Blár apríl, árlegt styrktar- og vitundarátak styrktarfélags barna með einhverfu, hefst á Alþjóðlegum degi einhverfunnar, laugardaginn 2. apríl. Af því tilefni hvetjum við alla til að klæðast bláu föstudaginn 1. apríl og vekja þannig athygli á málefnum einhverfra barna en blái liturinn hefur fest sig í sessi um allan heim sem litur einhverfunnar. 

 „Blár er alþjóðlegur litur einhverfu. Rétt eins og blæbrigði bláa litarins eru birtingarmyndir einhverfu óteljandi því hver einstaklingur hefur sinn stað á rófinu með öllum þeim áskorunum sem einhverfu fylgja," segir á Facebook síðu Styrktarfélags barna með einhverfu.

Nú er lokið 5 árshátíðarsýningum og eru allir í skýjunum yfir útkomunni. Yfirskriftin þetta árið var Sjónvarp í 50 ár og var einstaklega gaman að sjá mismunandi útfærslur árganga. Flestallir nemendur skólans stigu á svið eða komu að tæknimálum og er alveg einstakt að upplifa stemninguna sem ríkir þessa daga. Nám er svo mikið meira en lestur og stærðfræði og reynir virkilega á alla þætti þessa daga.

Við erum mjög stolt af krökkunum okkar og förum öll glöð inn í páskaleyfið sem hefst eftir morgundaginn. Á morgun, föstudag, er kennt samkvæmt stundaskrá, en 7. - 10. bekkur mætir kl. 9:40 í skólann. Kennsla hefst að páskaleyfi loknu þriðjudaginn 29. mars og vonum við að allir njóti þess vel. Gleðilega páska!

Þessa dagana fundar Erasmus+ hópurinn í Lüdenscheid í Þýskalandi.  Í dag voru kynningar á Sad and glorious moments in my country og sýndu fulltrúar G.Í., þær Guðbjörg Halla Magnadóttir og Helga Björt Möller, myndband sem nemendur í 6. og 8. bekk unnu fyrir verkefnið. Einnig verður farið yfir greiningar á námsárangri nemenda í 5. -9. bekk í íslensku og stærðfræði til að skoða dreifingu á námsárangri nemenda. Tilgangur verkefnisins er að skoða stöðu tvítyngdra nemenda og hvernig nýjar kennsluaðferðir geta gagnast sem best til að einstaklingsmiða nám. Allar kynningar verður hægt að nálgast á heimasíðu verkefnisins. 

Verkefni þetta hófst í fyrrahaust þegar skólinn skráði sig í eTwinning (rafrænt skólastarf) á vegum Erasmus+ sem er styrkjaáætlun ESB á sviði menntamála, æskulýðsstarfs og íþrótta. Eitt markmiða Erasmus+ er að auka gæði í menntun og þjálfun innan þeirra 34 Evrópulanda sem eiga aðild að áætluninni og stuðla að aukinni Evrópuvídd í menntastarfi. Þátttakendur í þetta skiptið eru auk Íslands; Króatía, Þýskaland, Lettland, Portúgal og Kýpur.

Nú er undirbúningur í hámarki fyrir árshátíð skólans sem verður dagana 16. og 17. mars næstkomandi. Yfirskriftin að þessu sinni er Sjónvarp í 50 ár. Fyrirkomulag sýninga er með sama sniði og í fyrra.

1. sýning – miðvikudagur 16. mars kl. 17:00

Flytjendur: 1. – 7. bekkur.  Áhorfendur:  Nemendur í 1. og 2. bekk og foreldrar/gestir þeirra.

2. sýning – miðvikudagur 16. mars kl. 20:00

Flytjendur: 5.–10. bekkur. Áhorfendur: Nemendur í 5.–7. bekk og foreldrar/gestir þeirra.

3. sýning – fimmtudagur 17. mars kl. 9:00

Flytjendur: 1.-4.bekkur. Áhorfendur: Tveir elstu árgangar leikskólanna, ásamt 8. og 10. bekk.

4. sýning – fimmtudaginn 17. mars kl. 17:00

Flytjendur: 1.-7.bekkur. Áhorfendur: Nemendur í 3. og 4. bekk og foreldrar/gestir þeirra.

5. sýning – fimmtudaginn 17. mars kl. 20:00

Flytjendur: 7.–10. bekkur. Áhorfendur: Nemendur í 8.–10. bekk og foreldrar/gestir þeirra.

Gert er ráð fyrir að nemendur í 1.-2. bekk mæti kl. 16:00 báða dagana og þeir sem eru í dægradvöl komi beint í skólann eftir að dægradvöl lýkur.  Nemendur í 3.-7.bekk mæta kl. 16:30.

Erfitt er að áætla lengd hverrar skemmtunar en í ljósi reynslunnar má gera  ráð fyrir 1 til 1½ klst.   

