Magnús Örn, Kári, Hrefna Dís, Bríet, Solveig Amalía og Helgi Ingimar.

G.Í. komst áfram í úrslitakeppni Skólahreysti í kvöld, eftir sigur í Vestfjarðariðlinum. Það var ekki þrautalaust fyrir hópinn að komast suður, þar sem ekki var flogið í gær og morgunvélin bilaði í morgun og snéri við. En allt gekk þetta á endanum og lenti hópurinn í Reykjavík um miðjan dag í dag.

Lið G.Í. skipuðu þau Magnús Örn Guðnason, Kári Eydal, Bríet Sigurðardóttir, Hrefna Dís Pálsdóttir, Solveig Amalía Atladóttir og Helgi Ingimar Þórðarson. Þjálfari og fararstjóri var Atli Freyr Rúnarsson.

Úrslit urðu þau að G.Í. sigraði riðilinn, Grunnskóli Bolungarvík hafnaði í 2. sæti, Grunnskólinn á Þingeyri í því 3. og Súðavíkurskóli í 4. sæti. Það er aðdáunarvert að þessir litlu skólar nái að senda lið í keppni sem þessa, en í þetta skiptið lánaði G.Í. Stefán Frey Jónsson til Þingeyringanna til að ná tilskildum fjölda.

Þau 12 lið sem sigra sína riðla, munu svo keppa til úrslita í Laugardalshöllinni þann 8. maí n.k.

Við óskum öllum innilega til hamingju og góðrar heimferðar.

« 1 af 5 »

Þessa viku hafa fimm nemendur í 9. bekk, frá Grunnskólanum á Ísafirði og Grunnskólanum á Suðureyri, verið í heimsókn til jafnaldra í Aþenu ásamt nemendum frá Svíþjóð, Hollandi og Búlgaríu. Með þeim í för eru þær Jóna Benediktsdóttir og Bergljót Halldórsdóttir.

Ferðin er farin vegna samstarfsverkefnis á vegum Evrópusambandsins, Erasmus+. Verkefnið byggir á Mannréttindayfirlýsingu Sameinuðu þjóðanna sem samþykkt var 10. desember 1948.

Heiti verkefnisins er: Living in a Challenging World og það byggist á því að allar greinar Mannréttindayfirlýsingarinnar eru skoðaðar. Allir nemendur í 9. Bekk G.Í. taka þátt og er fyrsta hluta verkefnisins nú lokið. Í fyrsta hlutanum voru teknar fyrir fyrstu fimm greinar yfirlýsingarinnar og fjalla þær um frelsi og jafnrétti.  

Þessir fimm nemendur ásamt nemendum frá áðurnefndum löndum halda áfram að fjalla um frelsi og jafnrétti og  auk þess að mynda tengsl við krakka frá öðrum Evrópulöndum, eru áhugaverðustu staðirnir skoðaðir og það er svo sannarlega af nógu að taka í Aþenu.

Frá vinstri: Hákon Ari Heimisson, Guðrún Eva Bjarkadóttir og Heiður Hallgrímsdóttir

Vinningshafar ásamt formanni dómnefndar og umsjónarkennurum sínum

Fulltrúar G.Í. á lokahátíðinni

« 1 af 3 »

Í gær fór lokahátíð Stóru upplestrarkeppninnar fram í Hömrum. Tíu nemendur frá fjórum skólum á norðanverðum Vestfjörðum lásu sögubrot og ljóð, en þessir nemendur höfðu verið valdir sem fulltrúar sinna skóla. Fyrir hönd G.Í. lásu þau Guðrún Eva Bjarkadóttir, Guðrún Helga Sigurðardóttir, Hákon Ari Heimisson, Heiður Hallgrímsdóttir, Helgi Rafn Hermannsson og Unnur Guðfinna Daníelsdóttir.

Í hléi léku þeir Ívar Hrafn Ágústsson á trommur, Pétur Örn Sigurðsson á hljómborð og Hákon Ari Heimisson á trommur, lagið Happier eftir Marshmello Bastille, sem þeir útsettu sjálfir.

Dómarar þetta árið voru þau Baldur Sigurðsson, Anna Þorbjörg Ingólfsdóttir, Anna Sigríður Ólafsdóttir, Dagný Annasdóttir og Dagný Arnalds og var fundarstjórn í höndum Guðrúnar Birgisdóttur, skóla- og sérkennslufulltrúa Ísafjarðarbæjar. Ávörp fluttu þeir Guðmundur Gunnarsson, bæjarstjóri og Baldur Sigurðsson, formaður dómnefndar. Mariann Rähni frá Grunnskóla Bolungarvíkur kynnti skáld keppninnar, en hún hafnaði í 3. sæti keppninnar í fyrra.

Niðurstaða dómnefndar varð sú að Heiður Hallgrímsdóttir sigraði, Hákon Ari Heimsson hafnaði í 2. sæti og Guðrún Eva Bjarkadóttir í því 3., öll úr Grunnskólanum á Ísafirði. Aukaverðlaun fyrir framúrskarandi flutning á Guttavísum hlaut Kristinn Hallur Jónsson frá Grunnskólanum í Bolungarvík. Við óskum öllum lesurum innilega til hamingju með frábæra frammistöðu. Ekki má heldur gleyma þeim kennurum sem hafa séð um þjálfun þeirra ásamt foreldrum, árangurinn er einnig þeirra. 

