26 nemendur á unglingastigi hafa hárgreiðlsuval á stundaskránni sinni í vetur, 11 fyrir áramót og 15 eftir áramót, undir styrkri stjórn Kristínar B. Oddsdóttur kennara. Þessa dagana hafa nemendur fengið að heimsækja hárstofuna Ametyst og nýtt sér aðstöðuna þar. Það er að mörgu að hyggja varðand umhirðu hárs, bæði hvað varðar þvott og þurrk. Auk fræðslu um umhirðu, hafa nemendur einnig fræðst um hársöguna frá árunum 1940 til 2020 og teiknuðuð uppáhalds greiðsluna sína.
Úrslitakeppni Pangeu 2023 fór fram með pompi og prakt í gær í Menntaskólanum við Hamrahlíð. Keppendur stóðu sig virkilega vel og þátttökumet var slegið í ár þar sem 4.893 nemendur alls (2.573 úr 8.bekk og 2.320 úr 9.bekk), úr samtals 66 skólum af öllu landinu tóku þátt í keppninni. Okkar menn, þeir Hálfdán Ingólfur Hálfdánsson og Orri Norðfjörð stóðu sig frábærlega og eru í topp 37 í sínum árgöngum, af þessum 4.893 nemendum. Við óskum þeim, kennurum þeirra og foreldrum innilega til hamingju með árangurinn.
Í vetur tóku nemendur 8. og 9. bekkjar þátt í Pangea stærðfræðikeppni sem er fyrir alla nemendur áttundu og níundu bekkja grunnskóla landsins. Aðalmarkmið keppninnar er að vekja áhuga hjá ungu fólki á stærðfræði, hvetja þau sem halda að stærðfræði sé of erfið til dáða með því að sýna þeim að þau geti afrekað mikið ef þau reyna, og hvetja efnilegustu nemendurna til áframhaldandi afreka.
Öll vinna við skipulagningu og framkvæmd keppninnar er unnin af sjálfboðaliðum úr Félagi Horizon og raungreina- og verkfræðinemum. Kennarasamband Íslands hefur verið skipuleggjendum innan handar við gerð prófanna.
Nú er ljóst að tveir nemendur G.Í. komust í úrslit Pangeu 2023. Það eru þeir Hálfdán Ingólfur Hálfdánsson í 8. bekk og Orri Norðfjörð í 9.bekk. Þetta er frábær árangur hjá þeim og erum við innilega stolt af þeim og óskum þeim góðs gengis í úrslitakeppninni, sem haldin verður 15.apríl í Menntaskólanum við Hamrahlíð.
Því miður er ekki hægt að bjóða upp á skíðadag á morgun vegna snjóleysis. Við höldum þó í þá veiku von að enn eigi eftir að snjóa til fjalla og grípum þá tækifærið ef og þegar það gefst.
Nú er lokið 5 árshátíðarsýningum og eru allir í skýjunum yfir útkomunni og aðsókn, sem hefur aldrei verið meiri. Yfirskriftin þetta árið var Íþróttir og var einstaklega gaman að sjá mismunandi útfærslur árganga. Flestallir nemendur skólans stigu á svið eða komu að tæknimálum eða förðun og er alveg einstakt að upplifa stemninguna sem ríkir þessa daga. Nám er svo miklu meira en bóknám. Leikur er mikilvæg námsaðferð sem opnar víddir þar sem sköpunargleði getur notið sín. Hamingja og gleði liggja í því að finna hæfileikum sínum farveg og fá að njóta sín sem einstaklingur og hluti af heild. Í því ferli sem undirbúningur árshátíðarsýninga er, verða margir sigrar hjá einstaklingum sem efla sjálfsmynd, félagsfærni og frumkvæði svo fátt eitt sé nefnt.
Við erum mjög stolt af nemendum okkar og starfsfólki eftir þessa erilsömu daga og förum öll glöð inn í páskaleyfið. Kennsla hefst að páskaleyfi loknu þriðjudaginn 11.apríl og vonum við að allir njóti þess vel.
Við viljum í lokin koma því á framfæri að stefnt er að skíðadegi miðvikudaginn 12.apríl ef veður og snjór leyfir.
Gleðilega páska!
Árshátíð skólans verður miðvikudaginn 29. og fimmtudaginn 30.mars. Æfingar standa nú yfir og mikið í lagt að venju, en nemendur völdu yfirskriftina ,,Íþróttir" að þessu sinni.