Athugið:

• Þar sem húsrými er takmarkað eru allir beðnir um að virða óskir um það hverjir mæta á hvaða sýningar.  Mikilvægt er að mæta tímanlega svo hægt sé að hefja sýningu á tilsettum tíma og sitja skemmtunina til enda til að forðast truflanir og óþægindi.
• Aðgangseyrir á árshátíðarsýningu er 1000 kr.  Nemendur og starfsfólk GÍ svo og þeir sem eru 67 ára eða eldri greiða ekki aðgangseyri.  Fólk borgar aðeins inn á eina sýningu, þeir sem sækja fleiri sýningar (þ.e. eiga fleiri en eitt barn í skólanum) sýna fyrri aðgöngumiða við innganginn.  Hagnaður af sýningum rennur í ferðasjóð 7. bk. vegna skólabúða.
• Ekki  er tekið við kortum.
• Mötuneytið verður opið báða árshátíðardagana.

Eins og allir taka eftir, þá hefur heimasíða skólans fengið nýtt útlit. Þetta er gert til að síðan verði aðgengilegri og hafa starfsmenn Snerpu haft veg og vanda að uppfærslunni. Von okkar er sú að þessi breyting reynist vel en allar ábendingar eru vel þegnar.

Frá vinstri: Ívar Tumi Tumason, Einar Torfi Torfason, Dagný Björg Snorradóttir, Daníel Wale Adeleye, Ólöf Einarsdóttir og Guðbjörg Ásta Andradóttir.

Grunnskólinn á Ísafirði sigraði í dag Vestfjarðariðilinn í Skólahreysti. Með sigri tryggði liðið sér sæti í úrslitunum, sem fara fram í næsta mánuði. Í öðru sæti varð Grunnskóli Vesturbyggðar og Grunnskóli Bolungarvíkur í því þriðja. Við óskum okkar fólki innilega til hamingju og erum virkilega stolt af þeim.

Á morgun, fimmtudaginn 10. mars frá kl. 17:30-19:00, verður opið hús í Menntaskólanum á Ísafirði. Markmið opna hússins er að kynna starfsemi skólans fyrir nemendum í 10. bekk á norðanverðum Vestfjörðum og forráðamönnum þeirra sem og öðrum sem hafa hug á að kynna sér starfsemi skólans.

Grunnskólinn á Ísafirði keppir í Vestfjarða- og Vesturlandsriðli Skólahreysti, miðvikudaginn 9. mars kl. 13:00, í Mýrinni í Garðabæ. Fyrir hönd G.Í. keppa þau Einar Torfi Torfason og Ólöf Einarsdóttir í hraðabraut, Dagný Björg Snorradóttir í armbeygjum og hreystigreip, og Daníel Wale Adeleye í upphífingum og dýfum. Til vara verða þau Guðbjörg Ásta Andradóttir og Ívar Tumi Tumason.

Við óskum okkar fólki góðs gengis og hlökkum til að fylgjast með þeim. 

Frá vinstri: Sveinbjörn Orri Heimisson, Rósbjörg Edda Rúnarsdóttir, Sigrún Jóhannsdóttir og Björk Einisdóttir, formaður dómnefndar.

Lesararnir stóðu sig allir með mikilli prýði

Hljómsveit 7. bekkjar G.Í., þeir Sveinbjörn Orri Heimisson, Robert Michal Palkowski og Daði Rafn Ómarsson.

« 1 af 3 »

Lokahátíð Stóru upplestrarkeppninnar fór fram í Hömrum í gærkvöldi. Á hátíðinni lásu 10 nemendur úr 7. bekk, brot úr sögu eftir Bryndísi Björgvinsdóttir og ljóð  eftir Guðmund Böðvarsson. Fulltrúar okkar voru þau Helena Haraldsdóttir, Júlíana Lind Jóhannsdóttir, Rakel Damilola Adeleye, Rósbjörg Edda Rúnarsdóttir og Sveinbjörn Orri Heimisson, auk þess sem tríó úr 7. bekk G.Í. lék eitt lag.

Nemendur 8. - 10. bekkjar var boðið á fræðsluerindið

Juan Camilo og Anna Lára Steindal

« 1 af 2 »

Í morgun hélt Rauði krossinn fræðsluerindi fyrir 8. - 10. bekk í Hömrum, undir yfirskriftinni (V)ertu næs?  - fjölbreytileiki og fordómar.  Fræðslan var létt og skemmtileg, um annars alvarlegt efni, sem þau Anna Lára Steindal og Juan Camilo stýrðu.

Í erindinu hvetur Rauði krossinn landsmenn til þess að bera virðingu fyrir náunganum, sama hvaðan hann er upprunninn.  Á Íslandi búa 320.000 manns og þar af eru um 10% af erlendum uppruna, eða um þrjátíu þúsund einstaklingar. Borið hefur á því að fólki sé mismunað eftir þjóðerni og getur það haft alvarlegar afleiðingar fyrir samfélagið allt.

Leynast fordómar gagnvart innflytjendum í okkar litla samfélagi? Höfum við undirbúið jarðveginn þannig að fjölbreytileikinn dafni, og allir fái að njóta sín jafnt? Leitast var við að svara ofangreindum spurningum, enda er þetta mál sem kemur okkur öllum við og krefst þess að við lítum öll í eigin barm og athugum hvort við getum gert betur.