VALMYND ×

Fréttir

Heimsókn í Arnarfjörð

9. bekkur fór í heimsókn á Hrafnseyri og í Mjólkárvirkjun í dag, 26. ágúst. Ferðin gekk vel, veðrið var gott og allir hressir. Staðarhaldari á Hrafnseyri, Valdimar Halldórsson, tók á móti hópnum og byrjaði á að sýna rústir gömlu kirkjunnar og segja frá henni og ýmislegt um sögu staðarins. Síðan fór hópurinn í kapelluna þar sem sagt var meira frá sögu staðarins, Hrafni Sveinbjarnarsyni og Jóni Sigurðssyni. Eftir það var hópnum skipt upp, helmingurinn fór í gamla bæinn og borðaði nesti en hinn helmingurinn í safnið. Síðan var víxlað. Eftir það var farið út í leiki, veðrið var gott eins og fyrr segir og krakkarnir fengu lánaðan bolta og kylfu og léku sér á túninu fyrir framan bæinn. 
Um kl. 11 fór hópurinn svo aftur upp í rútu, þakkaði kærlega fyrir góðar móttökur og hélt áfram inn í fjörðinn og heimsóttum Mjólkárvirkjun. Þar var boðið upp á ágæta leiðsögn og upplýsingar og vélasalurinn skoðaður. 
Þegar því var lokið var haldið heim á leið og eftir stendur skemmtileg ferð og afskaplega fróðleg. 

Líkamsvitund barna og unglinga

Heimsókn Tómasar í 6.HS
Heimsókn Tómasar í 6.HS

Í dag fengu 5. og 6. bekkur heimsókn frá Tómasi Emil Guðmundssyni Hansen, sjúkraþjálfara. Tómas fór yfir mikilvægi hreyfingar og réttrar líkamsstöðu, ekki síst í sambandi við tölvur, spjaldtölvur og lestur. Krakkarnir voru mjög áhugasamir og spurðu mikið og er alveg viðbúið að einhverjir foreldrar fá leiðbeiningar barna sinna eftir daginn.

Nýtt skólaár hafið

Í dag hófst nýtt skólaár hjá nemendum með foreldraviðtölum, þar sem allir settu sér markmið varðandi einelti, vinnufrið og ábyrgð á eigin námi í vetur. Kennsla hefst svo samkvæmt stundaskrá á morgun.

Í morgun fór 7. bekkur í skólabúðir að Reykjum í Hrútafirði, þar sem nemendur dvelja fram á föstudag. Nemendur 10. bekkjar eru einnig á faraldsfæti þessa dagana, en þeir munu halda í árlega Hornstrandaferð á morgun þriðjudag og koma til baka á miðvikudag. Aðrir árgangar munu skreppa í sínar fjallaferðir á næstu dögum og vikum, eftir því sem veður og aðrar aðstæður leyfa.

Nýtt fréttabréf

Fyrsta fréttabréf skólaársins hefur nú litið dagsins ljós og er aðgengilegt hér á vefnum. Við hvetjum foreldra til að kynna sér innihald þess, en þar koma m.a. fram upplýsingar varðandi foreldraviðtölin á mánudaginn.

Skólasetning

Skólasetning verður með öðru sniði en venjulega í skólanum. Mánudaginn 24. ágúst mæta nemendur og foreldrar í viðtöl til umsjónarkennara. Í viðtölunum er gert ráð fyrir að nemendur setji sér markmið fyrir ábyrgð og vinnu í skólanum. Opnað verður fyrir skráningar í viðtölin 19. ágúst. 

Innkaup

Nemendum er séð fyrir nánast öllum gögnum sem þeir þurfa til náms í skólanum.  Gert er ráð fyrir að  nemendur í 1.-7. bekk sjái sér sjálfir fyrir skriffærum og nemendur unglingastigs sjái sér sjálfir fyrir skriffærum, reglustiku, gráðuboga og litum.  Nemendur fá allar stíla – og reikningsbækur og möppur í skólanum.

