríður Hjaltadóttir og Benedikt Sigurðsson. Við óskum öllum þessum flytjendum til hamingju með árangurinn og fylgjumst spennt með siguratriðinu í lokakeppninni.