« 1 af 7 »

Verkgreinar eru ekki síður mikilvægar en þær bóklegu og alltaf gaman að sjá afurðir nemenda. Í 5. bekk hafa nemendur verið að sauma bútasaumspúða, húfur og fleira sem eiga örugglega eftir að fylgja þeim næstu árin.

2.bekkur í Námsveri

2.bekkur í Námsveri

3.bekkur á bókasafni

1.HM í rými Dægradvalar

1.HM í rými Dægradvalar

4.bekkur í náttúrufræðistofu

Danskennsla í matsal

1.KV í dansstofu

1.KV í dansstofu

Danskennsla í matsal

« 1 af 10 »

Það er alveg hreint ótrúlegt hvað hægt er að gera í samstilltum hóp. Nú hefur 1.-4. bekk verið kennt í nokkra daga á ýmsum stöðum í skólanum og ekki annað að sjá en að það gangi vel.  Starfsfólkið breytti á undraverðum tíma ýmsum rýmum skólans í kennslustofur fyrir árgangana sem þurfti að flytja úr gráa húsinu (gamla gagganum).  það er vissulega víða þröngt og margir sem hafa þurft að aðlaga sig en allir tilbúnir að gera sitt besta til að láta þetta ganga upp, bæði kennarar og nemendur og er þeim öllum þakkað fyrir það.

Í dag býður Foreldrafélag G.Í. í samstarfi við Edinborgarhúsið, nemendum í 1.-4. bekk á sýningu Leikfélags M.Í. á Ávaxtakörfunni. Sýningin hefst kl. 12:00 í Edinborgarhúsinu og er áætlað að henni ljúki um kl. 13:30. Starfsfólk skólans og Frístundar fylgja nemendum fram og til baka og vonum við að allir njóti vel.

« 1 af 2 »

Það er alltaf gaman að sjá nemendur að störfum og uppskeru þeirra, ekki síst þegar gleðin skín úr hverju andliti. Það átti svo sannarlega við á dögunum þegar nemendur kláruðu meistarastykki sín í kökugerð í heimilisfræðivali hjá Guðlaugu Jónsdóttur. Kökurnar voru glæsilegar eins og sjá má á meðfylgjandi myndum og myndu sóma sér vel á hvaða veisluborði sem er. Fleiri myndir má sjá hér í myndasafni skólans.

Verðandi fulltrúar G.Í. á lokahátíðinni

Tólf afbragðs lesarar sem lásu

« 1 af 2 »

Síðastliðinn fimmtudag fór fram skólakeppni Stóru upplestrarkeppninnar, þar sem valdir voru fulltrúar skólans til að taka þátt í lokahátíðinni sem fram fer þriðjudaginn 19. mars n.k. í Hömrum.

Tólf nemendur sem valdir höfðu verið úr 7. bekk lásu sögubrot og ljóð, Sveinfríður S. Stefánsdóttir og Matilda H. Maeekalle léku á hljómborð, auk þess sem farið var yfir Reykjaferðina s.l. haust í máli og myndum.

Dómarar voru þau Ingi Björn Guðnason, Helga Björk Jóhannsdóttir og Rannveig Halldórsdóttir. Niðurstöður þeirra voru þær að þau Guðrún Eva Bjarkadóttir, Guðrún Helga Sigurðardóttir, Heiður Hallgrímsdóttir, Helgi Rafn Hermannsson, Jón Gunnar Kanishka Shiransson, Matilda Harriet Maeekalle og Unnur Guðfinna Daníelsdóttir munu keppa fyrir hönd skólans á lokahátíðinni og Hákon Ari Heimisson verður varamaður þeirra.
Við óskum öllum þátttakendum innilega til hamingju með góða frammistöðu og hlökkum til lokahátíðarinnar.

Það er mikið líf og fjör í skólanum í dag og margskonar persónur og furðuverur sem mættu í skólann í morgun, enda bolludagur eða maskadagur. Sögupersónur úr Harrý Potter eru áberandi og má því segja að skólinn minni á Hogwart í dag.

Maskadagshefðin er upprunalega rakin til hefðar þegar strákar marseruðu um bæi með söng og betli á bolludag í lok 19. aldar, segir Jóna Símonía Bjarnadóttir, forstöðukona Safnahússins á Ísafirði. Hún segir hefðina hafa lagst af á landinu að mestu, nema á Akureyri þar sem siðurinn var svo fluttur yfir á öskudag og breiddist þannig út um landið á ný. Ísfirðingar og nágrannar hafi hins vegar haldið í upprunalega siðinn og klæðast því grímubúningum í dag. „Við vitum allavega um siðinn frá því í kringum 1900 og kannski aðeins fyrr, þá tíðkaðist að börn fóru á milli húsa og rassskelltu með bolluvöndum og fengu bollur og klæddu sig svo upp.“ Hún segir að þá hafi siðurinn ekki einungis náð til barna heldur líka til fullorðinna. Jóna Símonía segir að mögulega gæti siðurinn hafa lagst niður um tíma en að uppúr 1940 hafi verið grímudansleikir á þessum degi og svo hafi börnin eignast daginn (Heimild: ruv.is).

Á morgun, sprengidag, er svo starfsdagur hér í skólanum og geta nemendur því slakað á eftir annasaman dag.

Nú er enn einn mánuðurinn að baki og ótrúlegt hvað tíminn æðir áfram. Við birtum fréttabréf skólans á tveggja mánaða fresti og má nálgast fréttabréf febrúarmánaðar hér.