Í morgun hittust 4. - 6. bekkur á sal skólans til að þakka vinaliðum vel unnin störf sem þeir hafa sinnt frá upphafi skólaárs. Umsjónarmenn verkefnisins, þeir Árni Heiðar Ívarsson og Atli Freyr Rúnarsson, buðu svo hópnum í bíó. 

Vinaliðaverkefnið hefur verið starfrækt hér við skólann í 4 ár og hefur það gengið vonum framar. Því er ætlað, samhliða góðum eineltisáætlunum, að draga úr einelti og auka vellíðan og samheldni nemenda í skólum. Helstu markmið verkefnisins eru að:

• stuðla að fjölbreyttari leikjum í frímínútum skólanna
• leggja grunn sem gerir nemendum kleift að tengjast sterkum vináttuböndum
• minnka togstreitu milli nemenda og
• hampa góðum gildum, svo sem vináttu, virðingu og því að allir fá að taka þátt.

Í næstu viku tekur svo nýr nemendahópur við keflinu, en kosið er um vinaliða tvisvar á ári.

Þorrinn hefst á morgun, föstudaginn 19. janúar en þá halda nemendur 10. bekkjar sitt árlega þorrablót. Þar mæta nemendur ásamt foreldrum og fjölskyldu í sínu fínasta pússi og eiga saman ánægjulega kvöldstund, ásamt kennurum og starfsfólki skólans. Húsið opnar kl. 19:30 og gert er ráð fyrir að borðhald hefjist kl. 20:00.

Þorrablót þetta er upp á gamla mátann og hefur verið haldið allt frá árinu 1981. Gestir hafa með sér mat í trogum og einnig þarf að hafa með sér diska og hnífapör. Drykkir (gos og kristall) eru seldir í sjoppunni og fer ágóðinn af því í ferðasjóð 10.bekkjar, sem tekur eingöngu við reiðufé á staðnum. Glös eru til staðar og boðið er upp á kaffi eftir matinn. Hefð er fyrir því að foreldrar annist skipulagningu og skemmtiatriði, sem iðulega hefur slegið í gegn. Að borðhaldi loknu er svo stiginn dans og hafa nemendur æft gömlu dansana af kappi undanfarna viku.

Hið árlega þorrablót 10. bekkjar verður haldið föstudaginn 19. janúar næstkomandi, á sjálfan bóndadaginn. Eins og allir vita er nauðsynlegt að vera vel undirbúinn fyrir gömlu dansana á slíkum samkomum. Árgangurinn leggur nú allt kapp á dansfimi sína og standa nú yfir stífar dansæfingar, undir styrkri stjórn Sigurrósar Evu Friðþjófsdóttur, danskennara. 

Hér má nálgast stutt myndband af dansæfingum í morgun og eins og sjá má eru krakkarnir orðnir virkilega fótafimir.

Nú er komið vont veður þar sem gengur á með mjög dimmum éljum.  Starfsfólk Dægradvalar mun koma yfir í skóla og sækja þau börn sem ljúka deginum þar en við óskum eftir að foreldrar geri ráðstafanir til að sækja þá sem ekki eiga að fara í Dægradvöl.

Strætó gengur enn og reynt að halda áætlun en farþegar beðnir um að sýna þolinmæði. Sjálfvirkur símsvari hjá strætó er 878-1012.

Það er mikilvægt að börn og unglingar hafi aðgang að lesefni sem höfðar til þeirra. Nú í desember prófuðum við að leyfa nemendum sjálfum að velja bækur inn á skólabókasafnið. Nemendur 4. og 7. bekkjar fóru með kennurum sínum og bókaverðinum okkar út í bókabúð og hver nemandi valdi eina bók sem hann fær svo að lesa fyrstur. 

Miðvikudaginn 10. janúar n.k. eru foreldraviðtöl hér í skólanum. Líkt og undanfarin ár, bóka foreldar viðtalstíma í gegnum Mentor.

Hér má nálgast kynningarmyndband varðandi skráningu.

Nú hefur verið tekið í notkun nýtt skráningarkerfi í mötuneyti skólans og þurfa því allir sem vilja að börn sín borði í mötuneytinu á vorönninni að skrá þau hér. Við vonum að allir geti gengið frá áskrift sem allra fyrst. Nánari leiðbeiningar hafa verið sendar í tölvupósti á aðstandendur, en meðfylgjandi er tafla/mynd af verðskránni.

Starfsfólk Grunnskólans á Ísafirði óskar nemendum, fjölskyldum þeirra og öðrum gleðilegrar jólahátíðar, árs og friðar. Skólastarf hefst á nýju ári samkvæmt stundaskrá fimmtudaginn 4. janúar 2018.

Nú fer að líða að jólaleyfi og í mörgu að snúast síðustu dagana fyrir jól. Við reynum þó að halda ró okkar og hafa aðventuna sem notalegasta.

Í dag er skólastarf með hefðbundnum hætti, en þó ætlar barnakór T.Í. að koma og syngja fyrir okkur kl. 11:00.

Á morgun er svokallaður skreytingadagur þar sem allir leggja lokahönd á skreytingar í skólastofum og einnig hefur verið mikill metnaður í hurðaskreytingum. Það verður virkilega gaman að sjá þegar allt er orðið full frágengið í þeim efnum. 

Á miðvikudaginn eru svo litlu jólin. Þá mæta allir prúðbúnir kl. 9:00 með hátíðarnesti, þar sem smákökur skipa stóran sess. Nemendur mæta í sínar umsjónarstofur og eiga notalega stund þar, fara svo og ganga í kringum jólatréð í nýja anddyri skólans og verða eflaust einhverjir jólasveinar á ferðinni. Skóla lýkur svo um kl. 12:00 og þar með hefst jólaleyfið.

Strætó fer úr firðinum og Hnífsdal kl. 8:40 og til baka kl. 12:10. Dægradvöl verður opin frá kl. 12:00.

Í haust hafa margir nemendur 1. - 4. bekkjar valið danssmiðju í frístund, sem Henna-Riikka Nurmi hefur séð um. Nú er komið að því að bjóða foreldrum að horfa á hvað krakkarnir hafa lært í þessum tímum.
Þriðjudaginn 12. desember -    foreldrar barna í 3.- 4. bekk kl. 11:30
Miðvikudaginn 13. desember -  foreldrar barna í 1. bekk kl. 11:00
Miðvikudaginn 13. desember -  foreldrar barna í 2. bekk kl. 11:30 

Við vonum að sem flestir sjái sér fært að mæta í dansstofu skólans og sjá þessa dansfimu krakka.