Það er hefð fyrir því í skólanum að nemendur skreyti hurðirnar. Þetta er skreytingin hjá 8. bekk og það mætti segja að hún væri lýsandi fyrir komandi jól.

Samkvæmt reglugerð heilbrigðisráðherra í dag verða engar tilslakanir á sóttvarnarreglunum. Það þýðir það að hjá okkur verða engar breytingar og höldum við því skipulagi sem nú er við lýði að minnsta kosti til 9. desember.  Þetta eru vissulega vonbrigði því við höfðum vonast til þess að það yrðu einhverjar breytingar.  En það er ekkert annað að gera en að bíta á jaxlinn og halda áfram og vonast eftir jákvæðum breytingum í næstu viku.

Nú bíðum við frétta af næstu tilmælum vegna kórónuveirunnar.  í upphafi vikunnar vorum við orðin bjartsýn á að geta komið skólastarfinu í eðlilegt  horf; tekið inn hringekjur í verkgreinum, valgreinum á mið-og unglingastigi, mötuneytinu í fulla notkun, sem sagt fullan skóladag hjá öllum.  Í dag erum við ekki eins bjartsýn og tölurnar yfir smit síðustu daga vekja áhyggjur um að minna verði af tilslökunum en við bjuggumst við.  Þetta kemur þó vonandi í ljós um helgina og þið fáið upplýsingar í síðasta lagi á þriðjudaginn.

Við sjáum og finnum það hjá eldri nemendum sem eru alltaf með grímurnar að þeir eru farnir að þreytast á þeim og við skiljum það fullkomlega.  Þeir eru búnir að standa sig ótrúlega vel og það er bara þannig að þegar maður er farinn að sjá fyrir endann á erfiðleikum og leiðindum þá eykst óþreyjan og það er að gerast núna.  Það gæti reynst þeim erfitt ef það kemur svo í ljós eftir helgi að grímuskyldan verði áfram við lýði.  Við höfum verið að ræða við þá að við verðum að standa saman og gera allt sem í okkar valdi stendur til að hleypa kórónuófétinu ekki af stað hér hjá okkur.

Við vonum það besta en búum okkur undir að það verði ekki gerðar tilslakanir eftir helgi.

Á þriðjudaginn er 1. desember og á þeim degi hefur verið hefð að hafa opið hús.  Nú er það ekki í boði en það væri gaman ef nemendur og starfsfólk brjóti upp hversdaginn og mæti í betri fötunum.

Miðvikudaginn 25.nóvember er starfsdagur hér í skólanum og engin kennsla.

« 1 af 2 »

Síðasti grímudagur 5. - 7. bekkjar var í gær. 6.GS dreif sig út í góða veðrið eins og svo oft áður og var svo heppinn að hitta á leikskólakrakka frá Tanga. Að sjálfsögðu var tækifærið nýtt og farið í Hókí pókí.

6.bekkur í útivist

« 1 af 5 »

Þrátt fyrir grímuskyldu, fjöldatakmarkanir, sóttvarnarreglur og hvað allt heitir, þá gengur lífið sinn gang hér hjá okkur. Krakkarnir eru ótrúlega duglegir þrátt fyrir allt og reyna kennarar að brjóta upp daginn og njóta útiveru og samveru sem best. Verkgreinar hafa legið niðri að mestu leyti, þar sem nemendur mega ekki fara inn í verkgreinastofur, á milli sóttvarnarhólfa. Verkgreinakennararnir brugðu þá á það ráð að láta nemendur hanna borðspil frá grunni og útfæra á eigin hátt. Það tókst ljómandi vel og á meðfylgjandi myndum má sjá 5.bekk spila eigin útgáfur. 

« 1 af 2 »

Í dag, 16.nóvember, er dagur íslenskrar tungu, á fæðingardegi Jónasar Hallgrímssonar. Af því tilefni var setning litlu og stóru upplestrarkeppnanna í 4. og 7. bekk. Eins og gefur að skilja var engin samkoma á sal líkt og undanfarin ár, heldur var brugðist við ástandinu og dagskráin send út frá skrifstofu skólatjóra og út í bekkjastofur 4. og 7. bekkjar.

Sveinfríður Olga Veturliðadóttir, skólastjóri, setti hátíðina og Kristín Oddsdóttir, kennari, kynnti dagskrána. Þær Anna María Ragnarsdóttir og Dagný Rut Davíðsdóttir nemendur í 8. bekk fluttu ljóð, en þær náðu langt í upplestrarkeppninni í fyrra. Þá var hlustað á tónlist í boði Sinfóníuhljómsveitar Íslands og voru keppnirnar formlega settar að því loknu.

Markmið upplestrarkeppni í grunnskóla er að vekja athygli og áhuga á vönduðum upplestri og framburði. Mestu skiptir að kennarar nýti þetta tækifæri til að leggja markvissa rækt við einn þátt móðurmálsins með nemendum sínum, vandaðan upplestur og framburð, og fái alla nemendur til að lesa upp, sjálfum sér og öðrum til ánægju. 

Vikan hefur gengið ágætlega og nemendur eiga hrós skilið fyrir hvernig þeir taka taka þessum hertu sóttvarnarreglum.  Við sjáum þó að ákveðinnar þreytu er farið að gæta, sérstaklega varðandi grímurnar.

Nú hefur heilbrigðisráðherra kynnt nýja reglugerð sem gildir frá 18. nóvember til 2. desember, og samkvæmt henni verður aðeins slakað á hvað varðar fjöldatakmarkanir í skólum.  Það er gert til að koma til móts við framhaldsskólanna en breytir ekki miklu hjá okkur í grunnskólunum. Íþróttir barna með og án snertinga verða heimilaðar en sundlaugar verða enn lokaðar. Við í grunnskólunum bíðum eftir nánari útfærslu og getum vonandi kynnt hana á mánudag eða þriðjudag í næstu viku.

Nú er fyrstu vikunni í þessari lotu að ljúka. Mér finnst hún heilt yfir hafa gengið vel og þið sýnt okkur skilning og stuðning við breytt skipulag. Það skiptir okkur mjög miklu að finna það að við erum öll í þessu saman. Það er svo ótrúlega mikilvægt að geta haldið úti skólastarfi og að röskunin sé með minnsta móti fyrir nemendur. Mér finnst líka að nemendur standi sig ótrúlega vel. Þeir taka langflestir vel í grímunotkunina og skilja mikilvægi hennar. Eins reynir á alla nemendur að vera meira og minna inn í umsjónarstofunum sínum allan skóladaginn og þá sérstaklega þau yngstu sem eru fullan skóladag.
Vonandi verður hægt að létta á sóttvarnarreglunum strax eftir 17. nóvember og vil ég trúa því að það verði hægt, allavega að við losnum við grímur og að við getum farið í eðlilegt ástand hvað varðar kennsluna, þó svo að kannski verði enn fjöldatakmarkanir og aðgengi utanaðkomandi aðila verði enn takmarkað.

Við óskum ykkur góðrar helgar og við skulum reyna að hafa gleðina að leiðarljósi og njóta samveru við fjölskyldu þessa helgi þar sem yfirvöld hafa hvatt okkur til að ferðast innanhúss þessa helgi.