Frá og með 3. október eru íþróttirnar kenndar innanhúss. Nemendur þurfa því að mæta með íþróttaföt og handklæði þá daga sem íþróttir eru á stundaskránni.

Netþjónn skólans hefur ekki enn komist í lag eftir rafmagnsleysið í morgun og hefur því verið netsambandslaust í allan dag. Símkerfið er ekki heldur komið í lag, en skiptiborð skólans er tengt við símanúmerið 894-1688 sem tekur við öllum símtölum inn í skólann. Við bendum foreldrum einnig á að hægt er að skrá veikindi í gegnum mentor.is.

Á svona dögum erum við rækilega minnt á það hversu Netið er nauðsynlegt í okkar daglega lífi og starfi. Við vonum að allt verði fallið í ljúfa löð á morgun og þökkum fyrir að samræmdu könnunarprófin voru afstaðin!

Símakerfi skólans hefur legið niðri eftir rafmagnsleysið í morgun og er unnið að viðgerð. Hægt er að ná sambandi við ritara í síma 894-1688.

Grænmetisbaka með sætri chilisósu

Kúbverskur baunaréttur

Hveitikímkökur með allskonar fræjum og rúsínum

Kæfa úr sólblómafræjum, möndlum, grænmeti og kryddjurtum - notað sem álegg eða viðbit með hveitikímkökunum

Hollustunammi - aðal uppistaðan í botninum döðlur og möndlur. Millilagið meðal annars úr lárperu (avacado), bönunum og mintu. Kókosolía, kakó og smá hlynsíróp á toppnum...

« 1 af 5 »

Valhópar á unglingastigi í heimilisfræði vinna að mjög fjölbreyttum verkefnum. Kennslan er að lang mestu leyti verkleg, en helstu markmið hennar eru þau að gera nemendur meðvitaða um gildi hollrar næringar og hjálpa þeim við að tileinka sér vönduð og góð vinnubrögð við matseld, sem án efa efla sjálfstæði og sjálfstraust þeirra. Í liðinni viku spreyttu nemendur sig á bráðhollu og gómsætu grænmetisfæði eins og sjá má á meðfylgjandi myndum. /GJ

Á morgun og föstudag verða samræmd könnunarpróf í íslensku og stærðfræði lögð fyrir nemendur í 4. bekk. Líkt og í 7. bekk í síðustu viku verða prófin lögð fyrir með rafrænum hætti. Almennt gengu prófin í 7. bekk vel og flest vandamál sem upp komu voru leyst í samstarfi Menntamálastofnunar og skólanna. Í nokkrum tilfellum gátu nemendur í 7. bekk ekki ritað broddstafi í ritunarþætti íslenskuprófsins, en það kom ekki að sök þar sem vandamálið var upplýst fyrir próftöku.

Skóladagur hjá 4. bekk verður með hefðbundnu sniði að prófunum slepptum. Nemendur mæta kl. 8:00 í skólann, prófin verða lögð fyrir frá kl. 9:00 - 10:10 og eftir það er hefðbundin kennsla. Nú er bara að vona að fyrirlögnin gangi jafn vel og hjá 7. bekk.

Ísfirðingarnir voru kvaddir með gjöfum og veisluhöldum síðasta kvöldið í vinabæjarheimsókninni í Kaufering. Hópurinn kom til landsins í gær, sæll og glaður eftir frábæra dvöl í Bæjaralandi. Í apríl munu þýsku nemendurnir endurgjalda heimsóknina og verða þá væntanlega fagnaðarfundir.

Á fimmtudag og föstudag verða lögð fyrir samræmd könnunarpróf í íslensku og stærðfræði í 7. bekk. Þær breytingar verða á fyrirkomulagi prófanna að þau verða lögð fyrir með rafrænum hætti. Prófin hefjast klukkan 9:00 báða dagana og er próftími 80 mínútur.

Í næstu viku verður það svo 4. bekkur sem spreytir sig á fimmtudag í íslensku og á föstudag í stærðfræði. Prófin hjá þeim hefjast einnig kl. 9:00 og er próftími 70 mínútur.

Þá hefur verið ákveðið að halda samræmd könnunarpróf að vori í 9. bekk. Nemendur í 10. bekk skólaárið 2016-2017 munu þreyta próf vorið 2017, sömu daga og 9. bekkur, þ.e. dagana 7. - 9. mars.

Í dag heldur hópur vaskra nemenda og kennara frá Ísafjarðarbæ til Þýskalands á vit ævintýra í vinabænum Kaufering í Bæjaralandi. Þetta eru sjö krakkar úr 10. bekk á Ísafirði og Þingeyri ásamt tveimur kennurum, þeim Herdísi Hübner og Monicu Mackintosh. Hópurinn mun dveljast þar ytra í eina viku og koma aftur heim laugardaginn 24. sept.

Nemendurnir dvelja á heimilum jafnaldra sinna í Kaufering og er ýmislegt spennandi á dagskrá vikunnar fyrir utan skólaheimsóknir. Er ekki að efa að hópurinn á skemmtilega og lærdómsríka viku framundan.​

Vinaliðaverkefnið hefur nú sitt þriðja starfsár hér í skólanum, undir stjórn Árna Heiðars Ívarssonar, íþróttakennara. Vinaliðar sem kosnir voru lýðræðislegri kosningu, fengu þjálfun í dag varðandi sín hlutverk og eru með allt á hreinu og tilbúnir til starfa á mánudaginn.

Vinaliðaverkefnið snýst um það að setja upp leikstöðvar í frímínútunum hjá 4. - 6. bekk og stjórna vinaliðar því að allt fari vel fram á hverri stöð. Það er von skólans að með þessu finni allir eitthvað við sitt hæfi í frímínútunum og enginn verði afskiptur.

Í dag kom Þorgrímur Þráinsson, rithöfundur og fyrirlesari með meiru, í heimsókn í skólann. Hann hélt fyrirlestur undir nafninu ,,Verum ástfangin af lífinu" fyrir 10. bekk, en fyrirlesturinn fjallar fyrst og fremst um það að nemendur leggi sig fram og beri ábyrgð á sinni vegferð og séu flottir einstaklingar.

6. og 7. bekkur fengu að skyggnast á bak við tjöldin hjá íslenska landsliðinu í knattspyrnu, en Þorgrímur hefur unnið með liðinu í 10 ár og tók myndir og myndbönd sjálfur á EM í Frakklandi sem hann sýndi nemendum. Hann lagði upp með það að hver bekkur geti verið sterk liðsheild og náð frábærum árangri með því að hjálpast að og sýna samstöðu.

Að lokum veitti Þorgrímur nemendum 5. bekkjar innsýn í hugarheim rithöfundar þar sem hann sagði frá því hvernig hann hugsar sögu, teiknar upp persónur, býr til söguþráð, plott og fleira til að gera sögu spennandi. Þá las hann upp úr væntanlegri bók sinni ,,Henri og hetjurnar" . Bókin kemur út fyrir næstu jól og fjallar um hinn franska Henri (10-12 ára) sem vinnur á hótelinu í Annecy þar sem leikmenn íslenska landsliðsins í fótbolta dvöldu á meðan þeir tóku þátt í EM.

Það var virkilega gaman að sjá hversu vel Þorgrímur náði til krakkanna og þökkum við honum kærlega fyrir komuna.