Nú í svartasta skammdeginu er mikilvægt að öryggisútbúnaður nemenda sé í lagi. Því er nauðsynlegt að fara yfir endurskinsmerki á yfirhöfnum og töskum og tryggja að ljós á reiðhjólum séu í lagi svo allir sjáist vel í myrkrinu. Vart þarf að nefna hjálminn sem er skylda skv. lögum.
Á Degi íslenskrar tungu sem er föstudaginn 16. nóvember, verður bókasafnadagur á bókasöfnunum á Ísafirði. Boðið verður upp á dagskrá hér í G.Í. kl. 15:00-15:50 þar sem verður opið hús, upplestur og léttar veitingar. Bókasafn M.Í. býður einnig upp á opið hús, upplestur og léttar veitingar á milli kl. 16:00 og 16:50. Sævar Helgi Bragason ætlar svo að ræða um leitina að lífi í geimnum á milli kl. 17:00 og 18:00 á Bókasafninu á Ísafirði.
Allir eru velkomnir og þeir sem mæta á öll söfnin geta safnað stimplum á geimverukort og eigar þar með möguleika á bókavinningi.
Í gær var alþjóðlegur baráttudagur gegn einelti og tóku nemendur og starfsfólk G.Í. höndum saman í þeirri baráttu og klæddust þeir sem gátu einhverju grænu, í stíl við verndarann í eineltishringnum. Mikið var rætt um þær miklu og slæmu afleiðingar sem einelti getur haft og þá nauðsyn að uppræta þennan vágest, en eins og við vitum þá græðir enginn á einelti. Verkefnavinna dagsins var fjölbreytt inni í bekkjum og að lokum teiknuðu allir útlínur annarrar handar sinnar, skrifuðu einhverjar vel valdar setningar eða orð á þær og hengdu upp til að minna okkur öll á það hvern einasta dag hversu alvarlegt einelti er.
Í september s.l. tók skólinn þátt í Ólympíuhlaupi ÍSÍ eins og venjulega. Nemendur gátu valið um nokkrar vegalengdir og tóku allir þátt í hlaupinu sem það gátu og hlupu ýmist inn að Engi, Seljalandi eða golfskálanum í Tungudal.
Það var sérlega skemmtilegt þegar þær fréttir bárust okkur að skólinn hefði verið einn þriggja skóla sem dreginn var út, en 66 skólar tóku þátt þetta árið, sem er met. Í verðlaun hlaut skólinn inneign sem nú hefur verið nýtt til að kaupa bolta og snú-snú bönd fyrir alla árganga skólans. Í gær og dag voru allir nemendur boðaðir á sal skólans, þar sem verðlaunin voru afhent formlega og tóku fulltrúar allra árganga við þeim með brosi á vör, enda fátt skemmtilegra en að uppskera vel eftir góða frammistöðu.
Í dag bauð hópurinn í heimilisfræðivali nokkrum starfsmönnum skólans upp á smáréttaveislu, en í hópnum eru nemendur í 9.bekk skólans ásamt einum nemanda úr 8. bekk á Flateyri. Hópurinn hefur lært matreiðslu hjá Guðlaugu Jónsdóttur frá því í haust.
Matseðillinn hljóðaði upp á partýborgara, veislupítsur, mexíkóska ídýfu með tortillaflögum, suðræna ávexti með vanillusósu, hrökkbrauð og ostasalat, brakandi hrísgóðgæti og döðlugotterí, og að lokum skyrköku með jarðarberjum. Krakkarnir stóðu sig allir með sóma og sáu um alla matreiðsluna, framreiðslu og kynningu.
Á morgun, fimmtudaginn 8. nóvember, er baráttudagur gegn einelti. Þessi dagur er til þess að minna okkur á hvers vegna er mikilvægt að uppræta einelti, ekki aðeins úr lífi barna heldur okkar allra, á öllum æviskeiðum.
Einelti einskorðast ekki við skólaumhverfið, heldur getur komið upp alls staðar, á vinnustöðum, á netinu, í vinahópum og jafnvel fjölskyldum. Birtingarmyndin er fjölbreytt og getur falist í atriðum eins og uppnefnum, stríðni, hunsun og útilokun, eyðileggingu eigna, félagslegum þrýstingi, niðurlægingu, mismunun og líkamlegu ofbeldi.
Í tilefni dagsins munu allir nemendur og starfsfólk vinna saman að verkefni sem tengist deginum. Auk þess hvetjum við alla sem geta til að klæðast einhverju grænu, en grænn er litur verndarans í eineltishringnum.
Í morgun fór fram rýmingaræfing hér í skólanum, undir styrkri stjórn slökkviliðs Ísafjarðar. Brunaboðinn var ræstur kl. 9:10 og tók rúmar tvær mínútur að rýma húsið.
Nauðsynlegt er að framkvæma æfingu sem þessa reglulega, enda að mörgu að hyggja. Flóttaleiðir þurfa að vera á hreinu úr öllum rýmum hússins og allir starfsmenn og nemendur að þekkja sínar leiðir og viðbrögð ef hættuástand skapast. Hver árgangur á sinn söfnunarstað í hæfilegri fjarlægð frá skólanum og rötuðu allir á sinn stað í morgun. Taka þarf manntal á söfnunarsvæðinu, bæði hjá nemendum og starfsmönnum, þannig að engin hætta sé á að einhver hafi orðið innlyksa í skólanum.
