Keppendurnir allir ásamt kennurum og skólastjóra T.Í.

Báðir hópar tónlistarnemendanna sem kepptu á lokahátíð Nótunnar í Hörpunni um liðna helgi, gerðu sér lítið fyrir og unnu báðir til verðlauna. Skólakór Tónlistarskóla Ísafjarðar vann Nótuna í miðnámi ásamt tveimur öðrum atriðum og hljómsveit píanónemenda vann sérstök ÍSMÚS verðlaun fyrir frumlegasta atriði hátíðarinnar.

Glæsileg frammistaða hjá þessu unga fólki okkar, sem við óskum svo sannarlega til hamingju með árangurinn.

Þorgrímur Þráinsson

Í fyrradag kom Þorgrímur Þráinsson í heimsókn í 10. bekk með forvarnafræðslu undir yfirskriftinni Fylgdu hjartanu. Þessi fræðsla Þorgríms beinist að því að styrkja sjálfsmeðvitund nemenda áður en þeir fara í framhaldsskóla, ekki síst að setja sér markmið í lífinu og ná þeim. 

Nemendur létu mjög vel af fræðslu Þorgríms og þótti hún gagnleg.

Sunnudaginn 14. apríl fer fram Lokahátíð Nótunnar, uppskeruhátíðar íslenskra tónlistarskóla í Eldborgarsal Hörpu í Reykjavík.
Á tónleikunum verða 24 tónlistaratriði, víðs vegar að af landinu, sem valin voru laugardaginn 16. mars á fernum svæðistónleikum á Ísafirði, Egilsstöðum, Reykjavík og Selfossi. Af þremur tónlistaratriðum frá Vesturlandi og Vestfjörðum sem valin voru til þátttöku í Eldborgartónleikunum koma tvö frá Tónlistarskóla Ísafjarðar, en það eru skólakór Tónlistarskóla Ísafjarðar og hljómsveit píanónemenda. Með kórnum syngja nokkrir nemendur G.Í., þau Pétur Ernir Svavarsson, Birta Rós Þrastardóttir, Brynja Sólrún Árnadóttir, Hekla Hallgrímsdóttir og Hilda María Sigurðardóttir. Þá leikur Hilmar Adam Jóhannsson með hljómsveit píanónemenda, bæði á píanó og fiðlu og er yngsti meðlimur hljómsveitarinnar.

Það verður gaman að fylgjast með þessum hæfileikaríku krökkum og óskum við þeim góðs gengis.

Nánari upplýsingar er að finna inni á heimasíðu Tónlistarskóla Ísafjarðar og Nótunnar.

Í síðustu viku voru lagðar fram tillögur að breyttu skipulagi skólalóðarinnar. Tveir nemendur frá hverjum árgangi frá 3. - 7. bekk fóru á kynningarfund með skólastjórnendum, þar sem tillögurnar voru kynntar. 

Nemendurnir tóku virkan þátt í umræðunum og höfðu ýmislegt til málanna að leggja. Þeir eru mjög spenntir fyrir þeim framkvæmdum sem eru fyrirhugaðar og hlakka til að fá fjölbreyttari möguleika á hreyfingu í frímínútunum.

Tilraunin með hafragrautinn hefur gengið vonum framar. Boðið er upp á graut í hefðbundnum nestistíma nemenda og eru á milli 170 og 200 nemendur sem fá sér graut daglega og fara allt að 50 lítrar á dag. Nemendur eru mjög ánægðir og margir fá sér tvisvar á diskinn. Hjúkrunarfræðingur skólans hefur haft orð á því að mun minna hafi verið um komur nemenda vegna magaverkja í mars heldur en aðra mánuði, þó að ekki séu neinar talningar eða vísindalegar sannanir þar að baki.

Það er því ljóst að við munum halda áfram að bjóða nemendum upp á hafragraut það sem eftir lifir skólaársins.

Nú hefst páskaleyfi eftir glæsilega tveggja daga árshátíð, þar sem allir nemendur skólans skiluðu sínu með miklum sóma. Kennsla hefst að páskaleyfi loknu miðvikudaginn 3. apríl samkvæmt stundaskrá. 
Starfsfólk skólans óskar nemendum, fjölskyldum þeirra og öllum öðrum gleðilegra páska.

Árshátíð Grunnskólans á Ísafirði verður haldin fimmtudaginn 21. og föstudaginn 22. mars n.k. Þar munu allir árgangar stíga á stokk og sýna atriði sín undir yfirskriftinni Lífið er leikur.

Síðustu dagar hafa einkennst af undirbúningi fyrir árshátíðina, enda er mikið í lagt og allir nemendur skólans koma að skipulagningunni á einn eða annan hátt, þó svo að ekki alveg allir stígi á svið, en langflestir þó. Skólinn býður upp á fimm sýningar til að koma öllum að og er aðgangseyrir kr. 1.000 sem rennur í ferðasjóð verðandi 7. bekkjar fyrir skólabúðaferð að Reykjum í Hrútafirði næsta haust.

1. sýning – fimmtudaginn 21. mars kl. 9:00.

