Á morgun, þriðjudaginn 21. mars, er alþjóðlegi downs dagurinn. Fólk um allan heim klæðist mislitum sokkum þennan dag til að fagna og sýna samstöðu með margbreytileikanum og hvetjum við alla til að taka þátt.

Næsta vetur stendur til að fara af stað með þróunarverkefni í 1. bekk sem snýst um að vera með aukinn stuðning á yngsta stigi þannig að auðveldara verði að mæta þörfum allra nemenda og styðja umsjónarkennara til að sinna teymiskennslu. Verðandi 1. bekkur eru 47 nemendur og stefnt er að fimm kennara teymi. Hér er frábært tækifæri fyrir framsækna kennara til að takast saman á við teymiskennslu með faglegum stuðningi.
Frekari upplýsingar veitir skólastjóri Sveinfríður Olga Veturliðadóttir.

Náum áttum er fræðslu- og forvarnahópur sem skipuleggur morgunverðarfundi um ýmis mál er varða forvarnir og velferð barna og ungmenna. Á síðasta fundi hópsins var fjallað um netnotkun barna og unglinga í snjalltækjum og hvernig best sé að bregðast við þeim vanda sem við blasir í nýjum könnunum meðal skólabarna. Upptökur af erindum má nálgast hér  og hvetjum við foreldra til að fylgjast með þessum fróðlegu erindum og nýta sér þau í uppeldishlutverkinu.

Í dag keppti Grunnskólinn á Ísafirði í Vestfjarðariðlinum í Skólahreysti ásamt Bolvíkingum, Súgfirðingum og Hólmvíkingum. Keppnin fór fram í íþróttahúsinu Mýrinni í Garðabæ fyrir fullu húsi.

Úrslit urðu þau að G.Í. hafnaði í öðru sæti á eftir Bolvíkingum og kemst því ekki í úrslitakeppnina. Við erum stolt af okkar fólki um leið og við óskum Bolvíkingum tll hamingju með góðan sigur. Fyrir hönd G.Í. kepptu þau Dagný Björg Snorradóttir í armbeygjum og hreystigreip, Davíð Hjaltason í upphífingum og dýfum, Daníel Wale Adeleye í hraðabraut og Hafdís Bára Höskuldsdóttir í hraðabraut. Varamenn voru þau Phakawat Janthawong og Svava Rún Steingrímsdóttir og þjálfari Guðný Stefanía Stefánsdóttir.

Frá vinstri Lena Rut, Íris Embla og Auðbjörg Erna.

Í dag var lokahátíð Stóru upplestrarkeppninnar haldin í Hömrum, sal Tónlistarskólans. Tólf nemendur úr 7. bekk á norðanverðum Vestfjörðum lásu sögubrot úr Bláa hnettinum eftir Andra Snæ Magnason og ljóð eftir Steinunni Sigurðardóttur. Auk þess lásu allir eitt sjálfvalið ljóð. Dómurum var vandi á höndum að gera upp á milli þessara frábæru lesara, en úrslitin urðu þau Auðbjörg Erna Ómarsdóttir frá Grunnskólanum á Þingeyri sigraði, Íris Embla Stefánsdóttir frá Grunnskólanum í Bolungarvík hafnaði í öðru sæti og Lena Rut Ásgeirsdóttir frá Grunnskólanum á Ísafirði í því þriðja.

Dómarar þetta árið voru þau Baldur Sigurðsson, Anna Þ. Ingólfsdóttir, Heiðrún Tryggvadóttir og Kristín Ósk Jónasdóttir. Guðrún Birgisdóttir skóla- og sérkennslufulltrúi Ísafjarðarbæjar hélt utan um dagskrána, en Rósbjörg Edda Rúnarsdóttir, sem hafnaði í 2. sæti keppninnar í fyrra, las inngangstexta. Þá lék skólalúðrasveit Tónlistarskólans nokkur lög í upphafi og sá um að koma öllum í rétta gírinn.

Við óskum öllum lesurum innilega til hamingju með góðan árangur.