Minning

Ingibjörg Sigríður Guðmundsdóttir, Inga Sigga, hefur kvatt. Inga Sigga kenndi við Grunnskólann á Ísafirði í hart nær tuttugu ár, þar til hún lét af störfum fyrir tveimur árum vegna þeirra veikinda sem nú hafa haft betur. Inga Sigga var einstakur kennari, hún bar hag nemenda sinna fyrir brjósti og mætti þörfum hvers og eins sem best hún mátti. Hún var mikil fagmanneskja og fylgdist vel með nýjungum í kennsluháttum, hún var t.d. verkefnisstjóri í upphafi innleiðingar á byrjendalæsi í skólanum. Áður hafði hún tekið þátt í mörgum þróunarverkefnum og var ávallt í fararbroddi. Það var eftirtektarvert að fylgjast með Ingu Siggu í starfi sínu með börnum, virðingin og væntumþykjan gagnvart þeim fór ekki fram hjá neinum, enda þótti nemendum hennar vænt um hana og andrúmsloftið í kennslustundum bar þess merki. Það eru ófáir nemendur sem Inga Sigga hefur kennt og stór hluti Ísfirðinga sem hún hefur haft áhrif á, því að baki hvers nemanda eru heilu fjölskyldurnar. Það má með sanni segja að hún hafi verið kennari af guðs náð. Inga Sigga var líka dýrmæt í starfsmannahópnum, hún var mikill gleðigjafi og húmoristi og alltaf gleði og glaumur þar sem hún var. Það var líka mjög gott að leita til hennar, hún var með gríðarmikla reynslu af kennslu og deildi henni fúslega með öðrum, einnig var hún mjög traust og var trúnaðarmaður kennara í mörg ár. Hún var einnig vakandi yfir starfsandanum í hópnum og einhverju sinni þegar henni fannst að eitthvað þyrfti að hressa upp á hann fékk hún undirritaða í lið með sér og sendum við öllum starfsmönnum litlar gleðisprengjur. Það vissi enginn hver stóð fyrir þessu en það upplýsist hér með. Inga Sigga sýndi mikið æðruleysi í veikindum sínum og var aðdáunarvert að fylgjast með hvernig hún tók þeim. Það kom líka bersýnilega í ljós hve mikilvæg hún var okkur öllum því í kringum hana var stórt stuðningsnet fjölskyldu og vina. Við sendum eiginmanni, sonum og fjölskyldunni allri innilegar samúðarkveðjur.

Skólastjórnendur Grunnskólans á Ísafirði,

Sveinfríður Olga Veturliðadóttir.

 