Flytjendur: 1. – 7. bekkur.

Áhorfendur:  Nemendur í 1. og 2. bekk og foreldrar/gestir þeirra.

2. sýning – fimmtudaginn 21. mars kl. 11:00.

Flytjendur: 5.–10. bekkur

Áhorfendur: Nemendur í 5.–7. bekk og gestir (t.d. þeir sem ekki komast á öðrum tíma)

3. sýning – fimmtudaginn 21. mars kl. 20:00.

Flytjendur: 5.–10. bekkur

Áhorfendur: Foreldrar, gestir og almenningur.  Þetta er ekki nemendasýning.

4. sýning – föstudaginn 22. mars kl. 9:00.

Flytjendur: 1. – 7. bekkur.

Áhorfendur: Nemendur í 3. og 4. bekk og foreldrar/gestir þeirra.

5. sýning – föstudaginn 22. mars kl. 20:00.

Flytjendur: 7.–10. bekkur,

Áhorfendur: Nemendur í 8.–10. bekk og foreldrar/gestir þeirra

Ball (fyrir nem. 8.-10. bk.) er að lokinni sýningu til miðnættis.

Rebekka Skarphéðinsdóttir

Hugtakið Pí er stærðfræðilegur fasti og var upphaflega skilgreindur sem hlutfallið milli ummáls og þvermáls í hring og oftast skrifað með einungis tveimur aukastöfum þ.e. 3,14. Aukastafirnir eru þó óendanlega margir og fáir sem leggja á sig að festa fleiri en nokkra á minnið.

Rebekka Skarphéðinsdóttir, nemandi í 5. bekk G.Í. hefur þó heldur betur lagt fleiri aukastafi á minnið og þylur upp hvorki fleiri né færri en 85 eins og ekkert sé, þrátt fyrir að vera ekki farin að læra neitt ennþá um pí í námsefni stærðfræðinnar.

Að sögn Lindu Bjarkar Pétursdóttur, móður Rebekku, þá byrjaði hún smátt og smátt að bæta í minnisbankann frá því í haust. Hún sá þetta fyrst í myndinni Night at the museum og hófst þá handa. Brátt urðu aukastafirnir 20, svo 30 og ákvað hún þá að sjá til hversu langt hún næði fyrir alþjóðlega Pí-daginn 14. mars s.l., en þá voru þeir orðnir 85 talsins. 

Linda Björk segir dótturina vera algjöran límheila og hún geti t.d. þulið upp slagorð, auglýsingar og samtöl í teiknimyndum með léttum leik.

Hér má sjá myndband þar sem Rebekka hin 10 ára þylur upp Pí með 85 aukastöfum, geri aðrir betur!

mynd: Hermann Þorsteinsson

Strákarnir í 4. flokki handknattleiksdeildar Harðar gerðu sér lítið fyrir um helgina og urðu deildarmeistarar 2. deildar. Strákarnir fögnuðu vel og innilega eftir 10 marka sigur í lokaleik sínum í deildarkeppni vetrarins, en nú tekur við úrslitakeppni á meðal 8 bestu liða landsins.

Flestir þessara stráka eru í 9. bekk G.Í., en það eru þeir Friðrik Þórir Hjaltason, Jens Ingvar Gíslason, Gísli Jörgen Gíslason, Hjalti Hermann Gíslason, Eggert Karvel Haraldsson og Jakob Jóhann Veigarsson.

Við óskum strákunum innilega til hamingju með titilinn.

Í gær voru haldnir svæðistónleikar Nótunnar, sem er uppskeruhátíð tónlistarskóla í landinu. Þátttakendur komu frá sex tónlistarskólum á Vesturlandi og Vestfjörðum. Tónlistarskóli Ísafjarðar valdi þrjú atriði til þátttöku og voru nemendur G.Í. í þeim öllum.

Tónleikarnir skiptust í þrjá flokka, þ.e. grunnnám, miðnám og framhaldsnám. Í grunnnámi léku Unnur Eyrún Kristjánsdóttir á píanó og Jóhanna María Steinþórsdóttir á saxófón. Í miðnámi sungu Birta Rós Þrastardóttir, Hekla Hallgrímsdóttir, Brynja Sólrún Árnadóttir, Hilda María Sigurðardóttir og Pétur Ernir Svavarsson ásamt 9 öðrum í skólakór T.Í. Í framhaldsnámi lék svo Hilmar Adam Jóhannsson á fiðlu og píanó í hljómsveit píanónemenda, ásamt sjö öðrum. Allir þessir nemendur stóðu sig mjög vel og verður gaman að fylgjast með þeim í framtíðinni.

Skólakórinn og píanóhljómsveitin fengu bæði verðlaun fyrir framúrskarandi tónlistaratriði, auk þess sem þau voru bæði valin fyrir hönd svæðisins til að taka þátt í lokatónleikum Nótunnar, sem haldnir verða í Eldborgarsal Hörpu sunnudaginn 14. apríl n.k.

Við óskum þessu unga og efnilega tónlistarfólki innilega til hamingju með árangurinn.