Í mars síðastliðnum voru lagðar fyrir nemendur 5. -10. bekkjar nokkrar spurningar varðandi lestrarvenjur þeirra. Sambærilegar kannanir höfðu verið lagðar fyrir þennan aldurshóp þrisvar áður, þ.e. 1999, 2004 og 2009 svo að við höfum nokkuð gott yfirlit yfir þær breytingar sem hafa orðið á lestrarvenjum barna á þessum aldri síðustu 15 árin og einnig koma viðhorf þeirra til lesturs vel fram. Herdís Hübner, kennari við skólann, hefur haft veg og vanda að þessum könnunum og tekið saman niðurstöður.

Þótt ekki sé hægt að segja að niðurstöðurnar séu ánægjulegar, er vissulega fróðlegt að skoða þær og margt athyglisvert sem þar kemur fram. 

Síðustu daga og vikur hefur það færst í aukana að nemendur komi á reiðhjóli í skólann, enda vorið í augsýn. Því er ekki úr vegi að fara yfir skyldubúnað reiðhjóla.

• Reiðhjólahjálmur 
• Bremsur á fram- og afturhjóli
• Bjalla (ekki má nota annan hljóðmerkjabúnað)
• Hvítt eða gult ljós að framan ef hjólað er í myrkri
• Rautt ljós að aftan ef hjólað er í myrkri
• Þrístrend glitaugu, rautt að aftan og hvítt að framan
• Keðjuhlíf
• Teinaglit
• Glitaugu á fótstigum
• Lás 

Nú er um að gera að fara yfir hjólabúnaðinn til að hægt sé að njóta þess að hjóla við sem mest öryggi.

2.flokkur BÍ/Bolungarvíkur (Mynd: Manchester æfingaferð - Facebook)

Mætt á Old Trafford í morgun (Mynd: Manchester æfingaferð - Facebook)

« 1 af 2 »

Á þriðja tug nemenda í 9. og 10. bekk eru nú í æfingaferð með 2. og 3. flokki BÍ/Bolungarvíkur í Manchester í Englandi. Hópurinn hóf daginn í dag á skoðunarferð á Old Trafford leikvanginn sem er eflaust drauma áfangastaður margra ungra knattspyrnumanna. Hægt er að fylgjast með ferðinni á Facebook síðu hópsins. 

Við vonum að krakkarnir njóti ferðarinnar og eigi góða heimkomu.

Viktor Júlíusson nemandi í 10. bekk G.Í. og leikmaður 3.flokks BÍ/Bolungarvík var nú á dögunum valinn í 18 manna hóp U-17 landsliðs Íslands. Hann keppir með landsliði Íslands þessa dagana á undirbúningsmóti UEFA í Belfast á N-Írlandi.

Friðrik Þórir Hjaltason og Hjalti Hermann Gíslason, nemendur í 10. bekk hafa einnig verið kallaðir á æfingar hjá U-17 landsliðinu í vetur vegna góðrar frammistöðu hjá BÍ/Bolungarvík.

Í síðasta mánuði var Natalía Kaja Fjölnisdóttir nemandi í 9. bekk boðuð á landsliðsæfingar U-16 og fóru æfingarnar fram í Kórnum og Egilshöll. Natalía er á yngra ári í 3.flokki og hefur nú í haust og vetur æft með meistaraflokki kvenna.

Það er ljóst að þetta unga knattspyrnufólk er að standa sig gríðarlega vel í boltanum og vel fylgst með árangri þeirra. Við óskum þeim innilega til hamingju með þessu frábæru frammistöðu.

« 1 af 3 »

Í gær fóru krakkarnir í 1. bekk út á Silfurtorg í útivistartímanum sínum til að njóta veðurblíðunnar. Krakkarnir fengu sér heitt kakó og kex og sungu fyrir gesti og gangandi og er nokkuð víst að þeir hafi náð að syngja inn vorið.

Tónlistarnemendur 4. og 8. bekkjar sem fram komu í morgun

Áheyrendur kunnu vel að meta fagra tóna

« 1 af 2 »

Í morgun héldu 4. og 8. bekkur sameiginlega tónleika í Hömrum. Í báðum þessum árgöngum eru margir tónlistarnemar við Tónlistarskóla Ísafjarðar og Listaskóla Rögnvaldar Ólafssonar og léku þeir fyrir samnemendur sína og kennara. Dagskrá tónleikanna var fjölbreytt og skemmtileg og þökkum við þessum hæfileikaríku krökkum fyrir skemmtilega morgunstund.

Árshátíð Grunnskólans á Ísafirði verður haldin fimmtudaginn 3., föstudaginn 4. og mánudaginn 7. apríl n.k. Þar munu allir árgangar stíga á stokk og sýna atriði sín undir yfirskriftinni Öll ólík - öll eins.

Síðustu dagar hafa einkennst af undirbúningi fyrir árshátíðina, enda er mikið í lagt og allir nemendur skólans koma að skipulagningunni á einn eða annan hátt, þó svo að ekki alveg allir stígi á svið, en langflestir þó. Skólinn býður upp á sex sýningar til að koma öllum að og er aðgangseyrir kr. 1.000 sem rennur í ferðasjóð verðandi 7. bekkjar fyrir skólabúðaferð að Reykjum í Hrútafirði næsta haust.

Miðvikudagurinn 2. apríl er alþjóðlegur dagur barnabókarinnar, en það er fæðingardagur H.C. Andersens. Líkt og undanfarin ár færir IBBY á Íslandi, sem eru frjáls félagasamtök áhugamanna um barnabókmenntir og barnamenningu, íslenskum börnum smásögu að gjöf í tilefni dagsins. Þórarinn Eldjárn hefur að beiðni félagsins skrifað söguna Blöndukút í Sorpu sem hentar lesendum frá 6 ára aldri og verður henni útvarpað á Rás 1  kl. 9:10 sama dag.

Grunnskólinn á Þingeyri stóð uppi sem sigurvegari í Vestfjarðariðlinum í skólahreysti, sem fram fór fyrr í dag. Þar með tryggði skólinn sér þátttökuréttinn í úrslitakeppninni, sem fram fer 16. maí n.k. í Laugardalshöll.

Okkar fólk hafnaði í öðru sæti og hefur því lokið keppni. Við óskum Þingeyringum innilega til hamingju með sigurinn svo og öllum öðrum þátttakendum sem hafa æft stíft undanfarið og staðið sig einstaklega vel.

Á morgun, fimmtudag, fer keppni fram í Vestfjarðariðlinum í skólahreysti. Riðlakeppnin er haldin í íþróttahúsi Breiðabliks í Smáranum í Kópavogi að þessu sinni og taka 5 skólar þátt í okkar riðli. 

Lið G.Í. þetta árið skipa þau: Andri Fannar Sóleyjarson, Friðrik Þórir Hjaltason, Guðný Birna Sigurðardóttir, Gunnar Þór Valdimarsson, Katrín Ósk Einarsdóttir og Kolfinna Veigarsdóttir Olsen. 

Við óskum okkar krökkum góðs gengis og munum að sjálfsögðu fylgjast með gangi mála.