Í dag er vorverkadagur hjá öllum árgöngum skólans. Allir bekkir skólans ganga til ákveðinna verka ásamt umsjónarkennurum og öðru starfsfólki skólans.  Verkefnið er unnið í samvinnu við Ísafjarðarbæ og hefur Ralf Trylla verið okkur innan handar við skipulagið.  Á dagskránni eru mörg verk, t.d. hreinsun á opnum svæðum, sáning, gróðursetning í Tungudal og málun á grindverki.

Það er því viðbúið að víða megi sjá ungmenni með hin ýmsu verkfæri á lofti í dag. Um hádegisbilið býður mötuneyti skólans svo upp á grillaðar pylsur.

Margir koma hjólandi í skólann þessa dagana eins og sjá má á þessari mynd.

Þessa dagana er mikið um útivist sem eflir nemendur m.a. í félagsfærni, samstarfi og hreyfifærni. Einhverjir árgangar fara í stuttar hjólaferðir og viljum við minna á að enginn fer hjálmlaus í slíka ferð, enda er hjálmurinn að sjálfsögðu höfuðatriði og nauðsynlegt öryggistæki.

Sýning á verkefninu um aðgengi fatlaðra að stofnunum og þjónustufyrirtækjum í Ísafjarðarbæ sem 6. og 9. bekkur unnu fyrir skömmu, hefur verið sett upp á annarri hæð stjórnsýsluhússins. Á fundi MND félagsins fyrir hálfum mánuði kynntu tvær stúlkur úr 9. bekk niðurstöðurnar og fengu krakkarnir mikið lof fyrir verkið og útfærslu á því.   

Það er vel þess virði að koma við í stjórnsýsluhúsinu og sjá hversu fjölbreytt skólastarfið getur verið, en sýningin stendur yfir út þennan mánuð.

« 1 af 3 »

Síðastliðin sex ár hafa fyrirtækin Íslandssaga og Klofningur á Suðureyri, boðið öllum nemendum í 1. bekk G.Í. í heimsókn til að skoða fiskvinnsluna þeirra.  Þetta er mjög rausnarlegt boð þar sem rúta kemur og sækir krakkana í skólann og skilar þeim þangað aftur í lok heimsóknar. Í morgun var haldið af stað og þau Óðinn, Guðni, Oddný  og Ævar tóku á móti hópnum og sýndu þeim starfsemi sína. Starfsfólkið í beitningaskúrunum var heimsótt ásamt fiskvinnslunni og sáu krakkarnir allt vinnsluferlið.  Rúsínan í pylsuendanum þar var að allir fengu að setjast upp í lyftara og prófa að lyfta gafflinum á alla vegu og vakti það mikla lukku hjá börnunum.  Fylgst var með hvernig fisknum er pakkað í ýmsar umbúðir, en bæði er fiskur fluttur ferskur  til útlanda  í kælikössum, á meðan annar fiskur er frystur og sendur þannig út í heim.    

Hjá Klofningi var litið á þurrkaða fiskhausa og bein og fræddust krakkarnir um allt vinnsluferlið.  Ekki var laust við að sumum þætti lyktin slæm en það eru hraustir krakkar í 1. bekk og þeir létu ekki smá  lykt stoppa sig heldur skoðuðu  allt sem í boði var.   Í lok ferðarinnar var svo boðið til Elíasar í kaffihúsinu Kaupfélaginu og þar fengu allir ís.  Einnig leystu gestgjafarnir hópinn út með góðum gjöfum og fengu allir ferskan fisk í soðið, harðfisk og reyktan rauðmaga.  Það voru glaðir og ánægðir krakkar og kennarar sem héldu heim á leið í lok heimsóknarinnar. 

Hópurinn þakkar kærlega fyrir höfðinglegar móttökur á.   

Það er mikið um að vera þessa dagana sem endranær í skólastarfinu. Námsmat er í fullum gangi, auk ýmissa vorverkefna. Að sjálfsögðu er góða veðrið nýtt til hins ítrasta og ekki úr vegi að bregða á leik þegar tími gefst til, eins og sjá má á meðfylgjandi mynd.

Í kvöld skrifuðu Félag grunnskólakennara og samninganefnd Sambands íslenskra sveitarfélaga undir nýjan kjarasamning. Þar með er áður boðaðri vinnustöðvun frestað og skólahald verður með eðlilegum hætti á morgun.

Félag grunnskólakennara hefur boðað til annarrarar vinnustöðvunar á morgun, miðvikudaginn 21. maí, hafi kjarasamningar ekki náðst fyrir þann tíma. Búið er að gera stutt hlé á samningaviðræðum FG og sveitarfélaganna, en fundarhöldum verður framhaldið klukkan sjö í kvöld.

Hvort samningar nást og hægt verður að fresta vinnustöðvun mun ekki liggja ljóst fyrir fyrr en í kvöld eða nótt og biðjum við því alla að fylgjast vel með fjölmiðlum í kvöld eða fyrramálið.

« 1 af 7 »

Enn hlaðast upp óskilamunir í skólanum s.s. íþróttaföt, vettlingar, húfur, peysur o.þ.h. Auðvelt er að finna eigendur að vel merktum flíkum, en ógjörningur með það ómerkta. Við hvetjum foreldra og forráðamenn til að kíkja við í anddyri skólans, Aðalstrætismegin og athuga hvort þeir þekki eitthvað.

Í vetur gerðum við tilraun með að bjóða upp á valgreinar fyrir miðstigsnemendur, það er 5. – 7. bekk.  Það mæltist sérstaklega vel fyrir meðal nemenda og munum við því halda áfram með þetta verkefni.  Næsta vetur munu nemendur geta valið viðfangsefni í þrjár kennslustundir, þ.e. tvær á þriðjudögum og eina á föstudögum.  Nemendur fengu valblaðið í dag og eru beðnir um að skila því til umsjónarkennara í síðasta lagi þriðjudaginn 27.maí.