Hákon Jónsson, frá Skíðafélagi Ísfirðinga, varð í fyrsta sæti í 5 km hefðbundinni göngu karla 15-16 ára í Team Sportia Cup (Fis Junior Tävling) mótinu sem haldið var í Ulrichamn í Svíþjóð um helgina. Þá varð Elena Dís Víðisdóttir, einnig frá Skíðafélagi Ísfirðinga, í öðru sæti í 5 km hefðbundinni göngu kvenna 15-16 ára á sama móti, að því er fram kemur á www.bb.is.  

Þau Hákon og Elena Dís eru bæði nemendur í 10. bekk GÍ og óskum við þeim innilega til hamingju með góðan árangur.

« 1 af 3 »

Það er mikið um allskonar kynjaverur á göngum skólans í dag, enda hinn eini sanni maskadagur. Nemendur í 1. - 7. bekk mættu í þremur hópum í sal skólans á hin hefðbundnu maskaböll og var mikil gleði og stemmning eins og sjá má á þessum myndum.
Á morgun er svo starfsdagur kennara og geta nemendur því sofið út eftir annasaman dag.

Lögum samkvæmt ber grunnskólum skylda til að birta sjálfsmatsskýrslu einu sinni á ári. Fyrsta skýrsla G.Í. í vetur er nú komin hér inn á síðuna undir hnappnum útgefið efni - skýrslur.

Félagsmiðstöðin Djúpið heldur sína árlegu náttfatanótt mánudaginn 20. febrúar fyrir unglingastig skólans í Sundhöllinni. Eins og fyrr mun þessi viðburður standa alla nóttina, allt húsið verður nýtt og margt að gerast.

Meðal annars  verður boðið upp á kvikmyndir og þætti á sitthvorum skjávarpanum, playstation herbergi, ball, trúbador, sund, tarzanleik, feluleik, sítrónukappát, draugasögur og margt fleira . Boðið verður upp á aðstöðu þar sem að krakkarnir geta lagt sig og verður sú aðstaða kynjaskipt.

Áætlað er að öllu ljúki um kl 7:00 á þriðjudagsmorgun og á þá allt að vera frágengið og klárt áður en haldið er heim. 

Mánudaginn 20. febrúar er maskadagurinn eða bolludagur öðru nafni. Af því tilefni verða grímuböll á sal skólans sem hér segir:

1. – 3. bekkur kl. 8:20-9:10
4. -5. bekkur kl. 10:20-11:00
6. og 7. bekkur kl. 13:20-13:50

Nemendur og starfsfólk eru margir hverjir í grímubúningum þennan dag og verður gaman að sjá allar þær furðuverur sem verða á ferli.
Þriðjudaginn 21. febrúar er svo starfsdagur kennara án nemenda og engin kennsla.

10. bekkur stendur fyrir hinu árlega Rósaballi á morgun, föstudaginn 17. febrúar í sal skólans.
Húsið opnar kl. 19:30 og stendur gleðin frá kl. 20:00 - 23:30.
Hefð er fyrir því að strákar bjóði stelpum á ballið, en einnig mega nemendur bjóða með sér samnemendum af sama kyni.
Aðgangseyrir er kr. 1.000 fyrir einstaklinga, en kr. 1.500 fyrir pör.

Elísabet Lorange, listmeðferðarfræðingur frá Foreldrahúsi/vímulausri æsku, hefur undanfarna daga haldaið námskeið í sjálfsstyrkingu fyrir nemendur 10. bekkjar. Vinnan er einn þáttur í vímuefnaforvörnum á vegum Vá Vesthópsins en um er að ræða forvarnavinnu með þeirri nálgun að vinna með sjálfsvirðingu, sjálfsmat, sjálfstraust, tilfinningar, samskipti og fleira. Þetta er í þriðja sinn sem árgangurinn fær námskeið af þessu tagi og hafa nemendur látið mjög vel af því.

Slökkviliðmenn heimsóttu krakkana í 3. HA í síðustu viku í   tilefni þess að  Maja  Weronika Zietek var dregin út í verðlaunasamkeppni í tengslun við Eldvarnarátak Landssamband Slökkviliðs- og Sjúkraflutningamanna. Maja fékk  afhent verðlaun og viðurkenningskjal af þessu tilefni. Krakkarnir voru stoltir af Maju  og samglöddust henni, en þau  tóku öll þátt í þessari samkeppni og stóðu sig með prýði.

Vestfjarðakeppni Samfés var haldin í Súðavík s.l. föstudagskvöld. Það voru 10 atriði sem kepptu um þátttökurétt í úrslitakeppni Samfés, sem haldin verður í Reykjavík í næsta mánuði. Í fyrsta sæti höfnuðu GóGó píurnar frá Hólmavík og Egill Helgason ásamt hljómsveitinni The Cutaways frá Súðavík. Þessi tvö atriði munu því keppa fyrir hönd Vestfjarða.

Dómnefndina þetta árið skipuðu þeir Þorsteinn Haukur Þorsteinsson frá Súðavík, Bjarni Einarsson frá Hólmavík og Daði Már Guðmundsson frá Ísafirði en kynning var í höndum Péturs Markan.

Að keppni lokinni var svo dansleikur fyrir 8. - 10. bekk og sá Haffi Haff um fjörið.

Við óskum sigurvegurunum og keppendum öllum til hamingju með frammistöðuna.

Hér má heyra sigurlag Hólmvíkinganna:
http://www.youtube.com/watch?v=r7lJmWMBDkM&feature=share

og einnig framlag Súðvíkinganna hér:

http://www.youtube.com/watch?v=i6jg8Mh5_Yw

Undankeppni söngkeppni Samfés á Vestfjörðum verður haldin í kvöld,  föstudagskvöldið 10. febrúar. Að þessu sinni verður keppnin haldin í íþróttahúsi Súðavíkurskóla frá kl. 20:00 - 21:30. Keppendur koma frá Hólmavík, Ísafjarðarbæ og Súðavík og er öllum velkomið að mæta. Að keppni lokinni verður haldið ball  fyrir 8. til 10. bekk, þar sem Haffi Haff mun halda uppi stuðinu. 

Aðgangseyrir er 1000 kr. á söngvakeppnina og ballið, en miðasala fer fram á staðnum. Aðeins er hægt að greiða með peningum.