Það er kominn tími til að kveðja kæra samstarfskonu okkar, hana Ingu Siggu. Það var afar þungbært þegar Inga Sigga greindist með MND um páskana 2013 og varð að hætta sem kennari eftir 24 ára starf. Missir skólans var mikill; skólastarfsins, starfsfólksins og nemendanna. Inga Sigga hóf störf við Grunnskólann á Ísafirði, sem leiðbeinandi, haustið 1989. Þá var hún nýstúdent frá öldungadeildinni í Menntaskólanum á Ísafirði. Hún lauk svo B.Ed-gráðu í fjarnámi frá KHÍ árið 1996, ásamt 5 öðrum kennurum við skólann. Síðar bætti hún við sig diplómu í kennslu yngri barna. Inga Sigga kenndi aðallega á yngsta stigi skólans og þau eru mörg börnin sem hófu skólagöngu sína undir hennar handleiðslu. Hún var góður og skemmtilegur kennari, ástsæl með eindæmum. Hún var hugmyndarík og lagði sig fram um að finna leiðir til að ná til hvers og eins og hvetja þá til dáða. Hún sýndi nemendum sínum hlýju, veitti þeim athygli og leitaðist við að koma til móts við ólíkar þarfir þeirra. Hún hafði mikla ánægju af starfi sínu og velferð nemenda hennar var henni hugleikin allt til síðasta dags. Ingu Siggu var einatt falið að sinna faglegum verkefnum innan skólans. Hún var kosin trúnaðarmaður kennara um árabil og gegndi því starfi af trúmennsku, kostgæfni og áhuga. Hún var dugleg við að upplýsa kennarana um það sem var í gangi hverju sinni og það var gott að leita til hennar þegar á bjátaði. Um tíma var hún deildarstjóri á yngsta stigi og svo fagstjóri í íslensku. Síðasta árið sem hún starfaði var hún leiðtogi skólans í Byrjendalæsi. Hún vann að þessum verkefnum af miklum dugnaði og var einstaklega lagið að hafa marga þræði á hendi og tvinna þá saman þannig að útkoman yrði á besta máta. Inga Sigga glæddi vinnustaðinn lífi. Hún var mikill húmoristi, var fljót að sjá spaugilegar hliðar á hlutunum og hafði óskaplega smitandi hlátur. Hún hafði gaman af að segja frá og klæddi frásagnir sínar í þannig búning að hlátrasköll hennar og viðmælendanna hljómuðu um sali og ganga. Það er svo margs að minnast þegar hugsað er til samstarfsins við Ingu Siggu. Hún var góður félagi bæði í leik og starfi. Hún var handlagin, mikill leikari og músíkölsk sem kom sér vel þegar tekist var á við verkefni eins og árshátíð eða aðrar uppákomur í óhefðbundnu skólastarfi. Hún var tilfinningarík og fljót að koma til aðstoðar ef einhver átti um sárt að binda. Það var gott að leita til hennar því hún var hjálpsöm, umhyggjusöm og víðsýn. Það er sárt að vita til þess að ekki er lengur hægt að dæsa og segja stundarhátt: „Æ, ég spyr bara Ingu Siggu að þessu á morgun!“. Inga Sigga var heilsteypt manneskja sem kom vel fram við alla. Hún var rösk til vinnu, mjög skipulögð og vandvirk. Hún var fljót að hugsa og finna leiðir að settu marki. Henni var svo margt til lista lagt. Kæri Gummi, synir og fjölskyldur. Við sendum ykkur okkar innilegustu samúðarkveðjur vegna fráfalls þessarar einstöku konu. Góðar minningar um hana lifa.

Fyrir hönd starfsfólks Grunnskólans á Ísafirði,

Bergljót Halldórsdóttir, Ingibjörg Karlsdóttir og Jón Heimir Hreinsson.

Sumarfrí

Þá er enn einu skólaárinu lokið og óskar starfsfólk skólans nemendum, foreldrum og velunnurum öllum gleðilegs sumars.
Upplýsingar varðandi næsta skólaár má nálgast hér.

 

Óskilamunir

Í anddyri skólans, Sundhallarmegin, liggur nú frammi mikið magn af óskilamunum. Við hvetjum foreldra og nemendur til að kíkja við og athuga hvort þeir eigi eitthvað af þessu, enda um mikil verðmæti að ræða. Skólinn verður opinn fram að mánaðamótum, en eftir það verður farið með restina í Rauða kross Íslands.

Skólaslit G.Í.

Síðastliðinn föstudag fóru fram skólaslit G.Í. í Ísafjarðarkirkju. Hefð er fyrir því að nemendur úr 9. bekk kynni dagskrána og voru kynnar að þessu sinni þau Bjarni Pétur Marel Jónasson og Guðrún Ósk Ólafsdóttir.

Sveinfríður Olga Veturliðadóttir, skólastjóri, flutti ávarp og Ólöf Dagmar Guðmundsdóttir flutti ávarp fyrir hönd útskriftarnema. 10. bekkur bauð upp á tónlistaratriði, þar sem Karolína Júlía Edwardsdóttir og Hilda María Sigurðardóttir léku á píanó. 

 

Eftirtaldar viðurkenningar voru veittar fyrir góðan námsárangur. 

8. bekkur:

Oddrún Eva Kristjánsdóttir hlaut viðurkenningu Rotary klúbbsins á Ísafirði fyrir ástundun og framfarir. 

