Nú er loksins eitthvað jákvætt að gerast og mun skólinn opna aftur mánudaginn 4. maí. Það verður hins vegar með þeim sömu takmörkunum og voru fyrir páska, að því undanskyldu að við höfum fengið samþykki sóttvarnarlæknis að skipta ekki 3. 4. og 6. bekk í þrjá hópa, heldur verða allir í umsjónarbekkjunum sínum. Mötuneytið verður ekki opið, nemendur fara ekki í list-og verkgreinar og ekki í íþróttir og sund. Frímínútur verða á mismunandi tímum og skólatíminn er skertur og verður eins og síðustu vikuna fyrir páska;

1.-4. bekkur   kl. 8:00-12:00
5.-7. bekkur   kl. 8:00-11:30
8. bekkur       kl. 8:30-10:30
9. bekkur       kl. 9:00-11:00
10. bekkur     kl. 9:15-11:15.

Það verður strætó kl 8:00 í skólann en við biðjum foreldra sem mögulega geta keyrt börnin sín að gera það, til þess að geta haldið lágsmarksfjölda nemenda í vagninum. Það er áfram sveigjanleg skólabyrjun milli 7:45-8:15 svo að það séu ekki allir að mæta á sama tíma, en við munum skrá seinkomur eftir 8:15. Við minnum líka á það að nemendur sem búa fyrir innan Seljalandsveg 44 og í Hnífsdal eiga rétt á skólaakstri. Ekki verða sérstakar ferðir fyrir unglingana heldur hvetjum við þá að koma á hjólum, eða gangandi í skólann og nýta þennan ferðamáta í stað íþróttanna sem falla niður. Strætó verður svo heim kl. 11:35 og 12:05, fyrir yngsta- og miðstig.

Vonandi verður þetta skipulag aðeins 4.-8. maí og skólahald með eðlilegum hætti eftir það. Það fer þó eftir því hvernig Covid -19 þróast hjá okkur. Nú sem áður verðum við að vanda okkur og sofna ekki á verðinum, það er enn samkomubann fyrir 20 eða fleiri og nemendur eiga enn ekki að umgangast aðra en þá sem eru í þeirra hóp. Við erum full bjartsýni og vonum svo innilega að við séum farin að sjá fyrir endann á samkomubanninu og að við getum fljótlega farið að fylgja tilmælum á landsvísu.

Það er ómetanlegt fyrir okkur í skólanum að finna skilninginn, samhuginn og þolinmæðina sem foreldrar og samfélagið allt hefur sýnt okkur á undanförnum vikum. Við vonum svo sannarlega að nú fari að sjá fyrir endann á þessum höftum og við getum lokið skólaárinu með eðlilegu skólahaldi. Við erum ekki búin að fá neinar nýjar upplýsingar um framhaldið en vonandi koma þær í næstu viku.
Ekki þarf að gera miklar breytingar á námsmatinu þar sem við höfum nú í nokkur ár notað símat, sem þýðir að verkefni nemenda eru metin jafnóðum og próf og kannanir lögð fyrir jafnt og þétt yfir skólaárið. Kennarar munu nýta öll þessi gögn sem þeir hafa safnað yfir veturinn til að leggja mat á stöðu nemenda í vor. Kannski verða einhver hlutapróf í lok maí, en við verðum að sjá til með það hvernig þeim verður háttað þegar við vitum hvert framhaldið er. Eins verður tekin ákvörðun um skólaferðalag og útskrift í vor þegar við fáum upplýsingar um hvernig skólahaldi verður háttað eftir 4 maí.

Við óskum nemendum, fjölskyldum þeirra og bæjarbúum öllum gleðilegs sumars með kærri þökk fyrir einstakt samstarf á þessum fordæmalausu tímum. Við vonum að sumarið verði okkur öllum gæfuríkt og gjöfult eftir langan og krefjandi vetur.

Þar sem ekki hefur verið hægt vegna ástandsins í þjóðfélaginu að veita sérfræðiaðstoð sálfræðinga sl. vikur þá hafa sálfræðingarnir okkar þær Sólveig Norðfjörð og Björg Norðfjörð ákveðið að opna fyrir ráðgjöf með símaviðtölum við nemendur, foreldra og kennara. Einnig ætla þær að hafa samband við þá foreldra sem bíða eftir niðurstöðum viðtala frá því í febrúar.

