Nú er nýtt fréttabréf komið út hjá skólanum. Þar er stiklað á stóru í skólastarfinu og þeim fjölbreyttu verkefnum sem við tökum okkur fyrir hendur dags daglega.

Nú er samsöngurinn hafinn og syngja 1. - 6. bekkur saman í dansstofu skólans í tveimur hópum, við undirleik Olgu skólastjóra. Krakkarnir stóðu sig mjög vel í morgun og hafa mikið skólast í söngmenningunni.

Sjá má myndbrot frá söng 4. - 6. bekkjar í morgun hér vinstra megin á síðunni undir hnappnum myndbönd.

« 1 af 3 »

Á hverju ári er Evrópska tungumáladeginum fagnað þann 26. september. Að þessu sinni bar hann upp á laugardag, svo að við ákváðum að halda upp á hann í skólanum í dag.

Dönsku- og enskukennarar í 9. og 10. bekk settu upp ýmsar stöðvar með margvíslegum viðfangsefnum og nemendur í báðum árgöngunum unnu saman fyrstu tvo tímana. Á stöðvunum var eitt og annað í boði, m.a. var ein stöð um esperantó, þar sem nemendur gátu kynnt sér það tungumál, skoðað íslenskar bækur sem hafa verið þýddar á esperantó og skrifað nokkrar setningar. Á annarri stöð tók Nadja Widell frönskukennari í M.Í. á móti krökkunum og spjallaði við þau á finnsku og fleiri tungumálum um leið og hún fræddi þau um tungumálanám og gildi þess að kunna erlend tungumál. Ein stöðin var helguð færeysku og þar gátu nemendur séð og heyrt það skemmtilega tungumál og skrifað nokkrar setningar. Danska átti sína stöð og þar var verið að skoða skemmtilegan vef á netinu, þar sem t.d. einn drengur ættaður frá Ísafirði sagði frá lífi sínu í Danmörku. Enska átti líka sína stöð og þar var verið að vinna í öðrum skemmtilegum vef á netinu. Á einni stöð var þýðandi að kynna sín störf og segja frá ferlinu við þá vinnu. Ein stöð var helguð vef með alls konar fróðleik um alls konar tungumál.

Eins og sjá má voru stöðvarnar margvíslegar og fjölbreyttar og hver lota tók aðeins tuttugu mínútur svo að það var víða komið við. En við vonum og teljum að nemendur hafi haft gaman af þessari tilbreytingu og séu margs vísari um evrópsk tungumál eftir þessa vinnu. /HMH

Mynd: www.frmst.is

Hraðfrystihúsið − Gunnvör h.f. gaf hverjum nemanda úr Grunnskólanum á Ísafirði, sem eru í smáskipanámi hjá Fræðslumiðstöðinni, Sjómannabókina eftir Pál Ægi Pétursson. Sjómannabókin er aðalkennslubókin í smáskipanáminu og tekur á flestu er varðar sjómennsku og skipstjórn á þessu stigi. Er þetta í annað sinn sem HG gefur grunnskólanemum þessa bók.

Nemendur úr Grunnskólanum á Ísafirði hafa í nokkur ár getað tekið smáskipanám hjá Fræðslumiðstöðinni sem valgrein og eru nú 14 nemendur í þessu námi.

« 1 af 3 »

Í morgun bauð Möguleikhúsið nemendum 5. - 7. bekkjar upp á leiksýninguna um Eldbarnið, sem byggt er á heimildum um Skaftárelda og afleiðingar þeirra. Sýningin er helguð minningu sr. Jóns Steingrímssonar og samtímafólks hans sem þurfti af eigin rammleik að takast á við einhverjar mestu náttúruhamfarir Íslandssögunnar.

Leikstjórn er í höndum Sigrúnar Valbergsdóttur, en leikarar eru þau Andrea Ösp Karlsdóttir, Alda Arnardóttir og Pétur Eggerz. Nemendur nutu sýningarinnar og þökkum við kærlega fyrir þessa góðu heimsókn.

