Nemendur G.Í. í heimsókn í Kaufering s.l. haust

Í september fóru nokkrir nemendur úr 10. bekk til Kaufering í Þýskalandi og dvöldu þar á einkaheimilum hjá jafnöldrum sínum í góðu yfirlæti. Nú eru þýsku krakkarnir komnir til Ísafjarðar og eru að endurgjalda heimsóknina. Í för með þeim eru tveir kennarar. Hópurinn kom til Íslands s.l. fimmtudag,  flaug til Ísafjarðar á laugardaginn og fer til baka næsta fimmtudag. Það er ýmislegt á dagskrá hjá þeim, m.a. heimsókn í Grunnskóla Þingeyrar, kíkt á íslenska hesta, farið í skoðunarferð um Haukadal og fiskeldisstöðina, og að sjálfsögðu komið við í sundlauginni á Þingeyri. Þau tóku þátt í skólastarfinu hér í skólanum í dag, kynntu sér Fablab og síðan var haldið á menningarkvöld 10. bekkjar í Edinborgarhúsinu nú í kvöld.

Á morgun, miðvikudag, verður svo farið til Suðureyrar í heimsókn í fyrirtækin Íslandssögu og Klofning. Kajakróður var á dagskrá og vonandi viðrar nógu vel til að hægt verði að standa við það. Hópurinn snæðir ásamt gestgjafafjölskyldunum fiskrétti í Tjöruhúsinu síðasta kvöldið og síðan verður slegið upp balli hér í skólanum.

Svona heimsóknir eru afskaplega gefandi og lærdómsríkar, bæði fyrir gestgjafa og gesti og mikils virði að kynnast menningu annarra þjóða og styrkja vináttuböndin. ​

Í kvöld heldur 10. bekkur menningarkvöld í Edinborgarhúsinu. Nemendur munu bjóða upp á tónlist, dans, ljóðalestur og endursýna árshátíðaratriði sitt frá því í mars. Auk þess mun dúettinn Between Mountains koma fram, en þær stöllur unnu Músíktilraunir nú á dögunum.

Skemmtunin hefst kl. 20:00, aðgangseyrir er kr. 1.000 og eru allir velkomnir.

Alþjóðlegur dagur bókarinnar er 23. apríl og í tengslum við hann hefur Foreldrafélag Grunnskólans á Ísafirði staðið fyrir átaki til styrktar bókasafni skólans síðustu árin í samstarfi við bókaverslunina Pennann/Eymundsson. Verslunin býður 20% afslátt af bókum sem fólk getur keypt til að gefa safninu. Í  versluninni liggur frammi óskalisti frá skólanum en allar bækur eru að sjálfsögðu vel þegnar.

Þetta átak Foreldrafélagsins og bókaverslunarinnar hefur skilað góðum árangri á síðustu árum og er mikilvægt fyrir skólabókasafnið, auk þess sem hlýhugur og stuðningur foreldra við safnið er ómetanlegur.​

Í dag er sumardagurinn fyrsti, þó að jörð sé alhvít. Samkvæmt íslenskri þjóðtrú boðar það gott sumar ef sumar og vetur frjósa saman, þ.e. að hiti fari niður fyrir frostmark aðfararnótt sumardagsins fyrsta. Í Sögu daganna - hátíðir og merkisdagar eftir Árna Björnsson þjóðháttafræðing segir um sumardaginn fyrsta:

Hvarvetna var fylgst með því, hvort frost væri aðfararnótt sumardagsins fyrsta, þ.e. hvort saman frysti sumar og vetur. Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.

Við megum því eiga von á góðu sumri samkvæmt þessu. Við óskum öllum gleðilegs sumars og þökkum fyrir veturinn.

Nú er skólastarf hafið að nýju eftir gott páskaleyfi. Vikan verður þó í styttra lagi, eða þrír kennsludagar, þar sem sumardagurinn fyrsti er á fimmtudaginn.

Í dag er síðasti kennsludagur fyrir páskaleyfi. Kennsla hefst að því loknu samkvæmt stundaskrá þriðjudaginn 18. apríl. Gleðilega páska.

