Margt var um manninn í Hamraborg í morgun, þegar Ómar Karvel Guðmundsson opnaði sína fyrstu myndlistarsýningu. Á sýningunni getur að líta fjölbreytt myndverk sem Ómar hefur unnið á undanförnum árum. Sýningin verður opin út mánuðinn og hvetjum við alla til að líta við og njóta verkanna.
Á morgun, föstudaginn 11. maí, opnar Ómar Karvel Guðmundsson nemandi í 10. bekk G.Í. myndlistarsýningu í Hamraborg á Ísafirði kl. 10:00. Sýning þessi stendur yfir út mánuðinn og er fyrsta einkasýning Ómars Karvels og jafnframt útskriftarsýning hans frá Grunnskólanum á Ísafirði. Á sýningunni getur að líta sýnishorn af verkum hans í skólanum undanfarin ár.
Ómar Karvel er 15 ára, fæddur 20. júlí 1996. Hann var snemma greindur með ódæmigerða einhverfu og málþroskaröskun og hefur þurft aðstoð í námi í samræmi við fötlun sína. Myndlist hefur alla tíð verið sérsvið Ómars Karvels og hefur hann í gegnum tíðina þróað þann hæfileika sinn í myndmenntatímum árgangsins undir leiðsögn Péturs Guðmundssonar myndmenntarkennara og hvenær sem tækifæri hefur gefist, bæði heima og í skóla. Þegar Ómar Karvel hóf nám í 9. bekk var ákveðið að styðja enn frekar við myndlistarnám hans með vikulegri einkakennslu og hefur Valgerður Gísladóttir myndmenntarkennari sinnt þeirri kennslu frá þeim tíma.
Í gær var síðasti hefðbundni skóladagur Ómars Karvels og annarra 10. bekkinga í GÍ en við taka próf, skólaferðalag og fleira. Á þeim tímamótum afhenti Ómar Karvel skólanum tekassa að gjöf, sem hann smíðaði sjálfur og tók Sveinfríður Olga Veturliðadóttir við gjöfinni.
Foreldrafélag GÍ stendur fyrir hvatningarátaki til að styrkja bókakost skólasafnsins og hefur fengið til liðs við sig Pennann-Eymundsson á Ísafirði sem mun halda utan um þær bækur sem keyptar eru. Að sögn starfsmanna þar eru nokkur tilboð í gangi á barnabókum. Átakið hófst í Viku bókarinnar, þann 19. apríl og stendur yfir til 14. maí n.k.
Foreldrafélagið bendir á að með því að nýta ávísunina sem send var öllum heimilum í byrjun Viku bókarinnar til að kaupa bók fyrir bókasafnið er hægt að styðja við bakið á þessari grunnstoð lestrarmenningar barna okkar á tvöfaldan máta, en af andvirði ávísunarinnar renna 100 krónur í Skólasafnasjóð sem úthlutar styrkjum til bókasafna grunnskólanna.
Bókakaupandinn getur haft áhrif á úthlutunina með því að skrifa nafn GÍ í þar til gerðum reit á henni. Þá aukast líkurnar á því að skólabókasafn GÍ fái stuðning.
Nú fer í hönd sá tími sem margir árgangar fara í hjólreiðaferðir á vegum skólans. Vert er að minna á að ALLIR yngri en 15 ára eiga að vera með hjólreiðahjálma í umferðinni samkvæmt lögum og fara engir í slíkar hjólaferðir hjálmlausir.
Höfuðmeiðsl eru alvarlegustu áverkar sem hljótast af hjólreiðaslysum. Notkun hlífðarhjálms kemur ekki í veg fyrir slysin en dregur úr alvarleika þeirra og minnkar líkurnar á alvarlegum höfuðmeiðslum. Hjálmur getur greint á milli heilahristings og höfuðkúpubrots og jafnvel lífs og dauða. Sérstaklega er mikilvægt að börn noti hlífðarhjálm við hjólreiðar enda eru höfuð þeirra minni og viðkvæmari en þeirra sem eldri eru.