Haldinn var fundur meðal foreldra í 10.bekk nú síðdegis vegna umfjöllunar í DV um einelti í árganginum.  Móðir umrædds nemanda mætti á fundinn og skýrði sína hlið málsins og ljóst er að þessi umfjöllun á ekki við nein rök að styðjast.  Okkur er öllum brugðið vegna þessa og fundurinn sendir frá sér eftirfarandi yfirlýsingu:

Ályktun frá fjölmennum fundi foreldra 10.bekkinga, kennara og stjórnenda Grunnskólans á Ísafirði

Í frétt á DV um nýliðna helgi var slegið upp umræðu um eineltismál á Ísafirði.  Rétt er að taka fram að fréttin er í besta falli byggð á misskilningi og flest í henni beinlínis rangt.  Nemandinn sem um er rætt hefur ekki orðið fyrir aðkasti í skólanum og samnemendur hans tóku sig ekki saman um að hafna afmælisboði frá honum.  Þetta staðfestir móðir drengsins.   Foreldrum, starfsfólki skólans og ekki síst nemendum var verulega brugðið við fréttaflutninginn og umræðuna sem skapaðist í kjölfarið.

Umræða um einelti er mikilvæg í öllum samfélögum og öll erum við sammála um að við viljum stuðla að jákvæðum og uppbyggilegum samskiptum.  Sú umræða sem birtist í fjölmiðlum um þetta tiltekna mál virðist eingöngu hafa þann tilgang að rífa niður.  Hún er ekki byggð á traustum heimildum eða rannsóknarvinnu og leggur þar með neikvæðum samskiptum lið.  Slíku viljum við ekki taka þátt í.  Við munum leggja áherslu á að nýta umræðuna sem skapaðist til að halda áfram að kenna krökkunum okkar að lesa fréttir með gagnrýnum augum, bera ábyrgð á orðum sínum og gæta virðingar í samskiptum við aðra. 

Foreldrar nemenda í 10.bekk, kennarar og stjórnendur.

Mánudaginn 28. september er starfsdagur hér í skólanum og því engin kennsla.

Frá vinstri: Gabriela, Jessica, Nikola og Michal.

Börn sem tala eitt tungumál heima hjá sér og annað utan heimilis eru tvítyngd. Þau sem tala tvö eða fleiri tungumál heima og annað utan heimilis eru tvítyngd eða fjöltyngd. Um 70% jarðarbúa eru tvítyngdir og nota fleiri en eitt tungumál í daglegu lífi. Börn geta vel lært tvö tungumál á sama tíma. Sum börn tala íslensku einungis utan heimilisins. Önnur börn alast upp á heimilum þar sem annað foreldrið talar íslensku en hitt eitthvert annað tungumál.

Öll eru börnin tvítyngd og styrking þess tungumáls sem ekki er íslenska er mikilvæg fyrir sjálfsmynd þeirra og þroska.

Í Grunnskólanum á Ísafirði eru margir nemendur tvítyngdir/fjöltyngdir. Í námsveri skólans fer m.a. fram kennsla í íslensku sem annað mál og margir tvítyngdir nemendur frá miðstigi og upp úr koma nokkur skipti í viku til að skerpa á íslenskunni. Unnið er með talað mál, spil, tölvuforrit, vinnubækur, ritun og ýmislegt fleira. Á meðfylgjandi mynd má sjá nokkra nemendur í 9. bekk vinna á námsvefnum Kæra dagbók sem er kennsluvefur í íslensku sem annað mál. /HBM

Í næstu viku fara fram samræmd könnunarpróf í 4., 7. og 10. bekk. Meginhlutverk samræmdra könnunarprófa er að veita nemendum, foreldrum þeirra og skólum, upplýsingar um námsstöðu þeirra við upphaf skólaárs. Stefnt er að því að leggja könnunarprófin fyrir eins fljótt og unnt er að hausti svo niðurstöður þeirra nýtist sem best í skólastarfinu. Þannig er tilgangi þeirra náð með sem skilvirkustum hætti.

Prófaskipulagið er eftirfarandi: 

10. bekkur

7. bekkur

4. bekkur

Íslenska                  fimmtudagur          24. sept.        kl. 8:30 - 11:00
Stærðfræði             föstudagur             25. sept.         kl. 8:30 - 11:00

4. bekkur mætir báða þessa daga kl. 8:00 og lýkur skóla hjá þeim kl. 13:40.

Nánari upplýsingar varðandi samræmdu prófin má nálgast hér á vef Námsmatsstofnunar.

Í morgun fór hluti 2. bekkjar út í skólagarðinn góða við Tónlistarskólann og tók upp grænmeti sem sett var niður í vor. Uppskeran var fín hjá hópnum og mátti sjá t.d. kartöflur og grænkál. Á næstunni munu krakkarnir svo matreiða úr uppskerunni í heimilisfræðinni hjá Guðlaugu Jónsdóttur.