Jól í skókassa er alþjóðlegt verkefni sem felst í því að fá börn jafnt sem fullorðna til þess að gleðja önnur börn sem lifa við fátækt, sjúkdóma og erfiðleika með því að gefa þeim jólagjafir. 7. bekkur G.Í. hefur undanfarnar vikur safnað ritföngum, leikföngum, sælgæti, fötum og hreinlætisvörum og náðu krakkarnir að fylla rúmlega 20 kassa, sem þeir skiluðu til Ísafjarðarkirkju, sem er móttökuaðili verkefnisins.

Skókassarnir verða sendir til Úkraínu en þar búa um 46 milljónir manna. Atvinnuleysi er þar mikið og ástandið víða bágborið. Á því svæði þar sem jólagjöfunum verður dreift ríkir mikil örbirgð. Íslensku skókössunum verður meðal annars dreift á munaðarleysingjaheimili, barnaspítala og til barna einstæðra mæðra sem búa við sára fátækt.

Miðvikudaginn 12. nóvember er foreldradagur og mæta þá nemendur í viðtöl til sinna umsjónarkennara, ásamt foreldrum. Opnað hefur verið fyrir tímapantanir á mentor.is og geta foreldrar valið sér hentugar tímasetningar.

Í dag fengu nemendur í 5. - 10. bekk sjálfsmatseyðublað, sem þeir eru beðnir að fylla út ásamt foreldrum og skila í viðtölunum.

Í morgun var framkvæmd rýmingaræfing hér í skólanum, undir styrkri stjórn slökkviliðs Ísafjarðar. Brunaboðinn var ræstur kl. 9:10 og tók sléttar tvær mínútur að rýma allan skólann, sem telst mjög gott. 

Nauðsynlegt er að framkvæma æfingu sem þessa reglulega, enda að mörgu að hyggja. Flóttaleiðir þurfa að vera á hreinu úr öllum rýmum hússins og allir starfsmenn og nemendur að þekkja sínar leiðir og viðbrögð ef hættuástand skapast. Hver árgangur á sinn söfnunarstað í hæfilegri fjarlægð frá skólanum og rötuðu allir á sinn stað í morgun.

Eftir rýmingaræfingu sem þessa er svo farið yfir alla þætti, t.d. hvort heyrist nógu vel í brunabjöllu allsstaðar í byggingunni o.s.frv. og gerðar úrbætur ef þarf.

Við innleiðingu nýrrar aðalnámskrár breyttust markmið í mörgum kennslugreinum.  Í námskránni er markmiðum hins vegar ekki raðað niður á árganga heldur aðeins tiltekið hvað nemendur eiga að kunna við lok 4., 7. og 10. bekkjar. 

Nú hafa kennarar skólans raðað markmiðum flestra greina niður á tiltekna árganga.  Markmiðin eru nokkuð ítarleg og í stað þess að birta þau í hverri einustu kennsluáætlun eru þau birt hér á heimasíðu skólans og vísað til þeirra í áætlunum.

auglýsing nemendaráðs

Það hefur ekki farið fram hjá neinum hér í skólanum, að í dag er hrekkjavaka og hefur fólk ekkert kippt sér upp við blóðuga nemendur, eða afturgöngur á göngunum.

Í kvöld nær svo gleðin hámarki sínu, þegar nemendaráð skólans heldur hrekkjavökuball. Ballið hefst kl. 20:00 og kostar kr. 1.000 fyrir þá sem eru í búningum, en kr. 1.500 fyrir aðra.

Gormánuður hófst 25. október samkvæmt gamla íslenska dagatalinu en gor þýðir hálfmelt fæða í innyflum dýra, einkum hjá grasbítum.  
Á þessum degi rennur einnig fyrsti vetrardagur upp og þá veltir fólk því gjarnan fyrir sér hvernig viðra muni á komandi vetri. Oft hefur verið spáð í veðrið út frá ýmsum þáttum í náttúrunni. 

Norðurljósin eru síbreytileg eins og veðrið. Þau eiga rætur sínar að rekja til sólarinnar en virkni á yfirborði hennar stjórnar því hvort norðurljósin láti á sér kræla. Það er gömul hjátrú að litrík norðurljós á mikilli hreyfingu boði hvassviðri en liggi þau kyrr sé von á stillum. Þegar norðurljós sjást seint að vetri telja sumir að enn sé að vænta snjókomu. Rauð norðurljós eru sögð boða ófrið (Heimild: www.nams.is).

Mánudaginn 27. október er alþjóðlegi bangsadagurinn og ætla krakkarnir í 1. bekk að halda hann hátíðlegan og eflaust fleiri. Bók vikunnar í byrjendalæsinu er Paddington í skemmtiferð og verður hún lesin á skólabókasafninu og aðrar bangsabækur skoðaðar.  Svo ætla allir sem vilja að mæta með bangsann sinn í skólann, þannig að það er von á óvenju mörgum í skólann á mánudaginn.

Gleraugu í óskilum

Óskilamunir eiga það til að safnast upp hér í skólanum. Meðal þess sem bíður hér eigenda sinna eru nokkur gleraugu, sem munu enda hjá Rauða krossinum um miðjan nóvember, komist þau ekki í réttar hendur.
Við hvetjum alla til að kíkja við hjá okkur við tækifæri ef einhverra hluta er saknað.

Nú hefur nýtt fréttabréf skólans litið dagsins ljós. Þar er farið yfir helstu viðburði skólans í september og október.

Föstudaginn 17. október og mánudaginn 20. október er vetrarfrí og á þriðjudaginn er starfsdagur kennara. Það eru því 3 auka frídagar framundan hjá nemendum.