Í aðalnámskrá grunnskóla er gert ráð fyrir að börn og ungmenni læri til lýðræðis.  Að kenna lýðræðisleg vinnubrögð og hugsun sem felur í sér lýðræðislega virkni er flókið mál og engin ein leið til sem skólar geta gengið að við það verkefni.  Við erum með formlegt lýðræðisverkefni sem beinist að þátttöku nemenda og gert er ráð fyrir að taki þrjú ár í vinnslu.  

Á síðasta skólaári héldum við nemendaþing þar sem nemendur í 6. - 10. bekk komu saman og skilgreindu áhrifaþætti í skólastarfinu og hvað hver og einn gæti gert til að skólabragurinn yrði eins og þeir sjá hann bestan.  Vinna með niðurstöðurnar tók allan síðasta vetur.  Að lokum setti nemendaráð skólans saman þrjár setningar sem lýsa þeim skólabrag sem nemendur vilja skapa.  Setningarnar snúast um einelti, vinnufrið og ábyrgð.  

Nú í vetur eru nemendur í 5. - 9. bekk að vinna að því að skilgreina hvað við sjáum, heyrum og finnum í skóla sem vinnur vel með þessa þrjá þætti.  Þessar skilgreiningar verða svo settar fram sem matskvarði.  Við lok næsta skólaárs vonumst við svo til að geta beðið nemendur um að meta hvernig okkur hefur gengið að ná settum markmiðum.  Þetta er bæði flókin og tímafrek vinna en um leið skemmtileg og vonandi læra nemendur í gegnum hana að komast að samkomulagi og að taka ákvarðanir sem koma sér vel fyrir sem flesta.

« 1 af 3 »

Það var líf og fjör í skólanum í dag, enda voru hinar ýmsu kynjaverur á kreiki í tilefni maskadagsins. Þrjú grímuböll voru haldin og var virkilega gaman að sjá nemendur og starfsmenn í hinum ýmsu gervum.

Hægt er að nálgast fjölmargar myndir frá maskadeginum í myndasafninu hér vinstra megin á síðunni.

Á morgun, mánudaginn 16. febrúar er maskadagurinn eða bolludagur öðru nafni. Af því tilefni verða grímuböll á sal skólans sem hér segir:

1. – 3. bekkur kl. 8:20-9:10
4. -5. bekkur kl. 10:20-11:00
6. og 7. bekkur kl. 13:10-13:40

Nemendur og starfsfólk eru margir hverjir í grímubúningum þennan dag og verður gaman að sjá allar þær furðuverur sem verða á ferli.
Þriðjudaginn 17. febrúar er svo starfsdagur kennara án nemenda og engin kennsla.

Hermann Hermannsson afhendir Guðrúnu Evu Bjarkadóttur verðlaunin í eldvarnagetrauninni.

Í desember komu þeir Hlynur Kristjánsson og Hermann Hermannsson frá slökkviliði Ísafjarðbæjar í heimsókn í 3. bekk til að uppfræða nemendur um eldvarnir og þess háttar í tilefni af eldvarnaviku.  Við það tækifæri  fengu allir nemendur bekkjarins að taka þátt í eldvarnagetraun.  Það er hefð að afhenda svo vinninga til vinningshafa getraunarinnar á 112 daginn, en þar sem ekki var skóli þann daginn hjá okkur, birtust þeir félagar óvænt í gær með verðlaun fyrir einn nemanda bekkjarsins og var það Guðrún Eva Bjarkadóttir sem var svona heppin. Að launum fékk hún viðurkenningaskjal, slökkviliðstímarit, reykskynjara og tíuþúsund króna seðil.  Við óskum henni innilega til hamingju með vinninginn.

Í síðustu viku fengu nemendur 8. bekkjar í hendur iPad spjaldtölvurnar sem þeir hafa beðið eftir. Búið er að setja þær allar upp og hlaða inn einu appi sem þeir þurfa að hafa, en öppunum á eflaust eftir að fjölga á næstu dögum. Nemendum er að sjálfsögðu sýnt mikið traust með því að lána þeim þessi tæki og við erum sannfærð um að þeir muni standa undir því trausti. Í janúar fengu nemendur 10. bekkjar einnig spjaldtölvur til afnota og 5. og 9. bekkur fengu slík tæki s.l. haust.

Vonandi verða þessi tæki til þess að auðvelda nemendum námið og gera kennsluna fjölbreyttari og skemmtilegri, en reynslan sýnir að flestir nemendur verða meðvitaðri, ábyrgari og áhugasamari varðandi námið.

10. bekkur stendur fyrir hinu árlega Rósaballi föstudaginn 13. febrúar í sal skólans og stendur gleðin frá kl. 20:00 - 23:30. Aðgangseyrir er kr. 1.000 fyrir einstaklinga en kr. 1.500 fyrir pör, sem mega að sjálfsögðu vera af sama kyni.

Á morgun, miðvikudaginn 11. febrúar er foreldradagur í skólanum. Þá er engin kennsla, en nemendur mæta í sínar umsjónarstofur ásamt foreldrum/forráðamönnum á þeim tíma sem þeir hafa skráð sig. 

Grunnskólinn á Ísafirði notar sjálfsmatskerfið Skólapúlsinn til að fylgjast með og bæta innra starf skólans. Liður í því er að spyrja úrtak foreldra/forráðamanna í skólanum um nám og kennslu, velferð nemenda, aðstöðu og þjónustu, samstarf við skólann og heimanám.

Það er mjög mikilvægt fyrir skólann að allir sem lentu í úrtakinu taki þátt. Því viljum við biðja alla þá foreldra að svara könnuninni, en þeir hinir sömu hafa fengið tölvupóst með öllum nánari upplýsingum.  

Nú er skólinn lagður af stað í umfangsmikið þróunarverkefni sem kallað er Stillum saman strengi.   Í því felst meðal annars að við leggjum fyrir fleiri skimanapróf en áður og vinnum markvisst með niðurstöðurnar.  Allir kennarar skólans eru að vinna í að bæta kunnáttu sína til að efla lesskilning nemenda, undir leiðsögn frá Háskólanum á Akureyri.  Einnig er unnið að aukinni tæknifærni og eru fleiri árgangar að fá spjaldtölvur til afnota í skólanum.  Við stígum samt sem áður varlega til jarðar í þessu því það er mikilvægt að láta tæknina þjóna verkefnunum og gæta þess að hún verði til að auka fjölbreytni en ekki bara til að gera allt eins og áður með nýjum verkfærum.  

Kynningarfundur fyrir foreldra nemenda í 8. - 10. bekk var haldinn í síðustu viku og fundur fyrir foreldra yngri nemenda verður á morgun, þriðjudaginn 3. febrúar kl. 18 - 19.

Fleiri fréttir úr skólalífinu má sjá í nýju fréttabréfi, sem leit dagsins ljós í dag.

Sólargleði hjá 2. bekk

Það hefur legið pönnukökuilmur í loftinu síðustu daga, þar sem hinir ýmsu bekkir hafa gert sér glaðan dag með pönnukökuáti og beðið komu sólar. Veðurskilyrði hafa þó ekki gefið okkur færi á sólargeislum, en nemendur sem og aðrir Ísfirðingar bíða eflaust spenntir og vonandi ekki langt að bíða.