Lokahátíð Stóru upplestrarkeppninnar fer fram í Hömrum fimmtudaginn 9. mars kl. 18:00. Á hátíðinni munu nemendur úr 7. bekk, sem valdir hafa verið úr Grunnskólum Ísafjarðarbæjar og Bolungarvíkur, lesa verk eftir skáld keppninnar, sem að þessu sinni eru þau Steinunn Sigurðardóttir og Andri Snær Magnason. Fyrir hönd Grunnskólans á Ísafirði lesa þau Arnar Rafnsson, Kári Eydal, Lena Rut Ásgeirsdóttir, Lilja Borg Jóhannsdóttir og Snæfríður Lillý Árnadóttir. Til vara verður Viktoría Rós Þórðardóttir. Að lestri loknum mun dómnefnd velja þrjá bestu lesarana og veita þeim verðlaun. Gestir eru velkomnir á meðan húsrúm leyfir.

Nú er lestrarátaki Ævars vísindamanns lokið, en það hefur staðið frá 1. janúar. Góð þátttaka var og komu 123 lestrarmiðar í kassann hjá okkur og verða þeir sendir til Heimilis og skóla. Dregið verður í átakinu 8. mars og mun Guðni Th. Jóhannesson forseti þá draga út fimm miða úr lestrarátakspottinum. Haft verður samband við vinningshafa samdægurs og nöfnin tilkynnt opinberlega stuttu eftir það. Við þökkum öllum sem tóku þátt kærlega fyrir.

Mánudaginn 27. febrúar er maskadagurinn eða bolludagur öðru nafni. Af því tilefni verða grímuböll á sal skólans sem hér segir:

1. – 3. bekkur kl. 8:20-9:10

4. - 5. bekkur kl. 10:20-11:00

6. og 7. bekkur kl. 13:10-13:40

Nemendur og starfsfólk eru margir hverjir í grímubúningum þennan dag og verður gaman að sjá allar þær furðuverur sem verða á ferli.

Þriðjudaginn 28. febrúar (sprengidag) er svo starfsdagur kennara án nemenda og engin kennsla.

Orri Norðfjörð ásamt Hlyni Kristjánssyni frá Slökkviliði Ísafjarðarbæjar

Eldvarnaátak Landssambands slökkviliðs- og sjúkraflutningamanna fór fram í grunnskólum landsins í nóvember síðast liðinn. þar sem nemendur í 3. bekk fengu m.a. fræðslu um eldvarnir. Nemendur tóku þátt í eldvarnagetraun slökkviálfanna Loga og Glóðar og er nú búið að draga úr réttum lausnum.

Einn nemandi Grunnskólans á Ísafirði var dreginn út og fékk viðurkenningu, en það var Orri Norðfjörð í 3.ÁH. Þeir Hlynur Kristjánsson og Hermann G. Hermannsson frá Slökkviliði Ísafjarðarbæjar komu í heimsókn í gær og afhentu Orra verðlaunin.

Lesararnir í morgun þau Hrefna Dís, Lena Rut, Jóhanna Ýr, Kári, Gautur Óli, Arnar, Lilja Borg, Viktoría Rós og Snæfríður.

Í morgun fór fram skólakeppni Stóru upplestrarkeppninnar, þar sem valdir voru fulltrúar skólans til að taka þátt í lokahátíðinni sem fram fer 9. mars.

Níu nemendur úr 7. bekk lásu sögubrot og ljóð og var dómurunum, þeim Jónu Benediktsdóttur, Birnu Lárusdóttur og Baldri Inga Jónassyni vandi á höndum að velja 5 af þessum frambærilegu lesurum. Niðurstaðan varð þó sú að fulltrúar skólans verða þau Arnar Rafnsson, Kári Eydal, Lena Rut Ásgeirsdóttir, Lilja Borg Jóhannsdóttir og Snæfríður Lillý Árnadóttir. Til vara verður Viktoría Rós Þórðardóttir.
Við óskum öllum þátttakendum innilega til hamingju með góða frammistöðu og hlökkum til lokahátíðarinnar.