Sýningar eru eftirfarandi:
1. sýning miðvikudaginn 29.mars kl. 9:00
Flytjendur: 1. - 7. bekkur
Áhorfendur: Nemendur í 1. og 2. bekk ásamt gestum
2. sýning miðvikudaginn 29.mars kl. 11:00
Flytjendur: 5. - 10. bekkur
Áhorfendur: Nemendur í 5. - 7. bekk ásamt gestum
3. sýning fimmtudaginn 30.mars kl. 9:00
Flytjendur: 1. - 7. bekkur
Áhorfendur: Nemendur í 3. og 4. bekk ásamt gestum
4. sýning fimmtudaginn 30.mars kl. 11:00
Flytjendur: 1. - 6. bekkur
Áhorfendur: Nemendur Tanga og unglingastig
5. sýning fimmtudaginn 30.mars kl. 20:00
Flytjendur: 7. - 10. bekkur
Áhorfendur: Nemendur í 8. - 10. bekk ásamt gestum
Nemendur 7. - 10. bekkjar fá frí í fyrstu tveimur tímunum á föstudag vegna kvöldsýningar á fimmtudeginum.
Aðgangseyrir er kr. 1.000 fyrir alla gesti 16 ára og eldri (posi á staðnum), og rennur ágóðinn í tækjasjóð. Aðgöngumiðar gilda á allar sýningar, þannig að hver og einn greiðir aðeins einu sinni.
Mötuneytið er opið þessa daga og verður boðið upp á samlokur og djús á miðvikudeginum en pylsur og djús á fimmtudeginum, þar sem matsalurinn er upptekinn vegna sýninga.
Umsjónarkennarar senda nánari upplýsingar heim varðandi skipulagið hjá hverjum og einum árgangi.
Þekking og leikni í heimilisstörfum er kjarni heimilisfræðinnar og honum tengjast allir þættir námsins, fræðilegir sem verklegir. Í verklegum greinum er stuðlað að alhliða þroska nemenda, sjálfstæði í verki og lausnaleit, auk þess sem nemendur læra að líta á eigin verk og ákvarðanir gagnrýnum augum. Þetta eykur sjálfsöryggi og starfsánægju og gefur jafnframt tækifæri til sköpunar. Fátt styrkir betur sjálfsmyndina en vel unnið verk og ekki er nú verra ef hægt er að gleðja sína nánustu í leiðinni. Nemendur í heimilisfræðivali hjá Guðlaugu Jónsdóttur, mega vera virkilega stoltir af kökunum sínum sem þeir bökuðu og skreyttu nú á dögunum. Við höfum það fyrir satt að þær séu ekki aðeins fallegar heldur einnig sérstaklega bragðgóðar og myndu sóma sér vel á veisluborðum. Stundum þurfum við að taka okkur smá hlé frá hollustunni, það er nú bara þannig!
Á fimmtudaginn fór lokahátíð stóru upplestrarkeppninnar fram í Félagsheimili Bolungarvíkur. Ellefu nemendur af norðanverðum Vestfjörðum spreyttu sig í lestrinum og stóðu sig allir með stakri prýði. Sigurvegari varð Jósef Ægir Vernharðsson frá Grunnskólanum á Suðureyri og óskum við honum innilega til hamingju, sem og öllum öðrum þátttakendum. Æfingaferlið hefur staðið yfir allt frá Degi íslenskrar tungu 16.nóvember síðastliðinn og nemendur verið duglegir og tekið miklum framförum í framsögn og að rækta talað mál.
Í morgun fengu nemendur 7. - 10. bekkjar fræðslu sem unnin hefur verið af Insight og Huawei í samstarfi við Heimili og Skóla og SAFT um nethegðun. Fræðslan sem nefnist SmartBus var kynnt af Lalla Töframanni, sem er sérstaklega þjálfaður í þessu efni og er frábær fyrirmynd. Hann náði að tengjast nemendum mjög vel og skapaði skemmtilega og góða upplifun úr efninu. Nemendur svöruðu könnun, sem skilað hefur mjög góðum upplýsingum um hegðun barna á netinu. Síðan árið 2020 hafa rúmlega 2000 nemendur svarað og niðurstöður verið greindar í tveimur skýrslum. Könnunin hjálpar SAFT, Heimili og Skóla og öðrum hagsmunaraðilum að skilja stöðu barna á Íslandi hvað varðar áhættusama hegðun á samfélagsmiðlum, kunnáttu þeirra um netöryggi og réttindi, miðað við börn á Norðurlöndum. Engum persónulegum gögnum er safnað í SmartBus fræðslunni, sem fram fer í samræmi við persónuvernd og virðir innlenda menntunarstaðla.
Við vonum að nemendur okkar standi sterkari fótum á netinu eftir þessa fræðslu og nái enn betri fræni til að vafra um netheiminn á öruggan og gefandi hátt.
Fimmtudaginn 16.mars verður opinn skólaráðsfundur Grunnskólans á Ísafirði kl.15.00. Þar verður meðal annars rættt um skóladagatal næsta skólaárs. Við hvetjum áhugasama til að fylgjast með fundinum í gegnum Teams forritið.