Í morgun buðu Tónlistarskóli Ísafjarðar og Listaskóli Rögnvaldar upp á samspils tónleika í Hömrum. Þar léku tónlistarnemendur 4. og 8. bekkjar fyrir bekkjarfélaga sína og stóðu sig með stakri prýði. Fjölbreytnin var mikil þar sem nemendur sungu, spiluðu á píanó, gítar, trommur og bassa. 

Samspil þetta hjá 4. og 8. bekk er orðið að hefð og virkilega gaman að sjá hversu gróskumikið starf fer fram hér í tónlistarskólum bæjarins. Hér er hægt að nálgast fleiri myndir frá samspilinu.

Síðustu daga hefur svo sannarlega verið líf og fjör hér í skólanum. Nemendur og starfsfólk hafa staðið í ströngu við að gera árshátíð skólans sem veglegasta og má með sanni segja að það hafi tekist enn eitt árið. 

Yfirskrift árshátíðarinnar að þessu sinni var Tónlist og voru sýningar 5 talsins fyrir fullu húsi í hvert skipti. Því miður geta ekki allir nemendur séð alla bekki á sviði, þar sem við þurfum að takmarka aðgang vegna plássleysis. En sýningarnar voru allar teknar upp og verða aðgengilegar á næstunni.

Við viljum þakka öllum fyrir frábæra árshátíð, ekki síst nemendum sem fara alltaf á kostum ár eftir ár.

Þessa stundina er bilun í símkerfi og ekki hægt að ná sambandi við skiptiborð skólans.
Vinsamlegast hringið í síma 894-1688 á meðan viðgerð fer fram.

Árshátíð skólans verður haldin á miðvikudag og fimmtudag og er yfirskriftin að þessu sinni Tónlist. Fyrirkomulag sýninga er eftirfarandi:

1. sýning – miðvikudagur 29. mars kl. 17:00

Flytjendur: 1. – 7. bekkur. Áhorfendur:  Nemendur í 1. og 2. bekk og foreldrar/gestir þeirra.

2. sýning – miðvikudagur 29. mars kl. 20:00

Flytjendur: 5.–10. bekkur. Áhorfendur: Nemendur í 5.–7. bekk og foreldrar/gestir. 

3. sýning – fimmtudagur 30. mars kl. 10:00

Flytjendur: 1.-4.bekkur. Áhorfendur: Tveir elstu árgangar leikskólanna  (ásamt 8-10.b).

4. sýning – fimmtudaginn 30. mars kl. 17:00

Flytjendur: 1.-7.bekkur. Áhorfendur: Nemendur í 3. og 4. bekk og foreldrar/gestir þeirra.

5. sýning – fimmtudaginn 30. mars kl. 20:00

Flytjendur: 7.–10. bekkur. Áhorfendur: Nemendur í 8.–10. bekk og foreldrar/gestir þeirra.

Reynt er að halda stundaskrá eins og hægt er. Gert er ráð fyrir að nemendur í 1.-2. bekk séu í skólanum báða dagana frá kl. 8:00 - 13:40 og mæti svo aftur kl. 16:00 og þeir sem eru í Dægradvöl komi beint í skólann eftir að henni lýkur.  Nemendur í 3. - 7.bekk mæta kl. 16:30 í seinni lotu dagsins.

Erfitt er að áætla lengd hverrar skemmtunar en í ljósi reynslunnar má gera  ráð fyrir 1 til 1½ klst.   Gestum er bent á að virða óskir skólans varðandi það á hvaða sýningar fólk á að mæta og hvetjum við gesti til að sitja skemmtunina til enda. Það hefur töluvert rask og óþægindi í för með sér að yfirgefa sýningu áður en henni lýkur. Mikilvægt er að fólk mæti tímanlega svo hægt sé að hefja sýningu á tilsettum tíma.

Aðgangseyrir á árshátíðarsýningu er 1000 kr. og er ekki tekið við greiðslukortum. Nemendur og starfsfólk GÍ svo og þeir sem eru 67 ára eða eldri greiða ekki aðgangseyri.  Fólk borgar aðeins inn á eina sýningu, þeir sem sækja fleiri sýningar sýna fyrri aðgöngumiða við innganginn.  Hagnaður af sýningum rennur í ferðasjóð 7. bk. vegna skólabúða. Mötuneytið verður opið báða árshátíðardagana.

Umsjónarkennarar senda upplýsingar heim varðandi frekara skipulag.