Eftir rýmingaræfingu sem þessa er svo farið yfir alla þætti, t.d. hvort heyrist nógu vel í brunabjöllu allsstaðar í byggingunni, hvort að einhver svæði teppist o.s.frv. og gerðar úrbætur í framhaldinu ef þurfa þykir.
Eins og fram hefur komið fengu Grunnskólarnir á Ísafirði og Suðureyri styrk frá Evrópusambandinu til að vinna samstarfsverkefni með fjórum öðrum Evrópulöndum, Grikklandi, Svíþjóð, Búlgaríu og Hollandi. Í verkefninu munu nemendur vinna með mannréttindayfirlýsingu Sameinuðu þjóðanna og skoða hvernig ólík lífsskilyrði og viðhorf hafa áhrif á möguleika fólks til að fá notið þeirra réttinda að fullu. Markmið með verkefninu er að auka skilning og umburðarlyndi gagnvart ólíkum aðstæðum fólks. Nemendur 9.bekkjar verða þátttakendur af okkar hálfu og fjölmargir starfsmenn skólanna taka einnig þátt í verkefninu með einum eða öðrum hætti. Í verkefninu felst einnig að nemendur fara í heimsóknir á milli landanna og kynnast þar af eigin raun ólíkum aðstæðum. Fyrsta heimsóknin í verkefninu var undirbúningsfundur allra kennaranna sem taka þátt í vinnunni með nemendum sínum og fór sú heimsókn fram hér á Íslandi núna í október.
Hópurinn ferðaðist akandi frá Keflavík til Ísafjarðarbæjar þar sem voru vinnustofur og skoðunarferðir í þrjá daga. Það er alltaf gaman að taka á móti gestum því það krefst þess að maður velti fyrir sér hvað er skemmtilegt að sýna ferðamönnum. Að þessu sinni fóru þátttakendur í sögugöngu með Jónu Símoníu Bjarnadóttur, fóru í Seefood-trail, göngu á Suðureyri, kynningu hjá Ísafjarðarbæ og borðuðu í Tjöruhúsinu, auk þess að vera í skólaheimsóknum og fræðast um skólakerfið á Íslandi.
Næsta heimsókn verður til Grikklands og áður en hún fer fram verða nemendur búnir að fjalla um þær greinar mannréttindayfirlýsingarinnar sem fjalla um frelsi til að hafa skoðanir, jafnræði og virðingu og fróðlegt verður að sjá ólíka nálgun nemenda á þessu viðfangsefni eftir því hver bakgrunnur þeirra er.
Í næstu viku ætlar foreldrafélagið að vera með hrekkjavökuskemmtun í Grunnskólanum á Ísafirði.
Halloween skemmtun fyrir 1.-4. bekk kl. 16:30-18:00 miðvikudaginn 31. október.
Halloween skemmtun fyrir 5.-7. bekk kl. 18:00-19:45 miðvikudaginn 31. október.
Boðið uppá dans, föndur, andlitsmálningu og graskera úrskurð (ATH.mæta þarf með hreinsað grasker tilbúið til úrskurðar) Hvetjum alla til að mæta í búning, bæði foreldra og börn og mælumst til að börn séu í fylgd með fullorðnum.
Hallowen dla klas of 1.-4. odbedzie sie 31 pazdziernika og godz.16.30-18.00.
Hallowen dla klas od 5.-7. odbedzie sie 31 pazdziernika og godz 18.00-19:45
Tance, malowanie twarzy,robienie ozdob i wycinanie z dyni ( trzeba przyjsc ze swoja juz oprozniona dynia). Wszystkich zapraszamy w kostiumach-dzieci i rodzicow. Uprzejmie prosimy aby rodziece wzieli w tym udzial i mieli pod opieka swoje dzieci.
Next week the parent committee is planning a Halloweenparty at Grunnskólinn á Ísafirði.
Times for grades 1. - 4. grades, October 31st between 16.30 - 18.00.
Times for grades 5.-7. grades, October 31st between 18.00-19:45.
There will be dancing, crafts, face paint and optional pumpkin carving for those that want (Please come with fully cleansed pumpkin ready for carving). Feel free to wearing costumes. Please do not send children without supervision.
Í morgun bauð Höfundamiðstöð Rithöfundasambands Íslands upp á bókmenntadagskrána Skáld í skólum, þar sem höfundar heimsækja skóla til að fjalla um bókmenntir af ýmsu tagi.
Höfundateymið Kjartan Yngvi Björnsson, furðusagnahöfundur og bókmenntafræðingur og Snæbjörn Brynjarsson, leiklistarmaður, blaðamaður og furðusagnahöfundur, spjölluðu við 8. - 10. bekk um furðusögur, hvernig eitt agnarsmátt hugmyndafræ getur blómstrað og orðið að heilum sagnaskógi og hvernig maður uppgötvar nýja veröld. Þeir Kjartan Yngvi og Snæbjörn upplýstu nemendur um hvernig höfundar endurnýta hugmyndir og stef úr mannkynssögunni, bókmenntum, þjóðsögum og goðsögum og setja í nýjan búning þegar þeir skapa sína eigin heima. Þeir félagar hafa á undanförnum árum sent frá sér fjórar skáldsögur í bókaröðinni Þriggja heima saga, sú nýjasta, Draugsól, kom út í maí og er sú fimmta í vinnslu.