Þeir sem telja sig þurfa ráðgjöf er bent á að hafa samband við Sólveigu eða Björgu í gegnum tölvupóst: solveignordfjord@gmail.com  eða bjorg00@hotmail.com gefa upp nafn, símanúmer og jafnvel nafn barnsins ef það hefur verið í viðtölum hjá þeim. Þær munu síðan hafa samband við viðkomandi við fyrsta tækifæri.

Sálfræðingarnir sem starfa við leik- og  grunnskóla Ísafjarðarbæjar eru hluti af skólaþjónustu sveitarfélagsins og sinna allri almennri sálfræðivinnu við skólanna. Sálfræðingarnir vinna í nánu samstarfi við starfsfólk leik- og grunnskólanna og aðra þá sem koma að málefnum barna.

Nú er að koma mynd á skipulagið fyrir þessa og næstu viku. Foreldrar hafa nú fengið upplýsingar frá umsjónarkennurum hvernig kennslu og heimavinnu er háttað hjá hverjum árgangi fyrir sig og fá áframhaldandi upplýsingar daglega.

Á yngsta- og miðstigi er lögð áhersla á daglegan lestur og ýmis önnur verkefni sem skemmtilegt er að vinna heima. Búast má við því að bætt verði í á miðstiginu í næstu viku. Unglingastigið sinnir sínu námi í gegnum Google Classroom og hittir umsjónarkennara sína í fundarforriti í google alla daga.

Ef einhverjar spurningar vakna vegna skipulagsins þá endilega hafið samband við umsjónarkennara. Við erum öll að fóta okkur í þessum nýju aðstæðum og kannski verða einhverjir hnökrar, en við höfum öll sýnt það undanfarnar vikur að þegar við tökum höndum saman þá getum við svo margt. Starfsfólk skólans fæst við ýmis verkefni þessa daga, stærsti hópurinn er auðvitað að sinna og undirbúa kennslu og heimavinnu nemenda, nokkrir starfsmenn eru með nemendur í forgangshópi á morgnana, hluti starfsmanna aðstoðar við Covid skimun heilbrigðisstofnunarinnar og það er meira segja verið að sauma gardínur fyrir skólann. Það eru nefnilega allskonar verk sem þarf að vinna.

Eins og komið hefur fram hjá aðgerðarstjórn almannavarna á Vestfjörðum er skólahald áfram með breyttu sniði næstu tvær vikurnar að minnsta kosti. Það þýðir að skólinn er lokaður þennan tíma og nemendur mæta því ekki í skólann. Kennarar munu verða í sambandi við foreldra í gegnum tölvupóst á morgun og kynna þeim fyrirkomulag kennslunnar næstu tvær vikurnar. Við hvetjum foreldra einnig til að vera í sambandi við umsjónarkennara, starfs- og námsráðgjafa eða hvern þann sem þeir vilja ef einhverjar spurningar eða áhyggjur vakna varðandi nemendur. Við viljum gera allt sem í okkar valdi stendur til að koma til móts við þarfir hvers og eins nemanda.

Við bendum einnig foreldrum í framlínustörfum sem óska eftir aukinni skólaþjónustu á að hægt er sækja um þá þjónustu á island.is og verður að gera það í hverri viku.

Við sendum nemendum og fjölskyldum þeirra bestu þakkir fyrir einstakt samstarf á þessum erfiðu tímum undanfarnar vikur. Við gerum ráð fyrir svipuðu skólastarfi eftir páska, sem byggist á fjarkennslu, en munum koma frekari upplýsingum á framfæri þriðjudaginn 14. apríl.

Með von um gleðilega páska,

Ekki áttum við von á því eftir hádegið í gær að við yrðum í þessari stöðu í dag. Sú ráðstöfun Almannavarna að loka skólunum er varrúðaráðstofun sem gerð er til að hindra smit. Það er enginn nemandi né starfsmaður smitaður svo vitað sé. Við vitum ekki heldur hversu lengi þessi ráðstöfun varir, það skýrist síðar og munum við koma upplýsingum til ykkar um leið og vitum framvinduna.
Það er mjög mikilvægt að við hjálpumst öll að við að reyna að hindra smitin og það gerum við best með því að fara í einu og öllu eftir leiðbeiningum Almannavarna. Við verðum að taka því alvarlega þegar mælst er til að samgangur barna milli heimila sé eins lítill og hægt er.
Við hvetjum foreldra sem eru í forgangi starfsfólks í framlínustörfum um aukna skóla-og leikskólaþjónustu, að sækja um fyrir börnin og þarf að gera það á hverjum föstudegi meðan ástandið er eins og það er. Einnig geta þessir foreldrar haft samband ef skyndilegar breytingar verða á störfum þeirra og við vinnum úr því.
Það er von okkar að þrátt fyrir erfiðar aðstæður að þá eigum við öll gleðilega páska.

