Í næstu viku verða samræmd könnunarpróf í 4., 7. og 10. bekk sem hér segir:

Mánudagur 17. september kl. 9:00 - 12:00 íslenska 10. bekkur

Þriðjudagur 18. september kl. 9:00 - 12:00 enska 10. bekkur

Miðvikudagur 19. september kl. 9:00 - 12:00 stærðfræði 10. bekkur

Fimmtudagur 20. september kl. 9:00 - 12:00 íslenska 4. og 7. bekkur

Föstudagur 21. september kl. 9:00 - 12:00 stærðfræði 4. og 7. bekkur

Eins og fram kemur hjá Námsmatsstofnun þá er tilgangur samræmdra könnunarprófa að athuga eftir því sem kostur er, að hvaða marki námsmarkmiðum aðalnámskrár í viðkomandi námsgrein eða námsþáttum hafi verið náð. Einnig eiga prófin að vera leiðbeinandi um áherslur í kennslu fyrir einstaka nemendur og veita nemendum, foreldrum og skólum upplýsingar um námsárangur og náms­stöðu nemenda. Þá veita prófin upplýsingar um hvernig skólar standa í þeim námsgreinum sem prófað er úr, miðað við aðra skóla landsins.

Allar frekari upplýsingar um framkvæmd prófanna er að finna á heimasíðu Námsmatsstofnunar.

Farangurinn ferjaður í land á Hesteyri

Haustferð 10. bekkjar var farin á Hesteyri s.l. þriðjudag og miðvikudag. Til stóð  að fara í land á Sléttu og ganga til Hesteyrar, en vegna óhagstæðra lendingarskilyrða á Sléttu var siglt að Hesteyri og þaðan var gengið til Miðvíkur, Stakkadals og til baka  að Hesteyri. Ferðin tókst frábærlega og nemendur stóðu sig mjög vel og fóru heim þreyttir, sælir og glaðir.

Grunnskólinn á Ísafirði færði nemendum 5. bekkjar kortabækur að gjöf nú í vikunni. Um nýja útgáfu er að ræða, aukna og endurskoðaða af Kortabók handa grunnskólum sem fyrst kom út árið 1992. Bókin er sem fyrr unnin í samstarfi við Liber - útgáfuna í Stokkhólmi en Íslandskort eru að mestu fengin frá Landmælingum Íslands og Jean-Pierre Biard kortagerðarmanni. Á bókarkápu er kort Guðbrands biskups Þorlákssonar sem kom út í hollensku kortasafni árið 1590. Kortið var lengi undirstaða þeirra myndar sem birtist af landinu, skreytt fjölda mynda af ófreskjum og sæskrímslum og er skemmtilegt að bera það saman við nútíma kort og myndir.

Það er ósk skólans að bókin nýtist nemendum vel í öllu frekara námi, enda um mjög eigulega bók að ræða.

Þessa stundina er 10. bekkur að sigla inn Ísafjarðardjúp eftir mjög vel heppnaða ferð til Hesteyrar. Hópurinn er væntanlegur til Ísafjarðar um kl. 15:30 á eftir.

Ákveðið hefur verið að fara í haustferð 10. bekkjar á morgun, þriðjudaginn 11. september. Farið verður kl. 9:00 frá Sundahöfn og eiga nemendur að mæta eigi síðar en 8:30. Siglt verður að Sléttu, gengið þaðan til Hesteyrar og gist í tjöldum. Farangurinn verður settur í land á Hesteyri. Komið verður heim síðdegis á miðvikudag.

« 1 af 3 »

Þann 5. september s.l. hófst verkefnið Göngum í skólann, en það er nú  haldið í sjötta sinn hér á landi og tekur Grunnskólinn á Ísafirði þátt. Verkefninu lýkur formlega með alþjóðlega Göngum í skólann deginum miðvikudaginn 3. október. Sem fyrr verður lögð áhersla á að börn gangi eða hjóli til og frá skóla.

Markmið verkefnisins eru að hvetja til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar, að því er fram kemur á heimasíðu verkefnisins www.gongumiskolann.is

Sundkennslan hefst þriðjudaginn 11. september eftir lagfæringar á Sundhöllinni. Íþróttirnar verða að öðru leyti kenndar utan dyra til 1. október og því nauðsynlegt að allir séu vel klæddir til útiveru þá daga.

Alþjóðadagur læsis er laugardaginn 8. september, en Sameinuðu þjóðirnar hafa helgað þann dag málefnum læsis allt frá árinu 1965. Í ár taka Íslendingar þátt í þessum degi í fjórða skiptið.

Fjölskyldur eru hvattar til að skipuleggja 30 mínútna fjölskyldulestrarstund og njóta þess að lesa saman. Einnig munu kennarar G.Í. skipuleggja lestrarstundir í skólanum eftir helgina. 

Föstudaginn 7. september er starfsdagur samkvæmt skóladagatali og engin kennsla.

Krabbameinsfélagið Sigurvon fékk á dögunum rausnarlega gjöf frá nemendum sem á síðasta skólaári voru í 10. bekk Grunnskólans á Ísafirði en stíga nú sín fyrstu skref í framhaldsskóla. Afhentu þau Sigurvon 125 þúsund krónur og vilja með því leggja sitt af mörkum til að styrkja starfsemi félagsins. Peningarnir eru afgangur af ferðasjóði sem krakkarnir söfnuðu síðasta vetur til að fjármagna vorferð 10. bekkjar sem farin var í lok maí sl. í Skagafjörð. Voru krakkarnir svo öflugir í fjáröfluninni að peningarnir dugðu fyrir öllum útlögðum kostnaði við ferðina og vel það. Um 125 þúsund krónur stóðu eftir þegar allir reikningar höfðu verið borgaðir og urðu krakkarnir sammála um að Sigurvon fengi þá peninga. Vilja þau koma á framfæri þökkum til allra þeirra sem styrktu þau í fjáröfluninni síðasta vetur, m.a. með því að mæta á viðburði sem haldnir voru í nafni 10. bekkjar og með kaupum á rækjum, kökum, dagatölum og ýmsu öðru.