 

9. bekkur:

Bjarni Pétur Marel Jónasson hlaut viðurkenningu Rotary klúbbsins á Ísafirði fyrir ástundun og framfarir.

 

Í vetur luku 10 nemendur í 10. bekk smáskipaprófi sem er bóklegi hlutinn fyrir skipstjórnarréttindi á skip sem eru styttri en 12 metrar. Þetta er annað árið sem skólinn er í samstarfi við Fræðslumiðstöð Vestfjarða um kennslu í þessari valgrein en margra ára hefð er fyrir henni við Grunnskólann á Ísafirði.  Nemendur sem luku prófi eru:

Elías Ari Guðjónsson, Hákon Ernir Hrafnsson, Hjörtur Ísak Helgason, Hreinn Róbert Jónsson, Ísak Rúnar Ólafsson, Jón Stefánsson, Katrín Ósk Einarsdóttir, Pétur Tryggvi Pétursson, Sigurður Arnar Hannesson og Sævar Hrafn Jóhannsson.  

 

Eftirtaldar viðurkenningar voru veittar í 10. bekk:

Kvenfélagið Hlíf gaf eftirfarandi viðurkenningar fyrir verk- og listgreinar:

Viðurkenningu fyrir ástundun, framfarir, áræðni, drift og jákvæðni í leiklist hlaut Arndís Þórðardóttir.

Viðurkenningu fyrir framfarir og vinnubrögð í tæknimennt hlaut Elías Ari Guðjónsson.

Viðurkenningu fyrir framfarir og skapandi vinnubrögð í myndmennt hlaut Guðný Birna Sigurðardóttir.

Viðurkenningu fyrir miklar  framfarir, þrautseigju og vinnusemi í heimilisfræði hlaut Gunnar Þór Valdimarsson.

Ólöf Dagmar Guðmundsdóttir hlaut viðurkenningu Rotary klúbbsins á Ísafirði fyrir ástundun og framfarir.

 

Stúdíó Dan og Hafnarbúðin gáfu viðurkenningar fyrir góða ástundun og námsárangur í íþróttum. Þau verðlaun hlutu Guðný Birna Sigurðardóttir og Sigurður Arnar Hannesson.

Danska Menntamálaráðuneytið gaf viðurkenningu fyrir góða ástundun og námsárangur í dönsku og hlaut Karolina Júlía Edwardsdóttir þau verðlaun.

Grunnskólinn á Ísafirði veitti eftirfarandi viðurkenningar:

Viðurkenningu fyrir framúrskarandi störf í tækniráði hlaut Jón Stefánsson. 

Viðurkenningu fyrir góða ástundun og námsárangur í íslensku hlaut Hekla Hallgrímsdóttir.

Viðurkenningu fyrir góða ástundun og námsárangur í stærðfræði hlaut Sigurður Arnar Hannesson.

 

Tveir nemendur hlutu viðurkenningar fyrir góða ástundun og námsárangur í samfélagsfræði, þau Hákon Ernir Hrafnsson og Karolina Júlía Edwardsdóttir.

Viðurkenningu fyrir góða ástundun og námsárangur í ensku hlaut Unnur Eyrún Kristjánsdóttir.

Viðurkenningu fyrir góða ástundun og námsárangur í náttúrufræði hlaut Sigurður Arnar Hannesson.

 

Ísfirðingarfélagið í Reykjavík gaf peningagjöf til minningar um Hannibal Valdimarsson.  Þessi viðurkenning er veitt nemanda í 10. bekk  fyrir lofsverða ástundun, framfarir í námi og virka þátttöku í félagsstarfi.   Í ár skiptu tveir nemendur með sér verðlaununum þau Hákon Ernir Hrafnsson og Arndís Þórðardóttir.

 

Viðurkenningu fyrir hæstu meðaleinkunn vorið 2015 hlaut Hákon Ernir Hrafnsson.

  

Starfsfólk Grunnskólans á Ísafirði þakkar árgangi 1999 samfylgdina í gegnum árin og óskar þeim velfarnaðar í framtíðinni.