Aðgerðastjórn almannavarna á Vestfjörðum hefur í samráði við sóttvarnalækni og almannavarnardeild ríkislögreglustjóra ákveðið að bregðast við Covid-19 smiti í Bolungarvík, Hnífsdal og á Ísafirði með hertum aðgerðum, eins og hér greinir:

• Leik- og grunnskólum í Bolungarvík og á Ísafirði verði lokað frá og með morgundeginum 2. apríl 2020. Þó skulu börn á forgangslistum fá vistun á leikskólum og 1. og 2. bekkjum grunnskóla.   

• Samkomubann verði miðað við 5 manns (þetta á þó ekki við um fjölskyldur sem búa á sama heimili).    

• Fjöldi viðskiptavina í stærri verslunum (>150 fermetrar) sé að hámarki 30 á hverjum tíma.

• Hvatt er til þess að fólk haldi sig heima, haldi samskiptafjarlægð, takmarki ferðir og fylgi leiðbeiningum yfirvalda.

Þeim vinnustöðum eða hópum sem telja sig þurfa undanþágu er bent á að sækja um slíkt hjá heilbrigðisráðuneytinu.

Rauði Kross Íslands veitir fólki í sóttkví og einangrun aðstoð í síma, 1717.

Þessi ráðstöfun er tímabundin, ætluð til að hefta Covid-19 smit. Smitrakning stendur yfir og beðið er niðurstöðu nokkurs fjölda sýna sem tekin hafa verið.

Ákvörðunin tekur að svo stöddu ekki til Suðureyrar, Flateyrar, Þingeyrar eða Súðavíkur. Er það á grundvelli stöðu smitrakningar í dag. Áfram eru íbúar á þessum stöðum hvattir til að fylgja almennum reglum og leiðbeiningum.  

Fólk sem finnur til einkenna á að halda sig heima og hafa samband við Heilbrigðisstofnun Vestfjarða í síma 450 4500 eða á heilsuvera.is. Tekin eru sýni alla virka daga á Ísafirði kl. 10-11, en fyrst þarf að fá samband við lækni. Spurningum um sjúkdóminn sjálfan er mörgum svarað á Covid.is.

Frekari upplýsingar um þessar reglur verða veittar í netfanginu yfirstjorn-lvf@logreglan.is og á Facebook-síðu Lögreglunnar á Vestfjörðum.

 //Click the link for information in English
//Kliknij link, aby uzyskać informacje w języku polskim

https://www.isafjordur.is/is/moya/news/hertar-adgerdir-a-isafirdi-hnifsdal-og-bolungarvik-vegna-covid-19?fbclid=IwAR00OdefEGlfe2qUn3yFBCP9c-PJGclXNcZ0IQPTAgr9V_oE4PcuxuACzn8

Aðgerðastjórn almannavarna á Vestfjörðum, 1. apríl 2020.

Við finnum fyrir því að veiran nálgast okkur og staðfestum smitum á Vestfjörðum fjölgar. Foreldrar hafa verið að hafa samband og velta því fyrir sér hvort þeir ættu að halda börnunum sínum heima. Aðstæður barna eru mjög misjafnar og því er það alltaf ákvörðun foreldra hvort þeir senda börnin í skólann. Það er engin breyting hjá okkur, við höldum okkar skipulagi og gerum það besta í stöðunni. Við hvetjum foreldra til að koma öllum upplýsingum til okkar, hvort sem þeir hyggjast hafa börnin sín í sóttkví eða upp kemur grunur um smit.

En að öðru og léttara tali. Menntamálaráðherra er að hleypa lestrarverkefni af stokkunum í dag fyrir þjóðina, þar sem börn og fullorðnir eru hvattir til að nýta þann tíma sem nú gefst til lesturs. Verkefnið kallast Tími til að lesa. Árangurinn er mældur í tíma og allir Íslendingar hvattir til að skrá allan sinn lestur á vefsíðunni www.timitiladlesa.is. Verkefnið mun standa til 30. apríl og þá verður þess freistað að fá afraksturinn skráðan í Heimsmetabók Guinness. Þetta er mjög spennandi verkefni og hvetjum við ykkur og börnin ykkar til að taka þátt.