Nemendaráð fyrir skólaárið 2014-2015 er nú tekið til starfa. Formaður er Pétur Ernir Svavarsson og varaformaður Hekla Hallgrímsdóttir.

Aðrir í nemendaráði eru þau Andri Fannar Sóleyjarson, Hilda María Sigurðardóttir og Linda Marín Kristjánsdóttir úr 10. bekk, Birta Rós Þrastardóttir, Ína Guðrún Gísladóttir, Bergsteinn Snær Bjarkason og Bjarni Pétur Marel Jónasson úr 9. bekk og Hanna Þórey Björnsdóttir, Ólöf Einarsdóttir, Jakob Daníelsson og Kristófer Kristjánsson úr 8. bekk.

Nú er rétt vika liðin af skólastarfinu og lúsin mætt á svæðið í nokkrum árgöngum. Skólahjúkrunarfræðingur hefur sent bréf heim til viðkomandi árganga og biðjum við alla að bregðast fljótt og örugglega við til að koma í veg fyrir frekari útbreiðslu.

Frá og með 1. september taka við nýjar útivistarreglur fyrir börn. 12 ára börn og yngri mega ekki vera úti eftir kl. 20 og 13-16 ára börn mega ekki vera úti eftir kl. 22 og miðast aldur við fæðingarár.

Foreldrar og forráðamenn hafa fullan rétt til að stytta þessa tíma, en útivistarreglur þessar eru samkvæmt barnaverndarlögum og mega börn ekki vera á almannafæri utan ofangreindra tímamarka nema í fylgd með fullorðnum. Bregða má út af þessum reglum þegar börn 13-16 ára eru á heimleið frá viðurkenndri skóla-, íþrótta- eða æskulýðssamkomu.

Mjög mikilvægt er að foreldrar séu samtaka um að virða þessar reglur.

7. bekkur er nú á heimleið úr skólabúðunum að Reykjum í Hrútafirði og er von á rútunni á milli kl. 18:00 og 18:30.

Í morgun hélt 9. bekkur af stað í sína fjallgöngu í blíðskaparveðri. Farið var frá gönguskíðasvæðinu á Seljalandsdal klukkan 8:00 og gengið þaðan upp á Kistufellið. Áætluð heimkoma er um hádegisbilið.

8. bekkur fer í sína haustferð á morgun,  miðvikudaginn 27. ágúst og verður farið yfir Fellshálsinn. Hópurinn hittist hjá aðalstöðvum Vegagerðarinnar í Dagverðardal kl. 8:00 og gengur þaðan eftir veginum upp á heiði, fer síðan yfir hálsinn og kemur niður Engidalinn. Gert er ráð fyrir að gangan taki 4 - 5 klukkustundir. 

Næstu daga og vikur munu allir árgangar skólans fara í sínar árlegu haustferðir. Á morgun sigla 10. bekkingar norður á Hesteyri kl. 8.30 og verður líklega gengið yfir í Miðvík og þaðan aftur til baka á Hesteyri. Gist verður í tjöldum en einnig hefur hópurinn læknishúsið til afnota ef á þarf að halda. Áætluð heimkoma er kl. 12.30  á miðvikudag.

Á morgun, mánudaginn 25. ágúst, leggur 7. bekkur af stað í skólabúðir að Reykjum í Hrútafirði. Hópurinn dvelur þar fram á föstudag við leik og störf. Við óskum þeim góðrar ferðar og ánægjulegrar dvalar.

Skólasetning Grunnskólans á Ísafirði er 22. ágúst í sal skólans:

Kl. 9:00    8. 9. og 10. bekkur

kl. 10:00   5. 6. og 7. bekkur

kl. 11:00   2. 3. og 4. bekkur

Nemendur í 1. bekk verða boðaðir í viðtöl við umsjónarkennara ásamt foreldrum þennan dag.

Við viljum benda á að innkaupalisti fyrir haustið 2014 er kominn hér inn á heimasíðuna og hvetjum við alla til að nýta námsgögn frá fyrra ári. Sú nýbreytni verður í haust að skólinn sér nemendum fyrir öllum stíla- og reiknisbókum, þannig að óvenju lítið er á innkaupalistum heimila.

Skólasetning verður 22. ágúst n.k. en allar upplýsingar varðandi næsta skólaár má finna á skóladagatalinu hér vinstra megin á síðunni.

Starfsfólk Grunnskólans á Ísafirði óskar öllum gleðilegs sumars með þökk fyrir skólaárið sem nú er að líða.