Handknattleikslið Harðar varð deildarmeistari fjórðu deildar í fimmta flokki í handbolta um síðustu helgi, en liðið er skipað drengjum úr 8. bekk G.Í. Strákarnir unnu alla sína leiki, en mótið var haldið í Ásgarði í Garðabæ. Þjálfari strákanna er Ingvar Örn Ákason og hefur hann verið að ná mjög góðum árangri í handboltanum í vetur.
Í síðustu viku buðu forsvarsmenn fyrirtækisins 3 X Technology 10. bekkingum í heimsókn til að skoða fyrirtækið og kynnast starfsemi þess. Jóhann Jónasson framkvæmdastjóri og Karl K. Ásgeirsson rekstrarstjóri tóku á móti nemendum og leiddu þá um fyrirtækið og sýndu þeim um alla króka og kima. Þeir ræddu um þau ýmsu störf sem þar eru unnin, hvaða menntun þarf til og hvöttu nemendur til að mennta sig og nýta þá margvíslegu möguleika sem fyrir hendi eru í heimabyggð. Að lokum voru allir leystir út með gjöf; útskorinni mynd úr stáli af Íslandi.
Kennarar og nemendur 10. bekkjar senda sínar bestu kveðjur og þakkir fyrir þetta boð, heimsóknin var mjög fræðandi og ánægjuleg í alla staði.
Í maímánuði er mikið um að vera í skólalífinu. Fyrir utan hefðbundna kennslu og annarpróf eru heimsóknir í fyrirtæki og stofnanir, útivistardagar og margskonar uppákomur.
Vordagskrána í heild sinni má finna hér vinstra megin á síðunni.
Í kvöld voru tónleikar tónlistarnema í 10. bekk í Hömrum. Fram komu 11 nemendur af þeim 23 sem stunda tónlistarnám við Tónlistarskóla Ísafjarðar. Nemendur léku fjölbreytt verk eftir ýmsa þekkta höfunda á píanó, gítar, flautu og klarinett , en einnig var boðið upp á frumsamin lög. Flytjendur voru þau Laufey Hulda Jónsdóttir, Sigríður Salvarsdóttir, Hrafnkell Hugi Vernharðsson, Rakel Þorbjörnsdóttir, Elvar Ari Stefánsson, Hálfdán Jónsson, Hákon Ari Halldórsson, Þormóður Eiríksson, Hákon Jónsson, Aron Ottó Jóhannsson og Kristín Harpa Jónsdóttir.
Sigríður Ragnarsdóttir, skólastjóri T.Í. kvaðst mjög stolt af þessum hæfileikaríku krökkum og færði skólinn þeim rósir í lok tónleikanna og bauð upp á léttar veitingar.
Í vetur stunda 23 nemendur 10. bekkja grunnskólanna í Ísafjarðarbæ tónlistarnám í Tónlistarskóla Ísafjarðar á Ísafirði, Suðureyri, Flateyri og Þingeyri . Þetta er óvenju hátt hlutfall nemenda í þessum aldurshópi, en algengt er að unglingar hverfi frá tónlistarnámi um eða eftir fermingaraldur. Margir þessara nemenda hafa auk þess náð mjög góðum árangri í tónlistarnámi, hafa lokið grunnprófi eða miðprófi og einn hefur lokið framhaldsprófi sem er einstakt fyrir svo ungan nemanda.
Í kvöld, miðvikudaginn 2. maí kl. 20, munu um 15 þessara nemenda halda sérstaka tónleika í Hömrum, sal Tónlistarskólans við Austurveg. Leikið verður á píanó, gítar, klarinett, flautu auk söngs. Efnisskráin er fjölbreytt og aðgengileg, verk eftir Bach, Bertini, Satie, Tarrega og fleiri klassísk tónskáld en einnig verður flutt djass, dægur- og kvikmyndatónlist auk frumsaminna laga eftir nemendurna. Tvö íslensk tónskáld eiga verk á efnisskránni, Sveinbjörn Sveinbjörnsson og Hjálmar H. Ragnarsson. Allir eru velkomnir á tónleikana að því er fram kemur á vef skólans.
Eins og tíðkast hefur undanfarin ár, þá er leikfimin kennd utanhúss í maí. Því er um að gera að vera sérstaklega vel klæddur til útivistar til að njóta hennar sem best.
